21st February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

21.2.2014

Grace Lalchhanhimi, Mizo Idol 2014
pix courtesy: www.facebook.com/MizoIdol

*#MIZO IDOL 2013-2014 final result puan a ni a Mizo Idol thar atan Grace Lalchhanhimi (21), Kolasib chu thlan a ni ta. Mizo Idol hian Rs.Nuai 1 leh Mahindra Rodeo scooty a dawng ang a, 2-na Lalhlumawii (Bteii), Hnahthial niin Rs.Sing 5 a dawng ang a, 3-na chu Lancy Remlalhruaii, Serchhip niin Rs.Sing 2 leh sang 5 a dawng ang.

 

*PM IN INTHLAHNA THU A SAWI
India Prime Minister ni mek Manmohan Singh chuan vawiin khan Prime Minister a nihna anga Parliament a thusawi hnuhnun ber tur chu vawiin khan a nei. PM hian UPA in sorkarna lo chang leh pawh nise Prime Minister nih a tum zui tawh loh thu a sawi. Vawiin a thusawi ah hian PM a nih chhung a 'Food Security bill' leh 'Telangana bill' passed a nih chu lawmawm a tih thu a sawi lang tel a ni. Manmohan Singh hi kum 82 mi niin kum 2004 atang khan India ram PM hna tum 2-na a chelh mek a ni. Amah hi Assam atanga Rajya Sabha MP nilai mek a ni bawk. India ram PM 13-na niin Sikh zing a PM ni hmasaber a ni a, Jawaharlal Nehru tih loh ah chuan PM term vawi 2 a zawn a hmang tluantling thei tur a ni bawk.

 

*GOOGLE IN WHATSAPP LEI IN HUAM
Internet search engine lar google pawhin facebook tih thikin mobile messaging hmanna lar whatsapp chu facebook ho in lei an tumna aia man tam $19 billion in an dawr a, mahse thudawnna in a sawi danin whatsapp C0-founder Jan Koum chuan a pawisa in tlem zawk mahs e facebook hnenah whatsapp chu lei tur a tum zawk thu a sawi.

 

*Mizoram Journalists' Association, Champhai District chuan vawiin khan an din cham kum 25-na, Silver Jubilee chu I&PR Auditorium, CHANEM Building-ah an lawm a. Pu TT Zothansanga, Parliamentary Secretary chu khuallian a ni.

19th - 20th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

20.2.2014
*AIZAWL BAZAR AH BOMB PUAK
Zanin dar 11:40 vel khan Aizawl chawhmeh Bazar chhung a bawngsa zawrhna ah gelatin ni a rin bomb a puak a, thi leh hliam an awm hriat a ni lo a, mahse a bul hnai a in darthlalang te a keh nual ni a sawi a ni.

bomb explode in Aizawl bazar

pix: Zoremliana Hauhnar via Special Report Group
 
*Bengchheng nasa tak karah #Telangana bill chu Rajya Sabha in an passed ve leh ta a ni.
 

*Mizo Acamdemy of Letters, Sahitya Academy leh Agartala a, North East Centre for Oral Literature (NECOL) buatsaihin vawiin khan MBSE Conference Hall, Chaltlang-ah Mara tawng zirhona “Symposium on Mara Language” neih a ni a. Nileng awh he zirhona hi Art & Culture Minister Pu R. Romawia’n a hawng. Symposium ah hian Govt. Saiha College Associate Professor pathum - Benjamin Francis Nohro, Thasia T. Ayzu leh Dr. Chawngkhuma Chawngthu bakah Fisheries Department Joint Director (Rtd.) Pu Heili T. Ayzu te paper buatsaih chu ngaihthlak leh zirho a ni. -DIPR

 

*Mizo hla phuah thiam, poet of the century tia koh Pu Rokunga pian champhaphak vawi 100-na lawmna vawiina Vanapa Hall-a Rokunga Memorial Society in an buatsaih chu Chief Minister Pu Lal Thanhawla’n a hmanpui.

 

*FACEBOOK IN WHATSAPP LEI DAWN
Facebook company chuan tunhnai a mobile messaging nana hman lar tak Whatsapp chu US $16 billion in an lei dawn. An in dawrna ah hian Facebook hian pawisa faiin $4 billion leh stocks in $12 billion a in Whatsapp hi leisak turin an in be fel a ni. #Whatsapp hotupa Jan Koum pawh in FB board of directors a zawm thar dawn bawk a ni.#Mizo te zingah pawh smart phone hmang chin chuan Whatsapp hmang lo chu tlem te anni tawh zawk hial awm e.

 

19.2.2014

*RAK ZU LEH BEER MAN
Excise & Narcotics Department (END) Champhai station chuan tukin zing dar 2:10 khan Melbûk daiah duty-in Sumo Regn. No. MZ-04/3074 atangin Rakzu litre 500 (five hundred litres) leh Beer case 12 (228 cans) Diablo an man a. Heng zu neitu: - Lalbiaktluanga (24) s/o Kapchhuanga, Dawn, Lunglei District a awm anga inchhal, tuna Zokhawthara khawsa mek leh Sumo Driver, Dawngsianmuan (19) s/o Thangsuanhau, Bethel Veng, Champhai an man bawk a ni. An thurualpui tho, Vanlalmuana (20) s/o Lalpiansuala (L) Kanan Veng, Champhai leh a Scooty Regn. No. MZ-01/G-9939 pawh an man tel nghal a ni.

Vanlalmuana, Kanan Veng, Champhai hian a Scooty-in hma a hruai a, kawng a clear leh clear loh endiktu a ni a, hei hi hriain Excise & Narcotics-te chuan an lo man hmasa a. Tichuan Sumo hian zu phur chungin a hnungah a rawn zui a, an lo man ta a ni.

Heng an mi mante hi MLTP Act, 1995 hnuaiah Excise & Narcotics-te chuan thubuai an siamsak a ni. -DIPR

 

*Rajya Sabha ah #Telangana bill sawiho lo a tin darh a ni.

 

*MBBS AIIMS, New Delhi a zir duh class 12 passed leh exam tur te tan online registration 17th February, 2014 - 17th March, 2014 thleng an website ah a tih theih e. Hre chiang duh chuan Technical Wing, Higher & Technical Education, Chaltlang ah Office hun chhungin zawhfiah theih a ni e.

 

*Tamil Nadu Chief Minister Jayalalithaa chuan Rajiv Gandhi thahna chungchang a hrem tawk lung in a tang mek mi 3 Murugan, Santhan leh Perarivalan te chu ni 3 chhung a chhuah zalen anni tawh tur thu a sawi. Jayalalitha hian heng tual thahna a inhnamhnawih te hian kum 23 chhung tan in ah an awm tawh a sorkarin chhuah zalen hi a duh a ni a ti. Rajiv Gandhi thah chungchang ah inhnamhnawih a puh dang tang mek Nalini, Jayakumar, Robert Paes leh Ravichandran te pawh chhuah thuai annih tur thu a sawi.

 

*CHIEF MINISTER BANG
Andhra Pradesh Chief Minister Kiran Kumar Reddy chuan vawiin khan Telangana state thar siam tur duh loh vangin Governor hnenah banna a thehlut a, congress party a chhuahsan nghal bawl. A rual hian congress MLA 5 te pawn banna an thehlut bawk. #Telangana bill hi Rajya Sabha ah sawiho mek a ni.

 

*VIDARBHA STATE THAR NGIAT VE DAWN
Nimin lawkah Lok Sabha ah #Telangana state thar siamna tur bill passed a nih hnuah Republican Party of India President, Ramdas Athawale chuan 24 February atangin Maharashtra atanga Vidarbha state thar siam ngiat in chak tawkin hma an la dawn niin a sawi.

16th - 18th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

18.2.2014
*MIZO TLANGVAL IN Ph .D HMU THAR

Lalremruata Hauhnar, Ph.D

Tv. Lalremruata Hauhnar (Tetea) s/o. Lalchhuanmawia, Ramhlun North, Aizawl chuan vawiin khan School of Life Sciences, Jawaharlal Nehru University, Delhi atangin Doctor of Philosophy (Ph.D) a dawng thar. A thesis hi 'Analysis of GPI-GnT complex in Candida albicans: Focus on CaGpi15' tih a ni. Kan lawm pui e.
 

Lancy Remlalhruaii (Mizo Idol top 3)
Pix: https://www.facebook.com/MizoIdol

*Mizo Idol top 3 ah Lancy Remlalhruaii, Serchhip a tla. Ti hian Mizo Idol final chu Grace Lalchhanhimi, Kolasib leh Lalhlunmawii, Hnahthial ten an in chuh dawn ta a ni.

*Vawiin khan Directorate of Advertising & Visual Publicity (DAVP), Ministry of Information & Broadcasting chuan Aibawk-ah Sorkar Laipui in thingtlang hmasawn nana ruahmanna hrang hrang a duan, a bikin Bharat Nirman Campaign hnuaia ruahmanna leh scheme hrang hrangte a kalpui dan leh hnathawh dan te thlalak hmanga pholanna(Photo Exhibition) an buatsaih. Photo Exhibition hi BNRGSK Hall Aibawk-ah neih niin February ni 22 thleng a awh ang. Photo Exhibition hi Aibawk VCP Pu Lalthakima’n a hawng a ni.

Sorkar Laipui ruahmanna hrang hrang te chipchiar taka mipui hnenah thehdarh leh zau zawka heng ruahmanna chungchang an hriat theih nan Photo Exhibition hi Field Exhibition Unit, DAVP Aizawl, YMA Aibawk Branch leh Aibawk VC te thawhhona in buatsaih a ni. Hetiang Photo Exhibition hi Mizoram hmun khaw hrang hranga a lo buatsaih tawh thin a ni, tun thla pawh ni 4 pawh khan hetiang programme hi Seling-ah an lo buatsaih tawh a ni.

*Vawiin khan Lok Sabha ah Andhra Pradesh atanga state thar siamna tur Telangana Bill chu passed a ni ta.

 

17.2.2014

*AAM AADMI PARTY MIZORAM AH DIN
Vawiin khan Habung Payeng, Aam Admi Party National executive member chuan Mizoram ah an party aiawh tur hruaitu thar an ruat tawh thu a sawi. An hruaitu ruatthar te chu: State co-ordinator-ah Lalthanzami, Zemabawk. Joint Co-ordinator-ah S.L Sailo, IAS (retd). Member-ah John Lallawmkunga Sailo, Laltanpuia Tochhawng, Jacob L.Pachuau, Jeremy L.Pudaite leh Chawngzarliana Chawngthu te an ni. Party Sum leh pai vawng turin SL Sailo, John Lawmkunga Sailo leh Lalthanzami te ruat an nih thu puan a ni bawk.

 

*CHIEF MINISTER-IN VARANASI A TAWNGTAINA INPUI HAWN A HMANPUI
Varanasi a Mizo awmte tlawha zinchhuak, Chief Minister Pu Lal Thanhawla chuan inrinni kalta ni 15.2.2014 khan Varanasi Mission rawgbawlna hnuaia Tawngtaina Inpui hawnna a hmanpui.

Chief Minister chuan Hindu te khawpui hmun pawimawh tak,Varanasi-ah hetiang Kristiante Tawngtaina Inpui hawn a ni chu lawmawm a tihthu sawiin,Pathian hnathawh ropui tak leh mak danglam tak nia a hriat thu a sawi a. Pathian Ram zau zelna tur anih ngei a beisei thu a sawi a ni.

Chief Minister chuan Mizote hi khawvela sakhua lian ber ber, Hindu, Mosolman leh Buddhist ten min hual chungin Pathianin Chanchintha hmangin min zawng chhuak a, chuvangin chanchintha hril hi kan mawhphurhna a ni a; Chanchintha kan hril chhung chu chimralin kan awm lovang a ti.

Chief Minister chuan sorkarin hmasawnna leh chhungkaw tinte intodelhna turin nasa taka hma a lak thu sawiin, heng sorkar hmalakna kaltlang atanga chhungkaw tin ten malsawmna an dawn atangin Kohhrana an thawhlawmte lo pungin, chutatang chuan Pathian Ram zau nan kan luangchhuak zel thei dawn a ni a ti.

Chief Minister Pu Lal Thanhawla’n he Tawngtaina Inpui hawn a hmanpuina hriatrengna turin Pu Rajesh, Tourism Information Officer, Govt. of Uttar Pradesh chuan Varansi Guide Map siam that leh hunah he Christian Prayer House hmun hi tarlan anih tur thu inrinni zan inkhawmah a puang bawk a ni. Vawiin chawhnu khan Hindute hmun pawimawh Ganges lui kama Dhashaswamed Ghat hmuna tual inkhawm buatsaihah Chief Minister Pu Lal Thanhawla hian thu a sawi bawk a ni.

Chief Minister hi a nupui Pi Lal Riliani leh Pu Talo Rosanga, Additioanal Resident Commissioner, Kolkata ten an tawiawm a ni. -DIPR

 

*PRESIDENT RULE HNUAIAH DELHI DAH A NI TA
Delhi CM Arvind Kejriwal leh a cabinet ten karhmasa lama banna an thehluh tak vang leh party mal sorkarna siam thei an awm tak loh avangin Delhi Lt.Governor Najeeb Jung a rawtna angin India President chuan Delhi sorkar chu President rules hnuaia awm turin a pawm ta a ni.

 

16.2.2014

*NEPAL AH THLAWHTHEIHNA TLA
Vawiin khan Nepal ram a Arghakhanchi district a Khidim ramhnuai ah thlawhna te chi mihring 18 chuanna chu a tla. He thlawhna a chuang te hi an za vai hian an thih rin a ni. He thlawhtheihna tla ta ah hian passenger 15 leh crew member 3 an chuang a, an zingah hian Nepali mi 14 leh Denmark mi 1 an chuang a ni. Pakhora Airport atagin 12:40pm khan an thlawh chhuak a minute 15 hnu ah an biak pawh theih ta lo a, an tlak chhan ah hian khawchhia vanga boruak thiang tha lo chu rinhlelh ber a ni. Thlawlhna a chuangte hi dam an awm leh awm loh zawn mek anni a, chhanchhuahna na hi sipai leh helicopter hmang te in ngawrh takin an kalpui mek a ni.

 

*Dr T.Ao memorial football final result: Mizoram 3-1 Meghalaya (Penalty shootout)

 

*NE MITE TAN DELHI POLICE IN HELP LINE NO SIAM
Delhi Police Commissioner B.S Bassi in a sawi danin Delhi khawpui a India hmarchhak (North East India) mi awmte tan harsatna leh diriam an tawk a nih leh chuan police help line no thar 1093 an siam a, engtik lai pawh in north east India mi ten he number thar ah hian dial thin turin a ngen a ni.

13th - 15th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
15.2.2014
*NORTH EAST CULTURAL NIGHT HMANG
Zanin tlai dar 5 khan University of Hyderabad a North East Students' Forum(NESF) te chuan cultural festival 'SPACKLE 2014' an hmang a, Mizo zirlai te pawn Puma zai leh Cheraw te an entir ve a ni.
 
*Tukin khan Khleriat, Jaintia Hills ah Guwahati leh Aizawl inkar service sumo accident ah Synod missionary Hamrem a Evangelist Teacher a thawk mek Valalzuali w/o. C.Lalrokima, Zemabawk leh Apollo Nursing tutor ni thin Lalhmunsangi, North Vanlaiphai te an boral. An ruang hi Shillong YMA ten Mizoram lam panin an rawn thawn haw tawh a, Shillong atangin motor 7 velin an rawn zui chho mek a ni.
 
*Vawiin tlai dar 4 hian AR Ground, Aizawl ah 5th Dr.T.Ao memorial football championship final chu Mizoram vs Meghalaya ten an khel dawn.
 
*AIRTEL 4G PE CHHUAK
Nimin khan Bharti Airtel chuan Bangalore ah India ram a hmasaber turin 4G service an pe chhuak tan. Airtel 4G hi Apple iPhone 5s or 5c hmang te tan 3G rates in a hman theih a, high definition video te pawh bufferingchhung nghah buai ngai lo in darkar chanve chhung lek in movie 10 lai awlsam takin a download theih dawn a ni. 2G/GPRS data plans/packs hmang te tan pawh 3G plan hmangin 4G speed hi a hman theih tho bawk ang. Airtel 4G hmangtute chuan Rs. 1000/- pack in 1GB 4G data an hmang thei tawh dawn a ni.
 
14.2.2014
*SUPREME COURT IN NORTH EAST MIPUI TE HIMNA TUR IN NOTICE CHHUAH
Vawiin khan ukil 7 ten Supreme Court ah India hmarchhak mi ten ram chhung hmundang ah hmusit leh mawi lo tak tak a diriam an tawn thin lakah an himna tur ngaihtuahna tur PIL an thehluh chu Chief Justice P Sathasivam and Justice Ranjan Gogoi te chuan ngaihtuah sakin sorkar laipui(centre) leh state zawng zawng a sorkar hotute hnenah hriattirna chhuah nghalin kar 4 chhung a North East mi te himna tur dan lo duang chhuak a, SC hnen a thehlut leh theuh turin an ti a ni. PIL thehluttu ukil 7 te hian Ministry of Home Affairs ah North East mite himna tur in engmah a hranpa dan leh dun a awmlo niin an sawi.
 
*MIZO IDOL TOP 4 ah Vanlalauva, Bilkhawthlir a tla
 
*DELHI CM IN BANNA THEH LUT
Nimin a Delhi Assembly a eiruk dona tur bill Jan Lokpal Bill house in an pawmpui theih tak loh avangin zanin tlaiah khan CM Arvind Kejriwal chuan Delhi Secretariat atangin a banna lehkha Lieutenant Governor Najeeb Jung hnenah a ziak ta a ni.
 
*Excise & Narcotics Department (END) chuan nimin (13th February, 2014) tlai dar 4:00 khan Vaivakawn, Zotlang Road-ah Heroin 45 grams, 500 mgs leh a neitute, Lalhmingliana (35) s/o Laldinthara, Bawngkawn, tuna Vaivakawna khawsa mek leh Lalchawiliana (25) s/o Kaitinthanga (L), Dinthar veng te chu an man.

Heng Heroin te hi Myanmar lam atanga an rawn lak a ni a, ‘Hawng’ 3 a ni. Aizawl-a an hralh hmain Excise & Narcotics Department hian an lo man ta a ni.

Tukin zing dar 3:51 khan Excise & Narcotics Department Champhai Station te chuan Melbuk ah Heroin ‘hawng’ hnih, 28 grams leh a neitu Hmingthansanga (42) s/o Biakliana (L) Zokhawthar, Champhai District an man bawk. Heroin an man hi local market ah chuan Rs. 3,00,000/- a an zawrh mek lai a ni.

Excise & Narcotics Department hian an mi man te hi The Narcotics Drugs & Psychotropic Substances Act, 1985 (NDPS Act) hnuaiah thubuai an siamsak a ni. -DIPR
 
*FB AH GENDER OPTION DAH BELH A NI
Facebook engineer te chuan user ten an profile a gender an tarlanna ah mipa(male) leh hmeichhia(female) tih bakah tuai leh patil te tan hman tur an dah belh. FB in gender option ah dah thar a lar zual te chu androgynous, bi-gender, intersex, gender fluid or transsexual etc te anni. He gender option thar ah hian user ten an post, likes leh comment ah te an duhdan ber a lang thei turin 'him', 'her'or 'them' option siam a ni bawk. Tunah rih chuan option thar hi US mipuite tan a hman tur a chhawpchhuah hmasak phawt a ni a, zawi awiin khawmualpui danga user te tan pawh tih zel tum a ni.
 
13.2.2014
*LO HAL CHUNGCHANGA THUPEK
Mizoram Local Administration Department chuan thuchhuah siamin, kum 2014-a Mizoram chhunga lo, leipui leh huan hal tur te chuan March ni 15, 2014 ral hma ngeiin hal vek turin leh, an lo, leipui leh huan bak ramdang tikang lo tura meilam sialin kangmei an veng tur a ni, a ti. Mahni Village Council Area pawn lama ram hal tur nei te chuan ram an neihna khuaten an hal ni ah hal ve turin hriattir an ni bawk.
 
*Vawin Dt 13.2.2014 a Lungsen a thil thleng.Rinzuala'n a nupui leh a nupui u nizan khan a sawisa a,a sawi sak hnu ah atlan bo nghal a.A nupui leh a u te chu Lunglei Civil Hospital ah an awm a,a nupui u zawk hi vawin ah a boral a.a nupui pawh hi ngaihtuah awm tak a ni.Rinzuala hi khaw pawn ah in awkhlum a hmuh a ni.
Source: Mesa Chelsea Renthlei via SPECIAL REPORT
 
*UN Organisation pawimawh tak tak 5 - UNIDO, FAO, ILO, UNDP leh SouthAsia enkawltu bik UNIDO hnuaia Sustainable Energy for All hotu rual te chuan February 13 khian Mizoram an rawn tlawh dawn.

*Vawiin khan Lok Sabha ah Telangana state thar siamna tur bill pharh a ni ta a, Andhra Pradesh state thendarh duhlo MP thenkhat ten buaina siamin Parliament pawh rorel thei lo khawpin an tibuai a, Telangana leh Seemandhra MP te house chhungah an intibuai a, Seemandhra atanga Congress MP L Rajgopal chuan hmarcha(pepper) spray nasa takin house chhungah a kap kual a, MP leh house chhunga awm media mite pawh an tlan chhuak hum hum a ni. He buaina thleng avangin house pawh rorel thei lo in chawlh lai lawk angai ta hial a ni.