11th - 12th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

12.2.2014
*MIZORAM SAWRKAR HNUAI PISA KAI HUN SIAM THAR
Vawiin khan Government of Mizoram chuan thlasik chhunga Office kai hun leh ban hun, tuna hman kan hman mek thlakna tur Order a chhuah. Sawrkar hriattirna ang hian Pisa dawr hun chhung hi February ni 17 atanga hman tan a ni ang.

Sawrkar thuchhuah in a tarlan dan chuan Mizoram Sawrkar hnuai a Office zawng zawng te Thawhtanni leh Zirtawpni inkara dawr theih hun chhung chu zing dar 9:00 leh tlai dar 5:00 inkar a ni ang a. Inrinni leh Pathian ni tiam lovin New Delhi, Kolkata, Mumbai leh Bangalore khawpui a Mizoram House te hnathawh leh dawr theih hun chhung chu zing dar 9:30 leh tlai 5:30 inkar niin India hmarchhak huam chhung bika Mizoram House te chu zing dar 9:00 leh tlai dar 5:00 inkar ah an dawr theih thung ang.-DIPR
 
*KRISHI KARMAN AWARD 2012-13
Mizoram Agriculture Department chuan a tum hnihna atan Krishi Karman Commendation Award 2012-13 a dawng. He Award hian pawisa fai Rs. 25.00 lakh (Cheng Nuai sawmhnih panga) a keng tel a ni. He Award hi Ni 10 February, 2014 khan New Delhi ah India President, Shri Pranab Mukherji hnen atangin Pu C.LRuala,M.P.(Lokh Shabha) chuan a dawng a, Pu C.L.Ruala hi Agriculture Principal Secretary Pu Lalramthanga, Agriculture Director Dr. C.Lalzarliana leh Delhi a Mizoram Resident Commissioner ten an tawiawm a ni.

Commendation Award hi buhbal tharchhuah kawnga hmasawn leh titha heng State paruk hian an dawng a ni - Mizoram, Uttar Pradesh, West Bengal, Arunachal Pradesh, Meghalaya leh Tripura.

He Award Mizoramin a dawn nachhan hi eibar a a lo intodelh tak vang ni lovin, buh bal thar chhuah kawnga hmasawnna a neih vang a ni ber a, kum tina thar chhuahin kiam lam pan lova pun lam a pan chhoh ve hret hret vang a ni ber. Buh tharna tur Leilet siam belh zel vang te, Buh chin hlawk dan thar (New technology) e.g. SRI, IPP, IP hman avangte leh Buh chi tha leh hlawk chin chhoh ve zel vang te a tharchhuah a lo pung chhoh ve zel vang a ni.

He Award pawisa ken tel hi Agriculture Office hrang hranga thawhhona boruak tha thlen thei tur zawnga hman phal a ni a. Mizoram chuan Loneitute tih phur nan leh thar tam kawnga in elna boruak tha siam turin State Farmers’ Meet te buatsaihin loneitute hnena lawmman atan a lo hmang tawh thin a. Kumin ah pawh hian Ni 17th&18th February chhung hian Pu Lal Thanhawla, Hon’ble Chief Minister hovin heng pawisa hmang hian Farmers Meet buatsaih mek a ni a, Buh, Oil Palm leh thlai hrang hrang thar tha lawman sem a ni leh dawn a ni - DIPR
 

*INKAPHLUM PALH
From: C. Lalhranga Saiha
Feb 12, 2014: Feb 5, 2014 khan Vanlallura K-23 S/o Lalthanga leh a thianpa, Ramdingmawia (27) Rawlbuk khua te chu ramvak turin Chhimtuipui luiah an riak a. Hemi ni hian ramvak turin an chhuak dun a, a thianpa, Vanlallur chu zanah pawh a rawn hawn tak loh avangin an riahna-a riak ve, Thingfal, Lungtian leh Cheural pa hoten zankhua in an zawng, mahse an hmuh zawh tak mai loh avangin an khawlam theuh phone-in an zualko ta nghal a, a tukah khawlama tlangval ho an rawn thlen khawm hnuah an zawng hmu ta a ni.

A ruang an hmuh hian alo thifel der tawh a. A silai chu lo delhin, silaiah hian cartrige ruak a alo inthun a, a silai ngul pawh hi a kawi nghe nghe a ni.

A silai ngul (barrel)-ah hian silaimu kah chhuahna hnuhma alang lova, a silai kawmah leh barrel-ah erawh chuan musep-a kahna hnute hmuh a ni.

Aruang awmna chung zawn thingah chuan silaimu luhnate a awm bawk a, amaha intihpalh nitheia alan loh avangin Sangau Police-ten rinhlelh thilah, thu zawhfiah atan a thianpa Ramdingmawia chu an la ta a ni.

Hetia thu zawhfiah anih hian a thianpa chuan ama tihpalh ngei anih thu a inpuang a, tunah hian District Jail, Lawngtlaiah dah nghal a ni.
source: Kiddy Vanchhawng via Special Report

 

*MLTP ACT THLAK DAWN
Excise Minister, Pu R Lalzirliana chuan, MLTP Act, 1995 thlakna turin, Mizoram Excise Bill, 2014 duan fel a nih tawh thu leh, kumin March 18-a Assembly Session-ah pharh tum a nih thu a sawi.

Pu Zira chuan, Mizoram Excise Bill, 2014-in MLTP Act a thlak dawn tih sawiin, "Dan tharah chuan zu zawrh phal a ni ang a, inkhuahkhirhna ṭha tak siam chungin Zu zawrh phal a ni ang a, mahse ruih erawh phal a ni dawn lo tih a sawi a; a huhova zu inna (Bar) pawh siam a ni lovang tih a sawi bawk. source:vanglaini

 

*Vawiin khan Railway Minister Mallikarjun Kharge chuan Parliament ah Railway Budget 2014 a pharh a, rail 72 tlan thar tir anni dawn (17 Premium trains, 38 Express trains, 10 Passenger trains, 4 MEMU and 3 DEMU.)

 

11.2.2014

*Nepal National Congress President Sushil Koirala chu Nepal ram Prime Minister thar atan lakluh a ni.

 

*Mizo Idol Top 5 ah K.Lalrintluanga, Ramhlun Venglai chu a tla

 

*International Olympic Committee(IOC) chuan vawiin atang in Indian Olympic Association kum 1 leh thla 2 chhung a lo suspend tawh chu an hnukdawk leh ta. Ti hian India chuan khawvel a sports a inelna IOC huaihawt leh hriatpuina hnuaiah zalen takin a tel ve leh thei dawn ta a ni.

 

*Mizo Idol top 5 result puan leh top 4 intihsiakna chu zanin dar 8 ah tan a ni leh dawn, tu tak tla ang maw?

 

*NUPUI VITHLUM
Vanlalmuanpuia (46) s/o Lalzawma, Chanmari, Aizawla mi in luaha a nupui fanaute nena khawsa mek chuan a nupui, Lalnuntluangi (50) a vit hlum.

Thu dawn danin, Vanlalmuanpuia hian February 9, Pathianni tlai khan a zu rûi thinrimin a nupui hi a pumah chemte-in a vit a, Lalnuntluangi hi Aizawl Civil Hospital panpui niin, nimin zing dar 2:50 vel khan a hliam tuar loin a thi a ni. Lalnuntluangi ruang hi an khua, Baktawngah lak a ni. - Vanglaini

10th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
10.2.2014
*MIZO NULA Ph.D DAWNG THAR

Dr. Lalhmingchhuani, University of Madras

Nl. Lalhmingchhuani D/o V. Laizika, Bethlehem Vengthlang, Aizawl chuan vawiin khan Department of Sociology, University of Madras, Chennai (Tamil Nadu) atangin Doctor of Philosophy(Ph.D) a dawng thar. A thesis title hi 'A Study on Socio-Economic Profile of the Prisoners in the Central Jail of Mizoram, India' tih a ni. Kan lawmpui e.
 
*PAWNGSUAL CHHUICHIANG DAWN
Karhmasa lawk a Manipur tleirawl kum 14 in Munirka, South Delhi a pawngsual a tawh chungchang chhuichiang turin sorkarin Special Investigation Team(SIT) a din ta a, Delhi Deputy Commissioner of Police(South) BS Jaiswal in ho in vawiin khan he tleirawl hi a vanduai tawh dan te zawhfiah a ni.
 
*PAKISTAN AH KRISTIAN CHHUNGKUA TE VAKVAI
Nikum a Sagodha District, Punjab Province, Pakistan a Christian tlangval 1 in Muslim hmeichhia 1 nupui a aneih vanga tualchhung miten an In leh lo an suasam bakah khua atanga an hnawhchhuah tak chhungkaw 4 te chuan Pakistan sorkar thuneitute hnenah an In leh lo te neih let leh an dilna chu tun thlengin sorkarin ala ngaihven sak duhlo a ni. Heng Kristian chhungkaw 4 te hi khawdang ah miretheite chenna(slum area) ah an khawsa ve naw naw a, an in bakah an dawr te chu Muslim tualchhung miten an hnehchhuh fai vek tawh a ni. An harsatna tawh hi Human Liberation Commission Pakistan(HLCP) te chuan nimin khan Lahore Press club ah nasa takin an au chhuahpui a, UNO ah pawh an harsatna tawh hi tanpui thuai turin lehkha an thawn sak bawk a ni.

8th - 9th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

9.2.2014
*POLICE LOCK UP AH INAWKHLUM
Post hmasa lama kan rawn tarlan tawh 4 Feb a Vaseikaia thi a chhar Thianghlimi thattu nia rinhlelh a pasal thentak Thuamluaia chu 7 February zan khan police lock up ah a inawkhlum.
 
*UPC NEI chuan vawiin hian chawnghei a tawngtai hun an hmang mek a, kohhran thenkhat ah chuan chawnghei hi zing lamah an hmang tawh a zanin tlai a hmang tur pawh an la awm mek a ni.
 
*"Nun hlimna leh hriselna ngaina mi i nih a,i hlutna leh beiseina chhem alh duh mi i nih ngai chuan, nangmaha phurrit awma kha i thinthlak a ngai a,i thlauhthlak tawh thil chu la kir tawh ngai suh." (Nangma Khawvel - Zara, phek 70-na, Aman: Rs.100)
 
*FAINA BEIHPUITHLAK AH SIKKIM TI THA BER
Drinking water and sanitation ministry thuchhuah in an tarlan danin sorkar laipuiin faina beihpui a thlakna 'Nirmal Bharat Abhiyan sanitation drive' hnuaiah Sikkim chuan 100% in an hlawhtling. Sikkim hi thingtlang leh khawpui ah In, sikul, anganwadi centre, bawlhhlawh paihna siam kawngah India ram pumah an ti tha ber a, an state chhunga In awm zawng zawng 610,577 ah inthiarna leh bual in thianghlim tak an nei vek niin tarlan a ni.
 

*TRIPURA CIVIL SERVICE A MIZO TLING THAR TE
C.Lalfaksanga s/o. C.Lianmawia, Vanghmun;
Lalentlingi d/o. T.Lalbiakthanga, Behliangchhip;
Esther Jongte d/o. Lalfakzuala Jongte;
Beiseia Darlong s/o. Hminga Darlong
David Lalramnghaka Halam s/o Chawngmunrai Halam
source:vanglaini

 

*EPL Result:
Liverpool 5-1 Arsenal
Norwich City 0-0 Manchester City
Sunderland 0-2 Hull City
Southampton 2-2 Stoke City
Crystal Palace 3-1 West Brom
Chelsea 3-0 Newcastle
Aston Villa 0-2 Wes Ham
Swansea City 3-0 Cardiff City

 

*Mizoram Presbyterian Kohhran Hmeichhia te chuan zirtawpni zan atang khan Pastor bial hrang hrang ah Bial Inkhawmpui an hmang mek a, zanin ah an tiak ang.

 

*KE UIH DAMDAWI ATAN THINGPUI SEN
I ke uih thin kha tihreh i duh chuan zantin minute 10 chhung i ke kha thingpuisen tak deuh tak i ngam tawk a lumin chiah thin la, chawlhkar 1 i tih chuan a ziaawm ngei ang. Han chhin teh le!

 

*I AWIH ZAWNG A NI EM?
Chaw(food) lam zirchiang miten an sawi danin tunhnai a social networking site Facebook, Twitter, Instagram etc. hmang tute an pun chak chhoh em em tak hnu hian mi tam tak chuan in/restaurant/hotel vel a an chaw eitur post an ching uar hle a, chaw changkang(high end food) chin chauh post ching thin te hi mahni chauh inngaihtuah mi an ni duh chawk anti a, chaw chi hrang hrang a manto leh hniam pawh post thin te hi mi rilru zau annih chawk an ti a nih chu! Social networking site a lar tak hnu hian user tam zawk chuan chaw dangdai deuh emaw hmun changkang deuh a chaw an ei dawnin an ei hma in post atan tiin thla an la deuh zel an ti bawk.

 

8.2.2014

*MANIPUR TLEIRAWL DELHI AH PAWNGSUAL
Nizan khan Munirka veng Delhi ah Manipur tleirawl kum 14 mi chu an inluahna neitu fapa in pawn a thil leitur a a chhuak chu a bulhnai damdawiin compound ah namlut in a pawngsual (rape). He tleirawl pawngsualtu hi Vicky niin police ten an man tawh a Safdarjung Police station ah thubuai siamsak a ni.

 

*ICC CHAIRMAN AH INDIA MI
Board of Control for Cricket in India(BCCI) President nilai N.Srinivasan(69) chu kumin July thla atangin khawvel a Cricket thuneitu sangber International Cricket Council(ICC) Chairman thar a ni dawn, a hnathar tur hi kum 2 chhung a chelh ang. N.Srinivasan hi Chennai a cheng niin India Cements Ltd. ah Managing Director a ni a, nikum a IPL a match fixing chungchang ah a laina hnaitak te an inhnamhnawih ve avangin hun engemawti chhung chu BCCI President a nihna atangin a chawl lailawk a nih nghe nghe kha. ICC chairman ah hian Union Minister Sharad Pawar pawh a lo ni tawh thin a ni.

 

*Vawiin tlai dar 4:30 vel khan New Secretariat Complex, Khatla ah Maruti car (Taxi) chu nasa takin a kang. Taxi ah hian petrol an in pass laiin an lo start palh a chumi vanga kang ta ni a rin a ni.

Taxi gutted fire in Aizawl

Source: Tuaitea Renthlei Gunners via Special Reort

 

*I LO HRE TAWH NGAI EM?
Tunlai hian Mizoram in kawlphetha(power) a mamawh zat chu 110 megawatt a ni a, mahse Mizoram hian Serlui B atangin 8 megawatt chiah a siam chhuak ve a, a bak zawng chu phailam atanga lakluh a ni. Power mamawh san lai ber chu tlai dar 6:30-9:30 a ni a, mamawh tlemlai ber chu zing dar 1-5:30 a ni.

 

*Tukin khan Nambasi, Ukhrul Dist, Manipur ah 44th Assam Riffle te helho in kawnglak ah lambunin sipai 4 in hliam an tuar a ni. He thil thleng hi helho hian BJP PM candidate Narendra Modi an Imphal a mual inkhawm a thu a sawi tur vanga boruak chhia siam tumna anga ngaih theih a ni tiin media report thenkhat ah chuan tarlan a ni.

 

*PAWNGSUALTU HREM
14 December 2010 a Khawhai nula pawngsualtu Ramchhana chu Gauhati High Court Aizawl bench chuan kum 7 tang tur leh Rs.5000 chawituri in a hrem. - DINGDI

 

*Education Minister H.Rohluna'n thingtlang a sorkar sikul a zirtirtu thawklai Aizawl a insawn tumte chuan an bialtu MLA phalna an lak zel angai tawh dawn niin a sawi.

 

*ENGLAND AH EARLY MAN KE HNIAK HMUCHHUAK
British Museum, National History Museum leh Queen Mary University, London mithiam tangrual ten England khawchhak vaukam Happisburg, Norfolk hmun ah mihring hmasa (Early man) te ke hniak an hmuchhuak. He kehniak hi puitling leh naupang ke hniak ni a rin niin a lo berah kum 800,000 kalta a mite kehniak niin an chhut a, an ke len zawng hi British pheikhawk no 7-8 vel nen a intiat a, an ke hniak atang hian an san zawng pawh 2.5 ft - 5.6 ft ni tur a ngaih anni. Mihring hmasa te kehniak hi Africa khawmualpui pawn lamah hmuh tur avang em em a, tun tum a mi hian mihring te chanchin chhuina ah thil thar a puak chhuah ngei rin a ni.

*"I duhthusam thilte chu mi dangin an uphlumsak che phal ngai suh. Eng pawh lo tawk la, i thinlungin a kohna che chu zui tlat zel ang che." (Nangma Khawvel - Zara, phek 216)

5th - 7th February 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

7.2.2014
*INDIA FLAG TELLO IN INDIA INFIAMMI TE WINTER OLYMPIC TAN ZAN AH INLAN
22nd Winter Olympic chu Sochi, Russia ah zanin khan Russia President Vladimir Putin an a hawng. Opening ceremony ah hian India infiammi 3 te chu International Olympic Committee(IOC) in Indian Olympic Association(IOA) a suspend lai anih avangin India flag an keng ve thei lo a, IOC flag hnungah individual participant zingah an inlan ve ta mai a ni. Ram hrang hrang atangin infiammi 2500 ten discipline 98 ah inelna an nei dawn a, 23 February 2014 ah khar a ni ang. 2012 Dec khan IOC hian IOA hian dan an zawm that loh avangin an lo suspend tawh a ni.
 
*Mizo Idol 2013-2014 Top 6-ah Lalhriatrenga, Thenzawl a tla.
 
*Vawiin tlai dar 5:30 khan North East Students' Forum, University of Hyderabad te huaihawt in tunhnai a Delhi a Arunachal Pradesh zirlai Nido Tania sawisak hlum a nih duhlo entirnan leh hmarchhak mi ten hmusit an tawh thin te an haw tak zet a ni tih entirnan an University of Hyderabad campus ah 'silent march' neiin poster awmze nei tak tak (racism duhlona) nen an thawk chhuak a ni. North East zirlai te mai bakah state dang a zirlai thahnem tak he 'silent march' ah hian an tel a ni.

North East Students' Forum organised Silent March against racism in India, University of Hyderabad

Pix: Vansanglura Vanchhawng

*ODHISA MIZO KUT 2014

Odhisa Mizo kut 2014 banner

Odhisa a Mizo awmte chuan naktuk 8.2.2014 hian Mizo kut an hmang dawn a, kut pa/khuallian ah Shri. Lal Bihari Hamirika, Minister for ST & SC Development, Minorities & Backward classes, Govt. of Odhisa a ni ang. An kut hmanna tur hi NALCO Auditorium, Bhubaneswar ah niin kut thupui(theme) ah "Enriching socio-cultural relations between Odhisa & Mizoram" tih a ni. He kut hmang tur hian Odhisa a Mizo awm te bakah Mizoram leh state dang atang in Mizo thanhnem tak an tel dawn a ni.
 
*TRIPURA CIVIL SERVICE AH MIZO NULA TLING THAR

Lalentlingi Tochhawng (TCS), Behliangchhip, Jampui

Lalentlingi Tochhawng, Behliangchhip, Jampui chu Tripura Civil Services (TCS) ah a tling thar. Amah hi MA Geography (2010-12) North Eastern Hills University (NEHU), Shillong atang a zirzo a ni. Kan lawmpui e.
Courtesy: Reuben Zorema Sailo via SPECIAL REPORT

*JNU APPLICATION FORM CHHUAK TA
Jawaharlal Nehru University, Delhi ah admission tih tumte tan Offline application February 10 - March 11, 2014 chhunga thehluh tur a ni a. Online application February 10 - March 26, 2014 chhungin a fill up theih a ni ta. Question hlui te pawh lei tur a awm. Hrechiang duh tan jnu website http://admissions.jnu.ac.in/ ah en mai theih a ni.

 

*Pi Thianghlimi d/o Lalrawna, Tawipui 's' chu nimin khan Tuichawng lui(Vaseikaiah)a ruang hmuh a ni a. Pi Thianghlimi ruang hi naupangho-in an hmu hmasa a,an hmuhlai hian ruakin a awm a, a ruang hmuhna bul lawkah hian a thawmhnaw chu fel thlap a thleh in a awm a, tin, a ruang awmna lai hi tui khup chen lek a ni bawk. A ringruh a tliak a, a ka leh serh atangin thi a chhuak bawk. A ruang hi Lawngtlaiah post-mortem niin an khua ah vui tur a lak phei a ni. Pi Thianghlimi hian pasal pawmlai a nei thin a, tunhnai lawk khan a pasal hi a nupui te khua Vaseikai ah a zin a, Pi Thianghlimi hian um zuiin a pasal hi nupui atan tunge a duh zawk a thlan tir a, a nupui hmasa hi a thlang ta zawk ni a sawi a ni. He thiltitu nia rinhlelh mi pakhat chu Lawngtlai Police ten thu zawhfiah atan an la tawh a ni.

 

*INDIA RAMA ANDROID PHONE MANTO BER 'G FLEX'
LG company chuan India rama android hmang phone manto ber 'G Flex' Rs.69,999 man chu mipui te leitheih turin an tlangzarh ta. 'G Flex' hi curve display ania, curve/flexible display ah chuan phone screen ah pawn lam atangin light a lut tlem a. thlalak lai a eng paw a tlem bik bakah a screen i en lai pawhin i hmai hlim a ruk deuh a lo lang thin kha a awm mang tawh dawn lo a ni.

 

6.2.2014

*RUANG CHHAR
Tv.Lallura, Nicheua tupa Rawlbuk khua a mi chu Tuipui, Lawngtlai Dist ah nimin khan thi a chhar a ni. Amah hi a ramvak zan 2 a haw tak loh avangin zawn a ni a, a ruang hi hmuh a ni ta a ni.

 

*AN TI...
Kum hmasa lam ngaihtuah in Mizo mi nawlpui hian Idol/Icon thlan vel hi an ngaihven ta hluai lem lo 'an ti.'

 

*NORTHEAST MITE SAHIMNA TUR COMMITTEE SORKAR IN DIN
Sorkar laipui chuan India ram hmun hrang hrang a hmarchhak(northeast) miten enhranna te, tihduhdah leh hmusit an tawh thin te chhuichiang a, an harsatna tawh atanga an sahimna tur kawng te zawnsak a, rawtna thazawk ngaihtuahtu sak tu tur member 6 awmna committee an ruat thar. He committee hi beaurocrat pension tawh MP Bezbaruah an a ho dawn a, an report leh rawtna te hi thla 2 chhunga sorkar a thehlut tur a hriattir anni.

 

*NAWHCHIZUAR MUSEUM HAWNG
Netherland khawpui Armsterdam a red light district ah nawhchizawrhna musuem thar hawn a ni a, he museum ah hian engtin nge KS(nawhchizuar) ten hun an hman thin a, eng harsatna te an tawh thin tih lam hawi te tarlan bakah TV show te awm thin dawn a ni.

 

*Vawiin khan Minister John Rotluanga chuan Mamit ah petrol pump thar a hawng.

 

*UN Committee on the Rights of the Child chuan Roman Cotholic puithiam naupang khuaikhem chingte chu ban vek turin Vatican thuneitu an ngen.

 

5.2.2014

*Academy of Integrated Christian Studies(AICS), Tanhril ah Diploma in Church Music (Kum 1 course) admission hawn mek a ni.

 

*Mizoram Presbyterian Pastor lartak leh a thu leh hla tun thleng a mite hrilhfak Rev.Thansiama chu vawiin khan Chhinga veng, Aizawl ah a boral.