16th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

16.3.2015

*BENGALURU AH IAS OFFICER INAWKHLUM A HMUH A NI
Zanin tlai dar 6 vel khan IAS officer 2009 Batch DK Ravikumar chu an in Tavarekere, South Bengaluru ah ceiling fan a inawkhlum a hmuh a ni. Amah hi State Commercial Taxes Deparment a Joint Commissioner ni lai a ni. Amah hi Kolar district a deputy commissioner a nih lai a land and sand mafia te thil tih diklo lailang tu anih avangin a thihdan hian rinhlelh a hlawh hle.

*Kumin chhungin India ramah swine flu vangin mi 1731 an boral tawh. Tun hnai ah mi 21 in he natna avang hian nunna an chan leh a ni.

*VANAPA LIM SIAMTU IN SOLO EXHIBITION NEI DAWN
Mizo zing a MFA (Sculpture) zir chhuak hmasaber James Khamliansawma, Zuangtui chuan ama pual a vawi khatna atan 18-20 March hian Vanapa Hall, Aizawl ah Solo Exhibition Sculpture a nei dawn. Milim leh thil lem ker lam a tuimi te tan tlawh ngei ngei chi a ni e.

Poster of Mizo sculpture James Khamliansawma's 1st Solo Exhibition Sculpture in Aizawl

*REVD.CHUAUTHUAMA'N ZU DO
Vawiin MLPC Act hnuai a dan ang tak a zu zawrh ni hmasaber ah hian Revd.Chuauthuama chuan a in kawtah zu zawrh a duhloh zia lantir nan puandum a zar a, zu that loh zia point 12 ziak chhuakin chu chu flex a print chhuak in chhiar theih in a tarlang tel bawk.
Pix: Tekawka

Revd.Chuauthuama display black flag at his residence in Aizawl to oppose MLPC Act in Mizoram. It was the first day of selling liquor legally in Aizawl
Pix: Tekawka

*ZU DAWR HAWN PHALLO
Ni 14.3.2015 (Inrinni) khan Chaltlang
North (Lily veng) chhunga industry department buildinga Sorkar- in zu zawrhna dawr siam an tum chu duh lovin, Presbyterian Kohhran hmalaknain vengchhunga kohhran hrang hrang leh NGO's pawl hrang hrang in hmu khawm chuan joint action committee an din a. Kalkhawmte chuan Chaltlang North (Lily veng) vengchhunga zu zawrhna dawr awm tur hi tha a ti lo hle mai a, zu dawr a awm lohnan a tawp thlengin hmalak an tum.

Source: Prince Alex Sanga

*BIAK IN SAK LAI TICHHIA IN KRAWS AIAH HANUMAN-A LIM AN LO DAH
Nimin khan Haryana a Kaimiri khua a Kristian Biak in saklai chu mi tu tih hriatloh ten tichhia in Kraws awmna ah Hanumana lim an lo dah. Williwarsh church a Father Subhash Chand chuan mi 14 te lakah FIR a thehlut a ni. Biak in sak lai suasam tute hian Hindu Pathian Rama hming inziahna flag pawh an lo tar a ni. Father Subhash Chand a FIR thehluh a a landan chuan misual te hian biak in a mi cooler leh sakhaw biakna hmanraw pawimawh te pawh an ru bo a ni. Christian Front Haryana te chuan he thil thleng hi an dem thu an tarlang.

Haryana state ah hian vawiin ah Assembly ah bawng talh khapna dan khauh zawk pass an tum a, bawng talh leh bawngsa kawl/hralh/lei te chu kum 10 chhung lung in tan tir theihna dan siam an tum a ni. Kan lo hriat atan Haryana state ah hian BJP an sorkar mek a ni.
‪#‎ChurchAttack‬

*MIFCO ZU DAWR TUR
Dawrpui canteen kuala MIFCO Zu dawr vawiin March 16,2015 a hawn tur a ni.

MIFCO wine shop - One of the first Aizawl liquor shops after MLPC Act enacted
Pix: Lalhmachhuana Tochhawnga via DINGDI Group in Facebook

 
*PAKISTAN BIAK IN 2 AH BOMB PUAK
Nimin khan Pakistan a Lahore khawpui chhung a Kristian Biak in 2 St John's Catholic Church leh Christ Church gate bulah bomb a puah ve ve avangin mi 14 chuang in nunna an chan. Biak in 2 gate bula bomb puak avang hian mi 70 chuang in hliam an tuar a ni. Pakistan Taliban pawl Jamatul Ahrar te chuan bomb hi an tihpuah niin an sawi. Bomb tipuak tute hian Pathianni a Kristian te mass service nei lai tihbuai an tum ber niin a lang. Mipui thinrim in bomb tiphuahna a inhnamhnawih ni a an hriat mi 2 an sawisa hlum ve a ni.

PIX: BBC
‪#‎ChurchAttack‬ ‪#‎Lahore‬

15th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

15.3.2015

*BMCF 2015-16 HRUAITU THAR TE
Bangalore Mizo Christian Fellowship chuan vawiin 15.3.2015 khan hruaitu thar an thlang a, an mi thlan chhuah te chu:az
President:Dr HT Sangliana
Vice-President :Rev Dr F Hrangkhuma
Secretary : Pu Josiah Ralte
Asst Secretary :Rev Lalrohlua Pachuau
Financial Secretary: Pu Laldinfela Pachuau
Asst Financial Secretary:Nl Zaithanmawii
 
*#‎EPL‬ RESULT (SATURDAY)
West Brom 1-0 Stoke
Leicester 0-0 Hull
Arsenal 3-0 West Ham
Burnley 1-0 Manchester City

#EPL FIXTURE (SUNDAY)
7 PM: Chelsea vs Southampton
9:30 PM: Manchester United vs Tottenham

*SMTC IN LAY LEADER TRAINING HMANG ZO
Synod Multipurpose Training Centre (SMTC) buatsaih Lay Leader Training Vawi 184-na chu March 9-13, 2015 chhung khan Synod Conference Centre, Aizawl-ah neih a ni a, he training-ah hian Mizoram hmun hrang hrang atangin mi 34 an kal a, Myanmar atangin mi 4 an tel bawk a, an vaiin mi 38 an ni a. Trainees te chuan he training hi hlawk thlak an ti hle. (Synfo)

*TAWIPUI BIAL BKHP INKHAWMPUI
Tawipui Pastor bial BKHP chuan March 14-15, 2015 hian Tawipui South Biak inah an bial BKHP Golden Jubilee denchhenin Tawipui South Biak inah inkhawmpui an nei mek a, speaker atan FOD Director, Rev.KV. Thanga an hmang a ni.

Source: www.mizobaptist.org

*Pastor Bial thar hawng dawn
Kar hmasa maia tiak ta Assembly-a thurel pakhat Republic Bial atanga indang tura ruahmanna pawmpui tak Republic Vengthlang Pastor Bial chu vawiin Pathiani, March 15 2015 khian hawn a ni dawn. Hawnna inkhawm hi Republic Vengthlang Biak inah neih a ni ang a; tuna bialtu pastor, Rev. L. Vanlalsanga’n inkhawm kaihruaiin BCM President, Rev.C. Ngurhnema’n bial thar hawngin thuchah a sawi nghal ang.

Republic Vengthlang pastor bialah hian bialtu pastor atan tuna Rahsiveng bialtu pastor, Rev. Lalremsiama Ralte chu a awm nghal dawn a, Aizawl West ABC-ah an awm dawn a ni. Tihian Republic bialah Kohhran 5- Central Church, City Church, Bethel, Falkawn leh Aibawk te an awm ang a, member 1705 an ni ang. Republic Vengthlang bialah hian Kohhran 5 bawk awmin Republic Vengthlang, Venghlui, Bethlehem, ITI leh Mualpui te an awm ang a, member 1399 an ni ang.

Source: www.mizobaptist.org

*CONVENT SCHOOL AH NUN PAWNGSUAL RAWN
Zirtawpni zan zanlai ah khan Begopara, West Bengal a Jesus and Mary Convent School ah Nun (Sakhaw rawngbawl tur a hmeichhe inpumpe) pakhat kum 71 a upa chu misual 3/4 ten luhchilh in an pawngsual rawn. Vanduaina tawk Nun hian a taksa ah hiam tuar in Kolkata a damdawiin ah enkawl mek a ni. West Bengal chief minister Mamata Banerjee chuan he thil thleng hi a dem thu a sawi a, chhuichiang turin CID te thu a pek tawh thu a sawi bawk.

*CHANCHIN THA THLEN NI HMANG DAWN
Vawiin hian Mizoram Presbyterian kohhran te chuan 'Chanchin tha thlen ni' an hmang dawn. Thupui pahnih Chawhnu inkhawm ah "Kei heta hi ka awm, mi tir ta che" (Is.6;6-10) leh Zan inkhawm ah "Tuar huama Chanchin tha hril" (Tirh 20:23,24; 21:13) te ngaihthlak a ni ang. Rev. William Williams chuan March ni 15, 1891 (Pathianni)-ah Kutbûl lui kaia Mizote hnênah Pathian thu a hrilh tih hriat chian a nih hnuin kum 2012 Synod-ah hemi ni hi Mizorama Chanchin tha thlen ni a hman rawtna a lût a. Synod Inkhâwmpui chuan a remti a (Synod 2012:22). Tichuan, kum 2014 atangin Mizorama Chanchin tha Thlen Ni hi March ni 15-a hman a ni ta a ni. (Synfo)
Pix: Remlala Chhehlawn

The first missionary in the then Lushai Hills (Mizoram) Rev.Williams Williams memorial monument at Kutbul lui, Near Kawnpui, Mizoram.
Pix: Remlala Chhehlawn

14th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

14.3.2015

*MIZO CELEB MAMI VARTE IN PASAL NEI DAWN TA
Mizo hmeichhe zaithiam lar Mami Varte (Lalrinkimi Varte) chuan tunkar lo awm tur Zirptawni March 20, 2015 Chawhnu Dar 1:00 ah Kanan Veng Presbyterian Kohhran, Aizawl-ah Zoramchhana, Kanan Veng chu "tiam tlat e"a tihpui dawn ta. Mami Varte hian thian atan a naupanlai atanga a lo kawm tawh Mary Lalrinpuii, Zarkawt chu a hmang a, a pasal tur Zoramchhana pawhin naupan lai atanga a thiantha Zorammawia chu thian ah a hmang ve bawk ang.

‪#‎MamiVarte‬

Mizoram Celeb artist Mami Varte will be getting married with her longtime fiance Zoramchhana on 20th March 2015 at Kanan Veng Presbyterian Church, Aizawl, Mizoram.

*LAMTLUANG WEEKEND SPECIAL (MIZO FIAMTHU)
An YMA hnatlang pawh kha an han pachhe khawp a. 2 lek kha an chhuak a. Pakhat zawk khan "Hnatlan hi chuan a zelthel tawk hi a awm loh theih loh a" a la tihsan zui..

*BHU ADMISSION HAWN A NI
Kum 2015-16 academic session chhung atana Banaras Hindu University (BHU), Varanasi a Under Graduate, Post Graduate leh Diploma/Certificate course zir duh tan entrance test form a ngaihven theih ta e. Online application hi 12.3.2015-8.4.2015 chhungin university website www.bhuonline.in ah ngaihven theih a ni. Phaia lehkhazir tum tam admission ngaihven hun lai a ni e.

*ATHLAWN IN THISEN PE
Sialsuk Pastor bial KTP te chuan vawiin khan Synod hospital, Durtlang a hman turin a thlawn in thisen unit 66 an pe. Athlawn a thisen petute hi mipa 60 leh hmeichhia 6 anni. Synod hospital thawktute hian Pastor bial thuthmun Sialsuk ah va kal chilh in thisen te hi an lakhawm a ni.

‪#‎bloodDonation‬

*SENTEFIANG AH IN KANG
Nimin chawhma dar 10:30 vel khan Sangau atanga Km 3 vela hla Sentetfiang khua ah Pu Dawtchhunga in a kang a, Bungrua tam zawk an chuh hman a, Pu Dawtchunga in hi rap in a ni a, Vawk 3 a kang hlum bawk. He kang mei hi Lo hal na a tang a chhuak tan ni a sawi a ni.

*MARCH NI 16 ATANGIN ZU ZUAR TAN DAWN
Mizoram sorkar chuan karleh Thawhtanni March ni 16 atangin MLPC Act in a phal angin a mamawh te tan zu a zuar tan dawn. Sorkar in zu lei phalna card a pekchhuah neitu te tan zu hi zawrh a ni ang.

*AH & VETY DEPARTMENT HNUAIA NLUP HMALAKNA DOCUMENTARY FILM
NLUP Media Cell, I & PR/NIB ten an buatsaih documentary Film, 'AH & Vety department hnuaia NLUP hmalakna' chu LPS Vision ah ni 14.3.2015 zan dar 9:00 vel ah tih chhuah a ni dawn. (DIPR)

*BUS ACCIDENT
Nimin chhun khan Nagaland a Phek khawpui a Lanyie junction ah Nagaland State Transport Bus a chesual a mi 13 in nunna an chan a, mi 19 in hliam an tuar. Hliam tuar te hi Civil Hospital, Phek ah enkawl mek anni. Bus chetsual chhan hi hriat theih ala ni lo.

12th & 13th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

13.3.2015

*SANTOSH TROPHY SEMI FINAL
Mizoram 9-10 Punjab (Penalty shoot)

*LYUVA KHUTLA SAIHA-AH ROPUI TAKA HMAN A NI
Vawiin chawhma dar 10:30 atang khan Art & Culture Department, MADC bul tumin Saiha District Playground-ah Mara te KUT ngaihlut ber LYUVA KHUTLA-2015 chu ropui taka lawm a ni. He Kut hmanna-ah hian Dr.K.Beichhua, MLA Saiha Bialtu chu Khuallian a ni.

Vawiin Lyuva Khutla lawmna-ah thu sawiin Dr.K.Beichhua chuan hmanlai hnam zia leh rang vawnghim thiam leh phochhuak thiam ram leh hnam te hi hnam changkang leh ram ropui zia a ni a. Lyuva Khutla kan lawm dan leh Saiha mipuiin kan ngaihlut dan ka hmu hian min ti lawm hle a ni; a ti.

Lyuva Khutla lawmna-ah hian Mara hnam lam hrang hrang, Sawlakia, Zawchhy La,Hlichhy La, Pakhupi 0-do La, Azao la, Rakha tla, Bei La, Athih La, Khocheino La , Awkhypa La etc. te chu Saiha khawchhung leh khaw pawn a MTP Branch hrang hrang ten an entir a. Saiha Group YMA ten Khuallam an entir bakah YLA Sub Hqrs ten Chawnglaizawn lam an entir ve thung bawk a ni. Lyuva Khutla Miss (Chhivaw) leh Mister (Khydi) thlanna te neih nghal a ni a. M.CH.P (Mara Chano py) ten Costume Parade an entir a, School hrang hranga zirlai naupang ten pawnto hnunawm tak an entir bawk.

Vawiin KUT hmanna-a lawmman hrang hrang an siam te semna hun hi Pu R. Zarzosanga, District Bawrhsap in a hman hnua he Kut hi khar a ni. (DIPR)

Lyuva Khutla Festival in Saiha Town, Mizoram
Pix: DIPR

*AIZAWL BEAUTIFICATION MEMBER THAR TE
Mizoram sorkar chuan Aizawl Beautification member atan heng a hnuai ami te hi a ruat thar.

1) SP Traffic, Aizawl ; 2) Director, UD & PA ; 3) President Local Council Association ; Representative of Central Young Mizo Association. (DIPR)

*KAWNPUI-AH HOCKEY TOURNAMENT NEIH A NI DAWN
March ni 17 - 20, 2015 chhungin Boys Hockey Academy, Kawnpuiah Mizoram Hockey Association chuan tournament danglam tak buatsaih a tum.

He tournament-ah hian MHA hnuaia team tha zual 4 (super 4) chauh an inel dawn a, Mizoram Hockey Association chuan kum 2015-a ram pum huap inelna, National Championship hrang hrang awm turah team tha tak tirh a tum a, chumi atana inpuahchahnaah he tournament hi a hmang nghal dawn a ni.

Pu Hmingdailova Khiangte, President MHA leh Parliamentary Secretary, Sports etc. ni bawk chuan Senior level-ah kan la che tha vak thei lo chungin, inbuatsaihna tha tak kan neih phawt chuan sang tak pawh kan thleng thei. Ruahmanna fel leh tha kan neih hmasak a ngai a, National level-ah hniam tak atanga bul tan kan hreh lova, hma kan sawn theihna tur a nih chuan theihtawp kan chhuah zel dawn a ni. Junior leh Sub-Junior level-ah kan lan hmasak phawt a ngai a, rahbi thar rapa hmasawn chho zel turin ruahmanna kan siam a ni. Mizoram mipui beisei tihhlawhtlin hi kan chak takzet zet a ni a ti.

*HOME MINISTER IN CHAPCHAR KUT MISS LAWMPUINA HLAN
Nimin chawhnu khan Diktawn Monthly Magazine chuan Miss Chapchar Kut 2015 lawmman semna inkhawm Zonet Studio-ah a nei a. He hunah hian Home Minister Pu R. Lalzirliana chu khuallian niin Chairperson, Mizoram Women Commission Vanlalawmpuii Chawngthu MLA chu khualzahawm a ni.

Home Minister Pu R. Lalzirliana chuan Miss Chapchar Kut 2015 leh Runner Up te chu lawmman hlanin Miss Chapchar Kut chu a mimal tak pawha a hlut thu sawiin Mizo hmeichhe hmel tha tak tak te pholanna leh chawikanna a nih avangin tih zel tlakah pawh a ngaih thu a sawi a.

Miss Chapchar Kut 2015 te lawmman dawn dan chu hetiang hi a ni. Miss Chapchar Kut 2015 H. Vanlalhlimpuii Ramhlun North hian a thlangtu Diktawn Monthly Magazine atangin sumfai Rs. 10,000 a dawn bakah Photo Album Rs. 5,000 man hu, Photo Frame Rs. 1,500 man hu, Citation leh lehkhabu tha tak tak a dawng a, kumin chhung thla tin Rs. 1,000 a dawng ziah bawk ang. Samsung 3 : 16 Plan Solution atangin Washing Machine Kg. 6.2 a dawng bawk.

1st Runner Up - Brenda Laldampuii Chhinga Veng, 2nd Runner Up - Nethel Zodinpuii Chhinga Veng, 3rd Runner Up - Zoremmawii Ralte Tanhril, K. Lalremruati Upper Republic, leh Christina Lalmuanzuali Ramhlun South te'n Diktawn Monthly Magazine atangin Rs. 2,000 theuh bakah Citation leh lehkhabu tha tak tak an dawng a, Samsung 3 : 16 Plan Solution atangin Samsung Smartphone an dawng vek bawk. (DIPR)

Miss Chapchar Kut 2015 winners and R.Lalzirliana, Home Minister, Mizoram
Pix: DIPR

12.3.2015
*ZU PERMIT LAK AWLSAM DAN
Mizoram Excise Dept. chuan awlsam zawkin Zu leitheihna tur permit lak dan tur ruahmanna a siam.Challan siama State Bank of India a cheng 520/- deposit ngai tawh loh khan dilna form pangngai thehlutte kha an Zu lei theihna tur card kha cheng 520/- in an khul tawh tawh dawn a ni.

 

*KHAWLAILUNG IN KURTAI KUT HMANG

Khawlailung Sugarcane Growers’ Association (Fu chingtute) buatsaih Khawlailung khaw pum huap “Kurtai Kut” chu nimin nileng khan Khawlailung Bazar kawnah hman a ni a, Agriculture MinisterPu R. Lalzirliana chu “Kut Pa” niin Bialtu MLA Pi Vanlalawmpuii Chawngthu chu “Kut Nu” atan hman a ni a, District bawrhsap Pi Juhi Mukherjee, IAS, Superintendent of Police Pu Romil Baaniya, IPS, DRDA Project Director Pi Teresy Vanlalhruaii, MCS bakah mipawimawh tam takin he Kut hi an chhim a ni.

Kurtai Kut lawmna inkhawm buatsaihah “Kut Pa” Pu R. Lalzirliana chuan thu sawiin Sawrkarin Kuthnathawktute a dah pawimawh bera an hamthatna tur kawng hrang hranga dapin hma a la chhunzawm reng a ni a ti a, Khawlailung Sugar Growers’ Association ten Sugar Mills/Winery an mamawh thu leh Sawrkarin kawng dap pui se an duh thu an lo thlen chu chhangin MLPC Act hman anih takah hetiang atan hian kawng a inhawng tan a, tun dinhmunah erawh sum dinhmun a harsat rih avangin Sawrkar tan tanpuina inpek a harsa rih a, nasa lehzuala Fu an chin a Fu chingtu pawh an pung zel anih chuan kawng a inhawn veleh ngaihpawimawh hmasak an nih ngei tur thu a sawi bawk a ni. MLPC Act chungchang sawi chhunzawmin kum 17 zet Zu khap bur ani chungin khawtin leh veng tin deuhthaw ah Zu zuar an awm a, Dan pawisalo tute lahin nawmchenna atan an hmang mai mai a, zu thalo a tam phahin mirethei zawk Dan in a khap beh si te lahin zu chhia an in nasa in an thih phah nasa em em a, hetiang hi kan nih kumkhua dawn avangin leh zu in lo theilo an tam bawk si avangin zu thianghlim leh zu tha zawk an hmuh theih nan Dan hnuaiah khauh taka hralh Sawrkarin a tha a ti a, ruahmanna tha tak a siam ta a ni a ti a, kan nihna dik tak hi lan mawi duh vanga thup a tha lova, hmaithing kawr vuah chunga Kristian nih ai chuan a taka Kristian kan nihna kan lan tir ngam a tul tawh zawk a, Zu permit neih hi ruihbuai phalna ani tel lo mai nilovin ruibuai chu man tur an nih bakah awlsam taka Bail mai mai theih an ni tawh dawn lova, an phu ang tawk hremna an tawrh ngei ngei a ngai tawh dawn a ni a ti a, MLPC Act chuan milian leh mite a thliar dawnloh thu a sawi bawk a ni.

Agriculture Minister chuan Kuthnathawktute hamthatna tura Sawrkarin ruahmanna a siam chi hrang hrang hrangte tarlangin Custom Hiring Centre, loneitu telkhawm (farming society) hnenah leilehna hmanraw chi hrang hrang (Tractor + Trailer, Rotavator, Paddy Weeder leh Paddy Reaper) te man tlawm zawka mimalin an hire theih nan a man atanga 95% tumsak an nih tur thu a sawi a, Farming Society te hian 5% an tum ve a ngai dawn thung a ni. Hetiang Centre hi kum kalta khan 7 din a ni a, kumin hian Centre 40 din thar tum a ni a ti bawk. Heng bakah hian loneitute hman tur khawl chi hrang hrang subsidy a Sawrkarin a pek theih te a sawi lang bawk a ni.

Fu chingtute dawm kanna tur bik ruahmanna pawh siam anih thu sawiin Pu Zira chuan kum 2014-15 atang hian RKVY hnuaiah ruahmanna thar tha tak tak siam a ni a, Fu chin dan thar enchhinna siam niin he programme hmang hian Fu mit pakhat chauh nei leh mit 2/mit 3 nei karthlaka chin a ni dawn a, Hectare 1 zelah Rs. 8,000/- tanpuina pek an ni bawk ang a ti a, Fu chi tha bik tihpunna tur Nursery siam a, Fu chingtute hnena semchhuah anih tur thu te leh Training mumal leh changtlung lehzual buatsaih anih tur thu a sawi bawk a ni.

Pu Zira hian Khawlailunga Roadside Market sakna tur work order (Rs. Nuai 10) chu Kurtai Kut Organising Committee Chairman hnenah a hlan a, tangkafai Rs. 20,000/- an thawhrimna rah lawmna Kut lawmpuinan a hlan tel bawk a ni.

 

“Kut Nu”, bialtu MLA ni bawk Pi Vanlalawmpuii Chawngthu pawhin thu sawiin a bial a rawn ngaihsak avangin “Kut Pa”, Agriculture Minister ni bawk Pu R. Lalzirliana hnenah lawmthu a sawi a, Fu chingtute thawhrimna rah seng tur a awm chu lawmawm a tih thu sawiin an zinga chhungkaw engemawzat NLUP tanpuina dawng an awm tel chuan NLUP hlawhtlinna pawh a tarlang tel a ni tiin lawmthu a sawi bawk a ni. Pi Awmpuii chuan loneitute chu an tana Sawrkarin hamthatna a siam te chang ve tura an beihna kawngah theihtawp a chhuahpui tur thu a sawi bawk.

Khawlailung hi In 515 khua an ni a, an zinga In 150 chuang zetin Fu an ching a, kum kalta 2014 khan Fu atanga siam Kurtai hi Quintal 2250 vel tharchhuakin Rs. 1,12,50,000 /- an thar chhuak a, kuminah hian hei aia tam hi tharchhuah an inbeisei bawk a ni. Kum 1938 vel atang khan Khawlailungah hian Fu an lo ching tan tawh a, kum 2007 ah Fu chingtu pawl (Sugarcane Growers’ Association) din a ni a tun thlengin kum 100 dawn lai Fu an lo ching tawh a ni. NLUP kalpui mekah pawh Khawlailung atang chhungkaw engemawzatin Sugarcane/Fu Trade thlangin 100% hlawhtlinna an hmuh thu Sugarcane Growers’ Association hotuten an sawi a, Khawlailung ramah Fu a that duh bik zia leh Sugar Mill emaw Winery emaw pawh sawrkarin a ruahman sak thei anih phawt chuan Khawlailung mai bakah an khaw thenawmte pawhin Fu an ching duh vek hiala an rin thu an sawi bawk a ni.

Nimin Kurtai Kut lawmna inkhawm hi Pu Lalchangliana Ralte, Kurtai Kut Organising Committee Chairman in a kaihruai a, Khawlailung khawchhuak mi 20 hnenah chawimawina thuziak hlan a ni a, tlaiah khawtlang huapin ruai ropui tak theh a ni. (DIPR)

Mizoram Home Minister R.Lalzirliana inaugurate Sugarcane (Kurtai) Festival at Khawlailung Village, Mizoram
Pix: DIPR

*IMPHAL BAZAR AH BOMB PUAK
Nizan dar 6 vel khan Imphal a Khwairamband Bazaar ah IED bomb puak avangin mi 3 in nunna an chan a, mi 23 chuang in hliam an tuar. Hliam tuar te hi RIIMS hospital ah enkawl mek anni. Bomb tipuak tute hi tute nge annih hriat an la nilo.

‪#‎imphal‬