9th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

9.3.2015

*KOHHRAN HMEICHHE INKHAWMPUI LIAN TIAK TA
Mizoram Presbytrian Kohhran Hmeichhe Inkhawmpui Lian vawi 46-na, Mamit khelmuala March 6, 2015 zana ṭan chu nizan khan a ṭiak. Inkhawmpuiah hian social network hman dan ṭha inzirtirna leh mihring hmanga sumdawnna chungchangah ram pum huama inzirtirna neih an rel a ni.

Hmeichhe inkhawmpuiah hian Inrinni khan rorel inkhawm neih a ni a, rorel palai 459 leh chhimtu mi 126 an tel. Kum 2017 inkhawmpuina atan Serchhip an thlang a; kum 2015-2016 budget atan Rs. 52,00,000 an pawm.

An thurel zingah - human trafficking chungchangah ram pum huapa inzirtirna neih te; mi dangte nena inkarah rilru thianghlim, ṭawngkam mawi leh hawihhâwm hman inzirtirna neih te, ram pum huap ṭawngṭai tlaivar neih chhunzawm te, hmeichhe inkhawm vawi khat thawhlawm Synod Hospital-a blood donation khum leina atana pek te, social network hman dan ṭha inzirtirna te, Mizorama tualthahna rapthlak thleng ṭhin a reh theih nan leh sual thupha chawina ṭawngṭai neihte a tel.
Inrinni vek khan Central Kohhran Hmeichhe hruaitu turte an thlang a, vice chairman-ah K Vanlallawmi, Ramhlun bial; assistant secretary-ah Sailuti, Mission Veng bial; treasurer-ah Maria Lalchhanhimi, Khatla bial; finance secretary-ah Rallianthangi, ITI Veng bial. Chairman leh secretary erawh chu Synod-in a ruat a ni.

Presbyterian Kohhran Hmeichhiaah hian member 1,65,038 an awm a; member tamna ber bial - Bethlehem bialah mi 3,182 an awm. Ni tin chhung inkhawm nei thei zat chu 63,667 (61.59%) a ni a, buhfaiṭham ṭham ziah chhungkua 101,479 (98.05%) an ni. Bial 144-in missionary 414 leh a chanve an châwm mek a; bial 44-in Hmangaihna Ina naute 98 an châwm. Kristian chhungkua dinhmun tehnaah kum 2014 chhunga ti ṭha ber chu NE Khawdungsei an ni a, Dawrpui leh Tlangnuam ten an dawt.

Hmeichhe Inkhawmpui Lianah hian Inrini zan thleng khan mikhual riak lut mi 8,163 leh lehlánga kal mi 1,500 vel an awm a ni.
Source: www.vanglaini.org

Mizoram Kohhran Hmeichhe Inkhawmpui Lian, Mamit
(Mizoram Presbyterian Women Fellowship General Conference at Mamit Playgound)
Pix: Lachua Palian

*CENTRAL KOHHRAN HMEICHHE HRUAITU THLAN THARTE :
Chairman : Pi Rinchawii, Khatla (Khatla bial) (Synod ruat)
Vice Chairman : Pi K. Vanlallawmi, Ramhlun bial
Gen. Secretary : Pi H. Lalpianthangi (Synod ruat)
Asst. Secretary : Pi Sailuti, Thakthing veng (Mission veng bial)
Treasurer : Pi Maria Lalchhanhimi, Khatla bial
Fin. Secretary : Pi Rallianthangi, ITI Veng bial

COMMITTEE MEMBERS
1. Pi B. Zomawithangi Airfield Vengthar
2. Pi C. Romawii Bawngkawn
3. Pi Lalsiammawii Bungkawn
4. Pi Lalbiaki Chanmari
5. Pi C. Zopari Chanmari West
6. Pi R. Rengkhumi Chawnpui
7. Pi Tlangmawii Chhinga Veng
8. Pi Lalhmingmawii Sailo Durtlang
9. Pi Zothanpari Hlimen
10. Pi P.C. Nuzawni Luangmawl
11. Pi Lalpianthangi Maubawk
12. Pi Lalbiakengi Ramhlun Vengthar
13. Pi Lalfeli Republic
14. Pi C. Chawngpuii Thuampui
15. Pi Vanrammawii Tuikual
16. Pi Lalrokimi Venghlui

17. Pi C. Thanthuami Armed Veng
18. Pi Zopari Vaivakawn
19. Pi B. Bualchhumi Bethlehem
20. Pi Denghmingthangi Chaltlang
21. Pi Lalrinpuii Dawrpui
22. Pi Liansangi Dawrpui Vengthar
23. Pi Lalnuntluangi Electric Veng
24. Pi Lalhmingthangi Hunthar
25. Pi Lalnunsiami Kulikawn
26. Pi Lalhliapi Leitan
27. Pi Sangthuami Lungleng I
28. Pi Lalbiakhnaihi Mission Vengthlang
29. Pi Lalbiakhluni Ramhlun North
30. Pi P.C. Lalhmangaihi Ramthar Veng
31. Pi Vanlalpari Sihphir
32. Pi C. Nuntluangi Sihphir Vengthar
33. Pi Lalduhthangi Tanhril
34. Pi Rothangliani Tlangnuam
35. Pi Vanlalnghaki Venghnuai
36. Pi Lalmuanzuali Zemabawk
37. Pi Sawithangi Zemabawk North
38. Pi Lalbiaksangi Zonuam
39. Pi Lalfakmawii Co-ordinator
40. Pi C. Lalhmangaihi Ex-Chairman

Source: Lachua Paliana via Mamit District News Group

Mizoram Presbyterian Kohhran Hmeichhe Hruaitu thar te
(New Office Bearers of Mizoram Presbyterian Women Fellowship)

*TAIWAN RAM PALAI IN CHANCHINBUMITE KAWM
Republic of China (Taiwan) palai Representative Amb. Chung Kwang Tien leh Taipei Economic and Cultural Center In India a hotu pahnih te chuan 7.3.2015 khan State Guest House ah tualchhung thuthar thehdarhtu te an kawm.

Chanchinbumite kawmin Amb. Chung Kwang Tien chuan Republic of China (Taiwan) chu Mizoram ang thova tlangram a nih thu te, loneih atanga thilsiamna, a bik takin technology kawnga khawvel hriat an hlawh chhoh dan chanchin te, ram te reuhte nimahsela khawvel economy lian tehna kawnga 18-na an nih thu te sawiin Mizorama Chapchar Kut chhim tura amah leh a hote Sawrkarin an sawmnaah lawmthu a sawi a. Tunhmain an ramah loneimi za zela 60 ni thin chu tunah za zelah 5 an nih thu te sawiin tlangram loneih dan kawnga an tawnhriatte Mizoramin a chhawr theihna awm thei te dappui turin loneih lama thiamna sang nei Taiwan mi pahnih chuan March thla laihawl velah Mizoram an rawn tlawh dawn a ni, a ti a. Mau hmanga thilsiamna kawngah Taiwan chu hmahruaitu anih thu sawiin hemi lama Mizo themthiamte leh hetiang lama tui mite chu Taiwan tlawha heng te hi rawn en turin a sawm a. Taiwan Sawrkar in India mite tan zirna kawnga Scholarship a pek thin chu Mizo zirlai pawhin dil ve thin se a ti a, hemi bakah hian Mizoram University chuan Chinese tawng Mandarin zirna kawnga hma an lak duh phawt chuan kawng a awm thei dawn nia a hriat thu te a sawi.

8th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

8.3.2015

*OUTLOOK EDITOR LAR BORAL
India ram chanchinbu lar Outlook founder Editor Vinod Mehtha (73) chu tukin khan All India Institute of Medical Sciences (AIIMS), Delhi-ah mutiple organ failure avangin a boral. Amah hi Outlook editorial chairman ni mek a ni.

*BCM ASSEMBLY AH PALAI BORAL THUT/ROREL THU PASSED LANGSAR ZUAL
Mizoram Baptist Kohhran rorelna sangber BCM Assembly vawi 119-na chu Lunglei Farm Veng Biak In a neih mek a ni a, tukin dar 3 vel khan inkhawmpui palai Upa Mangduna (76) Saiha Tlangkawn kohhran chairman chu a boral thut a ni. A ruang hi tukin dar 8 khan an khaw lamah haw pui a ni. 

Nimin a palai rorel te thu passed langsar zual te chu hengte hi a ni:

1. Kan ramah Family Planning Programme-a Birth Control kan kalpui dan chungchangah hian Pathian Thuin min zirtir dan mila inzirtir turin BCM pum huaapa hma lak nise

2. BCM hian Christian Ethics inzirtirna kawngah hma lain, Value system inzirtirna thlurbing nise

3. BCM pum huapin Pathianni zing inkhawm vawi khat Naupangte Ni-ah hman ni rawh se

4. Mizoram Missionary hmasa ber Sap Upa leh Pu Buangate thlalak BCM Pastor Quarter zawng zawngah leh Biak Inah emaw Hall-ah emaw a remchang laiah Kohhran tinin tar ni rawh se. Hetiang hian thlalakah ziak lan nise ‘Mizoram Missionary hmasa ber’ (Pioneer Missionary)

5. Kum 2015 – 2016 chhungin HATIM pualin BCM Tualchhung Kohhran tinah September thla ralhma-in sum tuak fehchhuah neih ni rawh se.

6. Nupaa pawmna Register hi Dan Puitling leh Dante-a inneite Register-ah ziak lovin Register hran BCM Headquarters hian siam rawh se.

7. BCM Kohhran tinah kum khata Pathianni (Sunday) tuk khat tal chu taksa, silh leh fen, ei leh bar lama thianghlimna leh zuk leh hmuam laka thianghlimna sermon (temperance service) thlak nise.

8. Kohhran humhalh leh tihpun zelna atan BCM Tualchhung Kohhran tinin Seminar buatsaih nise .

9. BCM Chhungkaw tinten chhungkaw inkhawm uar zawka kan neih theih nan BCM in hma la se.

10. Ram tana Chawnghei tawngtai ram pum huapa neih ni rawh se.

*KOHHRAN HMEICHHE KHAWMPUI LIAN MAMIT AH HMANG MEK
Nimin a kan rawn post tawh angin tunah hian Mizoram Presbyterian Kohhran Hmeichhe Inkhawmpui Lian vawi 46-na chu Mamit GSA Playground ah neih mek a ni. Inkhawmpui thupuiah 'I nunna turin tlan chhuak rawh' (Gen.19:17) tih hman a ni a, Speaker Rev.Vanlalzuata hnen atanga ngaihthlak thin a ni. Inkhawmpui chhung hian Thupuan 2&3 'Kohhran 7-te' tih zirho thin a ni a Nl.Lalzuimawii Tlau M.A., B.D, Synod HSS zirtirtu in a zirpui thin a ni. Nimin thleng khan inkhawmpui ah hian palai riaklut mi 7000 chuang an awm a ni. Zanin ah inkhawmpui hi an tiak ang.

Pix:Lachua Palian via Mamit District News Group

Zoram Kohhran Hmeichhe Inkhawmpui lian, Mamit
(Mizoram Presbyterian Women Fellowship General Conference held at Mamit playground 2015)
Pix: Lachua Palian

*MIZO ZAITHIAM RAWIHMAN SIAM A NI
March ni 7-a Mizo Zami Inzawmkhawm (MZI) Gen.Hqrs Aizawl huaihawt zaimi te rawih man 'Minimum wages' chungchang sawihona Hotel Regency a neih chuan zaithiam te zai tura sawm/rawih man an siam.

1. Mahni awmna khuaah zaithiam te zai tura rawih/sawm an nihin vawikhat rawih man Rs. 3,500/- aia tlem a ni tur a ni lo.

2. Mahni awmna khua chhuahsan a ngai a nih chuan vawikhat rawih ah Rs. 5,000/- aia tlem a ni tur a nilo, hei bakah hian a ruaitu ten transportation, food & Lodging an tumsak bawk tur a ni.
Minimum rate bithliah a nih tak avang hian hei hi artist hrang hrang te rawihna tur rate tihna a nilo a, hemi rate aia hniam a ni tur a nilo tihna mai a ni. Artist hrang hrang ten hei aia sang a anmahni rate an neihte MZI Gen.Hqrs chuan a pawmpui in a support tlat a ni tiin an thu chhuahah chuan an tarlang bawk.
Source: Slchhunga Gooner via Save Mizoram Group

*CAR BO ZAWNNA
Maruti 800; regn. No MZ05-0269; Colour-Grey: a chung black: Mamit atangin dar 11 rik hma deuhin rukbo a ni a. Dar 11:40 bawrah Rawpuichhip thlen hma deuhin hmuh a ni.. a hmu kan awm chuan Mamit PS-03892565100 emaw PS hnai ber ah report turin kan inngen e

6th & 7th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 

 7.3.2015

*BCM ASSEMBLY IN PASTOR NUPUI TE SAWRKAR HNATHAWH PHALLO
Mizoram Baptist kohhran rorelna sangber BCM Assembly Lunglei Farm veng Biak In a neih mek chuan Kum 2008 Assembly-in Pastor Nupui Sawrkar hnathawk mekte, Kum 2015 atanga bang tura thu a lo dah tawh tih danglam rawtna chu hnawl a ni. Assembly in thu a lo passed tawh angin kumin April thla atangin Pastor nupui sawrkar hnathawh nei te chu an ban angai dawn a, an ban duh loh chuan an pasal (Pastor) te an ban angai thung dawn a ni.

Pix: Thatea Bawihtlung

Baptist Church of Mizoram (BCM) Assembly 2015 at Farm Veng Church, Lunglei
Pix: Thatea Bawitlung

*CHINESE TAIPEI PALAI TEN CHIEF MINISTER HMU SIPAI LALIN HMU BAWK
Chapchar Kut chhim tura Aizawla lokal, Taipei Economic & Cultural Centre, New Delhi a Representative Pu Chang Kwan Tien leh a nupui, Pu Ho Chung Chang, Director, Science Division leh a nupui leh Pu Hsin Chiang Hsu, Assistant Representative te chuan nimin tlai khan Chief Minister Pu Lal Thanhawla chu a chenna bungalow-ah hmuin inkawmna hun tha tak an nei.

Taipei Palaite leh Chief Minister te hian induhsakna thilpek an in hlan ve ve a, Chief Minister hian an pualin zanriah a buatsaih sak a ni.

Chief Minister hi a nupui Pi Lal Riliani bakah Pu Ronald Sapa Tlau, MP(RS) ten an tawiawm a ni.

Mizoram Chief Minister Mr,Lal Thanhawla and Chang Kwan Tien, Taipei Economic & Cultural Centre, New Delhi at Chief Minister bungalow, Aizawl, Mizoram
Pix: Department of Information and Public Relations, Mizoram.

Nimin tlai vek khan Chief Minister hi Lt.Gen Bipin Rawat, AVSM, YSM, SM, VSM, GOC 3 Corp, Dimapur in a hmu bawk a, inkawmna hun tha tak an nei bawk a ni. Sipai lal hi Brig.T.C.Malhotra, DIG, 23 Sector Assam Rifles in a rawn tawiawm a ni. (DIPR)

Mizoram Chief Minister Mr,Lal Thanhawla and Lt.Gen Bipin Rawati at Chief Minister bungalow, Aizawl, Mizoram
Pix: Department of Information and Public Relations, Mizoram.

*LAMTLUANG WEEKEND SPECIAL (MIZO FIAMTHU)
Fapa: Anu vantirhkoh te hi an thlawk thei i ti tiro?
Nu : Thlawk thei e mama. Engtizia nge min zawh leh a?
Fapa: Apa hian kan awmpuinu hi " You are my angel" a ti a, kan awmpuinu hi a thlawk ve dawn em le?
Nu: Thlawk dawn e. Naktukah an khaw lam panin a thlawk haw nghal ang....

 

*MAMIT AH NUHO INKHAWMPUI LIAN
Mizoram Presbyterian Kohhran Hmeichhe inkhawmpui lian chu Mamit ah neih mek a ni. Inkhawmpui hi naktuk zanah an tiak ang.

 

#‎SantoshTrophy‬ 2015
Mizoram 1-0 Railways (FULL TIME)

 

*BCM ASSEMBLY NEIH MEK A NI
Mizoram Baptist Kohhran rorelna sang ber BCM Assembly vawi 119-na chu Farmveng Biak In Lunglei ah neih mek a ni. Nakkum Assembly neih na tur atan Hnahthial Bazar Veng Biak in thlan a ni. BCM Assembly hi President thar Rev.C.Ngurhnema'n a kaihruai a, naktuk zanah inkhawmpui ang tiak ang.

 

6.3.2015

*Lamtluang page chhiartu zawng zawng te Chapchar Kut chibai kan buk vek a che u. Hlim leh nuam taka kan Mizo kut in hman theih nan duhsakna kan hlan a che u.

‪#‎ChapcharKut‬

*UNION MINISTER OF STATE BANNA PAWM
India President chuan Prime Minister thurawn angin nizan zanlai ah khan Union Ministert of State in Consumer Affairs Food and Public Distribution nilai Raosaheb Dadarao Danve banna chu a pawmsak. Amah hi tunhnai ah Maharashtra state BJP President thar atan ruat a ni a, chumi avang chuan mi pakhat zel in mawhphurhna pakhat chelh nise tih kalphung zulzui a banna thehlut ta a ni.

 

*PAWNGSUAL TU JAIL ATANGA PAWT CHHUAK IN SAWISAK HLUM A NI
Nimin 5.3.2015 tlai lam dar 3-4 khan Nagaland a Dimapur Central Jail atang in hmeichhe 1 pawngsualtu ni a puh Syed Farid Khan (35) chu mipui thinrim ten jail atanga pawtchhuak in an chilhlum. Pawngsualtu hi Bangladesh atanga Dimapur a sumdawng tur a pemlut ni a sawi a ni. Pawngsualtu hi February ni 24 khan man a ni a, he thil thleng duhlo hian Naga Students’ Federation (NSF) leh pawl thenkhat ten kawng zawh an huaihawt a, tichuan jail gate an chhuchhte ta a ni. Jail atang hian saruakin an kai chhuak a, khawpui lun lai City Clock tower thleng an chaih phei hnu ah an sawisa hlum ta a ni.

5th March 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

5.3.2015

*END HOTUTEN PHUNCHAWNG HMUNA RTP LEH SS WAREHOUSE TLAWH
Vawiin chawhma ah khan Pu P.C. Lallawmsanga, Principal Secretary, Excise & Narcotics Department (END) chuan Phunchawng Vengchhunga awm sapzu chhekkhawlna In, S.S. Enterprise leh R.T.P. Bonded Warehouse sak mek a tlawh a. Commissioner of END Pu Lalhmunsanga leh a thawhpui ten Principal Secretary hi an tawiawm a ni.

Principal Secretary Pu P.C. Lallawmsanga hian Warehouse an tlawh chhan chu March, 2015 thla lai hawl ah MLPC Act/Rules anga Sapzu chhekkhawl leh hralhchhuah a nih theih nan hna pawimawh chinfel hmasak ngai zingah warehouse sak zawh hman ngei hi a tel vang a ni a ti. END hotute hian warehouse venhim hna ruahman dan, electric hrui thlun luh dan te, Warehouse luhna bula END Site Office, Warehouse Staff Quarter/duty post leh lirthei atanga bungraw thiarluhna tur leh bungraw thiarchhuahna tur hmun hma te an endik a. Warehouse sak hna hi contractor te hian karleh chhung ngeia zawhfel vek hman an inbeisei a ni. 

Pu Lalhmunsanga, Commissioner of Excise & Narcotics chuan MLPC a taka hmang turin Department leh staff a inpei tawh thu sawiin Excise official te mawhphurhna hrang hrang leh posting pawh siam fel vek a ni tawh a ni a ti. (DIPR)

*VETY DEPARTMENT HNUAIA NLUP HMALAKNA DOCUMENTARY FILM
NLUP Media Cell, I & PR/NIB ten an buatsaih documentary Film, 'Vety department hnuaia NLUP hmalakna' chu ZONET Cable TV ah ni 7.3.2015 zan dar 8:00 ah tih chhuah a ni dawn. (DIPR)

*KAN THEIHNGHILH NGAI LO VANG
Phuahtu: Mafaa Hauhnar
(India Sorkar-in kum 1966, March ni 5-a a khua leh tui râlpui nuaia min nuai chiam champha Zoram Ni pualin)

Kan khawpui vutdûra in chantir kha,
A hma ang diak khan min dinsak leh dawn em?
Kan hliam-ser zawng zawng kha tirehin,
Kan nu leh pa, u leh naute thisen,
Tuihâwk ang maia in luantir kha,
Inhnûk kir leh thei dawn em ni?

Kan pitar, putar leh nunaute lungchhiat
Mittui zozaite kha in hru hul leh dawn em?
A tlâng tluana thlabâr leh ralṭi-a insiamte
Thinlung keh-sawmte in char khâwmin,
Kan hun leh tha hloh zozaite kha,
Min hmuh kirtir leh thei dawn em?

Fahrahte hnenah an nu leh pate pe lêtin,
An chin pawh hriat lohva ruang ṭawih ral ta
Kan laihrui-zawmpui unaute kha,
In kai thovin in tinung leh thei dawn em?

A nih loh chuan, min hrethiam ula,
Kan laka tawrâwt in chhuahna leh,
Chintâwk nei lova diriam taka,
Min hmelma beihna zawng zawngte kha,
Kan hriat reng loh lai pawhin,

Kan theihnghilh ngai lo vang.

(This poem is composed by Mafaa Hauhnar for remembering the inhuman bombing of Aizawl city by the cruel Indian Air Force that happened in March 5, 1966)

*"KHI TE KHIAN AIZAWL A BOMB AN TI"
MZP Chanchinbu 1980 September thla a chhuak a Dr.Laltanpuii thuziak 'Zawlkhawpui senmei chan ni kha' tih ah chuan heti hian a ziak tel a "Khi te khian Aizawl a bomb an ti, kei erawh ar ang ka lo vai e." tiin. Kum 1966 March ni 5 khan Mizo hnam sipai ten India lakah helna an chawhchhuah taka vangin India sorkar chuan Indo thlawhna (Hunter leh Toofani fighter) hmangin Aizawl, Tualbung leh Hnahlan ah bomb an thlak a ni. Heng Indian Air Force thlawhtheihna te hi IAF air base Tezpur atangin an rawn che chhuak a ni.

Khatih laia India PM Indira Gandhi kha Mizoram a bomb thlak a nih chungchang ah thuthar lakkhawmtu pakhat in a zawh chuan "Indo thlawhna te chu sipai leh eitur thlak nan chiah kan hmang' tiin a chhang a ni. Chutih lai a Assam MLA DD Nichols Roy chuan "Aizawl a bomb an thlak keh them te chu Prime Minister hnenah chuan thawn ila, i eitur rawn thlak tir hi engtin nge i chhum thin bik a?" tih a rawt hial a ni.

The Indian Express editor-in-chief Shekhar Gupta sawi dan chuan Mizoram a thlawhtheihna hmanga bomb thlaktu pilot te zingah hian politician a inlet ta Rajesh Pilot leh India in 2010 a commonwealth games athlen tum a Organising Committee Chairman a hnu a CBI in an man tak Sureh Kamaldi te an tel ve a ti.

Kum 49 kalta vawiin anga khan Mizo mipui te chu Indian Air Force indo thlawhna hmanga beih annih avangin an thlabar em em a, an chenna in tam tak pawh an bomb thlak avangin a alh zuai zuai a, chenna in neilo in an awm phah ta hial a ni.

That little thing they say has bombed Aizawl, and me I’m lost and so helpless’. ("Khi te khian Aizawl a bomb an ti, kei erawh ar ang ka lo vai e.")

Mizo people remembering bombing of Mizoram by Indian Air Force in March 5, 1966