20th - 23rd December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

23.12.2014

*Jammu and Kashmir leh Jharkhand assembly inthlan vote tla chhiar mek ah Jharkhand ah BJP in sorkar thar an siam dawn niin a lang a, Jammu and Kashmir ah chuan sorkar thar siam thei tur khawp a party chak fal an awm lo a, PDP leh BJP te vote hmu sang 2 anni.

 

22.12.2014

*PAKISTAN IN FIRFIAK 500 KHAIHLUM DAWN
Pakistan sorkar chuan kar hmasa lawka firfiak pawl ten sikul naupang te leh an zirtirtu te rawng taka an kahhlum chhanlet nan karleh ah firfiak pawl (terrorist) an man jail a tang mek mi 500 te khaihlum turin thu an ti tlu. Kar hmasa Zirtawpni atang khan firfiak pawl zing a mi mi 6 an khaihlum tawh bawk a ni.

 

*MIZORAM PRESBYTERIAN PASTOR HLUN BORAL
Mizoram Presbyterian Pastor te zinga thu leh hla lamah mi hriat hlawh tak Rev.Z.T Sangkhuma (80), Zotlang, Aizawl chu vawiin chawhma dar 11 vel khan thluaka thisen zam chat avangin a boral. Naktuk ah vui a ni ang. Rev. ZT Sangkhuma hian a nau Lalzuia Colney nen Mizo tawng dictionary an siam a ni.

 

*SIALSUK KHAWTLANG IN TAWNGTAI RUAL NA NEI
Vawiin ah Sialsuk khua a kohhran hrang hrang joint committee te chuan khawtlang huap in Sialsuk khelmual ah a huho in tawngtai rual an nei. Kohhran hrang hrang atangin mi 500 vel in he tawngtai rual hi an hmang a ni.

Pix: Amuana Ralte

Mass Prayer programme organised by Joint Churches committee at Sialsuk, Mizoram
Pix: Amuana Ralte

 

21.12.2014

*NEWS TAWI LAWRKHAWM
*Nizan khan Indian Super League (ISL) final hmasaber chu Mumbai ah khelh a ni a, Athletico de Kolkata chuan 1-0 a Kerala Blasters hnehin an champion ta. Goal khungtu hi Mohammad Rafique a ni.

*Real Madrid chuan 2-0 a San Lorenzo hnehin Club World Cup champion anni.

*Pakistan a Karachi anti-terrorism court chuan hmanni lawk a Peshawar a sikul naupang thahnem tak kaphlumtu Tehrik-i-Taliban Pakistan (TTP) firfiak pawl hotupa Mullah Fazlullah leh an hotu dang 7 bail theih loh tura manna tur thupek nimin khan a tichhuak.

*ISIS firfiak pawl ten an hmunpui Syria a Raqqa atanga tlanchhuah tum ramdang atanga an pawl rawn zawmtu mi 100 te an tihlum a ni.

*India sorkar laipui a health ministry thurawn angin union cabinet in cigarettes a mal te te (loose) a zawrh khapna dan an pawm thuai dawn ni a sawi a ni.

*Nizan khan New York khawpuina Brooklyn huam chhung ah mi pakhat silai kengin New York police duty lai mi 2 a kaphlum a, he pawi khawihtupa hi a hnuah amah leh amah a in kaphlum bawk a ni.

*State pahnih a election neih zawh taka mipui ngaihdan lakkhawm ah chuan Jharkhand ah BJP in sorkarna an siam rin a ni a, Jammu and Kashmir ah chuan sorkar siam thei tur party chak fal an awm dawn lo ni a rin a ni.

*Karnataka a Congress sorkar chuan term hmasa a sorkar kaihruaitu BJP ten an state chhung a bawng talh khapna dan Prevention of Cow Slaughter and Protection Bill, 2010 an lo siam chu an hnukdawk ta a ni.

 

*VHP TEN KRISTIAN 500 HINDU AH LET
Nimin khan Gujarat a Valsad khua ah Hindu duhfir pawl Vishwa Hindu Parishad (VHP) ten tribal Kristian chhungkaw 100 te chu Hindu ah an inleh tir a ni. Chhungkaw 100 te hi a lunung in mi 500 an ni. Tunlai hian VHP te hian sakhaw dang atanga Hindu a inleh tirna 'Ghar wapsi' an huaihawt ngun hle a, Hindu sakhua ah mi te inleh tir tumin programme chi hrang hrang an siam thin a ni.

 

*IMPHAL AH BOMB PUAK
Tukin khan Imphal a Khuyathong hmuna bus dinkhawmna bul hnaiah IED bomb a puak a mi 3 an thi a, mi 4 in hliam an tuar. Bomb tipuaktu te hi helpawl ni a rin anni.

 

20.12.2014

*INDIA IN BOMB THLAWK THEI ENCHHIN
India sorkar hnuaia ralthuam siamchhuak tu DRDO te chuan bomb thlawktheih (glide bomb) 100 km a hla kap thei chu Odhisa a Bay of Bengal tuifinriat kamah hlawhtling takin an enchhin. He bomb hi 1000 kg a rit niin India mithiam ten ram dang puihna tello a an siam a ni.

19th December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

19.12.2014

*MIPUITE HNENA HRIATTIRNA
Co-ordination Committee on Traffic Management-in a rel angin Ni 23, 24 leh 31 Dec, 2014 hian Krismas Bazar-a mipuite him zawk nan No Vehicle Zone hman leh tur a ni a, he huna lirthei khuahkhirh dan tur chu hetiang hi a ni e: -

1. Chanmari leh Zodin Square inkarah Dar 10:00 AM atanga tlai Dar 4:00 PM chhungin lirthei eng chi mah, Thirsakawr leh Nawrlirh huamin tlan phal a ni lo. Hei hian Hospital Emergency duty bakah natna avanga Damdawiin pante a huam lo ang.

2. Civil Hospital Aizawl atanga chhuak chhimlam pan turte chu Dawrpui Biak In lamah kual lovin Bazar Bungkawnah direct-in a tlan tur a ni.

3. Dawrpui Taxi stand chu Baza Tlang hnuai, AR Mandir Opposite-ah leh AR Quarter Guard hnuaiah hemi hun chhung atan hian sawn a ni.

4. Chanmari leh Power House inkarah lirthei eng chi mah No Vehicle Zone hun chhung hian hun phal a ni lo,

5. Chanmari leh Power House inkarah LMV chin hnuai lamte, Passenger la leh drop tur te tan khawi zawng pawhin tlan phal a ni a, Power & Electricity Office kawt zawlah kualin Dropping Zone ah Passenger te la leh drop-in Chanmari lamah an let ang. (DIPR)

 

*KELKANG-AH ZANTIN INKHAWM KAL PUI MEK
June 12, 2013 atang khan Kelkang khuaah zantin Inkhawm neih thin a la ni. Pathian Thlarau Thianghlim hnathawh a thleng mek zel a, Mizoram hmun hran hran atangin chhimtu englai pawhin an awm reng a ni.

Tunah hian mikhual chhimtu mi 300 vel zet an nei mek a, Damlo te leh Thlarau nuna harsatna tawk ten an pen mek a ni. Mikhual an neih thathnem deuh avangin Kohhran in Buhfai mithahnemngaite thawhkhawm an sem hial a ni.

Bethelna hmun, hmun thianghlimah hian Bethel an insul pel zut zut reng a ni. Kelkang Hlimpui Platinum Jubilee chu kum 2012 khan an lo lawm tawh nghe nghe a ni. --Thangpuii Chhakchhuak:
GLOBAL MIZO PRESBYTERIAN FELLOWSHIP

Spiritual revival happening in Kelkang Village, Mizoram. It is said that since June 13, 2013 they conduct church worship service without stop till today.

 

ZINGKAR CHANCHINTHAR LAWRKHAWM
*Nizan dar 9 vel khan Champhai Venglai ah bungrua chuh hman loh in in a kang a, he inkang ah hian chhungkua 4 (mihring 14) an cheng a ni. Kangmei chhuak avang hian Lalnunsangi a thi a ni.

*Nimin a rawng taka a hrawk a zaihlum Zokhumi (83), Mission veng, Aizawl thihdan chhui turin police hotuten Special Investigation Team an ruat.

*Tunlai a sawihlawh tak sorkar laipuiin Krismas ni a zirna in a good governance day hman an tum chu parliament ah eptu lam ten nasa takin an sawisel. Hemi avang hin University Grant Commission chuan Krismas lawmna boruak tibuai lo turin Krismas hma a good governance day atana programme duang turin ramchung a university VC zawng zawng te a hriattir.

*Hyderabad ah swine flu natna avangin nimin khan damlo pakhat a thi leh. Hemi chhiar tel hian tunhnaiah Hyderabad ah hian swine flu natna avangin mi 4 an boral tawh a ni.

*Congress president Sonia Gandhi chu nimin khan Sir Ganga Ram hospital, New Delhi ah thawk a harsat avang leh a awm hnuailam ah insawiselna a neih avangin dahluh a ni.

*Kolkata khawpui a taxi service te chuan vawiin atang in darkar 24 awh tur nawrh an huaihawt dawn. Taxi service 7000 chuang an tlan dawn lo a ni.

*Muslim firfiak pawl Boko Haram te chuan Nigeria ram hmarchhak thingtlang khua a cheng mi 32 an that a mi 185 an ru bo bawk a ni.

*Krismas pawh ni 5 chiah in a dang ta. Hlim taka i hman theih nan inbuatsaihna tha i neih kan duhsak a che. In veng/khua a vawt tawh viau em?

 *MIZORAM THLASIK BORUAK
Aizawl -13 C
Lunglei -12 C
Saiha - 15 C
Mamit - 12 C
Kolasib - 14 C
Lawngtlai - 12 C
Serchhip - 13 C
Champhai - 16 C

18th December 2014 news in Mizo

Latest news collection in Mizo language
MIZO TAWNG A CHANCHINTHAR LAWRKHAWM

 

18.12.2014

*BREAKING NEWS: PI ZOKHUMI MISUAL IN A HRAWK AH ZAIHLUM
Lamtluang in whatsapp a message kan dawn danin Pi Zokhumi w/o. J.Lalsangzuala (L), Mission veng, Aizawl chu tukin dar 10 vel khan a tunu in a mulai va kaithawh a tum chu a hrawk ah zaihlum in a va hmu a, a taksa atang hian thisen a chhuak nasa hle bawk. A room a steel almirah chu a lo inhawng bawk a ni. (Thuchiang zawk hria kan awm chuan comment lamah rawn sawi ula kan duh hle mai.)

Former Mizoram Finance Minister Late Mr.J.Lalsangzuala's wife Mrs. Zokhumi was murdered by unidentified person in her residence at Aizawl Mission Veng.

 

*INDIA IN ROCKET HLAWHTLING TAKIN ENCHHIN
Tukin dar 9:30 khan Indian Space Research Organisation (ISRO) chuan Sriharikota space station atangin next generatiob rocket an tih mai GSLV Mark-III chu hlawhtling takin an enchhin a ni.

 

*Supreme Court chuan sorkar laipui hnenah thla thum chhungin India leh Bangladesh ramri hung zo turin hriattir na a pe.

 

ZINGKAR CHANCHINTHAR LAWRKHAWM
*Krismas thlen nan ni 6 chiah a ngai ta. Mizoram a kohhran hrang hrang te pawh Krismas hlim taka hman tumin an inbuatsaih nasa tawh hle a ni.

*Lirthei i khalh thin a nih chuan Krismas hlim taka i hman theih nan fimkhur takin i lirthei khalh thin turin kan duhsak a che.

*International Boxing Association chuan Asian Games a bronze medal a lak duh loh avangin India Boxer Meitei nula Sarita Devi chu kum khat chhung atan hremna a pe.

*India Defence minister Manohar Parrikar chuan India sipai te hman tur rualthuam leh hmanrua lei nan a Rs.Vaibelchhe 4444 ruahman chu nimin khan a pawm.

*Pakistan a Peshawar a rawng taka sikul naupang te thattu, Taliban firfiak pawl a mi sikul luhchhuahtu te thlalak chu Taliban ten nimin khan an tlangzarh.

*India Parliament pawh in Pakistan a Taliban firfiak pawl ten rawng taka sikul naupang te an that kha an dem thu an sawi chhuak.

*Assam ah helpawl ULFA, NDFB leh pawl dang ten Krismas leh Republic day denchhen a pawi khawih an tum ni a hriat ruk anih avangin sorkar in theih tawp in venhimna leh inralrinna a kalpui.

*Hyderabad ah tunhnai lawk khan swine flu avangin mi 3 an boral. Sorkar in theih tawp in swine flu a darh zel loh nan hma an la mek a ni.

*US sorkar in North Korea chu sony picture cyber attack tu ah a puh.

*Thlawhna fuel (tuialhthei) man an pek loh vanga tunhnai a buaina tawk spice jet chuan nimin atang khan an thlawhna te airport hrang hrang atanga thlawhchhuah phalna an nei leh ta. Oil company te pawh in spice jet hi fuel pek chhunzawm an rem ti ta bawk a ni. Spice jet thlawhna te cancel annih avang in khualzin tam takin harsatna an tawh phah a ni.

*Nimin khan Rajya Sabha ah eptu pawl ten sakhaw inleh luih tir chungchangah Prime Minister Narendra Modi chhanna hriat an phut tlat avangin rorelna mumal a kal pui theih a ni lo.

*Nimin khan Union cabinet chuan bungrua leh hnathawhna atang a chhiah lak na tur dan thar Goods and Service tax chu an pawm. He dan thar hi tuna Parliament thlasik thutkhawm chhung a put luh hman tur a beisei a ni.

15th - 17th December 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

17.12.2014

*ANGLICAN HMEICHHE BISHOP HMASABER
Vawiin khan Church of England (Anglican tia hriat lar bawk) chuan an kohhran hnuai a hmeichhe Bihshop hmasaber atan Libby Lane an ruat. Amah hi Crewe a pastor hna thawk lai a ni a, kum 1994 khan Pastor atan nemngheh a ni. A pasal George pawh pastor thawklai tho a ni bawk.

 

*SAIHA OFFICERS’ CLUB TEN KRISMAS THILPEK AN HLAN
Vawiin chawhma dar 11:00am khan Saiha Officers’ Club hruaitute chuan kumtina an lo tih thin angin Krismas thilpek atan Pawisa fai Rs.3000/- theuh heng : ECM KNP enkawl Motherless Baby Home, Salvation Orphanage Boys' Home, District Hospital leh ECM Hospital Saih-ah te an hlan.

He thilpek hlanna hi an President Pu B.Lallawma’n hovin Motherless Baby Home-ah hian naupang enkawl lai 11 awmin; Salvation enkawl Orphanage Boys' Home-ah hian naupang 15 an awm bawk a, Heng Hospital Pahnihah te hian tunlai hian damlo an tamin khum zawng zawng a full vek a ni. (DIPR)

 

*THIERRY HENRY AN FOOTBALL CHAWLHSAN
Nimin khan France footballer lar Thierry Henry (37) chuan football khelh a chawlhsan thu a puang. Kum 1998 World Cup khan an ram France chu an champion a, khami tum khan player thawh hlawk tak a ni. Kum 2000 a France in European Champion nomawi an lak tum pawh khan a khel ve bawk a ni. An ram tan hian goal 51 a pet lut a ni. AS Maonaco, Juventus, Arsenal FC, FC Barcelona, the New York Red Bulls club ah te a khel thin a ni. Henry hian kumthar atangin Britain ram a TV channel Sky sports ah thawh chhunzawm a tum a ni.

 

*YEMEN AH CAR BOMB PUAK
Nimin Thawlehni khan Yemen ram a Rada khua ah Muslim firfiak pawl Al-Qaeda ten thihchilh car bomb hmangin sikul bus an bei a, zirlai 25 an boral

 

16.12.2014

*VIJAY DIWAS (HNEHNA NI) AH SIPAI MARTAR TE ZAHNA PANGPAR HLAN
Kum 1971 Indo-Pakistan indonaa India-in hnehna a chan hriatrengna, kum tina ni 16 December-a hman thin Vijay Diwas (Victory Day) chu tukin zing dar 8:25 khan War Memorial, Treasury Square, Aizawl ah hman a ni a, hnam sipai huaisen, ram tana an nunna hlu tak hlantu te hnenah zahna leh chawimawina hlanin Sawrkar hotu leh mi pawimawh ten pangpar an hlan. Hemi hunah hian Chief Minister Pu Lal Thanhawla, Speaker Pu Hiphei, Lt.Col. Z.S.Zuala, Parliamentary Secretary, Capt.(Retd) Hmingdailova Khiangte, Parliamentary Secretary, Pu Lalmalsawma, IAS, Chief Secretary, Pu Dharmendra Kumar, IPS, Director General of Police, Mizoram, Wg. Cdr. (Retd) Lalzawma, Principal Consultant, Civil Aviation Wing, Dr. Franklin Laltinkhuma, IAS, Deputy Commissioner, Aizawl, Brig. T.C.Malhotra, SM, Commander, 23 Sector, Assam Rifles, Col. Alok Sethi, Commanding Officer, 457 Field Hospital, Station Hqrs (ARMY), Col. Shameer Sharma, Director Recruiting, ARO, Zemabawk leh mi pawimawh dang ten zahna pangpar an hlan a ni. (DIPR)

 

*FIRFIAK PAWL TEN SIKUL LUHKHUNG MEK
Vawiin ah Pakistan a Peshawar khawpui a Army Public School ah Muslim firfiak pawl Taliban thihchilh huam te lutin sikul naupang 12 an that tawh a, zirtirtu leh naupang 500 te an thuhnuai ah che chhuak theilo in an dang mek. Sikul pawn leh boruak lamah Pakistan sipai leh police ten a tul hun a che mai thei turin he sikul hi an hual mek a ni. Nimin ah khan Australia ram a Sydney khawpui a cafe pakhat chu Muslim firfiak pawl a mi ni a rinhlelh mi pakhat in silai nen luhchilhin mi thenkhat ten nunna an chan phah tawh bawk a ni.

 

15.12.2014

*CHRISTMAS AH CENTRAL SCHOOL TE CHAWL DAWN LO
Union Ministry of Human Resources ten kumin Christmas ni a JNV leh CBSE hnuai a sikul te chawllo a 'good governance day' hman nan a essay competition buatsaih tur a ti chu Telangana sorkar chuan an zawm dawn loh thu an sawi. Christmas ni a central school te chawllo tura sawi hi Christian pawl tam tak te pawn an duh lo hle. Hemi chungchang ah hian Union minister Smriti Irani chuan essay competition a tel tur hian tumah tihluih anni lo a, online a mahni inhuam dan a zir a tel mai turin an ti niin a sawi thung a, mahse, sikul chawlh tur tih chu a sawi chiang chuang lo a ni. Sorkar thuchhuah chuan sikul principal te chu Christmas ni a huaihawt tur essay competition a telte report pe turin thu an chuah bawk a ni.