26th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

26.2.2014

*PENSION DAWN

C Lalniliana & V Sapchhunga IAS

Mizoram sorkar hnuai a officer senior 2 - C.Lalniliana, Director of Agriculture (Research & Education) leh V.Sapchhunga, IAS, Deputy Commissioner, Lunglei te chu 28.2.2014 hian superannuation pension in an chhuak dawn ta.

 

*LAWNG CHHIATNA THLENG VANGIN INDIA LAWNG SIPAIZAHOTU BANG
Tukin khan India lawng sipaite tuihnuailawng (Submarine) pakhat INS Sindhuratna chhungah meikhu nasa taka a chhuah avangin lawng sipai(Navy) 7 in hliam an tuar a officer 2 te chin hriat loh in an bo mek, hliam tuar te hi helicopter hmangin INS Ashwini hospital ah phurh chhuah vek tawh anni. He chhiatna thlen lai hian INS Sindhuratna ah hian lawng sipai 94 an chuang a, nikum may - december chhung khan he tuihnuailawng hi Russia ramah cheithat tir niin nikum december thla khan Indian Navy te hnenah hlan let chauh a ni a. Cheithat a nih hnu a mumal tak a hman tan anih laiin he vanduaina hi Mumbai lawngchawlhna atanga 80 Km ah an awm laiin a thleng ta a ni. He chhiatna thleng avang hian India Navy hotuber Admiral DK Joshi chuan a ma mawhphurhna ah ngaiin banna a thehlut a, a banna thehluh hi sorkarin an pawmsak a, Vice Admiral RK Dhowan chu Navy hotuber mawhphurhna lo la rih tur a hriattir a ni bawk. Nikum august 14 khan INS Sindhurakshak chhungah pawh chhiatna liantham tak a lo thleng tawh bawk a nih kha.

 

*Zan khat riak a Mizoram sum mamawh te zirchiang tur a lo kal 14th Finance Commission member-te leh officer-te chu vawiin khan Mizoram an lo thleng. Finance Commission member-te hi Finance Minister Pu Lalsawta, Parliamentary Secretary Pu K.S. Thanga leh Chief Secretary Pi L. Tochhawng te’n lo hmuakin, Mizoram mipuiten beiseina sang tak nen an lo kal an chan thu Finance Minister chuan Commission member-te chu a hrilh a ni.

14th Finance Commission Chairman Dr. Y.V. Reddy chuan Mizoram an cham chhungin harsatna leh mamawh state-in a neihte chu hriat a zirchian an duh thu leh, a theih anga hmalak an tum thu a sawi bawk.

Finance Commission Member-te hi Assembly House Annexe Conference Hall-ah tlawmngai pawl hrang hrang aiawhte, Local Bodies aiawhte leh pawl dang hrang hrang atanga aiawhte nen inkawmna hun an hman hnu ah Chief Minister-in zanriah a kilpui ang a. Naktukah Chief Minister hovin Assembly House Annexe Conference Hall-ah hian meeting an nei leh ang.

14th Finance Commission hi an Chairman Dr. Y.V. Reddy leh member pathum - Sushama Nath, Dr. N. Govinda Rao leh Dr. Sudipto Mundle leh Secretary Ajay Narayan Jha bakah Officer pawimawh dangte hovin an lo kal a ni. - DIPR

 

*Naupang huaisen lawmman National Bravery Award , 2013 dawngtu Mizo naupang palite hnenah Mizoram State Council for Child Welfare (MSCCW) chuan vawiin khan chawimawina thuziak leh pawisa fai cheng singkhat theuh an hlan a ni. Mizo naupang zing a huaisen lawmman dawngtu te chu:

Hani Ngurdinthari, kum 15, Lengte, Mamit District. Hani Ngurdingthari hian kum 2013 khan a thiante Dialdawk lui a tla tum li lai a chhanchhuak a ni. March 9 khan a thiannu Lallawmawmi D/o Hmunsiama tui tla chhanhimin, April 29 khan Malsawmzuali D/o Lianmawia a chhanchhuak leh a, May 11 khan a thian te pahnih Zorinpuii D/o Zohmingliana leh Lalchhanhimi D/o R.L. Daniela te a chhanchhuak leh a ni. June 8 khan Malsawmtluangi leh a thiante nena ram atanga an haw Dialdawk lui an kan laia tui lianin a lak Vanrosanga pawh a chhanchhuak bawk a ni.

Malsawmtluangi (L), kum 13, Lengte, Mamit District, Lalduhawmi fanu hian June 8, 2013-a a thiante nena chawhmeh la a an ram kal haw chu Dialdawk luiah an chesual a, a nau Vanrosanga leh a thiannu Lallawmawmi te chu tuiah an tla a. Malsawmtluangi hian chhan tumin luiah hian a zuang thla ve nghal a, mahse tui a thiamloh avang leh tui a khauh em avangin chhan hman lovin a nunna hial a chan phah ta a ni.

Vanlalhruaia, kum 10 , Hmunsam Veng, Mamit, Lalramnghinglova (L) fapa hian May ni 4, 2013 khan a thiannu Zomuanpuii Tuidai luia tla chu a chhanchhuak a. Vanlalhruaia leh a thiante pahnih Zomuanpuii leh Lalramdinthari te hi Tuidai Darbenli-ah an kal tumin an thiannu Zomuanpuii chu tlusualin Tuidai luiah a tla thla a, Vanlalhruaia hian chhanchhuah tumin luiah a zuanglut ve nghal a, Zomuanpuii tui atanga a lak chhuah hnu ah, khaw chhungah midang pun turin a tlan lut lehnghal a ni.

Remlalhruaitluangi, kum 9, Hruaikawn Champhai District D/o Vanlalthanga. April ni 4, 2013 khan Remlalhruaitluangi hian a thiante pahnih Maichammawii leh Lalthanpuia, Tiau luia tla chu chhan tumin theihtawpin a bei a, Lalthanpuia chu chhanchhuakin Maichammawii erawh a chhan hman ta lo a ni.

National Bravery Award dawngtu te hian hian medal, chawimawina thuziak leh pawisa fai an dawn bakah class XII an zir zawh thleng scholarship an dawn ang a, Engineer leh Medical lama kalte chu an graduate thleng scholarship pek an ni ang.

National Bravery Award hi mizo zingah mi 26 in an lo dawng tawh a, an zinga mi 9 te hi thih hnua hlante (posthumous awardee) an ni. -DIPR

 

*Excise & Narcotics Department (END) te chuan vawiin chhun dar 1:30 khan Champhai Jail Veng-ah Heroin gram 9 an man a, a neitu, Lalhmangaihsanga (20) s/o Zothanngura, Champhai Venglai an man nghal bawk.

Heng Heroin te hi a neitu hian Tiau atanga a lak a ni a, Penicillin bur 20-ah dah in Sumo-a Aizawl panpui a tum mek laiin man a ni. Heng Heroin man te hi local Market-ah chuan Rs. 47,000/- man vel ni a chhut a ni.

Lalhmangaihsanga hi Section 21 (b) of The Narcotics Drugs & Psychotrophic Substances Act, 1985 (NDPS Act, 1985) hnuaiah thubuai siamsak nghal a ni. -DIPR

25th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

25.2.2014

*"Tho La Eng Rawh" tih thupui hmang a, Kriatian Thalai Pawl (KTP) General Conference, Diamond Jubilee lawmna ninghal tun Ningani atanga March ni 2 thlenga Khawzawla neih tur atan ngawrh taka inbuaitsaih a ni.

Pandal lian tawk, mi sing 1 vel len theihna tur, a dung feet 288 a vang feet 160 chu Khawzawl Vengthar Field No 1-ah sak zawh thawkhat a ni tawha, tunah chuan a chhung chei hna tlemte leh thil dang thenkhat zawhfel mai thieh turte chauh a awm tawh a, a pannga kawng chei leh Ceiling siam hna te chu tunhnai khan zawhfel an ni.

KTP General Conference-ah hian thupui atan- “ Thola eng rawh “ tih thlan a nia, he thupui hmang hian KTP hruai tu hlui pahnih, Rev H Lalrin mawia leh Rev Lalzuithanga te leh Upa C Ngurthantluanga ten Pathian thuchah an sawi thin dawn a ni. He Thalai khawmpui-ah hian Thalai tana tangkai tur, Multiplex Programme – Thupui 4 nei hman a ni dawna, chutah chuan Upa Lalbiakzuala, Central YMA President ni bawk hovin Thalaite hmathlir- Zu leh Ruihhlo chungchangah tih zirho a ni anga, Central KTP Asst. Secy. Pu Lalmuanchhana hovin – Thalaite hmathlir- Globalization leh Social Media-ah tih zir a ni anga, tupui pathumna, Thalaite hmathlir-Harsatna hmachhawn chung changah tih chu Mout Everent lawn chhuaktu-Pu David Zohmangaiha hova zir a ni anga, thupui hnuhnung ber, Thalaite hmathlir- Thalaite hmathlir- Hlem hletna-Corruption chungchagah tih chu PUC a Assistant Professor, Tv Lalthlamuana hoa zir ho a ni ang.

He Conference-ah hian KTP Diamond Jubilee lawm nghal tur a nih avangin March ni 1-ah Diamond Jubilee Concert ropui tak neih tum a nia, hetah hian tunlaia Zaithiam te bakah hranghlui thahnem tak zai tura beisei a ni.

He Conference ah hian tun thla ni 28 Zirtawp zing ah kum 2014 atanga kum 2016 thlenga hruaitu thar tur thlanna neih a ni ang, hemi ni hian chhun lamah rorel palai ten agenda ngaihtuahin ro an rel dawn a ni. He thalai khawmpuiah hian Zaipawl pui, Bial zaipawl zawng zawng infinkhawm in Jubilee lawm nan Pathian fakna hla tum 2 an rem dawn a ni.

Khawmpui chhim tur hian Taiwan atang leh Mizoram chhunga Lairam Isua Krista Kohhran atang in Palai an lo tel beisei a ni. Conference chhung hian Pathian biak inkhawm tum 6, Fellowship tum 2, bakah Variety Programme tum, Jubileet Concert leh Multiplex programme tum khat theuh neih a ni ang. - Source: Lalhmachhuana Tochhawng via DINGDI Group
Pix:Amby Kop

KTP Diamond Jubilee Logo

 

*BAWNGKAWN IN WINESHOP AN DUH LO
Bawngkawn Branch YMA chuan Mizoram sorkarin zu khapna Burna Dan hlih a, Wine Shop siam leh a tum nia an hriat avangin, sorkar in a zuar leh dawn anih pawhin Bawngkawn veng chhungah chuan wine shop awm lo se tiin an rel.

Bawngkawn YMA te hian kar kalta khan he thu hi ngaihtuahin, sawrkar chu an veng chhungah Zu zawrhna dawr siam tir lo turin an ngen a. Bawngkawn mipuite leh Bawngkawn venga In leh lo neite pawh, hetiang atan hian an In te mi luah tir lo turin an lo ngen lawk bawk a ni.
Source: Lalhmachhuana Tochhawng via DINGDI Group

 

*Mizoram Legislative Assembly member-te leh Synod Executive Committee member-te chu vawiin khan JM Lloyd Hall, Synod office ah an inkawm a. He inkawmhona programme pawimawh tak hi Synod Moderator Rev.K.Lalhmuchhuaka’n a kaihruai a ni.

Mizoram Synod chuan ram hruaitute chu Pathian ruat an ni tih kohhranin a pawm a, ram roreltute leh kohhranhote hi Pathian hruaina zuia thawkho tur an ni, an ti a. MLA te chu hleih nei lova dik taka rorel tura ngenin ram hmasawnna hnukpui an thawhna kawngah theihtawp chhuaha bei turin a sawm a. Mizoram leh Cachar inri na venhim thu ah ramri hrula chengte sahimna mai bakah, an huan lo ram venhim leh thlamuang taka an khawsak theih nan sorkarin tan a lak tulin a hria a. Eirukna chu ram hmelma, mihring nun leh rilru tichhetu a nih avangin tibo tura an hmalakna chu hlen chhuak ngei turin an beisei thu an tarlang bawk. MLTP Act, 1995 chungchanga kohhran ngaihdan tarlangin, he dan kenkawh hi kohhranin a thlawp a, chak taka kalpui zel turin ram hruaitute an ngen a ni. -DIPR

 

*RAHUL GANDHI AN VAWIIN AH GUWAHATI TLAWH DAWN NIMIN AH MI 1 INHAL HLUM
Vawiin hian Congress Vice President #Rahul Gandhi chuan Guwahati ah vantlang inkhawm a nei dawn a, a programme hman tur hi a hma ni a thihna thleng vang in khauh takin venhimna kalpui mek a ni. Nimin zing dar 10 khan Dispur a Asssam sorkar secretariat hma ah nitin inhlawhfa a eizawng Pranab Boro(45), #Guwahati a Garchuk veng a mi chu amah leh amah a inhal a, a hliam tuarlo hian Gauhati Medical College Hospital ah nimin tlai dar 4:20 khan a boral a ni. Amah hi Guwahati khaw chhung a miretheite hnena ram pek duhtu pawl Krishak Mukti Sangram Samiti (KMSS) member a ni. Hetiang hi thil awmdan a nih mek avangin KMSS chuan Assam ah bandh an huaihawt mek bawk a ni.

 

*MIZO TLANGVALIN Ph.D DAWNG THAR
Tv. R.Vanlalvena, Buarpui, Lunglei District chuan Department of Geography, North Eastern Hill University, Shillong atangin Doctor of Philosophy (Ph.D) a hmu thar. Kan lawmpui e

 

*MIZORAM SYNOD CHOIR MUSIC VIDEO ‘Aw Isu, min kai ang che’ tih chu ni Feb. 28, 2014 Zirtawp zanah KTP Gen. Conference, Khawzawlah Tlangzarh a ni dawn ta. He Album-ah hian Hla 11 a awm dawn a, Sap hla lehlin 6 leh Mizo phuah 5 a ni ang. DVD mai bakah Data Disc a keng tel nghal dawn a; Data Disc-ah hian Convert ngai lovin awlsam taka a hla kan neih theih nan a hla zawng zawng MP3 te, Music Track te leh hla Copy fiah felfai takin pdf file-in a awm dawn bawk a ni.

He Music Video Album hi Rs. 160/- man tur niin, Thalai Pawl leh Group-a zuar chhawng duh tan Music Home, Chanmari (Ph 9774393985 / 9436152636)-ah Booking a tih lawk theih a; Aizawl pawn lam tan pawh Khawzawl a lam mai theih turin mahni Copy duh zat sawiin a Order lawk theih bawk e.
Source: Ralte Mesa

Mizo Synod choir Album cover

24th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

24.2.2014

*VAWK PUM-A A SA KG AWM ZAT TUR CHHUTCHHUAH DAN
Teh daih a kan ti maithei. Sa ser thinten an hisap dan ber hian kan han chhut thin a, a dik tlangpui zel mai a, la hre lo te kan awm takin kan tarlang ve mai mai ang e. Vawk lenzawng, a pum-a teha inchi zat atanga 25 paihin a chhuak chu 5-a puntir lehin a Kg zat tur tlangpui (a then chu a dik chiah a) a chhuak a. Entirnan, i vawk kha a puma teh (kualin) inchi 50 ni ta se, 50 atangin 25 paih la, 25 a chhuak ang a, 25 chu 5-in puntir leh la 125 a chhuak ang a, chu chu vawk hetianga lian-a a Kg zat chhuak thin a ni. A lenzawng sawi dan hi hmun hrang hrangah a inang lova, tuna entirna kan sawi pawh hi thenkhat chuan inchi 50 an ti a, thenkhat chuan inchi 25 an ti bawk. Tin, vawk hi a mawng bawr a inang lova, tlem chuan chu chuan a tidanglam thei a, mahse, a dik tlangpui. - Jesse L Paite

 

*MAL BOOK OF THE YEAR TOP 20
Mizo Academy of Letters (MAL) chuan kum 2013 chhung a Mizo tawng a lehkhabu chhuak zing a Book of the Year turin a hnuai a lehkhabu te hi top 20 atan an tlang chhuak:
Baibel - Zarzokimi
Chutiag pawh a ni lo ka nu - Lalhmingliana Saiawi
Hlim ve I duh em? - Evan Lalramzauva Ralte
Jail Run Thim - C.Zama
Ka Lung Ram - H. Lalnunzira
Khami zan kha ka hre reng asin - Lalthantluanga Chawngthu
Lamlian Lehlam - Lalhruaitluanga Chawngte
Lengdawn - C. Lalhruaitluanga
Mihring leh a Sakhua - Lalchhuanawma Tochhawng
Mitthi Privatise - Vanramchhuangi
Mizo Culture - B. Lalthangliana
Mizo History Kamkeuna - R.K.Lalhluna
Pro. Pastor a ni si - Lalhriata
Ramada 19 - Zirsangkima
Riakmaw Cabin - L.P. Mawia Hlawndo
Thangliana - Lalhruaitluanga Ralte
Thinglubul- Lalpekkima
Vullai a Tliak - Duhawma Pachuau
Zo Liantuaii Thliah - Rohlupuia Chhangte
Zoram Mi hrangte an vanglai - C. Lalnunchanga

 

*BAJAJ IN CAR NI CHIAH SILO 4WHEELER MOTOR THAR SIAM CHHUAK
India ram a lirthei siamchhuaktu lar Bajaj Auto chuan car tih dawn a car nih chiah silo rickshaw tih dawn a ni chiah bawk silo lirthei chhuak thar ke pali nei RE60 an tih chu kumin October thla atang hian zawrh chhuah theih an in beisei. He motor thar hian autorickshaw ke pathum nei chi ho a luahlan hneh hle tur a rin lawk a ni. RE60 hi Kg 400 a rit niin darkar 1 ah km 70 a chakin a tlan thei a, gasoline emaw compressed natural gas (CNG) a hmang ang a, aman pawh Rs.Nuai 2 vel bawr ni tur a rin a ni. Car ni bawk silo rickshaw ni bawk silo hi sorkar in a category tur a ngaihtuah mek niin Bajaj Auto Managing Director Rajiv Bajaj chuan a sawi.
#Lamtluang page hi i thiante lo like tir ve rawh le.

 

Bajaj RE60
pix:zigwheels.com

*#Mizo_Idol thlan thar a 2-na nita Lalhlumawii chu an khua Hnahthial Joint Village Council in Mizo Idol thlan na a 2-na a nih lawmpui nan Rodeo Scooty an leisak dawn. Lalhlumawii hian tunkar Ningani hian an khua pan a haw a tum a, an khawmi ten ropui tak a lo hmuah an tum ni a sawi a ni.

Lalhlumawii, Hnahthial, Mizo Idol top 2,
pix: www.facebook.com/MizoIdol

 

22nd - 23rd February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

23.2.2014

*NE-A UNIVERSITY THA BER MZU
Mizoram University (MZU) chuan National assessment & accreditation council (NAAC) atangin 'grade A' a hmu. NAAC hi India ram university leh college dinhmun zirchianga grade petu a ni.

North east-ah chuan NAAC-in assessment a neih tawhah NEHU leh MZU chiahin grade A an nei ni a hriat a ni. NEHU in grade point 3.01 a hmuh laiin MZU chuan 3.12 a hmu a ni.
Source: Aitea Ralte via Times Corner Group

 

22.2.2014

*Mizo Idol thar Grace Lalchhanhimi chu vawiin khan an khua Kolasib ah ropui tak a lo hmuah a ni.

 

Mizo Idol Grace Lalchhanhimi, Kolasib
Pix: www.facebook.com/MizoIdol

 

 

*IIIT MANIPUR AH DIN DAWN
#Manipur CM Okram Ibobi Singh chuan an state chhung Senapati ah Indian Institute of Information Technology (IIIT) din a nih tur thu a sawi. IIIT hi public private partnership hnuai a din tum niin Union Ministry of Human Resources team pawhin a hmun ah an enfiah tawh a reilo te ah hma lak chhoh tum a ni. {Mi state chuan zirna in tha hi an nei leh mai thin, rualawh a na}