11th - 14th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

14.1.2015
*INDIA AH MOBILE INTERNET HMANGTU MAKTADUAI 40 TLING THUAI DAWN
Internet and Mobile Association of India (IAMAI) leh IMRB International te report a alan danin thla ruk chhung in India a mobile phone atanga internet hmang tu mi maktaduai 40 an tling dawn niin an sawi. Nikum December thleng khan India ah mobile phone hmanga internet hmang thin mi maktaduai 173 an awm a, kumin June thla ah chuan maktduai 213 an tlin hman beisei a ni. Tunah hian mobile phone atanga internet ngawrh tak a hmang thin zingah hian khawpui tangin 76% an awm a, thingtlang atangin 66% an awm thung a ni. A bikin thingtlang (khawpui lian lo zawng) a mobile phone atanga internet hmang an pun chak na chhan hi handset internet hman theihna man a tlawm tak vang leh operator ten internet hmanna tur package an siam that vang a ni ber a ni. Social networking site, email leh online shopping te chu an hman tamna ber a ni bawk.

*CHANCHINTHAR TAWI LAWRKHAWM
*Vawiin ah Mizoram District khawpui tinah 'Kut Hanthawktute Ni' hman a ni dawn a. Aizawl ah chuan Synod Conference hall-ah chawhma dar 11:00am atanga tanin
Chief Minister Pu Lal Thanhawla Khuallian a ni ang. Chawhnu lamah Rev.K.Thanzauva leh Dr.Robert S.Halliday te paper buatsaih hmangin Seminar neih chhunzawm a ni ang.

*Nimin khan Interbank Foreign Exchange
(Forex) market ah India pawisa hlutna paise 2 in a pung a, US $1 leh India Rs.62.14 a intluk a ni.

*Malawi ah tuilian vangin mi 43 an thi a, mi 23,000 chenna mumal nei lo in hmun him lamah an in suan phah.

*Samsung chuan vawiin hian India a ahmasaber turin an mobile phone model thar Tizen OS-powered hmang chi Z1 phone (SM-Z130H) chu New Delhi ah an tlangzarh dawn ni a sawi a ni, aman Rs.5,700 a ni ang.

*Roman Catholic Puithiam lalber Pope Francis chuan nimin khan ni hnih cham turin Sri Lanka khawpui Colombo a thleng.

*Internet hmanga thil zawnna lar tak google chuan India ramah a vawi khatna atan thlawhtheihna a zin tum te tana hman tangkai theih turin 'flight search' an telh ta. Google atanga thil i zawn khan flight search option atang khan ticket man leh thlawhna thlawh rei chhung tur te i hre thei tawh ang.
 

13.1.2015
*LARSAP IN CHHIAT TAWK CHHUNG TE RAL
Governor Dr. Aziz Qureshi chuan vawiin tlai khan January 9, 2015 a vanduaina namenlo tawka tualthihna rapthlak tak tawk Sangliansiama te chhungkua chu an chenna In Republic Vengah a ral a. An chhungkaw zinga damkhawchhuak awm chhun Tv. Lalhriatpuia hnenah pawisa Rs 5,000/- ( cheng sang nga ) a hlan a ni.

Dr. Aziz Qureshi chuan Pu Sangliansiama te chhungkaw thihna chu pawi a ti takzet tih sawiin misual hian Dan anga na taka hrem a phu a ni, a ti a. Mizoram alo thlen hnu lawka hetiang thil rapthlak lutuk a thleng ta mai hian a barakhaih takzet a, mithite chhungkua bakah Mizoram mipui te a tawrhpui hle a ni, a ti a. Tun hnuah hetiang thil sual hi thleng tawhlo se a duhthu a sawi a ni.

Tv. Lalhriatpuia, chhungkaw zinga dam khawchhuak awm chhun chu Governor hian a tawrhna te hnemin a mamawh huna amah pan hrehlo turin a chah bawk a ni. (DIPR)

*LENGPUI AIRPORT ATANGA THLAWHCHHUAH TUM LUNGPHU CHAWLIN BORAL
Vawiin a Lengpui Airport a Jet Airway thlawkchhuak tura chuang ve tur, NBCC a thawk hnamdang anmahni khaw lama haw tur chu, Boarding ve hmanlo in, checking tih lai in lungphuchawl in a boral.

Source: Esther R. Fanai

*SUMO ACCIDENT AH MI 3 BORAL
Nizan dar 12 pelh khan Sialsuk leh Thenzawl inkar ah sumo AS-01 C-3061 a chesual a, mi 12 an chuang a, mi 3 an boral a, mi 3 dang Sialsuk PHC ah enkawl mek anni. An vai hian hnamdang (vai) vek anni.

12.1.2015
*DELHI ASSEMBLY INTHLAN HUN PUANG
Election Commission chuan Delhi assembly inthlan hun atan February ni 7 a ruat, vote chhiar ni atan February ni 10 a ni ang. Kan rawn post thin tawh angin Delhi assembly ah hian Aam aadmi party ten Congress thlawpna nei a reilo te sorkar an siam hnuah sorkar a buai chhoh tak zel avangin inthlan that an hmachhawn leh angai ta a ni.

*Mi in accident an tawhna hmunah a hmu hmasa tu zingah i tel ve a nih chuan i phone camera nilo in i tanpuina kut pe la, i ngaihtuahna fim hmang thin zawk ang che. Mi chhiat tawhna thlalak thehdarh hi a puitling zia lo a ni.

*COURT IN NRI TE TAN VOTE THLAK THEIHNA NGAIHTUAH TURIN TI
Vawiin ah Supreme Court in sorkar laipui hnenah hriattirna pe in India mi ram dang a awm Non-Resident Indian ten vote an thlak ve theih nan a e-vote hman theih na tur chawlhkar 8 chhungin tifel turin a ti.

*COMPANY TAM TAK TEN GUJARAT AH AN PAWISA PEIPUN AN TUM
Nimin a Gujarat khawpui Gandhinagar a Vibrant Gujarat Summit nikhatna ah company tam takin Gujarat sorkar nen a sum peipunna kawng a thawhho na turin inremna an ziak. Heng corporates, medium leh small scale industries te hian Gujarat state chhung a an sum peipun (investment) na tur a an inhuamna zat chu Rs. Vaibelchhe nuai 10 a chuang a ni.

*UGC IN UNIVERSITY LEH COLLEGE AH GRADING SYSTEM HMANG VEK TURIN TI
University Grants Commission (UGC) chuan 2015-16 atangin India ram a university leh college zawng zawng ah semester system hmang vek tawh tur leh zirlai te mark pek nan grading system hmang vek tawh turin hriattirna a chhuah. Hei hi university thenkhat in zirlai te mark pek nan a numerical system an la hman tihtawp na tur a ni. UGC hian university zawng zawng te chu an mahni leh an hnuaia college zawng zawng ah zirlai te tan choice-based credit system (CBCS) leh credit framework for skill development (CFSD) hmang turin a hriattir bawk. CBCS hnuaiah hian zirlai ten foundation, elective leh core subject te an zir thei dawn a ni. Zirlai te hian semester tin core subject an zir thei ang a, elective subject ah an subject nen a inlaichinna neilo chi pawh an la tel thei tawh dawn a ni. Foundation course ah colpulsory leh elective subject te telh a ni ang.

*INDIA ECONOMY 6.4% AH KAI HMAN BEISEI
World Bank President Jim Yong Kim chuan kumin chhungin India ram economy chu 6.4% a athan chhoh hman a beisei thu a sawi. Hemi atan hian sorkar in chhiah lakkhawm leh man tlawm zawk a mipui te tan a thil a pek chhuah thin te siamthat a tul a ni a ti.

11.1.2015
*ASSAM AH TERRORIST 12 MAN
India leh Bhutan inrina Assam a Chirang district huamchhung ah police ten firfiakpawl a mi 12 an man, an zingah hian National Democratic Front of Bodoland a mi man ngei ngei tur a duh mi 2 an tel a ni. An hnen atang hian AK Rifles 4, rifle 2 leh pistol 5 man sak a nih vakah ralthuam dang te pawh man a ni. Police ten thu an zawt fiah mek a ni.

9th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

9.1.2015

*BREAKING NEWS UPDATE
Republic veng a vanduaina tawkte: 
1.Sangliansiama (53)
2.Vanlalchhungi (50),
3.Khualthangi (53),
4.Isaac-a (6),
5.Samuela (Pu Siama farnu fa). Kum 13 vel mi.

A thattu: Parsasata fapa Laltlanchhuaha(Matlana) (33 vel), Republic thlanmual bul.

Misual in an vih tho damdawiin a thi ta naupang kum 5 vel mi chu Civil mitthi dahna ah Dawrpui YMA in an awmpui mek bawk. A thattu pa scooty hi mipui thinrim in an hal a, ruang te hi Aizawl Civil Hospital a post mortem turin Republic veng tlangval ten ke in an zawn chho dawn a, vengchhung tlangval zawng zawng kal vek turin tiin an au a ni

*MIZORAM BREAKING NEWS UPDATE
Zanin dar 8:00 pm vel khan Aizawl a Republic venga Springfield Higher Secondary school building neitu Pu Sangliansiama te inah misual 3 nia hriat lutin inchhunga loawm mi 4 chu chemte in an vit a, a hmun ah paber Sangliansiama leh nuber Khualthangi leh an fa pakhat thi nghal in naupang kum 5 mi chu damdawiin pan pui a nih laiin a thi leh bawk, an awmpuinu chu bual in ah a biru hman a a him nia sawi a ni. Heng misual zinga pakhat hi chu an man hman a, mipui ten khawih an tum a, police ten an dang mek a ni. Pu Sangliansiama fapa Lalhriatpuia chu office a la ban hman loh avangin inah a awmlo a him bawk a ni.

Angry mob burnt miscreant scooty

 

Miscreant killed one family members in Aizawl, Republic veng

Miscreant killed one family members  in Aizawl, Republic veng

*MIZORAM GOVERNOR THAR LALUT
Mizoram Larsap thar atana ruat Dr. Aziz Qureshi chu vawiin tlai dar 4 khan Raj Bhawan-ah rinawmna thu tiam tira Mizoram Governor 15-na atan lakluh a ni a. Governor lakluhna inkhawm ah hian Chief Secretary Pu Lalmalsawma, IAS chuan President Dr. Pranab Mukherjee’n, Dr. Aziz Qureshi, Mizoram Governor atana a rawn ruatna lehkha Warrant of Appointment a chhiarchhuah hnuin Gauhati High Court Judge thar Justice Michael Zothankhuma’n rinawmna thu tiam tirin Dr. Aziz Qureshi hi Mizoram Governor atan lakluh a ni.

Larsap thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister-
te, Parliamentary Secretary-te leh MLA te bakah Sorkar mi pawimawh thahnem tak an tel.

Larsap thar hi kum 74 a upa niin February ni 3, 1940 khan Bhopal-ah a piang a. Government Hamidia College, Bhopal; Agra University; Vikram University, Ujjain; leh Bhopal University atangtea zirchhuakin MA (Political Science), MA (Arabic), MA (Urdu Literature), LL.B., Ph. D (Political Science) leh D.Lit. (Honoris Causa, Aligarh Muslim University-in a hlan) degree te nei a ni. Kum 1972 leh 1977 inkar khan MLA niin hemi chhung hian Madhya Pradesh Sawrkar-ah Minister niin Power & Irrigation Minister leh Education & Endowments Minister te a ni a. Kum 1988 khan Satna bial atangin MP atan thlan tlin a ni bawk. May ni 15, 2012 leh December ni 30, 2014 inkar khan Uttarakhand Governor niin June ni 22 2014 leh July ni 22, 2014 inkar khan Uttar Pradesh Governor hna a hmui bawk a ni.

Zirna lam abik takin Urdu tawng zirna lamah sulsutu niin Founder Vice Chairman of National Council for Promotion of Urdu Language nihna leh Central Urdu University dinna atana Sawrkar Laipuiin a din Urdu University Committee-a Chairman nihna te a chelh tawh bawk a ni. (DIPR)

 

Aziz Qureshi sworn in as Mizoram's 15th Governor, Aizawl Raj Bhavan

*Zonet Breaking News: Lalnunmawia Zadeng, Zarkawt veng thattu nia rinhlelh chu police-te'n an man a, amah hi Vanramropuia s/o. Juman Singh {(alias Zoramsanga (L)}, Thuampui veng a ni. Amah hi jail ah thawn ni tawhin thu kan dawng.

 

*JAMMU AND KASHMIR AH GOVERNOR RULE PUAN A NI
India hmar tawp state Jammu and Kashmir ah political party sorkarna siam thei an awmloh avangin Governor rule puan a ni. State rorelna chu union cabinet thurawn angin Governor kut ah a awm dawn a ni. Nizan khan Chief Minister Omar Abdullah chuan caretaker CM anihna atangin banna a thehlut a ni. Kan rawn tarlan tawh thin angin nikum December ah khan J&K ah hian assembly inthlan neih a ni a, tun thleng hian political party tumah in sorkar siam thei khawp in member an ngah tawk lo vek a ni.

 

*SRI LANKA PRESIDENT THAR
Sri Lanka President 7-na turin eptu hruaitu Maithiripala Sirisena chu thlan tlin a ni. Zanin dar 6 ah rinawmna thu tiam tirin lakluh a ni dawn. President nilai Mahinda Rajapaksa chu vote nuai 4 leh a chanve chuangin a hneh a ni.

8th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

8.1.2015

*MIZORAM GOVERNOR TUR AIZAWL LO THLENG
Uttarakhand Governor Dr.Aziz Qureshi chu Central Sorkarin Mizoram Governor ni tura a ruat angin vawiin khan Aizawl alo thleng.

Mizoram Governor tur hi Lengpui Airportah Chief Minister Pu Lal Thanhawla leh Mizoram Sorkar hotu pawimawh dang ten an lo hmuak a. Airport Apron (Tarmac) ah Chief Minister Pu Lal Thanhawla, Speaker Pu H.Hiphei, Chief Secretary Pu Lalmalsawma, Director General of Police Pu Dharmendra Kumar leh Secretary to Governor Pi Nandini Paliwal ten amah lawmna pangpar an hlan a. Airport VIP Lounge bulah Finance Minister Pu Lalsawta, Higher & Technical Education Minister Pu R.Romawia, Dy Speaker Pu R.Lalrinawma, Lai leh Chakma Autonomous District Council hruaitute leh Principal Secretary to Chief Minister Pu Lalram Thanga ten lawmna pangpar Dr.Aziz Qureshi hnenah hian an lo hlan bawk a. Airport Terminal hma lam Parking Bay-ah Chawimawina Guard of Honour lo pek leh a ni bawk.

Dr.Aziz Qureshi hi naktuk ni 9 Jan 20215 tlai dar 4 ah Raj Bhavan Durbar Hall-ah Gauhati High Court Judge in rinawmna thu tiam tirin Mizoram Governor ni turin a la lut ang. (DIPR)

Mizoram Governor designated  Dr. Aziz Qureshi arrived Aizawl ( Lenngpui )Airport, he was received by  Mizoram Chief Minsiter Mr. Lalthanhawla

 

*MAWITEA RUANG NI NGEIA HRIAT CHHAR A NI
Tunah hian Zemabawk, Falkland venga, Local Council, Pu Lan-a kawm thlang hnim karah vawkchaw zawng, nu pakhatin a hmu mipa ni ngeia hriat ruang a hmu a, ruang hi a chhe tawh hle a, tunge anih hriat mai theih a ni lova, December ni 31 zan atanga chin hriatloha bo, Zarkawt tlangval Lalnunmawia (Mawitea/Taitea) ni ngeia hriat a ni.

Source: Kiddy Vanchhawng Vanchhawng via Special Report Group

1st-7th January 2015 news in Mizo

Latest news collection in Mizo language (News update from Mizoram)

MIZO TAWNG A CHANCHINTHAR LAWRKHAWM

7.1.2015
*MIZORAM GOVERNOR THAR LAKLUH DAN TUR ENHO
Mizoram Governor thar tura ruat Dr. Aziz Qureshi lakluh dan tur ruahmanna siam chu vawiin khan Chief Secretary Pu Lalmalsawma hovin Chief Secretary Conference Hall, New Secretariat Complex ah thlir nawn a ni.

Ruahmanna hmasa ti danglamin Governor thar lakluh hun hi darkar hnih a sawn hma a ni a, January ni 9, tlai dar 4 ah Raj Bhavan Durbar Hall-ah neih a ni dawn a. Dr. Aziz Qureshi hi January ni 8 ah lo thleng tura beisei niin amah hmuahna programme pawh Lengpui Airport-ah neih nghal tur a ni. Lengpui Airport atang hian lirthei hmangin Raj Bhavan panpui a ni ang. (DIPR)
 

*CHIEF MINISTERS’ RELIEF FUND
Mi harsa zualte tanpuina turin MHIP Tuithiang Branch chuan Chief Ministers’ Relief Fund atan Rs. 4,000/- (Cheng sangli) an chhunglut.

 

*WHATSAPP I HMANG EM?
Online hmanga mobile phone atanga message, video, audio leh thlalak inthawn theihna whatsapp hi thlatin a hmangtu mi tluklehdingawn 70 an tling a, nitin message tluklehdingawn 30 thawnchhuah thin ni a chhut niin whatsapp CEO Jan Koum chuan a sawi. Whatsapp hmangtu zawng zawng khaikhawm in nitin mi pakhat in message 43 zel thawn chhuak thin ang a ngaih theih a ni a, second tin message 347,222 thawn chhuah ziah ang ngaih theih a ni bawk. Whatsapp i hman thin chuan chung zingah chuan i tel ve a ni.

 

*PARIS AH CHANCHINBU OFFICE AH INKAHNA THLENG
Vawiin ah Paris khawpui ah France ram a chanchinbu lar tak Charlie Hebdo office ah mi pahnih ralthuam keng an lut a office hnathawk mi 10 an kaphlum a ni. An mahni va bei lettu police zing a 3 te chuan hliam an tuar bawk. He chanchinbu hi kum 2011 a Prophet Mohammed cartoon lem tichhuak tute kha anni.

 

*MIZOPA HIGH COURT JUDGE AH LALUT DAWN
Vawiin dar 10:30 a.m hian Michael Zothankhuma, Senior advocate chu Gauhati high court Judge atan Guwahati ah rinawmna thu tiam tir a lakluh a ni dawn. Amah hi P.Rohmingthanga IAS(Retd.) fapa niin Aizawl Chaltlang Salem veng a mi a ni.

 

5.1.2015

*PADMA BUSHAN DAWNG TURIN SAINA NEHWAL THLANG
Sports Ministry chuan India badminton khelthiam Saina Nehwal chu India khua leh tui te chawimawina sang Padma Bhusahan dawng turin an thlang. Saina hian nikum lam khan Badminton Association of India in Padma Bushan dawng tur a an rawtna chu sorkar in a pawmsak lo niin a sawi a, hei hi Sports ministry hian an enfiah a, chawimawina dawng turin an rawt ve ta a ni.

 

4.1.2015

*NAGPUR MIZO TEN KUMTHAR RUAI NAWN DAWN
Nagpur Mizo te chuan vawiin hian Pathian chawimawi leh fak nan Kumthar ruai an nawn dawn a ni.

 

3.1.2015

*Vawiin ah Prime Minister Narendra Modi chuan University of Bombay ah Science Congress 2015 a hawng.

 

2.1.2015

*DELHI POLICE ATAN HMARCHHAK MI LA DAWN
Union home minister Rajnath Singh chuan Delhi police atan India hmarchhak state zawng zawng atangin mi 20 theuh lak anni dawn a ti. Mizoram atang pawh in mi 20 tan luhtheih dawn a ni.

 

*Gerrard a chhuak dawn an ti ta!
Robbie Fowler ang bawka Liverpool ti-Liverpool-tu zinga mi, Steven Gerrard chuan nipui chawlhah Anfield chhuahsan a tum an ti!
Liverpool captain contract hi season tawp rualin a tawp tawh dawn a, he kum 34 mi hian European player dangte ang bawkin US a pan dawn nia rin a ni.
England skipper pawh lo ni tawh, Steve G hian Liverpool a hmangaihna hmasa a la bansan ve lo. November khan contract zawrh leh ni mah se, an hotute a la chhanglet lo va, vawiin hian a thutlukna beisei a ni.
Gerrard-a'n Liverpool leh England tana a lo khelhpui thin, Jamie Carragher chuan, "Liverpool leh English football tan ni lungchhiatthlak a ni," tiin a lo sawilawk tawh.
Gerrard hi Merseyside thingtlang khuaa piang a ni a, kum 9 a nihin Liverpool's academy a zawm tan tawh a, puitling team-a a tel hmasak berin, Blackburn Rovers nena November 1998-a an inkhelh tumin substitute a ni. Chu chu Liverpool tana a bultanna chu a ni a, captain a ni ta.

 

*MIZORAM GOVERNOR THAR JANUARY AH
Mizoram larsap (governor) 15-na tur a ruat Aziz Qureshi(74) chuan January chawlhkar 3-na ah a hna thar a rawn zawm dawn niin Aizawl Raj Bhavan thuneitu ten an sawi. Kan rawn tarlan tawh angin Aziz Qureshi Uttarakhand governor nilai a ni a, Mizoram ah rawn sawn a ni. Kum 2017 May thla thleng governor hna thawk tur a tih a ni.

 

1.1.2015

*KULIKAWNAH RUANG 2 CHHAR
Aizawl Kulikawn huamchhung, Ngaizel phei Saikhamakawn bul, Chhantea Workshop bulah ruang 2, Lalrosanga (34) s/o Rokima, Tlangnuam, Hridaikawn leh Rosanglura (30) s/o Rochungnungi, Tlangnuam, Block veng te ruang chhar a ni a, Kulikawn police ten an enfiah mek a ni. An mahni hi drug verdose ni a rin an ni a, mita hmutu thenkhat sawi dan chuan an ruang hi insi rialin an lo awm a ni.

 

*KUMTHAR LAWM TUM MI 35 INCHIL HLUM
Nizan dar 11:35 khan China a Shanghai khawpui a luikam mipui punkhawmna thin Bund an tih hmunah kumthar lawm tum a mipui pungkhawm te an inchil chiam avangin mi 35 an boral a, mi 42 chuang in hliam an tuar a ni. Chhiatna thlenna hmun luikam hi kumtin China mipui thahnem tak kumthar lawm tur a an kalkhawm thinna hmun a ni. Mipui chiaia inchilhlum hial khawp a buaina chhuah chhan hi thuneitu ten an chhui mek a ni.

 

*Lamtluang follower zawng zawng te Kumthar Chibai vek ule. He kumthar hian in tan malsawmna tam tak rawn thlen se tiin duhsakna kan hlan a che u.