11th August 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

  11.8.2014

*CHAKMA CENSUS LAK TUM CHUNGCHANGAH HOME MINISTER LEH CYMA HRUAITUTE INHMU
Vawiin khan Central YMA-in Chakma Census kalpui a tum chungchangah Home Minister R. Lalzirliana hovin a pisaah Sorkar hotute leh Central YMA Office Bearer-te an thukhawm. He hunah hian Chief Secretary Pi L. Tochhong leh Home Department hnuaia Officer pawimawhte an tel a ni.

Home Minister chuan YMA-in chhiarpui kalpui a tum hi ram leh hnam hmangaihna leh humhalh duhna atanga chhuak a ni tih a hriatpui thu leh, YMA-in ram venhimna a vei tak zet avanga a lawmzia a lo hrilh a. Chutihlaiin, mahni thahnemngaihna zawna census lo neih chu ram inpumkhatna tichhe theitu leh nghawng tha aia thalo thlentirtu a nih theih zawk avangin fimkhur a ngaih thu a sawi a. Mizoram chhunga hnam bil bik chhiarpui lo neih ngawt pawh hi ram Dan Pui pawhin rem a tih a rinloh thu sawiin, YMA chu an thil tum kal tlangpui rihlo turin Minister Pu. R. Lalzirliana chuan a lo ngen a ni.

Mizoramah Dan lo anga pawn lam mi an awm hi eng sorkar tan mah phal chi a nih loh thu sawiin Home Minister chuan khua leh tui takte chhinchhiahna tur khaw tina Village Register neih chu tihhlawhtlin dan kawng zawngho zawk turin CYMA hruaitute chu a sawm a. He Village Register neih hi Legislative Session-a pharh theih tura ruahmanna mumal tak siam tura theihtawp chhuaha tangho turin rawtna a siam a. Dan anga hman theih anih chuan phallohva hnamdang mi state chhunga lo lutte zawn chhuahna leh danna hmanraw tha tak anih tur thu Minister chuan a sawi a ni.

YMA hruaitute chuan census lak an tum chu hnam bil thliarna leh harsatna siam sak tumna anih loh thu leh political party bil tana hamthatna siam sak tumna anih loh thu an sawi bawk. (DIPR)

 

*NRINNI A ASSAM A HMEICHHE PAWNGSUAL RAWNTUTE MAN ANNI
Karhmasa Inrinni zan dar 11:45 a Assam Dibrugarh a hmeichhe kumtlinglo pawngsual rawntu College zirlai 4 - Pranjit Dutta, Kalyan Dutta, Karan Gogoi leh Pranjit Dutta te chu Assam police ten an manchhuak ta. Lamtluang in kan lo hriat dan in heng zirlai 4 te hian thingpuihuan a thawk hmeichhe kumtlinglo an pawngsual hnuah nikhawhrelo khawp in Dibrugarh Railway Station bul Banipur ah an hmeichhia pawngsual hi an kalsan a ni. Pawngsualtute ni a puh te hi Dibrugarh atanga Km 20 a hla Romai Kordoibam khua a mi te anni.

 

*SOCIAL WELFARE MINISTER PU P.C. LALTHANLIANA'N 'CAREER GUIDANCE AWARENESS CAMPAIGN' A HMANPUI
Vawiin khan Saikuti Hall, Lunglei-ah MSU Regional Hqrs. Lunglei buatsaihin 'Career Guidance Awareness Canpaign' hman a ni a, Social Welfare Minister Pu P.C. Lalthanliana chu Khuallian niin Campaign hi a hawng a ni.

Hawnna inkhawm MSU Vice-President Biaksiamtluanga kaihhruaiah Khuallian Pu P.C. Lalthanliana chuan Career Guidance Awareness Programme hlawhtlinna tura mithiam hrang hrang-in tunlai khawvelah eizawnna tur kawng kawhhmuh theihna tur zirlaite tan MSU-in a buatsaih chu a vanneihthlak hle a ni, a ti. Zirlaite kawng tha leh dik zawk kawhhmuhtu tur nei lo tam tak an awm laiin vawiina Career Gudance Campaign chhim theia lo kal zirlaite chuan tih takzeta mithiamte thusawi ngaithla a, hmang tangkai ngei turin a chah a ni. "Vawiin ni hi in naktuk ni tur in siam hun a nih avangin, tumruhna nen, eizawnna atan eng kawng pawh thlang ula in rahbi tur in tuk thiam phawt chuan hlawhtlinna in hmu ang," tiin Minister chuan zirlai kalkhawmte a fuih a ni.

MSU Secretary Lalnuntluanga chuan report pein MSU-in 'Career Guidance Awareness Campaign' hi kum 2012 leh 2013-ah te sikul hrang hrangah an lo huaihawt thin tih a tarlang a. Kumin Career Guidance hian sikul 4 - Govt HSS, BHSS Serkawn, Leitlang HSS leh KT HSS - te a huam dawn a ni. MSU Regional Hqrs. Lunglei chuan kumina College admission chang lote chu JB College leh Lunglei Govt College-ah admission an dil hlawhtlinsak thu leh Class XII zirlai leh Under-graduate tithate chawimawina hun hman a nih thu te a tarlang bawk a ni. (DIPR)

*MIZO MUSIC VIDEO THAR: MICHAEL M.SAILO LEH SPI TE NUPA MUSIC VIDEO  "KA HMANGAIH CHE" TIH CHU HEI LE!
Mizo rapper lar Michael M.Sailo leh a nupui SP-i te chuan an nupa a an zaidunna music video thar "Ka hmangaih che" tih chu a duh apiang te en theih turin youtube ah Michael M Sailo channel ah an dah ta. Upload a nih 4 August 2014 atanga he thu post a nih thleng hian thlirtu(viewer) 4393 an tling tawh a ni. An zai in lung a kuai a, an hla ngaihthlak a hahdam bakah an video pawh a qualiy a that piah lamah an creative hle a ni. Hei le youtube link chu: https://www.youtube.com/watch?v=sJaZYfAt6xw 

Mizo celebs - Michael M Sailo & his wife SP-i on their new music video

*EBOLA HRILENG IN CHENNAI A RAWN THLENG EM NI?
Nimin Pathianni khan India mipui tam tak ten Chennai ah Ebola hrileng mek vei mi pakhat hmuchhuah a ni tih thuthang avangin an ralkhel hman hle a nih kha. He thuthang hi Union Health Minister Dr Harsh Vardhan chuan thudik lo niin a sawi. Mi pakhat Guinea ram atanga rawn haw chu chennai Airport ah Inrinni khan health check neih a ni a, Ebola a lo vei palh takin tih hlauhthawn thil ah Government General Hospital, Chennai ah dahhran nghal a ni a, mahse a taksa ah ebola natna hmuchhuah a nih tak loh avangin nimin Pathianni chawhnu khan Damdawiin atangin chhuahtir leh a ni.

10th August 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

 10.8.2014

*SUPERMOON ZANIN AH
Zanin hian Britain ram zawnah Supermoon a lang mek a ni. Zanin a supermoon hi kum 20 kalta ai khan thla leh lei a inhnaih bik a, astrologer te sawi dan chuan zanin hian thla hi 14% in a lang lian dawn a, 30% in a lang eng zual dawn bik a ni. Supermoon tih chu saptawng a ni a, Mizo tawng a awmzia sawi dawn chuan "Thla leh lei in hnaih ber tum" tih na a ni mai awm e. Zanin hi kumin chhung a vawi 2 awmna a ni a, June 12 khan a lo awm tawh bawk a ni. Kumin September ni 9 hian supermoon a awm leh beisei a ni bawk. Zanin anga lei leh thla inhnaih hi kum 2034 ah a lang leh chauh dawn niin chhuichiangtu te chuan an sawi.

*THLAWHTHEIHNA TLA MI 48 THI
Tukin khan Iran a Mehrabad airport atanga thlawk chhuak Air Iran-140 chu a tla a, hriat theih chinah mi 48 an boral.

 

*SUMO ACCIDENT
Vawiin chhun dar 12 vel khan Aizawl - Guwahati sumo service 'Ebenezer' chu Jowai bulah truck nen an insu a, passenger 2 an boral. Midang pawh in hliam na tak an tuar ni a sawi a ni. Chanchin hrechiang in awm chuan comment ah rawn sawi nise.

 

*MIZORAM SYNOD CHOIR LEH SYNODE MODERATOR PROGRAMME
Mizoram Synod Choir chuan Wales rama rawngbawla an zin report Kohhran 6-ah an pe tawh a, vawiin chawhnu inkhawm ah Aizawl Chaltlang Kohhran Biak In ah report an pe mek a, Zanah Mission Vengthlang Kohhran Biak In ah report an pe leh dawn a ni.

Mizoram Synod Moderator Rev.K Lalhmuchhuaka chuan nizan khan Kawtethawveng South Kohhran a tlawh a, vawiin chawhma khan West Bunghmun kohhran a tlawh a, vawiin chawhnu ah Serhmun Kohhran tlawh mek a, zanah Kawrtethawveng kohhran a tlawh leh bawk ang.

*BCM IN MISSIONARY TIR CHHUAK
Vawiin hian a rualin Biak in 2- Lunglei Chanmari Biak In leh Rahsiveng Biak Inah te Missionary tirhchhuah Inkhawm Baptist Church of Mizoram in a buatsaih . Tun tumah hian July 24-a Missionary lak thar 10 tirhchhuah an ni. Heng Tirhchhuah te hian July 30 – August 8 chhungin BCM Headquarters, Serkawn-ah Orientation an nei a ni.

Missionary tirhchhuah thar te chu:
1.F.Rorelliana : Belthei Bru Mission(BBC)
2.R.Lalnunzira, Evangelist – Arunachal Pradesh – Far East
3. F.Vanlalhruaii, Evan.Teacher-St.James H/S Tripura
4. R.Zorempuii, Evan.Teacher-Tukawi CBC
5. Amar Thapa, Evangelist- Kolosib-Non Mizo
6.V. Laawmsangpuia, Rotlang West
7.Moses Lalvenhima, Nazareth H/S Vathuampui
8. H. Malsawmkimi, Baptist Mission School, Putlungasih
9. C. Lalnunzami, Zawlpui P/S
10. R. Lalhmangaihzuala, Evangelist, Non-Mizo – Lengpui

Source:mizobaptist.org

 

*SYNOD HOSPITAL A NURSE ZIR DUH TAN
Synod Hospital, Durtlang chuan GNM zir tur a la dawn a, Prospectus/Application Form chu August 1 - 23, 2014 chhungin a hnuaia hmun tarlanah te hian dar 9:00 am - 4:00 pm chhungin lei theih a ni e.

Application form hi mahni ngeiin Principal Office-ah thehluh tur a ni ang.
1) Principal Office, School of Nursing, Synod Hospital, Durtlang
2) Fraser’s Clinic, Mission Veng

Prospectus/Application Form man - Rs. 100/-

Dil thei chin :
1. 10+2 emaw a tlukpui emaw pass, 45% mark hmu chin.
2. Nupui/Pasal la nei lo, kum 17-35 inkar.

Source: Synfocity=499

 

*MIZORAM GOVERNOR HLUI KAMLA BENIWAL IN DAN ANG ZEL IN THIL TI NIIN A INSAWI
Mizoram Governor anihna atanga sorkar in a ban tak Kamla Beniwal chuan Mizoram a chhuahsan hnuah an khua Jaipur tluang takin a thleng a, Airport ah thuthar lakhawmtuten zawhna an zawh chu chhang duh lo in, an in a thlen hnuah pawh an zawhna a chhansak ta chuang lo a ni. Hemi hnua hian Kamla Beniwal chuan a hranpa in thu a chhuah asiam a chutah chuan "Ka thil tawh chu dan ang zel a tih a ni" tiin a sawi. Mizoram Governor hlui hian hethu hi dan a bawhchhiat vanga Governor a nihna atanga ban tir ani tia an puhna a chhanna a ni.

Kamla Beniwal, Former Governor of Mizoram

9th August 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

 9.8.2014
HYDERABAD KHAWPUI A DAN LEH THUPEK CHUNGCHANG AH TELANGANA LEH SORKAR LAIPUI IN MILLO
Sorkar laipui a Home ministry chuan Telangana sorkar hnenah ah lehkhathawnin Hyderabad khawpui chu Andhra Pradesh Bifurcation Act 2014 in a duan anga Telangana leh Andhra Pradesh ten kum 10 an intawm dawn avangin dan leh thupek kenkawhna chu Telangana sorkar kutah ni lo in Governor kut a awm tur a ni tih an hriattir. He hriattirna hi Telangana sorkar hian chhanglet in Sorkar laipui duhdan chu an zawm theih loh thu leh state chhhung a dan leh thupek kenkawh chu state sorkar kut (State affairs) a ni tiin an sawi.

Union Home ministry hian Telangana state sorkar hnenah hian Andhra Pradesh Bifurcation Act 2014 in a duh angin Hyderabad khawpui chhung a dan leh thupek kenkawh hna chu Governor kut a awm tur leh police lal te pawh sawn theihna power pek a ni tiin an hriattir. Mahse, Telangana sorkar hian Governor chu council of minister thurawn anga hma la tur chauh a ni an ti thung. Telangana Chief Minister K.Chandrasekhar Rao chuan an party TRS MP te chu sorkar laipui thil tih dan hi state sorkar hnuaichhiahna a nih avangin Thawhtanni ah Parliament a auchhuah pui turin a ti a ni.

Kan hriat angin Hyderabad khawpui ah hian Andhra lam mi leh Telangana lam mi an in chenpawlh nuk avangin Telangana state thar khawpui tur a puan pawh nise kum 10 chhung a intawm hrih tur a tih annih kha.

*BARACK OBAMA IN IRAQ FIRFIAK PAWL AN BEIH CHHAN SAWIFIAH
Vawiin khan US President Barack Obama chuan US indo thlawhna 2 in Iraq rama Muslim firfiak pawl Islamic state ten an awp mek Erbil chunga bomb an thlak chhan a sawifiah na ah chuan heng firfiak pawl te hian Iraq ram a sorkarna chelh mek te an tihbuai vang leh mipui thlabar te chhanchhuah an duh vang niin a sawi. Nimin a US in Iraq firfiak pawl te a beih na ah hian Islamic state te ramthuam leh hmanrua te tihchhiat sak anni in Obama hian a sawi.

US thlawhna te hian bomba ah thlak hnu hian Iraq ram hmar lama Sinjar tlangdung a Yazidi hnam tlem zawk te firfiak pawl Islamic State hlau a tlanchhe mek te tan tui in tur leh chaw ei tur a thlak sak bawk a ni. Thlawhna atanga tanpuina an thlak hi chawfun 28,000 leh tui gallon 1500 a ni.

 

*INDIA IN CRICKET STADIUM SAK NAN AFGHANISTAN TANPUI DAWN
India chuan Afghanistan sorkar hnenah cricket stadium sak nan US Dollar maktaduai 1 a pe dawn. He stadium hi Afghanistan ram chhim lam Kandahar ah sak a ni ang.

 

*MAMIT HMASAWNNA TUR THLITHLAI
Mamit khawchhung tih hmasawnna tur 'Mamit Development Project' chungchang chu Mamit DC Pu K. Lathawmmawia hovin UD&PA Department aiawh te nen ngaihtuah ho a thlithlai a ni.

Mamit Development Project hnuaiah hian khawtlang hmunhma tha zawk siam (Composite Infrastructure Development) , inkalpawhna tha leh khawchhung kawng cheithat (Road Project) leh Bazar huam chhung cheimawi leh tih changtlung (Bazar area development project) ah te ruahmanna siam a hmalak dan tur thlithlai a ni.

Survey hi Ningani (dt.7th august,2014) atanga tan ni in vawiin khan zawh a ni a.Mamit VC member ten survey hi tawiawmin khawtlang mamawh te an lo thlen a ni. (DIPR)

 

*AFRICA A EBOLA NATNA HRILENG MEK CHU WHO IN INTERNATIONAL HEALTH EMERGENCY AH PUANG TA
Lamtluang a kan rawn post tawh ang khan nimin khan World Health Organization (WHO) chuan Geneva ah Emergency Committee neiih Africa khawtlang ram a natna hlauhawm tak leng mek ebola darh zel tur ven nan international health emergency a puan hnan ta. Chumi awmzia chu he natna ebola hi khawvel ram dang te tan pawn kaichhawn hlauhawm khawp in a darh chak tihna a ni. WHO hian khawvel ram dang te pawh he natna hi an kai loh nan fimkhur tur leh invenna ruahmanna siam vek turin a hriattir.

WHO hian he natna lenna ram abikin Liberia, Guinea, Nigeria leh Sierra Leone ah te he natna leng hi tihtawp anih hma chuan mipui vantlang punkhawm te, zanlam a nightclub leh intihhlimna dang huaihawt te a tihtawp tir vek a ni.

WHO hian he natna lenna ram tlawhtu/zin mi tupawh ebola natna an vei a hlauhthawn awm tawh avangin international airport zawng zawng ah exit screening neih vek turin khawvel ram hrang hrang te an ngen a, he natna vei ni a rinhlelh te chu ramdanga in enkawl tur a phalsak annih chauh loh chuan thlawhna a zin phalsak anni dawn lo a ni.

India sorkar pawh in ebola natna kaipalh theih laka invennan Mangalore leh Bangalore international airport ah te ebola special examination centre a dah tawh a ni. Lamtluang in news report a kan hmuh danin Delhi ah pawh he natna vei hmuchhuah annih chuan Ram Manohar Lohia hospital ah enkawl tur in Sorkar in ruahmanna a siam a, vawiin atangin 24 hour emergency helpline no 011-23061469, 3205, 1302 ah te hman tan a ni ang. He natna vei nia rinhlelh te thisen sample chu National Institute of Virology, Pune leh National Centre for Disease Control, Delhi ah te enfiah thin ani ang. Bagalore a awm te tan help line no chu 080-22873151 emaw 080-26631923 a ni .

Vawi duailo Lamtluang a kan rawn post tawh thin angin ebola natna hrik (virus) hi thisen, thlan, luak, zun, mihring chi (baw), chil atang te a inkaichhawn theih a ni. A natna landan chu khawsik, luna, chauhna, luak, khawthalo, pumna, ruh inzawmna na, thisen chhuak te in an awm thin a ni. Lamtluang in i hriat hmaih hauh loh tur a kan duh chu, ebola natna enkawlna tur damdawi hi la hmuchhuah loh a ni tih hi a ni.

*HINDU TEN UTTAR PRADESH AH KRISTIAN AWMLOHNA KHUA SIAM TUMIN TAN LA NASA
Hindu duhfir pawl Rashtriya Swayamsewak Sangh (RSS) a coordinator for the western UP region nilai Rajeshwah Singh chuan Kum 2/3 chhungin Uttar Pradesh khawthlang lam a thingtlang khua te chu Kristian awmmiah tawh loh na khua ni turin hma an la dawn niin a sawi. A sawi dan chuan kumin Krismas ni (25 December) hian Hindu atanga Kristian a inlet tawh te chu Hindu ah inleh tir leh vek tumin beihpui nasa takin thlak an tum a, "Hindu nge Kristian chak zawk tih chu lo thlir mai rawh u" tiin thuthar lakhawmtute zawhna a chhang a ni.

RSS leh Hindu duhfir pawl dang te hian tun hnai ah Kristian chauh nilo sakhaw dang te pawh an beiin ram lak an tum nasa hle a ni. Nimin piah lawk pawh khan Uttar Pradesh ah Hindu nula 1 Muslim a inlet in pawngsual a tawh avangin BJP hmeichhe pawl (Mahila Morcha) leh RSS te hian Sakhaw dang a inlet te nasa taka sawisel in an sakhua Hindu ah inleh tir leh an tum thu an au chhuahpui a ni. Lamtluang in hepa thusawi kan lo chhiar danin kumin December ni 23 khian UP state chhung a hmun 50 ah Muslim atanga Hindu a inleh runpui huaihawt an tum bawk ani. RSS te hian Hindu atanga Kristian leh Muslim ah inlet te hming leh chanchin kimchang an lakhawm mek ni a sawi a ni bawk.

Tunkar nilaini pawh khan Rohtak District, Haryana ah pawh St.Francis Xavier Biak in compound chhung ah Sikul bus 2 te pawh tihchhiah sak anni bawk. I hriat hmaih hauh loh tur chu tuna India Prime Minister Narendra Modi leh a minister tam zawk te hi RSS mi leh sa ruh em em te an ni.
-----------
Kan sakhaw biak ang be lo ten tan an lak nasat zia leh ringtu te kan tawngtai nasat a tul zia hi i vei a nih chuan, he post hi a zau thei ang berin lo share chhawng ve rawh le.

 

*V.K. DUGGAL MIZORAM LARSAP ATAN LAKLUH A NI
Sorkar Laipuiin Mizoram Larsap hna hmui tur atana a ruat Shri Vinod Kumar Duggal, Manipur Governor ni lai mek chu nimin tlai dar 6 khan Raj Bhawan-ah rinawmna thu tiam tira Mizoram Governor 13-na atan lakluh a ni a. Rinawmna thu hi Gauhati High Court, Judge, Justice L.S. Jamir’n a tiam tir. Larsap lakluhna inkhawm-ah hian Home Minister Pu R. Lalzirliana, Chief Minister charge la mek, Minister te, Assembly Deputy Speaker, Parliamentary Secretary leh MLA te bakah Chief Secretary leh Sorkar mi pawimawh thahnem tak an tel a ni.

Larsap hi kum 69 a upa niin November ni 1, 1945 khan Sialkot tunah Pakistan a awm ta ah a piang a. Zirna lamah chuan BA, Delhi University atanga neiin Post graduate degree National Defence College, Delhi (National Security Issues) leh Reading University, U.K (Agriculture & Food Production) atang te in a nei bawk.

Kum 1965 khan Second Lieutenant-in Indian Army a zawm a, kum 1971 khan Captain niin hemi kum vekah hian Indian Administrative Service (IAS) a zawm a. Sipai anih chhung hian kum 1971 Bangladesh War ah Sylhet sector-ah indona a hmachhawn a ni.

1973 kum laihawl atanga 1976 kum tawp lam thleng Mizoram UT a nih laiin Mizoram ah a awm a, hemi hun chhung hian Aizawl DC hna pawh a lo chelh tawh a ni.

Sawrkar hna a thawh chhung hian dinhmun pawimawh tak tak te lo luahin kum 2003 khan Sawrkar Laipuiah Secretary puitlinga hlankai a ni a, 2005 khan Union Home Secretary atan dah a ni a, he hna atangin hian 2007 khan a pension a.Sawrkar hna atanga a chawlh hnuin Member, Commission on Centre State Relations te, Member Secretary, Committee for Consultations on the situation in Andhra Pradesh te (Srikrishna Committee on Telangana), Member of the Task Force on National Security te leh Member, National Disaster Management Authority te a ni.

Nikum May thla ah Uttarakhand a leimin leh tuilian rapthlak tak a thlen khan Uttarakhand Sawrkar pui turin leh chhanchhuahna leh chhawmdawl hna te vil turin Sawrkar Laipuiin a ruat a, chutiang bawkin October thla a Odisha-a Cyclone Phailin a thleh khan chhawmdawl hna a enkawl bawk.

December ni 31, 2013 khan Manipur Governor atan lakluh a ni.
(DIPR)

Mr. VK Duggal sworn in as Mizoram Governor
pix: DIPR Mizoram

8th August 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

8.8.2014

*KHAWNGLUNGRUN FILM DELHI AH SHOW DAWN
Ministry of Information and Broadcasting ten 22-24 August 2014 chhung a Siri FOrt Auditorium Complex, Delhi a Film Festival on North East an buatsaih turah Mapuia Chawngthu (Leitlang Picture) siam Mizo film lar "KHAWNGLUNG RUN" chu a hawnna ni 22 August ah chhuah (Screen) turin an rawn sawm a ni. Lunglei atanga thu kan dawn danin Khawnglung run film director Mapuia Chawngthu (C.Lalhmangaiha) hian he sawmna hi pawmin Delhi pan a tum niin sawi a ni.

Mizo Warrior movie 'KHAWNGLUNG RUN' poster

 

*US IN IRAQ FIRFIAK PAWL TE BOMB TA
Vawiin khan US indo thlawhna pahnih US F/A-18 ten Iraq ram a Islam firfiak pawl Islamic State of Iraq te awp mek Irbit khawpui ah 500-pound (225-kilogram) bomb an thlak.

 

*ISRAEL LEH HAMAS TE INBEI CHHUNZAWM
Ni 3 chhung inkahhai an puan a tawp leh tak hnuah Israel leh Palestine hel Hamas te chuan vawiin khan inralsai an tan leh ta. An ram sana a zing dar 8 (0500 GMT) khan inkahhai hi a tawp a, chumi hnu lawk chuan Hamas te hian Israel lamah rocket 21 an kapchhuak leh nghal a ni, an rocket kahchhuah tamber te leilet zawl ah tla a, mahse 2 te chu tuipuikam a awm Ashkelon khawpui chungah lo kahthlak anni thung. Israel sipai te hian Hamas te beih na chu an lo chhang let ve chauh niin an in sawi thung.

Nimin thleng khan Egypt khawpui Cairo ah ram dang palai te hmalakna a inbiakna neih ah Israel lam hin Hamas te chu tharum hmang a chet bansan se an duh a, Hamas lam hian Gaza strip chu inkalpawh theih a hawn nise tiin an phut ve tlat bawk a, hei vang hian Israel leh Hamas te hian inremna fumfe an la nei thei leh ta lo a ni.

 

*MIZO ZAITHIAM NANCY FB FRIEND PUNGCHAK
Mizo gospel singer lar Nancy Zothanmawii chuan a profile record a landan in 31 July 2014 khan Facebook account a hawng thar ve a, a account hawn atanga ni 9-na chhung (he thu post a nih thleng hian) in thian (friend) 1060 a nei hman a ni.

COURTESY: He kan thu post hi amah Nancy Zothanmawii hnen atanga official a kan dawn leh dil nilo in Mizo celeb lar a nih avangin Lamtluang in a FB account hi kan "stalk" a, chuta tanga kan rawn tarlan chu a ni e, ama hriat loh in a FB account kan lo chingphul chiam a nih hi. Ama privacy kan zah sak avangin a FB profile link pawh chu min zawt lo turah kan ngai che u ania.

Mizo celeb gospel singer Nancy Zothanmawii posing with children in UK

 

*I HRE TAWH NGAI EM?
Mizoram hian UT kan nih laiin Lt.Governor 6 kan nei hman a, state kan nih tak hnu hian Governor 12 kan nei tawh a, zanin a lakluh tur - min hmui hrih tur VK Duggal hi a 13-na tur a ni dawn e.

 

*Pope Francis chuan karleh 13-14 August khian South Korea tlawh a zin a tum a, a kalkawng ah China boruak thlawh tlang a ngaih avangin China ram boruak a thlawh laiin China sorkar hruaitute biakhlatna hmanga biak pawh ngei a tum. Kum 1989 khan khatih laia Pope John Paul II khan South Korea tlawh tur a zin tum in China in an ram chung boruak ah Pope kha thlawh tlang an phalloh avangin Russia boruak zawn ah a thlawh phah tawh a ni.

 

*Thenzawl khawchhung a tuilian thlalak whatsapp lam a kan dawn

Flood in Thenzawl town, Mizoram