11th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

 11.2.2015

*ARMY HELICOPTER TLA AH OFFICER 2 THI
Zanin dar 7:43 vel khan Jammu and Kashmir a Safapura ah India army helicopter a tla a, a chhung a chuang pilot 2 an thi.

*Tun thla chhungin India ramah swine flu avangin mi 216 an boral tawh niin sorkar thuchhuah in a tarlang.

*CLEAN MIZORAM CYCLING EXPEDITION A KAL TEN CHAMPHAI AH PRESS MEET NEI 
Communication & Capacity Development Unit (CCDU), PHE Department bultuma thawk chhuak, Clean Mizoram Cycling Expedition-a Serchhip leh Champhai tlangdung fang mek, Mission Veng Youth Adventure Club member Vanlallawmzuala Varte leh PC Lalramengmawia te chu vawiin khan Champhai an thleng a, Tourist Lodge-ah thuthar lakhawmtute nen inkawmna hun an nei. Cyclists-te hi PHED leh Sports Department hotuten Tourist Lodge-ah hian an lo hmuak a ni.

Vanlallawmzuala Varte chuan he expedition-a an kaldan hrang hrangte a tarlang a. Communication & Capacity Development Unit (CCDU) bultuma thawk chhuak an nihna angin an chawlhna khuaah faina kawnga Mizoramin hma a sawn theihna atan mipui zirtirna hun an hmang thin a. Khaw hrang hrangte chuan PHE Department hmalaknain bawlhhlawh paihna felfai tak an nei deuh vek tawh thu leh, a tlangpuiin khaw tinten faina kawngah hma an sawn hle tawh a an hriat thu an sawi a ni. An zin chhuahnaah hian harsatna lian tham an tawh loh thu leh, ralmuang taka expedition an nei thei chu lawmawm an tih thu an sawi tel bawk.

Vawiin hunah hian Pu Lalngilneia Colney, DYSO Champhai chuan thu sawiin, adventure club te chu mi chhanchhuak tura ke pentu pawimawh an nih thu leh, tunlaia faina kawnga mipuite kan harh zel theihna tura hetianga hma an lakna chu thil ropui tak a nih thu a sawi a ni.

Inkhawm kaihhruaitu Pu Zohmingliana, PHE EE chuan Clean Mizoram hnuaiah hian PHE Department-in nasa takin hma a lak mek thu te, tunah hian Champhai District-a rural area-ah faina beihpuithlak a kalpui mek thu te leh zirna in hrang hrangte nena tangrualin Champhai District hi District faia siam turin hmalak mek a nih thu a sawi bawk.

Clean Mizoram Expedition Cyclists-te hi Aizawl atanga an chhuah hnuah Tlungvel leh Serchhip an tlawh a, heta tang hian Champhai District-ah lutin Khawhai leh Khawbung te an tlawh leh a; hemi hnu hian Dungtlang, Vangchhia leh Zokhawthar te tlawh lehin vawiin khan Champhai an lut a. Vawiin vek hian Khawzawl panin Kawlkulhah an riak ang a, naktukah Saitualah hun hmangin Aizawl lam an pan leh dawn a ni. (DIPR)

‪#‎cleanmizoram‬

*VALENTINES SPECIAL BARBEQUE CUM DINNER
Mizoram Tourism Department chuan a vawikhatna atan Valentines Day Ni. 14.2.2015 (Inrinni) chawhnu dar 2:00 atanga tan turin “ Valentines Special Barbeque cum Dinner” Hmuifang Tourist Resort ah a buatsaih dawn a. He hunah hian Live Band ngaihthlak tur awm in, barbeque leh buffet dinner a duh apiang tan ei theihin a awm dawn bawk a ni. Heng bak ah hian Adventure activities chi hrang hrang a awm bawk ang.

He hun hi Nula leh tlangval tan mai nilo, chhungkua leh thian ho tan pawh a hlim leh nuam taka Valentines Day hmang duh tan a buatsaih a ni.

He event hi a hlawhtlin dan a zirin, kartin Inrinni apianga tih chhunzawm tum a ni. Tourism Department in a tum ber chu mipui vantlang tana intihlimna leh chhuah thawvenna hmun thawl leh nuam siam a ni.

Ticket leh advance booking ti duh tan, Directorate of Tourism, Bungkawn, Aizawl ah leh heng Phone No. 9774996068 / 8259943044 ah hian zawhfiah theih a ni. (DIPR)

*SAIHA-LAWNGTLAI KAWNGAH RUANG CHHAR
Pu HC. Lalmalsawma Zasai thlam, Saiha -Lawngtlai kawng, (Via Tuipui Ferry ) tawngtaina thlang lawk a mi vengtu Zakam kum 60 vel chu vawiin dar 12 vel khan thlam chhungah thi a chhar a ni.

Zakam hi zu in thin a ni a, A zuin chau bawihsawmtu nei lo chu a thi nia rin a ni. A bawhna hmunah hian thi a luakna hmuh a ni bawk.
Source: Lalhmachhuana Tochhawng via DINGDI Group (FB)

*NEDFI-IN 'BUSINESS MEET' BUATSAIH

North Eastern Development Finance Corporation Ltd. (NEDFi), Lunglei Branch Office chuan vawiin khan DIC Conference Hall, Venglai-ah 'Business Meet' a buatsaih a, Lunglei-a sumdawng mi (entrepreneurs) engemawzat an kalkhawm a ni.

'Business Meet' ah hian NEDFi Lunglei Branch Manager Pu Lalhruaizela Fanai chuan NEDFi hmalakna hrang hrang leh an scheme kalpui mekte a sawifiah a, NEDFi chuan loan nuai 100 (za) aia tam lovah chuan kum khatah 8% pung awmin loan a puktir thin thu a sawi a. Interest chu sum la bat zat atanga thla tin chhut thar zel a nih avangin Bank dangte nena khaikhin chuan an interest rate a hniam hle a ni, a ti. NEDFi chu DoNER Ministry hnuaia awm a nih thu sawiin sorkar laipuiin hmarchhak biala mite a duhsak avanga interest hniam zawka loan pek chhuak thei an nih thu a sawi bawk. Industry dinte leh sumdawngte chuan bank dang an dawr hmain NEDFi chu dawr phawt thin se a duh thu a sawi bawk a ni.

Business Meet chhim tura kalkhawm sumdawngte leh mahni kutkawia eizawnna ngelnghet bultan tumte nen NEDFi hotute chu inkawm zuiin, zawhna hrang hrang an neite chu NEDFi lamin an chhang a ni.

NEDFi hi kum 1995-a India sorkarin NE states te hmasawn nana din a ni a, tunah hian DoNER Ministry hnuaiah awmin industry leh sumdawnna lampangah loak an puk tir thin a ni. Mizoramah hian Aizawl leh Lunglei-ah office neiin Lunglei NEDFi Branch Office hi 26th April, 2012 khan Chanmari-a Pu R.Laldawnglana building-ah hawn a ni. (DIPR)

*UNDER 14 FOOTBALL PLAYERS TE PU JOSEPH LALHIMPUIA, PARLIAMENTARY SECRETARY IN A LAWMPUI
60th National School Games, 2014-2015 Football (Boys) under 14 ah Mizo naupangten lawmman pahnihna an rawn hawn lawmpuina nimin chawhma dar 11 khan Directorate of School Education Conference Hall-ah hman a ni a. Khuallian Pu Joseph Lalhimpuia, Parliamentary Secretary in Players te hnenah certificate leh pawisa fai Rs. 3,000/- theuh a hlan. (DIPR)

 

*VALENTINE'S DAY AH TEMPLE TLAWH TURIN TI
Bangkok khawpui a roreltute chuan an ram Thai thalai te chu Valentine's Day ah sex hmang lo tur a ngen in hemi ni hian hmun fal a interek lo in Temple tlawh theuh zawk turin an ngen. Thailand hi Southeast Asia a tleirawl laia naupai tamna ber pawl anni.

 

*CHAMPHAI DISTRICT VIGILANCE AND MONITORING COMMITTEE THUKHAWM 
Nimin khan Champhai District Level Vigilance & Monitoring Committee chu an Chairman Pu C.L.Ruala, MP (Lok Sabha) leh Co-Chairman Pu Ronald Sapa Tlau, MP(Rajya Sabha) hovin Champhai DC Conference Hall-ah an thukhawm. He hunah hian Champhai North bialtu MLA leh Parliamentary Secretary ni bawk Pu T.T. Zothansanga a tel a. Champhai DC leh Committee Secretary ni bawk Pu Sangdingliana chuan Committee Member zawng zawngte lawmna thu a sawi a ni. (DIPR)

 

*ASSAM RIFLES TEN TEIKHANG AH A THLAWN A INENTIRNA BUATSAIH
39 Assam Rifles chuan niminpiah khan Teikhang ah a thlawn a inentirna Free Medical Camp an buatsaih a. He Free Medical Camp ah hian Teikhang bakah Mimbung, Hrianghmun, Depatlang, North East Khawdungsei leh Kawlbem atangin mi 650 vel an inentir a, damlo te tan a thlawnin damdawi an sem a ni bawk a. Medical Camp hi Assam Rifles atangin Deputy Commandant Amrik Singh, Senior Medical Officer ni bawk leh Major VT Ashokrao, RMO, 39 Assam Rifles ten an buaipui a, Medical Camp hi Pu T.Ropianga, VCP Hrianghmun in a hawng a ni. (DIPR)

 

*MIZO THALAI INFIAMMITE HMASAWNNA AH SPORTS MINISTER LAWM “ZONET, LPS, DDK leh print media te chungah lawmthu ka sawi” - Zodintluanga
Nimin chhun dar 11:30 khan Serchhip District Tuikum Biala Hmuntha khuaah Sports Minister Pu Zodintluanga’n ni 9 chhung awh tur 2nd Hualliana Memorial Football Tournament a hawng a, hawnna ah hian thusawiin Pu Zodintluanga chuan ZONET, LPS, DDK leh Print Media ten Sawrkarin infiammite hmasawnna tura hma a lakna a an thlawp that avang leh anmahni ngei pawhin Mizo thalaite talent haichhuak leh phochhuak tura ruahmanna chi hrang hrang an siam thin avangin Sports lamah pawh a taka hmuh theihin Mizoramin hma a sawn a ni a ti a, Media te hnenah lawmthu a sawi a ni. (DIPR)

 

*AH&VETY DEPARTMENT IN SERCHHIPAH NLUP SEM
Nimin chawhnu dar 1:00 khan AH&Vety Complex, Serchhip ah AH&Vety hnuaia NLUP 2nd Phase beneficiaries Serchhip, Chhiahtlang, Sialhau leh Hriangtlang khua a vawkvulh thlangtu chhungkaw 31 hnenah 3rd /final installment Rs. 20,550/- theuh pek an ni a, tanpuina sum hi beneficiary te bank account ah dahluh sak nghal vek an ni. (DIPR)

 

*CHIEF MINISTER-IN NEEPCO BOARD OF DIRECTORS MEETING HMANPUI
Mizoram Chief Minister Pu Lal Thanhawla chuan nimin khan State Guest House Conference Hall-ah NORTH EASTERN ELECTRIC POWER CORPORATION (NEEPCO) Board of Directors Meeting vawi 213-na a hmanpui.

Chief Minister chuan NEEPCO in Aizawlah Board of Directors Meeting an rawn nghat chu kan vannei hle a ni a ti a. Hmasawnna ruhrel tha, infrastructure kan nei tawklo erawh chu in mi hriatthiam kan duh a ni tiin, Mizo ten mikhual kan dawnsawn danah an tan tawnhriatna thar anih ngei a beisei thu a sawi a. NEEPCO chu hmarchhak bial tan power siamchhuaktu pawimawh tak an nih thu sawiin, hmarchhak bial hi power, abikin hydel power siamchhuah theihna hmunpui a ni chungin power kan khawpkhamlo em em a ni a ti a. 50,000 MW power siam chhuah theihna awm si, 11% pawh kan siamchhuaklo a ni a ti a. Mizoramah phei chuan 1% vel chauh kan hmang a ni a ti. Hei hian hmasawnna a tih chak loh phah hle a ni a ti.

Chief Minister chuan hmarchhakah Neepco hian power siam zawng zawngah 50% vel an thawk chhuak a ni tiin, hmun harsa leh chhengchhe tak kara a hnathawkte inpeknaah kan lawm hle a ni a ti a. Keini pawhin tanpui ngaihnaah kan inhawng reng a ni a ti. Thermal power lamah pawh Neepco chu kal se a duhthu sawiin, Chief Minister chuan natural gas leh lungalhthei 60:40 ang tea tlangramah hydro-thermal mix siam a, micro hydel leh non conventional source te dap chhuak se a duh thu a sawi a.

Neepco hian National Solar Mission atanga sum leh technical lama puihna te dap se tiin Chief Minister hian a rawn bawk a. Tuirial Hydel Project 60MW power pechhuak thei tur hawn hlan a nghahhlelhawm a tih thu a sawi bawk a. Tuivai Hydel Project 210 MW power siam chhuak thei tur pawh Mizoram sorkar-in Neepco kutah hlan nise tia a rel tawh pawh a sawi a ni.

Neepco Chairman & Managing Director Pu P.C.Pankaj chuan Chief Minister Pu Lal Thanhawla’n Board of Directors Meeting a hmanpui chu lawmthu a sawi a. Neepco in Mizoram project a kenkawh te chu a hun taka zawh vek a tum a ni a ti a. Hetih lai hian kumina hawn hman tum, Tuirial Hydel Project chu a Power House bul leichim avangin a hun takah hawn theih a beiseiawmlo a ni a ti a. Kumin May thla khian a tuikhuah (Dam) chu zawh hman a ni ang a ti a. Tuivai project pawh Neepco kuta hlan a ni chu lawmawm a tihthu a sawi a. Mat Hydel Project chungchangah Central Water Commissionin DPR an buatsaih mek a ni a ti a. Lungreng leh Chhimtuipui Hydel project te pawh bawhzui reng a ni a ti a, a huna zawh hman vek tum a ni a ti. Pu Pankaj chuan Hydel project ngau ngau ah chuan Mizoramah an ngah ber a ni a ti a. Solar power siamchhuah lamah pawh hmalak tum anih thu a sawilang bawk a ni.

Chief Minister hi Pu T.P.Khaund, Principal Adviser to Govt of Mizoram & Neepco Permanent Invitee bakah Pu L.Pachuau, E-in-C, P&E leh P&E Chief Engineer pahnih Pu Vanlalhruaia leh Pu Lalnunmawi Sailo ten an tawiawm a. Neepco hotu dang U Moral, Director (T), A.G.West, Director(F), S.Borgohain, Director(P) leh S.C.Verma, Chief Vigilance Officer te an tel bawk a. An ni bakah Central Ministry hrang hrang atangin Independent Director 5 an tel bawk a ni. (DIPR)

10th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

10.2.2015

*HEALTH DEPARTMENT OFFICE KAL HUN CHHUNG TIH DANGLAM A NI

Mizoram Civil Hospital/ District Hospital/CHC/PHC a work ethic/work culture a lo that zawk theih nan OPD hnathawh hun chhung a hnuaia mi ang hiansiama ni a. Hei hian emergency services leh office erawh a huam lovang.
Summer Season (February 16th - November 15th) - 9:00 AM - 3:00 PM

OPD Card lak theih hunchhung (Summer)- 9:00 AM - 1:00 PM
Winter Season (November 16th - February 15th)- 9:00 AM - 2:00 PM
OPD Card lak theih hun chhung (Winter)-9:00 AM - 12 Noon
All Saturday - 9:00 AM - 12 Noon

He Office Memorandum hi Civil Hospital/Distrct Hospital/CHC/PHC hnuaia hnathawktu awm zawng zawng te chuan strict taka zawm tur a ni a. Bawhchhiatna a awm chuan sawrkarin a ngai pawimawh hle ang. (DIPR)

*KUTHNATHAWKTUTE HAMTHATNA NGAIHTUAH TU TUR PAWL DIN

Vawiin ah khan Horticulture Conference Hall ah Horticulture Department leh Indian Grameen Services puihna in Aizawl District chhung thlai chingtute hamthatna ngaihtuahtu tur Farmers Producers Organisation(FPO) chu Farmers Interest Groups (FIG) 53 atanga kalkhawm te chuan Board of Directors 10 thlang chhuak in an din.

Aizawl District chhunga FIG 53 ah te hian member 15 aia tam awm deuh vekin tunah hian Aizawl District FPO ah member 1060 an awm a. FPO hi Co-operative Society ang ni lovin company act of 1956 hnuai a in Register tur a ni a. An member farmers te thawhchhuah te man man leh tlawm zawka hralhna ngaihtuah in member/farmers te mamawh company hrang hrang ami man tlawm zawka leisak bakah an member te hamthatna chi hrang hrang te ngaihtuah in hna a thawk ang. Tunah hian Horticulture Department chuan FIG tin hnenah hian a tul anga an hman turin an Bank account ah Rs. 1,70,000 aia tlem lo a dah sak veka, he sum hi revolving fund anga FIG ten action plan siam in Department pawmpuina an hmalakna atan an hmang thei dawn a ni.

FPO dinna ah hian Pu. Sundar Roy, Vice President IGS, Kolkata chu rawn tel in FPO hmalak dan tur te a sawifiah a. FPO ah hian member tinin, share 10 tal a lei anga, share khat hi Rs. 100 zela bithliah a ni a, hei bakah Entry fee/Registration fee Rs. 100 a pek a ngai bawk dawn a ni.

Aizawl District Board of Directors atan hian C.Lalbiaksanga,Sihphir ; H.Rinzuala, Sihphir ; H.Vanlalhriata, Sihphir ; Lalbiakkima,Durtlang; K.Lalnunthari,Sairang ; J.Lalthianghlima, Sairang ; Lalthuneia, Saikhamakawn ; R.Lallianzela, Sawleng ; K.Zaihmingthanga, Thingsulthliah leh H.Pakunga, Tlangnuam te thlan an ni. (DIPR)

*#‎Delhi‬ assembly election final result:
AAP: Win-67
BJP: Win- 3
Congress: Win-0
Total seat: 70

*MARCH 17-AH LEGISLATIVE ASSEMBLY SESSION TAN DAWN
India Danpui Article 174 Clause (1) in thuneihna a pek angin Mizoram Governor Dr Aziz Qureshi chuan 7th Mizoram State Legislative Assembly Session vawi 5-na chu March 17, 2015 zing dar 10:30 a neih tan turin a ko. (DIPR)

*CYMA LEH MFA TEN APRIL AH FOOTBALL TOURNAMENT HUAIHAWT DAWN
Nimin chawhma ah khan Health Minister Pu Lal Thanzara office ah Central YMA leh Mizoram Football Association hotute chu inkawm in April 21 atanga tan tur, Inter-Branch YMA Football Tournament buatsaih an rel.

Health Minister Pu Lal Thanzara, President, MFA ni bawk chuan Football hi Mizo thalaite thiam zawng tak leh eizawnna atana an hman mek a ni a, Mizoram kilkhawr berah pawh tihhmasawn a nih theih nan tan lak chhoh zel a ni dawn a ni a ti a. Pawl lian tak pahnih inlungrualna zarah football tournament siam a lo ni leh dawn ta chu lawmawm a tih thu a sawi a ni.

Meeting ah Inter Branch YMA Football Tournament kalpui dan tur kimchang duang chhuak turin CYMA leh MFA atanga member 5 ve ve te chu a hma lama inhmu khawm tura tih a ni. He tournament ah hian MFA in inkhuahkhirhna dan a neih te chu hman a ni dawn a. Tournament senso tum sak tur in City Group of Institute, Chandigarh chuan CYMA an rawn be tawh a ni. (DIPR)

*DELHI SORKAR THAR 14 FEBRUARY AH
Delhi assembly inthlan vote chhiar mek ah Aam Aadmi Party ten sorkar siam thei tur a hma an hruai tawh avangin Arvind Kejriwal kaihhruai AAP sorkar thar chu February ni 14 ah Ramlila Maidan ah lakluh a ni ang.

*Delhi assembly inthlan vote chhiar mek ah Aam Aadmi Party chuan hneh takin hma an hruai mek a, sorkar thar an siam thei dawn niin a lang. AAP hotupa Arvind Kejriwal chuan New Delhi seat a humhim a, BJP CM candidate Kiran Bedi chu Krishna nagar bial atangin a tling zo ta lo a ni.

*DISTRICT LEVEL IMPLEMENTATION COMMITTEE ON DIRECT BENEFIT TRANSFER ON LPG - THUKHAWM
Nimin khan DC Conference Hall ah Lawngtlai District Level Implementation Committee on Direct Benefit Transfer on LPG (DBTL/PAHAAL) chu an Chairman Pu J. Hmingthanmawia, Lawngtlai Bawrhsap hovin an thu khawm a, Lawngtlai District-a LPG Consumer Registration chak zawka tih dan tur an sawi ho.

Bawrhsap chuan Direct Benefit Transfer on LPG hi UID/Adhaar nena kal kawp tura ruahman ni mahse harsatna hrang hrang avangin a tih theih mai lohva, hei vang hian UID Registration neilo tan pawha tih vek turin ruahmanna a siam ta zawk a. Ruahman danah chuan kumin January thla tir atanga kalpui vek tur a ni nain tunah hian March thla thleng innghah (grace period) leh hlek a ni bawk a. Hetih chhung hian District chhunga gas Consumer zawng zawngten he Registration hi kan tih vek a ngai dawn a ni a ti. He mi chhunga ti hman lo te chu a Scheme hi kalpui a nih tawh dawn avangin subsidy in Gas an la thei dawn lova, ngaihven thuai hi kan tan a tha a ni a ti.

Member Secretary Pu R. Sanghnuna, DCSO Lawngtlai pawhin a Scheme kalphung tlangpui hrilhfiahin , Gas Consumer te hriattur pawimawh hrang hrang a tarlang bawk a, Lawngtlai khawpuia Gas Agency awm chhun Khuma Gas Agency atangin tun dinhmuna BDTL form lachhuak tawh leh thehlut zat report ngaihthlak a ni bawk. Khuma Gas Agency hnuaiah hian tun dinhmunah Consumer 9811 vel an awm a, an zinga Consumer 5000 vel hian DBTL Form hi an la chhuak tawh a, mi 3000 velin an submit leh tawh bawk a ni. Vawiina meeting hian mipuiten an lo ngaihven lehzual theih nan VC tinte chuan hma la se, VC tin te hnenah a Form te pawh lakchhuah theih tura chhawp vek nise an ti bawk.

He Scheme hi Bank te nena kalpui ngai Scheme a nih avangin Bank leh Gas Agency te indawr dan tur chak zawk leh tha zawk nia hriatte pawh sawi ho a ni bawk a, Bank thenkhat a account nei, Core Banking Account Number la pek fel tawk lohte pawh a rang lama pek fel nise tih a ni bawk.
Lawngtlai District ah hian PMJDY hnuaia chhungkaw tintena Bank Account pakhat tal neih theuhna Scheme chu za a za puitlin tawh a ni a, hei vang hian DBTL pawh zangkhai zawkin a kalpui theih dawn a ni.

District Level Implementation Committee on DBTL ah hian District chhunga Bank Manager zawng zaw, Gas Agency zawng zawng, VC, Consumer Union leh Tlawmngai Pawl dangte an tel a ni. (DIPR)

*TRAINING TUR VAILIAM
Dt. 8.2.2015 tlai dar 5:00 khan LBIIHM, New Delhi-a training tur mi 26 te chu Dr. JT Vanlalngheta, Secretary, Mizoram Youth Commission chuan Aijal Club atangin a vailiam a ni. Training hi thla 6 (ruk) chhung tur a ni a, hemi hnu hian India ram hmun hrang hrangah trainees te hi hna zawn sak an ni ang. (DIPR)

*INDIA RAM ECONOMY 7.4% A PUNG TUR A BEISEI A Ni
Nimin khan Central Statistics Office chuan thuchhuah siamin kum 2014-14 chhung in India ram economy chu 7.4% in a pung dawn niin an sawi. Kum hmasa ah khan 6.9% in a pung a ni.

*CHIEF SECRETARY HOVIN JICA PROJECT CHUNGCHANGA DIN JCC THUKHAWM
Nimin tlai dar 3:00 PM khan Chief Secretary Pu Lalmalsawma hovin Chief Secretary Conference Room-ah Japan International Cooperation Agency project chungchanga Joint Coordination Committee din chu an thukhawm a, vawiina meeting hi hemi chungchanga an thutkhawm 4-na a ni a. He meeting pawimawh tak ah tel turin JICA India Office, New Delhi atangin Mr. Akihiro Kimura chu a rawn kal a. Amah bakah hian JICA Study Team member te, Central Water Commission (CWC) aiawh te leh Mizoram sorkar-a Department hrang hrang - Minor Irrigation Department, Agriculture, Horticulture, Soil & Water Conservation, Environment & Forest, Fisheries Department etc. aiawhte an tel bawk.

Chief Secretary Pu Lalmalsawma IAS, Chairman, JCC(JICA)-in he meeting hi a kaihruai a, Japan Sorkar senso-a Mizoram zirchianna kal mek ‘A study on Development and Management of Land and Water Resources for Sustainable Agriculture in Mizoram’ chungchanga hmalak tawhna report ngaihthlak niin Minor Irrigation Project atana ‘DPR preparation Guideline’ chu pawm a ni bawk.
Japan mithiamte hian Mizoram ei leh bara intodelhna tur ‘Master Plan’ an buatsaih mek a, he master plan hi April 2015 a thehluh tura tih a ni a. Master plan hi kum 20 chhunga tihhlawhtlin tura ruahman a niin, ei leh barah za zela 60 vel intodelh mai bakah tharchhuah hralh dan tur ruahmanna a keng tel dawn bawk a ni. (DIPR)

*CHHIAHTLANG-AH PUBLIC GRIEVANCES REDRESSAL CAMP BUATSAIH
MP Model Village “Sansaad Adarsh Gram Yojana (SAGY)” Programme kalpui zelna ah ni 6.2.2015 (Zirtawpni) khan Chhiahtlang Community Centre-ah khawtlang mipui ten Sawrkar hmalakna chungchanga an vui leh vainate bakah an ngaimawhte Sawrkar thuneitute hnena an thlenna leh a sutkian dan tur sawihona hun “Public Grievances Redressal Camp” buatsaih a ni a, District Bawrhsap, SAGY Nodal Officer ni bawk Pi Juhi Mukherjee, IAS chuan he hun hi a hmanpui a ni.

Pi Juhi Mukherjee chuan Chhiahtlang khua Model Village a siam tura thlangtu Rajya Sabha MP Pu Ronald Sapa Tlau piancham denchhen a February ni 4, 2015 a Public Grievances Redressal Camp hi neih tura ruahmanna siam anih thu leh Sawrkar Programme pawimawh dangin a rawn tlak hnan tak avanga hun remchang dang siam anih thu sawiin Chhiahtlang mipuite chu Model Village ni ngei tura tan an laknaah Sawrkar hnathawh dan te leh hmalaknate langtlang taka an hriat a pawimawh a, hei hian Sawrkar leh mipui inkara inhriatthiamlohna awmte a tihbo bakah thawhhona tha zawk leh inhriatthiam tawnna a thlen thei a ni a ti a, mipui leh khawtlang hruaitu kalkhawmte chu an harsatna leh ngaimawhte tlang taka sawichhuakturin a sawm a, Sawrkar Department hrang hrang te chu heng an harsatnate ngaihthlaksak a, chinfel sak dan kawng ngaihtuah turin an bulah an inchhawp hnai a ni tiin khawtlang tana thahnemngaihna rilru pu chunga hun hmanpuiah a sawm a ni.

Pi Teresy Vanlalhruaii, MCS, Project Director, DRDA Serchhip, SAGY a Charge Officer ni bawk chuan he inkhawm hi kaihruaiin SAGY kalphung te sawifiahna hun a hmang a, Model Village atana thlan an nih avanga Sawrkar atanga tanpuina sum lut ruih ruih tura beiseina rilru bansan a pawimawh thu leh Sawrkar Laipui ruahmanna ah chuan tanpuina sum a hrana pek an nih dawn loh thu te, an khawtlang tihhmasawnna tura mipuiten an ngaihtuahna an sen thiam a tul thu te a sawi a, MP Model Village a thlan hmasak ber an nih avangin hlawhchham thiang an nih loh thu leh midangte entawn tlak ni tura theihtawp chhuah a pawimawh thu a sawi a ni.

Public Grievances Redressal Camp ah hian SAGY Line Department aiawh te an telkim hle a, Department hrang hrang ten Chhiahtlang tana hma an lakna hrang hrang chungchanga harsatna leh hriatthiamloh an neihte mipuiten zawtin Department aiawhten an chhang a, sawiho ngaite sawiho zel a ni a, e-district hotuten National e-Governance Plan (NeGP) hnuaia e-district application kalpui anih dan powerpoint hmangin an entir a, tun dinhmunah chuan Income Certificate, Caste Certificate leh Residential Certificate siamturin DC Office pan kher ngai tawh lovin online kaltlangin a tihfel theih vek tawh a ni. (DIPR)

*INDIA AH SWINE FLU HRILENG A DARH CHAK HLE
Nimin khan India ram khawpuiber ‪#‎Delhi‬ ah chuan swine flu natna vei mi 61 hmuchhuah belh anni. Kumin chhungin he natna vei hi 968 hmuhchhuah anni tawh a ni.

‪#‎Maharashtra‬ ah chuan swine flu vanga thi mi 38 an tling tawh a, he natna vei hmuchhuah tawh zat pawh mi 193 an tling tawh a ni. 

‪#‎Karnataka‬ ah swine flu avanga thi mi 7 an awm tawh a, a natna vei mi 106 hmuhchhuah anni tawh.

‪#‎Telangana‬ ah chuan kumin chhungin swine flu avangin mi 44 an thi tawh a, a natna vei mi 49 an awm tawh a ni. Telangana leh ‪#‎Andhra‬ Pradesh state 2 ah kumin chhungin swine flu vei mi 913 an tling tawh a ni.

‪#‎Gujarat‬ ah chuan swine flu avangin mi 88 an thi tawh a, a natna vei mi 831 hmuchhuah anni tawh.
‪#‎Punjab‬ ah pawh swine flu vangin mi 12 an thi tawh a, a natna vei mi 34 enkawl mek annih bakah he natna vei ni a rinhlelh mi 84 chhinchhiah anni tawh bawk.

‪#‎Goa‬ ah chuan swine flu vei mi 6 hmuchhuah anni tawh.

‪#‎Uttar‬ Pradesh a Agra khawpui ah chuan swine flui vei nia hriat enfiah mek mi 18 an tling tawh a Lucknow khawpui ah chuan swine flu vei mi 40 hmuhchhuah tawh niin thihpui mi 2 an awm tawh bawk.

‪#‎Rajasthan‬ ah Swine flu vei mi 897 hmuchhuah anni tawh a, an zinga mi 92 an thi tawh a ni.

‪#‎Madhya‬ Pradesh khawpui Bhopal ah pawh swine flu vei mi 11 hmuchhuah belh anni a, an state he natna vei hmuchhuah tawh zat chu mi 45 chuang anni tawh a ni.

‪#‎swine‬ flu hrileng mek hian vanneih thlak takin India hmarchhak leh a bikin Mizoram a rawn thleng ve lo a ni.

BUAINA KHAWVEL TUALZAU: NEWS TAWI LAWRKHAWM
*Nimin khan Iraq khawpui Baghdad khawsir ah bomb vawi 2 a puah avangin mi 15 an thi

*Nimin khan Somalia ah an ram Member of Parliament Abdullahi Qayad Barre chu car a chuang lai Islam firfial pawl Al-Shababd ten an kaphlum.

*Niminpiah khan Egypt ah Egyptian Premier League clubs 2 Zamalek leh ENPPI inkhel entum fans te intihbuai avangin mi 30 an thi a hliam tuar engemaw zat an awm bawk.

*Ukraine ah Russia zawmduh avanga helna chawkchhuak mekte nen a an inbeih avangin Ukraine sipai 9 kahhlum anni.

*Nigeria rama Islam firfiak pawl Boko Haram te chuan Nigeria leh Cameroon inrinna hnaih Cameroon ramchhunga Tourou khuah ah bus a chuang mi 30 te chu chinhriat lohin an hruaibo.

*Pathianni khan Boko Haram firfiak te nen an inbeihna lamah Cameroon sipai 9 in hliam an tuar bawk a ni.

*Syria foreign minister Walid al-Moallem chuan Jordan in an ramchhung a Islamic State firfiak pawl te thlawhtheihna hmanga an bei chu sawiselin Syria sorkar in Islamic State firfiak pawlte beih nan rampawn atanga tanpuina a mamawh lo a ti a ni.

*Lamtluang page like tur kan pung chak lo hle mai a, tan min lo like pui ve la, i thiante pawh like turin i lo hrilh darh ve zel dawnnia aw.

*VAWIINAH DELHI INTHLAN VOTE CHHIAR DAWN
Tukin dar 8 atang hian Delhi Assembly inthlan a vote tla te chu chhiar tan a ni dawn ta. Kan rawn tarlan tawh thin angin he inthlan ah hian Aam Aadmi Party leh BJP te chu party mala inbei tawk ber a ngaih anni. Election Commission chuan vote chhiarna atan hian counting center 14 a buatsaih a ni. Vote chhiar result atang hian sorkar laipuia rorelna fung vuan mek BJP in Delhi assembly inthlan ah awmzia an nei pha em tih a lang chiang dawn niin a ngaih theih.
-------
In veng/khua a news a chhuah tur a awm chuan inbox ah message a rawn thawh thin turin kan ngen a che u.

9th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

9.2.2015 
*35th National Games final a Mizoram chakna goal Imanuel Lalthazuala'n a thunlai video a hnuaia youtube link ah hian en theih a ni.
https://www.youtube.com/watch?v=zvcFGb_R-uE

*MIZORAM CHAMPION THE HINDU AH
India rama chanchinbu lar tak The Hindu ah Mizoram team tean National Games football champion nomawi an lak thu an chhuah ta kulh mai. A hnuaia link ah hian entheih a ni e.
http://www.thehindu.com/sport/football/mizoram-takes-football-gold/article6875316.ece

*EXCISE IN ZURUI MI 80 MAN
January, 2015 chhunga Excise & Narcotics Department, Mizoram in zu leh a kaihhnawih thil a mihring leh thildang an man zat hetiang hi a ni :
1. Zu zuar-91
2. Zu rui - 80
3. Rak zu - 2015.65 litres
4. Zu bilhlai - 1875 tins
5. IMFL 750 ml. -8439 bottles
  375 ml. - 4 bottles
  180 ml. - 147 bottles
  canned beer 500 ml. - 98 cans
  Apple jiuce - 690 litres
  Foreign (Imp) liquor - 3 bottles
  Foreign (Imp) canned beer - 327 cans
6. Zu sakna bel man zat - 39 Nos
7. Motor man zat - 9 Nos.

 

*NATIONAL GAMES FOOTBALL AH MIZORAM CHAMPION
Zanin a Kerala a 35th National Games, Kerala Football final khelh zawh tak ah Mizoram chuan 1-0 a Punjab hnehin champion an ni ta. Mizoram hnehna goal hi Imanuel Lalthazuala'n 83 minute a pet goal a ni. Mizoram in India ram football ah ro an rel leh ta a ni. Kan lawmpui em em e.

India National Games Football Champion - Mizoram team
pix: The Hindu

Mizoram win 35th National Games Football final against Punjab by 1-0

*GOVERNOR-IN TNT NAUPANGTE LENGAH SAWM
Vawiin tlai khan Mizoram Governor Dr. Aziz Qureshi chuan TNT naupangte Raj Bhawan-ah lengah sawmin an pual hian intihhlimna hun a siam sak.

TNT naupangte chu rimawi leh zai lamah mipuite hriat hlawh tak an nih avangin he hun hi buatsaih sak anih thu Governor chuan a sawi a. Tunlai khawvel harsatna leh buaina kara naupang rilru thianghlimte zai ngaihthlak chu hahdam thlak a tih thu sawiin inlungrualna leh sakhaw in ngeih tawnna kawngah state dangte pawhin Mizoram atanga zirtur an neih thu a sawi a ni.

He hunah hian Governor thenrual tha pahnih Mizorama lo zin mek - Dr. Syeda Hameed, Planning Commission Member lo ni tawh leh Dr. K.L. Mehra, Emeritus Professor of Mathematics, University of Alberta, Canada te pawh an tel a. Nizan khan Governor hian a mikhualte hi Helipad leh Aizawl Theological College atangin Aizawl khawpui a thlirpui a, a mikhualte hian hetianga thil mawi hi hmun dangah an la hmuh ngai loh thu an sawi.

Governor hian TNT tanpui nan Rs. 50,000/- a pe a, Dr. K.L. Mehra’n Rs. 10,000/- a pe bawk. (DIPR)

Mizoram Governor and TNT orphanage home inmates

8th February 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

8.2.2015

*DURTLANG AH INKANG
Zanin dar 7 vel khan Pu Valbuanga in assam type chhawng Durtlang Zion veng ami chu bungrua engmah chuh hman lovin a kang ral. Pu Valbuanga hi PHE dept. a thawk a ni.

*NIGERIA IN PRESIDENT INTHLAN HUN SAWN HLA
Nigeria Independent National Electoral Commission (INEC) chuan an ram chhung a firfiak pawl Boko Haram ten buaina an la chawhchhuah fo avangin President inthlan hun February ni 14 a neih tur a tih chu March ni 28 thleng neih hrih loh turin hun an pawtsei. Inthlan hun an sawn hlat chhan hi an ram sipai ten Boko Haram firfiak te an beih mek avangin inthlan na ah an duty hman rih loh avang niin INEC chairman Attahiru Jega chuan a sawi.

*UAE IN IS TE BEIH NAN JORDAN HNENAH F-16 FIGHTER A THAWN
Nimin khan United Arab Emirates sorkar chuan Jordan sorkar in Islamic State (IS) te a beih tanpui nan F-16 jet fighter squadron 1 a thawn. Nimin khan Jordan hian IS te tawmna hmun pawimawh tak pakhat Syria a Raqqa chu indo thlawhtheihna hmangin a a ni 3-na atan a bei leh a ni. Ni 3 chhungin Jordan hian thlawhtheihna hmangin tum 60 a bei tawh a ni. Lamtluang a kan rawn tarlan tawh thin angin Jordan hian IS te an beihna chhan hi an ram fighter pilot 1 an lo halhlum sak avang a phuba la anni. Kan hriatna ti zau ah squadron 1 ah hian indo thlawhtheihna 12-24 an awm thin a ni.

*MIZORAM LEH PUNJAB IN FOOTBALL FINAL KHEL DAWN
Kerala a National Games vawi 35-na khelh mek ah Mipa football final ah Mizoram leh Punjab an intum dawn. Mizoram hian semi final ah Maharashtra chu 2-1 in an hneh a, Semi final dangah Punjab hian 2-1 in Goa an hneh bawk a ni. Mizoram in final a an tum tur Punjab hi group match ah 2-0 in an lo hnehtawh a ni. Final hi naktuk ah khelh a ni ang

INDIA RAM POLITICS THLIRVELNA
*Nimin khan Delhi ah assembly inthlan neih a ni a, vote tla zat hi 67% a ni. Inthlan zawh a mipui te ngaihdan lakkhawmna exit poll 7 lakkhawm a 5 ah te chuan Aam Aadmi Party ten sorkar thar an siam dawn niin an tarlang.

*Nimin khan Lamtluang ah pawh kan rawn tarlan tawh thin angin Bihar a rorellai Janta Dal (United) party chhung a buaina chhuak avangin legislature party meeting neih a ni a, anni hian hruaitu thar atan an Chief Minister hlui Nitish Kumar chu an thlang a ni. Chief Minister nilai Jitan Ram Manjhi erawh chuan CM post hi ken mai a tum loh thu a sawiin a tul chuan state assembly chu dissolve turin Governor ngen a tum thu a sawi a ni. Bihar hian inthlan an hmabak a, rorellai JD(U) chhungkua a an hotu pahnih Nitish Kumar leh JItan Ram Manjhi te inkar a buaina hian ziaawm lama pan hlei thei lo a ni.

*Nimin khan Odhis state assembly ah RTI activist Niali chu Cuttack district ah thah anih avangin eptu lam ten sorkar hruaitute nasa tak a sawiselin CM hnen atangin thudik puanchhuah an ngiat a ni.

*Nimin khan Goa Investment Promotion Board chuan an chairman Chief Minister Laxmikant Parsekar kaihhruaina hnuai ah hnathar 741 siamna tur rawtna Rs. Vaibelchhe 457 senna tur a ruahman chu an pawm.

*Kolkata a Alipur SDJM Court chuan Saradha Chit Fund Scam avanga man Union Minister hlui Matang Sinh chu tun thla ni 11 thleng CBI custody a atang turin thupek a siam. Nimin vek khan West Bengal police te chuan Chit Fund Company Managing Director chu Vidhan Nagar ah an man bawk.

*Union Minsiter hlui Ghulam Nabi Azad chu nimin khan Jammu & Kashmir atangin Rajya Sabha member thar atan thlan tlin leh a ni. J&K ah hian MP Rajya Sabha thar atan PDP member 2 leh BJP member 1 thlan tlin anni bawk.

*Andhra Pradesh Chief Minister N.Chandrababu Naidu an sorkar laipui hnena an state khawpui thar dinna tur a tanpuina Rs. Vaibelchhe Singhnih a dil chu sorkar laipuiin an pek theih loh tur thu in an chhang.

MTKP ROREL A THU PAWM TE
Mizoram Thalai Kristian Pawl (MTKP) Rorel vawi 61-na chu February 5, 2015-a Mizoram Baptist Kohhran Biak In, Rahsiveng, Lunglei-a neih chu tluang takin an zo ta. He Rorel Inkhawm hi Rev. R. Lalbiakliana, President, Mizoram TKP-in a kaihruai a. Rev. Samuel Lalremsanga, MTKP Organiser-in kum 2014 chhunga Mizoram TKP hmalakna tlangpui report pein Minute Secretary thlanna neih a nih hnu-ah Rorel hi an tan a ni.
THUREL TE :

1. Tlabung chhak Tuikawi hmun hi Mizorama Krismas hmanna hmasa ber a ni a, hei hi Mizoram pum huapa hriat a nih theihna turin MTKP-in a hriatrengna siamin a tul angin hma la rawh se.
2. Zu hian ram leh khawtlang, chhungkua leh mimal nun leh Kristianna thlenga a tihchhiat avangin, kum 2015 chhung hian zu leh a nghawng that lohna hi inzirtir nise, MTKP-in hma la rawh se.
3. Chhim lama kan Missionary ten Mizoram an rahna hmasa ber ‘Missionary Kai’ (Tlabung) hmun hi a hriatrengna tur MTKP hminga siam ni rawh se.
4. Thalai, Lal Isua neilo ten Lal Isua an neih theih nan MTKP pum huap Chawnghei tawngtai neih ni rawh se.
5. Kristian Chhungkaw din kawngah MTKP-in hma la rawh se.
6. Christian Hospital, Serkawn (CHS) a ICU tihchangtlun na’n Unit tinin vawi khat fehchhuah neih nise.
7. MTKP te hian sumtuak fehchhuah hi kum khat ah vawi khat bak neih tawhloh nise.
8. MTKP Inkhawmpui dawltu tanpuina atana Unit hrang hrang te’n fehchhuah kan neih thin hi nei tawh lovin TKP member tin-ah Inkhawmpui tanpuina hi Rs 10/- (Cheng sawm) theuh khawn ni tawh rawh se.
9. AIDS awareness chungchang inzirtirna hi uluk zawkin kum 2015 chhung hian MTKP-in kalpui se.
10. Ram leh khawtlang nun chhe mek hi siam tha turin MTKP-in hma lak ve ni rawh se.
11. MTKP inneih lawmpuina Certificate hi mumal zawka kalpui a nih theih nan MTKP-in hma la rawh se.
12. Sum enkawl dan (management & savings) chungchanga hma lak thu. (Director, Social Concern Dept. BCM)
13. Kumin MTKP Rorel hi Palai kal tam ber tum a ni a, Budget ah Rs 9,00,000.00 (Nuai kua) pawm a ni.
Heng bakah hian FOD (TKP) Inkaihhruaina Dan siam that te pawh a tel a ni.
Kumin hi Rampum huap anga Inkhawmpui awm loh kum a nih avangin Rorel palai tura ruat unit aiawh pakhat theuh leh Bial aiawh pahnih theuh bakah MTKP Executive Committee members leh MTKP OB te chu Rorelna-ah hian an tel .
MTKP Statistic-in a tarlan danin tunah hian TKP te hi Pastor bial 77 ah Unit 396 niin, Member hmeichhia – 14987 leh mipa – 25223, an vaiin member 40120 an ni. Kumin Rorel-ah hian Agenda pangngai 31 leh Inkaihhruaina Dan siamthat (Amend) rawtna 11 zet a lut bawk.
Source: www.mizobaptist.org

*REV.C.VANLALHRUAIA HNENAH DOCTOR OF DIVINITY HLAN A NI
Mizoram Presbyterian kohhran Pastor Senior Rev.C.Vanlalhruaia, Ramhlun Venchung, Aizawl hnenah nimin khan Convocation of Serampore College, Orthodox Theological Seminary, Kottayam, Kerala a neih ah Doctor of Divinity (DD) hlan a ni.

Rev.C.Vanlalhruaia receiving Doctor of Divinity (DD) at Convocation of Serampore College