19th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

19.1.2015

*POLIO VACCINE PEK TAN A NI
Vawiin atang khan naupang kum 5 hnuai lam te hnenah zenghri danna polio vaccine pek tan a ni leh ta a. Hawnna inkhawm hi Aizawl Civil Hospital Auditorium-ah neih niin Health Minister Pu Lal Thanzara chu khuallian a ni.

Pu Lal Thanzara chuan India ram atanga zenghri umbo a lo ni ta chu thawktute thawhrimna leh inpekna rah a ni, tiin an chungah lawmthu a sawi a. India ram chu zenghri awm lohna ram ‘polio free’ ni tawh mahse khawvel hmun thenkhatah zenghri natna hi hmuh a la nih cheu avangin fimkhur taka a umbona hna hi kalpui a la tul a, he hri laka invenna vaccine chu nausen piang hlim atanga kum 5 chin te chuan an la ngei tur a ni, a ti. Minister chuan nu naupaite damdawi iron mum sem thin tlakchham chungchang sawiin a chinfel hna department in a thawk mek a. Kum dangah Iron mum hi a thlawnin sorkar laipui atanga dawn thin a nih laiin tun tum ah erawh dawn a nih tak loh avangin he harsatna hi a lo awm a ni, a ti.

Health Minister chuan thisen sawngbawlna senso phuhrukna atana sum lak tul ta chungchang pawh sawi fiahin sorkar laipui NACO (National AIDS Control Organisation) atanga thisen pekna hmanrua – blood bag, test kit leh mamawh dangte a thlawna dawn thin chu tihtawp niin heng hmanrua leina tur senso 25% chu state sorkar tum tura a phut bakah, tanpuina hrang hrang hmuh thinte tihhniam vak a ni a. Miin thisen a thlawnin pe mahse damlovin a hman theih tura thisen siam nan unit khatah Rs. 1,200 vel sen a ngai thin a, kum khat chhungin thisen sawngbawl man hi cheng nuai tam tak sen ral a ngai thin a. Thisen sawngbawlna senso phuhrukna tur pawisa lak a lo tul ta hi thisen man a ni lo tih hrethiam turin Health Minister chuan mipuite a ngen nghal bawk a ni.

Medical Superintendent Dr.Rosangluaia kaihhruai National Immunization Day for Polio, 2015 hawnna inkhawmah hian Principal Director Dr.K.Ropari leh Director Health & Medical Education Dr. Lalbiakkima te pawhin thu an sawi.

Zenghri umbo beihpui hi India ramah sorkar laipui hmalakna in kum 1995 khan tan a ni a. Rampum huapin he hmalakna hi chak taka kalpui niin Mizoramah chuan kum khatah vawi hnih neih thin a ni. Zenghri venna beihpui hi ramchhung hmun dang ah chuan January ni 18 khan neih tan a ni tawh a, Pathianni a nih avangin Mizoram ah chuan January ni 19 Thawhtanni hian neih tan a ni. Mahni awmna hnai ber sub-center ah leh IPPI Booth tin ah zenghri venna hi a thlawna lak theih a ni. Zenghri venna (Polio Vaccine) hi Mizoram pumah naupang 1,35,086 hnenah pek tum niin, hemi atan hian a lakna hmun tur IPPI Booth 1306 siam a ni. Kum kal ta January 2014 a beihpui thlak a nih khan an target za a za an tlin thei a ni.

Kum 1994 khan India ram pumah zenghri vei mi 35,000 report a ni a. Zenghri umbo beihpui thlak a nih atanga kum 16 a liam hnu kum 2011 ah chuan zenghri vei hi mipakhat chiah hmuh a ni ta a. Hemi hnu hian zenghri vei an awm tak loh avangin March 27, 2014 ah chuan World Health Organisation chuan India ram chu zenghri awmlohna ram ‘Polio Free’ ah a puang ta a ni. Chutihrual erawh chuan ram thenkhatah polio hrik hi hmuh a la nih avangin uluk takin vaccination hi kalpui a la tul a. Ram danga zinchhuak tur reng reng, nausen atanga pitar putar thlengin, an zinchhuah hma thla khatah tal vaccine hi an la ngei tur a ni a. Vaccine an la ngei a ni tih hriatpuina certificate an ken a tul tawh a ni. (DIPR)

*KAWNG SIAM THAT NGENIN PWD MINISTER HMU
Vawiin chawhnu khan Lunglei South Thalai Kawng Tha Duh Pawl aiawh te chuan PWD Minister Pu Lal Thanzara chu a pisaah hmu in A.O.C to Zobawk kawng chungchanga an harsatna tawhte chinfel pui turin an ngen.

Lunglei South Thalai Kawng Tha Duhpawl aiawh te hi an Chairman Ngurthansanga Sailo, Vice Chairman Jacob Vanlaltana leh Asst. Secretary Vanlalliana Pachuau te an ni a. National Highway No.54-A, A.O.C to Zobawk kawngpui siam that a nih theih nan vawi tam tak tlawmngai pawl te kaltlang pawha hma lak a nih tawh hnuah vawiin thlenga kawng siam that a la ni lo chu hriatthiam har an tih thu leh motor khalh thin te’n an tuar piah lamah mipui mimir hriselna thlengin kawng chhia hian a khawih pawi nia ngaiin PWD Minister hnenah a rang thei ang bera siam tha turin ngenna an thlen a ni.

Hemi chungchangah hian PWD Minister Pu Lal Thanzara leh amah tawiawmtu PWD Chief Engineer (Highways) Pu John Rammawia leh SE Pu Henry Lalmuankima te chuan he kawng siam that an ngaih pawimawh thu leh a siam tur contractor pawh thlan fel thuai an beisei thu an sawi a. Tum nga lai a thawk tur contractor zawnga tender an chhuah hnuah chhangtu an awm theih loh avanga harsatna an tawh dan te an hrilhfiah a ni.

PWD hotute tarlan danin Lunglei chhim lam kawng NH-54A, Lunglei (A.O.C Ramthar) atanga Hrangchalkawn kawngpui siam tha tur hian Ministry of Road Transport & Highways chuan March 31, 2014 khan cheng nuai 493.04 a sanction a. Tender hmasa ber chu 4.3.2014 ah tihchhuah niin online e-tendering chu technical problem a awm avangin cancel a ni a. 23.05.2014 ah tender chhuah nawn leh a ni a. National Highway a nih avangin sorkar laipui MoRTH kaihhruaina zawm a tul a. MoRTH phut angin single tender a chhuah lovin tender pahnih a then a ni a. Tender hi mi pakhat chauh chhangtu an awm avangin 30.09.2014 ah tender chhuah nawn leh a ni a, a vawi li na atan 30.10.2014 ah tender tihchhuah a ni leh a. Tender vawi li chhuah a nih hnuah pawh a thawk duh contractor an awm leh tak loh avangin a vawi nga na atan 8.12.2014 ah tender dang chhuah leh a ni a. Contractor pahnih in an chhang ta a, tunah hian tender document enfiah sak mek an ni a. Dan anga tih fel a nih veleh contractor thlan hian hna a thawh tan nghal PWD hotute chuan an beisei a ni. (DIPR)

*ISIS TEN TUAI LEH HMEICHHE UIRE TIHLUM
Islam firfiak pawl ISIS te chuan kar hmasa Ningani leh Zirtawpni khan thlalak thehdarh in mipa tuai 2 tower atangin thiturin an nam thla a, hmeichhe pakhat uire chu lungin an deng hlum a, mipa 17 an mahni dodaltute kraws ah an khengbet bawk. ISIS te hian Islam sakhaw dan kalh a awm leh an pawl dodaltu te chungah hetiang hian ro an rel zel dawn niin an sawi.

15th - 18th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

18.1.2015
*PATHIANNI ZING CHANCHINTHAR TAWI LAWRKHAWM
* Niminpiah khan Saitual, Keifang, Rulchawm leh Ruallung khua te tui tlan tur Greater Saitual Water Supply Scheme hna kallai chu Home Minister Pu R.Lalzirliana, bialtu MLA ni bawk leh PHE Minister Pu Zodintluanga ten an tlawh a. He project atana sum ruahman Rs. 21,53,20,000/- hi NLCPR atanga hmuh niin Excelsior Merchants Private (Ltd), Kolkata ten contract hi an thawk a ni. Tuilakna hmun, raw water pump house hi Tuivawl Luiah siam mek a ni. (DIPR)

*Zirtawpni zan zanlai atang khan India ram pum ah tuialhthei man tih hniam a ni a, Petrol 1 litre ah Rs.2.42 leh Diesel 1 litre ah Rs.2.25 a tihhniam a ni.

*India Republic day a khuallian tur US President Barack Obama rawn veng turin US sipai leh intelligence lam mi 1,600 vel an lo kal dawn.

*Nimin khan Delhi ah swine flu natna vei mi 10 hmuchhuah belh anni a, kumin chhungin he natna ve hi Delhi ah mi 108 an tling tawh a ni.

*Roman Catholic puithiam lu Pope Francis chuan kum kalta lama Philippines ram a telphawk thli tleh (Typhoon Haiyan)tuartu te awmna Tacloban a tlawh.

*Nimin khan India in amah a siam chhuah indo thlawhtheihna te chi ( Light Combat Aircraft) Tejas chu Indian Air Force te hman turin Bengaluru ah Union defence minister Manohar Parrikar an IAF hotute hnenah a hlan fel ta.

*Punjab state sorkar chuan an state chhung ah 'Messenger of God' tih film chu buaina chhuah hlauhthawn vangin chhuah an khap.

*EPL- Chelsea in 5-0 in Swansea an hneh.

*Ziaktu lar Louise Hay-i chuan nileng a rilru zangkhai taka awm i duh chuan zing i thawh veleh darthlalang ah inen la, nui var var chung in nangma hming sawi la "Ka hmangaih che" ti thin rawh a ti. Mahni intihhlim luih hram hram a, mahni taksa ngei 'ka hmangaih che' han in tih hian rilru lam thleng in kan vei leh inthiam lohna nasa tak atangin min ti zangkhai thei thin a ni a ti.


*LUNGLEI AH FM RADIO CHANNEL HAWN BELH DAWN
Nimin khan Union Minister of State of Development of North Eastern Region Dr. Jitendra Singh chuan India hmarchhak leh Jammu and Kashmir ah te FM radio channel hawn belh a nih tur thu a sawi. Heng zingah hian Lunglei, Mizoram pawh a tel ve a ni. Hmarchhak bial a FM channel thum hawn belh na tur khua te chu - Lunglei bakah Haflong leh Dhubri (Assam), Jowai (Meghalaya), Mokukchung (Nagaland) leh Belonia (Tripura) te anni.

*HIGH COURT IN ENGATINGE INDIA MI TE TAN NILO A US PRESIDENT TAN CHAUH? TIH A ZAWT
US President Barack Obama India Republic Day hmanpui tur a rawn kal dawn vangin sorkar in Delhi khawpui ah CCTV 15,000 dah thar a ni a, hemi chungchang ah hian Delhi High Court chuan Zirtawpni liamta khan sorkar laipui leh Delhi state police te hnenah "Ramdang President a lo kal 

16.1.2015
*Nimin khan Horticulture Minister Pu P.C. Lalthanliana, Parliamentary Secretary Pu K. Lalrinthanga leh Parliamentary Secretary leh bialtu MLA ni bawk Pu Hmingdailova Khiangte te chuan Hortoki khua tlawhin Tlawng kam nul-a Hortoki khua chhungkaw 200 dawn ten thlai huan an siam te chu a hmuna kalin an hmalakna te an enpui a. He programme-ah hian Pu P.C. Lalthanliana chuan kuthnathawktute leh thlai chingtute hi Sawrkar chuan a thu nilovin a takin a ngaituaha, an hmakhua te chu engtik lai pawha Sawrkarin a ngaihpawimawh a ni, a ti a. Kuthnathawktute hmalakna a hmun ngeia kal a, enpui an duh avangin ama hova Parliamentary Secretary pahnih ten nen Hortoki khua ah thlai chingtu te hmalakna leh hlawhtlinna a thu an hriat thin chu mit ngeia hmuh a duh avangin a hmuna enpui a, Sawrkar angin enge tih thei awm te, enchian leh hrethiam tura lo an nih thu a sawi a. “Hausak tumin thawk lovang ang u, hlawtling turin thawk zawk ang u” tiin he hunah thlai chingtu kalkhawmte chu a chah a. Thlai an la chin ngai loh ang chi tomato, broccoli leh adangte pawh Kolasib Horticulture Division hmalaknain Hortoki ah bultan tum a nih thusawiin tih takzeta kuthnathawktu ten an thawh zel chuan Sawrkarin a theih ang angin a pui zel dawn a ni, a ti.

Thlai chingtu leh kuthnathawktu ten an mahni thawhrimna phu tawk anga an thawh rah an seng a pawimawh thusawiin chu chu hre reng chunga kharchhawngtu ten anmahni an duhsak a tul a ni, a ti a. Thil sem te hi mimal anga tih sen anih loh vangin intawma thil hman te hi Farmer’s Interest Group, Community Water Tank angtea kaltlangpui anih hian mi tam zawkin a hlawkna an tel thei nia a hriat thu a sawi bawk.

Nimin vek khan Horticulture Minister Pu P.C. Lalthanliana chuan Hortoki khua a thlai chingtu ten tangkai taka an hman atana RKVY hnuaia Pack House leh Godown sak thar te leh Tlawngkam Damdiai Thlangta Zau a Community Water Tank pahnih leh Tlawngkam Zau a Individual Water Tank siam te chu a hawng nghal bawk a ni. Thlai thar dah khawmna tur kudam hi feet 36 a sei leh feet 15 a zau a ni a; a chhung ah hian Motor lian phur 10 zeta tam dah khawm theih beisei a ni. Thlai thar dah thatna tur Pack House feet 16 a sei leh feet 10 a zau siam a ni a; a chhungah thlai chhe hma zual bik dahna tur Cold Room pawh siam nghal a ni bawk. Tui dah khawlna tur hmun Community Water Tank 2 siam ah hian tui litres 98125 ve ve leng thei tura siam a ni a. Hei bakah hian hmun dangah Individual Water Tank siam ah hian tui litre 25800 a dah thei a ni.

Farmer’s Interest Group panga ah hian mi 20 zela in thenin a vain mi 100 an awm a, Group tin account ah hian sumfai cheng 1,71,500 theuh dahsak an ni a. He sum hmang hian kum danga pawisa neih loh vanga an tih theih loh pawh an tih theih phah beisei a ni a. Thlai thar an hralh hunah an hnawh khat leh zel dawn a ni.

Hortoki khua ah hian in 600 vel a awm a, za zelah chhungkaw 80 vel chu huan neia thei leh thlai chinga eizawng tute an ni a. Chhungkaw 200 vel hian Tlawng kam nul ah hian huan siamin thlai chi hrang hrang an ching a, an thlai tharchhuah te hi kharchhawngtute an hmuna kalin an leisak thin a. Mai-te, mai, bean leh antam leh thlai dang an tharchhuah te hi Aizawl leh a chhehvel chhawmtu ber a ni, heng bakah hian vaimin leh kawlbahra te pawh an hralhchhuak nasa bawk. Thlai an chinna ah hian hlo leh fertiliser eng chi mah an hman loh avangin an tharchhuah hi tunlai khawvel in a ngaihsan ber ‘organic product’ a ni nghe nghe a ni.

Tlawng kam nul ah te hian thal lai October thla tawp lam atangin thlai an ching tan thin a, February thla tawp thlengin thlai an ching thei a, fur ah chuan heng ram te hi tui in a chim avangin huan a siam theih lo a ni. Thla 4 lek thlawhhma an nei chhung pawh hian chhungkaw tam takin an thawhrimna rah an seng a. Tin 3 hmuna thlai chi hrang hrang chingtu Pu Challianngura chuan ‘Thla 4 chhungin hah takin kan nupa in kan thawk a, thlai nuai 3 man vel kan lei thei a, kharchhawngtu hnenah pe lovin Aizawl lamah mahni in hralh thei ila chuan kan hah man tha zawk kan hmu thei ang’ a ti.

Nikum khan bean chi quintal 10 leh mai chi quintal 1 chu Horticulture Department chuan Hortoki khua a mi an leisak. Nikum khan Hortoki khua hian thlai nuai 80 atanga nuai 100 man hu an hralhchhuak a. Hortiki khua hi Seed Village atan Sawrkarin a lo puang tawh bawk a ni.

Tunhnai khan Horticulture Department hnuaia Horticulture Division Office  Kolasib chuan chak takin hma an la mek a. Hortoki khua ah hian Farmer’s Interest Group te an dinpuia, thlai chi, pipe leh tui pump khawl te semin thlai tui pekna turte an ruahman a, thlai chi hrang hrang chinna tur Unit 54 RKVY hnuaia an kalpui mek a. Tui pump khawl an sem leh thlai tui pekna tur Horticulture Department in an ruahman hian kum danga thlai an chin theih lohna hmuna te pawh thlai an ching thei tura beisei a ni a, hei hian an tharchhuah pawh a tih tam ngei beisei a ni bawk. (DIPR)

**UNION HEALTH MINISTER LO ZIN DAWN
Ministry of Health and Family Welfare enkawltu Union Minister Pu J.P. Nadda lo zin tur chungchang ngaihtuahin nimin khan Chief Secretary Pu Lalmalsawma,IAS hovin Chief Secretary Conference Hall-ah meeting pawimawh neih a ni a, thil tul leh a kaihhnawih chi hrang hrang chipchhiar takin thlir ho a ni.

Union Minister hian ni khat chamin January ni 30 hian Mizoram a rawn tlawh dawn a. Imphal atangin Helicopter- a Aizawl rawn lutin Regional Institute of Paramedical and Nursing Sciences (RIPANS) a tlawh ang a. RIPANS Board of Governors (BOG) meeting a kaihhruai hnuah building thar sakna tur lungphum a phum nghal ang a. Hemi ni vek hian Aizawl a chhuahsan leh ang. (DIPR)

*MI FIRFIAK NIA RINHLELH 2 KAPHLUM
Nimin Ningani khan Begium police ten an ram khawchhak lama Verviers khawpui ah mi firfiak nia rinhlelh mi pahnih an kaphlum. An mi kahhlum te hi man tum a an hual laiin an mahniin police te an rawn kaphmasa a ni. An inkahna hmun hi train station bul lawk a ni.
 

15.1.2015
*A hmaa kan rawn post tawh angin Kiran Bedi, IPS(Retd.)chuan vawiin tlai khan BJP a zawm ta. Delhi Assembly inthlan ah a in candidate dawn a ni.

*MLPC ACT HMANG A RECORD SIAM
Vawiin atanga hman tan MLPC Act 2014 tlawhchhanin vawiin khan Chief Judicial Magistrate, Vanlalena chuan Lalremliana s/o Laltluanga, Lunglei Venghlun chu thla khat chhung Jail tang turin a hrem. Lalremliana hi vawiin ațanga hman țan tak MLPC Act hnuaia district Jail tang hmasa ber niin hriat a ni. A zurui in thenawm khawveng te tan a hnawksak khawp a bengchhen a siam avanga man a ni.

Source: Kiddy Vanchhawng

*DELHI POLITICS THUTHANG
India rama hmeichhe IPS hmasaber, Mizoram ah pawh rawn awm tawh Kiran Bedi chuan BJP a zawm dawn niin an sawi. BJP a zawm dawn anih chuan Delhi assembly inthlan lo awm turah AAP hruaitu Arvind Kejriwal a khing dawn ni a sawi a ni.

*VAWIIN ATANGIN MLPC ACT HMANG TAN DAWN
Mizoram sorkar chuan vawiin atangin zukhap burna dan MLTP Act thlakna tur Mizoram Liqour (Prohibition and Control) Act 2014 chu a hmang tan dawn ta. MLPC Act hman tan ni dawn mahse a dan kaihhnawih thenkhat peih kim loh ala awm avangin zu zawrh a la ni dawn lo a ni. Zu lei theihna licence dilna form chu district tinah semchhuah tawh a ni.

*DELHI AH CHRISTIAN BIAK IN SUASAM
Nimin zing dar 4:18 khan Delhi a Vikaspuri veng a Our Lady of Graces biak in chu misual pahnih in sawisa in biak in bang darthlalang leh Mari lim an ti tlu a ni. CCTV a alan dan chuan misual pakhat zawk hi scooter a lo kalin biak in ah hian tawngtai tur ni awm takin a lut a, hmanhmawh takin biak in bang darthlalang chu a susam a, a tlanchhe nghal a, reilote ah a thianpa nen lo kir leh in Mari lim an rawn suasam leh a ni. Hemi.hnu hian scooter in an tlanchhe leh ta a ni. Police ten case an ziaklut tawh a pawikhawihtute hi an zawng mek a ni. He thil thleng hi chawlhkar ruk chhung a misual in Delhi khawpui a Kristian biak in an suasam vawi 4-na a ni.

*Thawhlehni zana Aizawl Tuikhuahtlang a pawngsual rawn athleng anga whatsapp lama thudiklo thehdarh tan tu chu police ten an chhui mek.

*GERMANY PALAIIN MIZORAM CM HMU
Zan hnih riaka Mizoram rawn tlawh, Pu Rainer Schmeidchen, Consul General, Federal Republic of Germany, Kolkata chuan nimin tlai dar 6:30 pm khan Chief Minister Pu Lal Thanhawla chu a chenna bungalowah a hmu. Chief Minister leh Consul General te hi inkawmna hun tha tak an hmang a, duhsakna thilhlan in pe ve vein Schmeidchen hian Mizo thalai ten football an tuipui hle a ni tih a hriat thu lantir nan Chief Minister hi Football German Flag lanna pe a, Mizoram sorkar in an thleng zo anih chuan German football trainer tha tak a pek theih tur thu a hrilh a ni.

Consul General Rainer Schmeidchen hi niminah Aizawl lo thlengin,MHIP hruaitute nen inkawmin Hotel Regencyah zanriah an kilho a. Nimin khan Bishop of Aizawl te, Mizoram Football Association hruaitute, Higher & Technical Education Director te, Chief Secretary leh Principal Secretary, PWD te alo hmu bawk a ni.

Consul General hi kum 2012 khan Mizoram a rawn tlawh tawh a, tun tumah hian a nupui Dr.Annette Schmeidchen in rawn tawiawmin, vawiinah Kolkataah an kir leh ang. (DIPR)

*SRI LANKA SORKAR IN POPE IN A TLAWH PUALIN MITANG CHHUAH
Sri Lanka sorkar chuan an ram Pope Francis an a tlawh denchhen in mitang case lian neilo 572 te an chhuah. Pope Francis hian nimin khan Sri Lanka a kum zabi 17-na a missionary thawk thin Joseph Vaz chu mithianghlim ah a puang a ni. Joseph Vaz hi Goa lam chhuak niin Sri Lanka ah hian a thihthleng in Pathian rawng bawl in a awm a ni.

11th - 14th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

14.1.2015
*INDIA AH MOBILE INTERNET HMANGTU MAKTADUAI 40 TLING THUAI DAWN
Internet and Mobile Association of India (IAMAI) leh IMRB International te report a alan danin thla ruk chhung in India a mobile phone atanga internet hmang tu mi maktaduai 40 an tling dawn niin an sawi. Nikum December thleng khan India ah mobile phone hmanga internet hmang thin mi maktaduai 173 an awm a, kumin June thla ah chuan maktduai 213 an tlin hman beisei a ni. Tunah hian mobile phone atanga internet ngawrh tak a hmang thin zingah hian khawpui tangin 76% an awm a, thingtlang atangin 66% an awm thung a ni. A bikin thingtlang (khawpui lian lo zawng) a mobile phone atanga internet hmang an pun chak na chhan hi handset internet hman theihna man a tlawm tak vang leh operator ten internet hmanna tur package an siam that vang a ni ber a ni. Social networking site, email leh online shopping te chu an hman tamna ber a ni bawk.

*CHANCHINTHAR TAWI LAWRKHAWM
*Vawiin ah Mizoram District khawpui tinah 'Kut Hanthawktute Ni' hman a ni dawn a. Aizawl ah chuan Synod Conference hall-ah chawhma dar 11:00am atanga tanin
Chief Minister Pu Lal Thanhawla Khuallian a ni ang. Chawhnu lamah Rev.K.Thanzauva leh Dr.Robert S.Halliday te paper buatsaih hmangin Seminar neih chhunzawm a ni ang.

*Nimin khan Interbank Foreign Exchange
(Forex) market ah India pawisa hlutna paise 2 in a pung a, US $1 leh India Rs.62.14 a intluk a ni.

*Malawi ah tuilian vangin mi 43 an thi a, mi 23,000 chenna mumal nei lo in hmun him lamah an in suan phah.

*Samsung chuan vawiin hian India a ahmasaber turin an mobile phone model thar Tizen OS-powered hmang chi Z1 phone (SM-Z130H) chu New Delhi ah an tlangzarh dawn ni a sawi a ni, aman Rs.5,700 a ni ang.

*Roman Catholic Puithiam lalber Pope Francis chuan nimin khan ni hnih cham turin Sri Lanka khawpui Colombo a thleng.

*Internet hmanga thil zawnna lar tak google chuan India ramah a vawi khatna atan thlawhtheihna a zin tum te tana hman tangkai theih turin 'flight search' an telh ta. Google atanga thil i zawn khan flight search option atang khan ticket man leh thlawhna thlawh rei chhung tur te i hre thei tawh ang.
 

13.1.2015
*LARSAP IN CHHIAT TAWK CHHUNG TE RAL
Governor Dr. Aziz Qureshi chuan vawiin tlai khan January 9, 2015 a vanduaina namenlo tawka tualthihna rapthlak tak tawk Sangliansiama te chhungkua chu an chenna In Republic Vengah a ral a. An chhungkaw zinga damkhawchhuak awm chhun Tv. Lalhriatpuia hnenah pawisa Rs 5,000/- ( cheng sang nga ) a hlan a ni.

Dr. Aziz Qureshi chuan Pu Sangliansiama te chhungkaw thihna chu pawi a ti takzet tih sawiin misual hian Dan anga na taka hrem a phu a ni, a ti a. Mizoram alo thlen hnu lawka hetiang thil rapthlak lutuk a thleng ta mai hian a barakhaih takzet a, mithite chhungkua bakah Mizoram mipui te a tawrhpui hle a ni, a ti a. Tun hnuah hetiang thil sual hi thleng tawhlo se a duhthu a sawi a ni.

Tv. Lalhriatpuia, chhungkaw zinga dam khawchhuak awm chhun chu Governor hian a tawrhna te hnemin a mamawh huna amah pan hrehlo turin a chah bawk a ni. (DIPR)

*LENGPUI AIRPORT ATANGA THLAWHCHHUAH TUM LUNGPHU CHAWLIN BORAL
Vawiin a Lengpui Airport a Jet Airway thlawkchhuak tura chuang ve tur, NBCC a thawk hnamdang anmahni khaw lama haw tur chu, Boarding ve hmanlo in, checking tih lai in lungphuchawl in a boral.

Source: Esther R. Fanai

*SUMO ACCIDENT AH MI 3 BORAL
Nizan dar 12 pelh khan Sialsuk leh Thenzawl inkar ah sumo AS-01 C-3061 a chesual a, mi 12 an chuang a, mi 3 an boral a, mi 3 dang Sialsuk PHC ah enkawl mek anni. An vai hian hnamdang (vai) vek anni.

12.1.2015
*DELHI ASSEMBLY INTHLAN HUN PUANG
Election Commission chuan Delhi assembly inthlan hun atan February ni 7 a ruat, vote chhiar ni atan February ni 10 a ni ang. Kan rawn post thin tawh angin Delhi assembly ah hian Aam aadmi party ten Congress thlawpna nei a reilo te sorkar an siam hnuah sorkar a buai chhoh tak zel avangin inthlan that an hmachhawn leh angai ta a ni.

*Mi in accident an tawhna hmunah a hmu hmasa tu zingah i tel ve a nih chuan i phone camera nilo in i tanpuina kut pe la, i ngaihtuahna fim hmang thin zawk ang che. Mi chhiat tawhna thlalak thehdarh hi a puitling zia lo a ni.

*COURT IN NRI TE TAN VOTE THLAK THEIHNA NGAIHTUAH TURIN TI
Vawiin ah Supreme Court in sorkar laipui hnenah hriattirna pe in India mi ram dang a awm Non-Resident Indian ten vote an thlak ve theih nan a e-vote hman theih na tur chawlhkar 8 chhungin tifel turin a ti.

*COMPANY TAM TAK TEN GUJARAT AH AN PAWISA PEIPUN AN TUM
Nimin a Gujarat khawpui Gandhinagar a Vibrant Gujarat Summit nikhatna ah company tam takin Gujarat sorkar nen a sum peipunna kawng a thawhho na turin inremna an ziak. Heng corporates, medium leh small scale industries te hian Gujarat state chhung a an sum peipun (investment) na tur a an inhuamna zat chu Rs. Vaibelchhe nuai 10 a chuang a ni.

*UGC IN UNIVERSITY LEH COLLEGE AH GRADING SYSTEM HMANG VEK TURIN TI
University Grants Commission (UGC) chuan 2015-16 atangin India ram a university leh college zawng zawng ah semester system hmang vek tawh tur leh zirlai te mark pek nan grading system hmang vek tawh turin hriattirna a chhuah. Hei hi university thenkhat in zirlai te mark pek nan a numerical system an la hman tihtawp na tur a ni. UGC hian university zawng zawng te chu an mahni leh an hnuaia college zawng zawng ah zirlai te tan choice-based credit system (CBCS) leh credit framework for skill development (CFSD) hmang turin a hriattir bawk. CBCS hnuaiah hian zirlai ten foundation, elective leh core subject te an zir thei dawn a ni. Zirlai te hian semester tin core subject an zir thei ang a, elective subject ah an subject nen a inlaichinna neilo chi pawh an la tel thei tawh dawn a ni. Foundation course ah colpulsory leh elective subject te telh a ni ang.

*INDIA ECONOMY 6.4% AH KAI HMAN BEISEI
World Bank President Jim Yong Kim chuan kumin chhungin India ram economy chu 6.4% a athan chhoh hman a beisei thu a sawi. Hemi atan hian sorkar in chhiah lakkhawm leh man tlawm zawk a mipui te tan a thil a pek chhuah thin te siamthat a tul a ni a ti.

11.1.2015
*ASSAM AH TERRORIST 12 MAN
India leh Bhutan inrina Assam a Chirang district huamchhung ah police ten firfiakpawl a mi 12 an man, an zingah hian National Democratic Front of Bodoland a mi man ngei ngei tur a duh mi 2 an tel a ni. An hnen atang hian AK Rifles 4, rifle 2 leh pistol 5 man sak a nih vakah ralthuam dang te pawh man a ni. Police ten thu an zawt fiah mek a ni.

9th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

9.1.2015

*BREAKING NEWS UPDATE
Republic veng a vanduaina tawkte: 
1.Sangliansiama (53)
2.Vanlalchhungi (50),
3.Khualthangi (53),
4.Isaac-a (6),
5.Samuela (Pu Siama farnu fa). Kum 13 vel mi.

A thattu: Parsasata fapa Laltlanchhuaha(Matlana) (33 vel), Republic thlanmual bul.

Misual in an vih tho damdawiin a thi ta naupang kum 5 vel mi chu Civil mitthi dahna ah Dawrpui YMA in an awmpui mek bawk. A thattu pa scooty hi mipui thinrim in an hal a, ruang te hi Aizawl Civil Hospital a post mortem turin Republic veng tlangval ten ke in an zawn chho dawn a, vengchhung tlangval zawng zawng kal vek turin tiin an au a ni

*MIZORAM BREAKING NEWS UPDATE
Zanin dar 8:00 pm vel khan Aizawl a Republic venga Springfield Higher Secondary school building neitu Pu Sangliansiama te inah misual 3 nia hriat lutin inchhunga loawm mi 4 chu chemte in an vit a, a hmun ah paber Sangliansiama leh nuber Khualthangi leh an fa pakhat thi nghal in naupang kum 5 mi chu damdawiin pan pui a nih laiin a thi leh bawk, an awmpuinu chu bual in ah a biru hman a a him nia sawi a ni. Heng misual zinga pakhat hi chu an man hman a, mipui ten khawih an tum a, police ten an dang mek a ni. Pu Sangliansiama fapa Lalhriatpuia chu office a la ban hman loh avangin inah a awmlo a him bawk a ni.

Angry mob burnt miscreant scooty

 

Miscreant killed one family members in Aizawl, Republic veng

Miscreant killed one family members  in Aizawl, Republic veng

*MIZORAM GOVERNOR THAR LALUT
Mizoram Larsap thar atana ruat Dr. Aziz Qureshi chu vawiin tlai dar 4 khan Raj Bhawan-ah rinawmna thu tiam tira Mizoram Governor 15-na atan lakluh a ni a. Governor lakluhna inkhawm ah hian Chief Secretary Pu Lalmalsawma, IAS chuan President Dr. Pranab Mukherjee’n, Dr. Aziz Qureshi, Mizoram Governor atana a rawn ruatna lehkha Warrant of Appointment a chhiarchhuah hnuin Gauhati High Court Judge thar Justice Michael Zothankhuma’n rinawmna thu tiam tirin Dr. Aziz Qureshi hi Mizoram Governor atan lakluh a ni.

Larsap thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister-
te, Parliamentary Secretary-te leh MLA te bakah Sorkar mi pawimawh thahnem tak an tel.

Larsap thar hi kum 74 a upa niin February ni 3, 1940 khan Bhopal-ah a piang a. Government Hamidia College, Bhopal; Agra University; Vikram University, Ujjain; leh Bhopal University atangtea zirchhuakin MA (Political Science), MA (Arabic), MA (Urdu Literature), LL.B., Ph. D (Political Science) leh D.Lit. (Honoris Causa, Aligarh Muslim University-in a hlan) degree te nei a ni. Kum 1972 leh 1977 inkar khan MLA niin hemi chhung hian Madhya Pradesh Sawrkar-ah Minister niin Power & Irrigation Minister leh Education & Endowments Minister te a ni a. Kum 1988 khan Satna bial atangin MP atan thlan tlin a ni bawk. May ni 15, 2012 leh December ni 30, 2014 inkar khan Uttarakhand Governor niin June ni 22 2014 leh July ni 22, 2014 inkar khan Uttar Pradesh Governor hna a hmui bawk a ni.

Zirna lam abik takin Urdu tawng zirna lamah sulsutu niin Founder Vice Chairman of National Council for Promotion of Urdu Language nihna leh Central Urdu University dinna atana Sawrkar Laipuiin a din Urdu University Committee-a Chairman nihna te a chelh tawh bawk a ni. (DIPR)

 

Aziz Qureshi sworn in as Mizoram's 15th Governor, Aizawl Raj Bhavan

*Zonet Breaking News: Lalnunmawia Zadeng, Zarkawt veng thattu nia rinhlelh chu police-te'n an man a, amah hi Vanramropuia s/o. Juman Singh {(alias Zoramsanga (L)}, Thuampui veng a ni. Amah hi jail ah thawn ni tawhin thu kan dawng.

 

*JAMMU AND KASHMIR AH GOVERNOR RULE PUAN A NI
India hmar tawp state Jammu and Kashmir ah political party sorkarna siam thei an awmloh avangin Governor rule puan a ni. State rorelna chu union cabinet thurawn angin Governor kut ah a awm dawn a ni. Nizan khan Chief Minister Omar Abdullah chuan caretaker CM anihna atangin banna a thehlut a ni. Kan rawn tarlan tawh thin angin nikum December ah khan J&K ah hian assembly inthlan neih a ni a, tun thleng hian political party tumah in sorkar siam thei khawp in member an ngah tawk lo vek a ni.

 

*SRI LANKA PRESIDENT THAR
Sri Lanka President 7-na turin eptu hruaitu Maithiripala Sirisena chu thlan tlin a ni. Zanin dar 6 ah rinawmna thu tiam tirin lakluh a ni dawn. President nilai Mahinda Rajapaksa chu vote nuai 4 leh a chanve chuangin a hneh a ni.