30th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

30.1.2014
*AIZAWL AH BOMB PUAK
Zanin dar 11:30 vel khan Aizawl Treasury Square chawhmeh bazar tawntirh ah gelatin bomb a puak a thi leh hiam an awm hriat a ni lo. Bomb puahna hnaih Assembly house darthlalang thenkhat erawh a keh nasa niin sawi a ni. Police ten bomb puahna hmun hi an enfiah mek a ni.
 
*Naktuk ah Santosh Tropy 2014 qualifying round of NE zone Aizawl a khelh mek ah Mizoram leh Manipur an intum dawn, Mizoram hi an chak ngei ngei angai,an chak lo emaw draw chuan Manipur hi an tlang ang.
 
*ULFA HRUAITU THI TURIN TI
Chittagong Metropolitan Special Tribunal court, Bangladesh chuan Assam hel ULFA hruaitu Paresh Barua leh midang 11 te chu 2004 a a ruk a Bangladesh a ralthuam tam tham tak tawlhruk thubuai ah thi turin an chungthu a rel sak.
 
*Home Minister R.Lalzirliana'n Mizoram Liquor Total Prohibition Act chu enthat a nih dawn thu leh zu khuahkhirhna thlah zalen hlek tum ani a, chumi atan chuan Kohhran te rawn anni lo ang a ti.
 
*Mizoram police CID(Crime) hnuai a special narcotic cell te chuan nimin tlai dar 5 khan Lalremruata s/o.Lalhmingthanga(L), Chhinga Vengthlang hnen atangin ruihhlo hlauhawm tak methamphetamine mum 1,20,000 an man, an thil man hi Rs.Nuai 224 man hu nia chhut a ni. Lalremruata hian heng ruihhlo te hi an bedroom chhung a air bag ah a lo dahtha a, khawchhak lam atanga an rawn ken a lo kharchhawn sak niin a insawi. - Zonet Zingdaifim
 
*INDIA RAMA MONORAIL HMASABER MUMBAI AH HAWNG DAWN
Tunkar inrinni lo awm turah hian India khawpui te zinga monorail service hmasaber tur chu Mumbai ah hawn a ni dawn ta. Mumbai monorail service 1st phase ah hian monorail 6 hman a ni rih phawt dawn a, rail 1 ah hian pindan(coach) 4 zel a awm ang a tum khat ah mi 560 a chuan theih dawn a ni. 15 mins inkar dan zel ah Wadala leh Chembur inkar (8.26 Kms) ah a service thin dawn a, 2nd phase Wadala leh Jocob's circle inkar chu nakum lamah peih hman beisei a ni. Monorail chuan man hi Rs.5-11 inkar a ni ang.
 
*EIRAWNGBAWLNA GAS THLATIN SEM DAWN
Union Cabinet chuan vawiin khan sorkar in a man tlawm zawk(subsidized) a eirawngbawlna gas chhungkaw tin tan a pek chhuah thin chu kum 1 chhung atan bur 9 atangin bur 12 ni tawh turin thu tlukna an siam. Oil minister M Veerappa Moily chuan 1 February atang chuan chhungkaw tinin kum 1 chhungin thla tin LPG an chang thei tawh dawn niin a sawi.
 
*Vawiin khan Lunglei High Powered Committee Vice-Chairman Pu S.Laldingliana chu Govt. Theiriat Middle School Golden Jubilee (1964-2014) lawmnaah Khuallian niin Jubilee Lungphun a hawng nghal a ni.

Jubile lawmna inkhawm Govt. Theiriat M/S Headmistress Pi F.Chhunzami kaihhruaiah Khuallian Pu S.Laldingliana chuan Jubilee lawmna chhimtu zawng zawngte chu Jubilee Chibai bukin, kum 50 kalta chhungin he sikul atangin sorkar officer leh mi pawimawh engemaw zat an chherchhuak thei avangin a chhuanawm hle a ni, a ti. Mizoram chhimlam chu “thluak a awm” tiha hriatlar thin a ni a, amaherawhchu tunhnaiah Central leh Civil Service lamah mi kan tlem tak avangin tun aia nasa zawka tanla turin zirtirtu leh zirlai kalkhawmte a fuih a, hun lokal zel tur atan duhsakna a hlan a ni. Zirlai ten zirna lama an tui leh thahnemngaihna chang an hriat theih nan zirtirtuten an cho thiam a ngai a, nu leh pa te pawhin faten lehkha an zir that theihna turin hun tha an pek a ngai a ni, a ti.

HPC Vice-Chairman hi a nupui Pi Lilypari Sailo, ARCS Lunglei, SDEO(S) Lunglei Pu Vanlalchhana leh sorkar officials dangten an tawiawm a ni. Golden Jubilee lawmnaah hian sikul naupang ten special item hrang hrang an nei a, an school-a Hindi Teacher Pu C.Biakkunga chu a hnathawh that avangin Citation hlan a ni bawk a. Vawiin tlai vek khan Jubilee ruai kilho nghal a ni bawk.

Theiriat Middle School hi khua mipuiten School Managing Board dinin ni 15.1.1964 khan din tan a ni a, zirlai naupang 55 an nei a ni. Headmaster hmasa ber chu Pu C.Lawmkima niin zirtirtu pahnih - Pu R.Sangthuama leh Pi R.Rokimi - te nen zitir hna an thawk tan a ni. Kum 1968-ah Adhoc Aided leh kum 1972-ah Deficit-ah te hlankai niin kum 1991 atang khan Sorkar School-ah hlankai a nih tak avangin a hming pawh ‘Govt. Middle School, Theiriat’ tih a lo ni ta a ni. Kum 2005 khan SSA tanpuinain School building chu semi-pucca leh changtlung zawkin sakthat a ni. -DIPR
 

*KOM NULA IFS AH TLING THAR

Esther Laltankim Serto, IFS
Pix source: www.facebook.com/Lamtluang

Nl.Esther Latankim Serto chu UPSC in nimin a Indian Forest Service Examination 2013 result a tih chhuah ah tling zingah telin a pumpui ah 62-na a ni. Nl.Esther-i hi a pa Kom hnam niin a nu Hmar a ni a, Imphal, Manipur-ah chengin University of Delhi atanga Mathematics a Graduate a ni. IFS tling thar Esther-i hi kan lawmpui e. IFS 2013 exam ah hian mi 85 an tling a, tling zingah hian ST-6, SC-13, OBC-29 awmin a bak zawng chu General candidate an ni.

 

*AP ASSEMBLY IN TELANGANA BILL AN HNAWL
Vawiin khan Andhra Pradesh Assembly chuan Telangana state thar siamna tur Andhra Pradesh Reorganisation Bill 2013 chu voice vote hmangin an hnawl. Chief minister Kiran Kumar Reddy chuan Parliament ah he bill hi passed a nih chuan politics atanga chawlh a tum thu a sawi. AP assembly house ah he bill sawiho a nih lai hian Telangana bial chhunga MLA te chuan house pawmpui na phut in nasa takin an nawr a mahse Telangana state thar siam duhlo tu an tam zawk avangin an duhdan hi a tlang zo ta rih lo a ni. State thar siam hi state assembly in duh lo mahse Parliament ah passed a nih chuan kal tlang pui theih tho a ni.

 

*LIRNGHING KHA
Nizan a kan rawn post tawh lirnghing (earthquake) kha Regional Seismological Centre, Shillong in an chhut dan chuan dar 7:16 p.m khan epicentre atanga Richter Scale a tehin 5.1 magnitude a chakin a nghing a ni. Manipur lamah a nghing nasa ber a, India hmarchhak state dang ah te pawh lirnghing hi hriat a ni deuh vak a, a thawh nasat na hmun hi India leh Myanmar inrina lai vel a nih avangin Mizoram ah pawh a siper chhete kan lo hre ve a ni. He lirnghing avang hian chhiatna thleng a awm hriat a ni lo a, chik zual duh te tan lirnghinna hmun tak tak chu 93.9A E Longitude leh 23.9A N Latitude a ni e.

 

*Directorate General of Civil Aviation chuan tunhnai lawk khan private airlines te hnenah India ram a Member of Parliament -Rajya Sabha & Lok Sabha te chu thlawhna an zin leh haw reng rengin 'mi pawimawh bik' (VIP) annih avang in 'lal' anga lo buaipui thin turin hriattirna a chhuah. Sorkar enkawl Air India ah chuan MP te hi 'lal' anga lo buaipui thin anni.

29th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

29.1.2014 

*Tualbung khua chuan an khawchhuak mi 2 - R.Lalzirliana(Home Minister) leh John Rotluangliana (Tourism Minister) leh an bialtu MLA Dr.Ngurdingliana te assembly inthlan hnuhnungber a MLA an tlin lawmpuina khawtlang huapin an nei.

 

*Khawvel a puitling ziak leh chhiar thiamlo 37% te chu India mite anni. UNESCO hnuai a EFA Global Monitoring Report 2013-14 in an chhui chianna ah India ramah hian puitling ziak leh chhiar thiamlo mi maktaduai 287 an awm mek a ni.

 

*Internet and Mobile Association of India(IMAI) te chuan kumin June thla chhung hian India mipui maktaduai 243 te tan internet access pek chhuah theih an inbeisei. 2013 chhung khan India ramah internet hmang mi maktaduai 213 in an pung niin an chhut, internet hmang an pun chak na chhan hi mobile phone hmanga online an tam chhoh tak em vang niin an sawi lang.

 

*Zanin dar 7:15 vel khan Mizoram ah lir na vak lo in a nghing.

 

*AAP IN INDIA HMARCHHAK LAM HAWI TAN
Tunhnai a Delhi inthlan a chetha tak Aam Admi Party (AAP) chuan Arunachal Pradesh ah pawh Assembly leh Lok Sabha seat chuh an tum thu an sawi. Arunachal Pradesh bakah India hmarchhak state dang ah pawh an party zawm duh tam tak an awm avangin chak tak a hmalak zel an tum thu an sawi a ni.

 

*HIGH SECURITY NUMBER PLATE SIAM HUN PAWTSEI
Mizoram sorkar chuan tun thla chhung a zawh hman tur a thu a chhuah motor registration MZ-E,F & G neitu te chu Jan thla chhung a High Security Number Plate an vuahtir zo hman loh a nih pawhin February thla thleng high security number plate vuah nan hun a pek belh a, MZ regn G hnulam a mi te pawh April thla thleng hun a pek belh sak bawk.

 

*SANTOSH TROPHY 2014 NE ZONE QUALIFYING ROUND Result: Mizoram 5-0 Arunachal Pradesh. Zirtawpni ah Mizoram leh Manipur an in tum leh ang.

 

*SAKAWRDAI LEH CHHANCHHUAHNA P.S AH VOTERS TLEMBER
Aizawl District a Photo Electoral Rolls Special Summary Revision 2014 neih zawh tak chu vawiin khan tlangzarh a ni.
Election Commission of India ruahmanna angin Final Electoral Rolls hi soft copy @Rs 100 /- leh a hard copy phek 1 @Rs 5 /- zelin a duh apiang tan lei theih a ni.
Final Electoral Rolls 2014 atanga thil chhinchhiahtlak deuh te :-
1. Electors tlemna ber : 7/5-Upper Sakawrdai leh 7/25-Chhanchhuahna Polling Stations (104 Electors)
2. Electors tamna ber : 13/18-Zemabawk III (1213 Electors)
3. Elector tlemna ber Constituency : 9-Tawi(ST)A.C. (14665)
4. Elector tamna ber Constituency : 19-Aizawl South II(ST)A.C. (21342)
5. Aizawl District ah hian Voters 260427 awmin mipa 124834 leh hmeichhia 135593 an ni a, mipa aia hmeichhia tamna chu 10759 a ni. Tin, Service Voters hi 1802 an awm bawk.
6. Aizawl District pumpuiah EPIC 100% neih a ni.
7. Aizawl District ah hian Supervisors 31 leh BLO 323 an awm.
8. Aizawl District huam chhunga Assembly Constituency 14 ah hian Polling Station 323 a awm a, chawhrualin Polling Station pakhat zelah Elector 806.27 awm ang an ni.

Final Electoral Roll tlangzarhna kaihruaitu Pu Lalchungnunga chuan Electoral Roll chu thil pawimawh, uluk taka buatsaih ngai a nih thu leh Mizote hunpui Krismas vuakvet laia thawh chhoh a nih thu te a sawifiah a, Special Summary Revision of Photo Electoral Rolls 2014 tluang tak leh hlawhtling taka neih a nih theih nana mawhphurtu ERO, AERO, Local Council, Village Council, Political parties, BLO leh NGO hrang hrang leh thu thar thehdarhtu te hnenah lawmthu a sawi bawk.

Vawiina Final Electoral Rolls 2014 tlangzarhna ah hian District Level Standing Committee member te - ERO, AERO, SP Aizawl, Political Parties, CYMA, MUP, MHIP, MZP, MJA, Local Council Association bakah School Education leh I&PR Department aiawh te an kal a ni. -DIPR

 

*UKRAINE PM IN BANNA THEHLUT
Eptu lam leh mipui tam ten nasa taka an sorkar an sawisel chhunzawm zel avangin Ukraine Prime Minister Minister Mykola Azarov chuan Prime Minister a nihna atanga banna an ram President hnenah a thehlut ta. Sorkar dodaltu mipui leh eptu lam hian President pawh a ban phut in a ban hma loh chu buaina an siam chhunzawm zel tur thu an sawi.

 

*Chiahpuam thubuai chungchang chu Gauhati High Court, Mizoram, Bench-in naktukah a ngaihtuah dawn.

 

*Tukin zing dar 1:30 vel khan Pune atanga Ahmedabad pan a tlan Volvo night bus leh oil tanker chu Kude khua Thane Dist, Maharashtra ah an insu a, bus hnung a tlan car 1 pawh nasa takin a chhe tel a ni. He chetsualna thleng avang hian mi 7 in nunna an chan a, mi 11 in hliam an tuar bawk. Hliam tuarte hi Manor Rural Hospital ah enkawl mek anni.

 

*India Cricket captain hlui tuna MP(LS) ni mek Mohammed Azharuddin chuan kumin Lok Sabha inthlanpui lo awm turah hian West Bengal atanga MP seat chuh a tum.

 

*Andhra Pradesh Chief Minister N.Kumar Reddy chuan India President hnenah Telangana Bill sawi ho na hun pawhsei a dil. AP assembly house ah Telangana state thar siamna tur bill hi 30 Jan thleng sawiho a an ngaihdan thawn let turin President hian hriattirna a lo chhuah tawh a ni. Andhra Pradesh thendarh duh leh duhlo pawl ten assembly session an tihbuai nasat avangin thutlukna mumal MLA te hian an la siam hleithei lo a ni.

 

*SUPERMOON TUNKAR AH
Tunkar zirtawpni tlai dar 3:30pm hian 2014 chhung atan a thla en lai ber (supermoon) tum 2-na chu a hmuh theih dawn. 1 Jan khan supermoon hi a thleng tawh a kumin chhung hian 12 July, 10 August, 9 September ah te supermoon hi a thleng leh dawn niin mithiam ten an sawi. Supermoon hi thla leh kan chenna lei hi orbit a a inhnaih lai ber tum a ni thin a, hetih lai hian khawvel atang hian thla eng hi a landan pangngai aia 14% a lian leh 30% a eng in a hmuh theih thin a ni.

28th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

28.1.2014

* Facebook a kan Lamtluang Mizo news page pawh in zarah like tu mi sangli chuang kan tling ve ta. In zavaia chungah kan lawm em em e.

 

*Mizo Idol Top-8 ah Angela Lalremtluangi, Saiha chu a tla.

 

*ADDL.SP KAPHLUM
Tukin khan Assam Police te leh National Democratic Front of Bodoland (Sangbijit faction) te Sonitpur district, Assam a an inbeihna ah police 2 kahhlum anni a, 5 in hliam an tuar a thi zingah Additional SP, Guljar Hussein a tel ve a ni.

 

*FB A THLALAK MAWILO POST SAK A NIH VANGIN INAWKHLUM
Nizan khan Kochi,Kerala bula khaw pakhat ah hmeichhia pasal nei kum 27 chu an thenawm a mi in ruak a awm lai thlalak facebook ah a post sak avangin a inawkhlum. He nu hian nikum december thla khan Kerala police te hnenah alo zualko tawh a mahse an tanpui mai loh avangin Kerala High Court ah a thlalak post tupa hi a khing leh a, High Court chuan a thubuai chu chhuichian sak a remtih mek laiin a inawkhlum ta mai a ni.

 

*Vawiin khan Supreme Court chuan 2013 December a thutlukna alo siam tawh neih inang inkawp (Gay sex) chu dan anga hrem theih annih mai bakah damchhung lungin tan tir theih a ni tih chu sorkar laipui leh Gay rights activist ten sut leh turin nasa takin ngen mahse sut leh theih a ni lo a ti bur mai.

 

*Ni 3 chhung awh tur Social Audit training chu vawiin (28.1.2014) khan Pu R. Lalvena (IAS) Secretary, Rural Development Department chuan Information and Public Relation Conference Hall, Aizawl-ah a hawng.

Pu R. Lalvena chuan thu sawiin Audit hi Post Mortem anga kan kalpui chuan awmzia a nei thui lovang tih a hlauh thu a sawi a; chuvangin, tihsual a awm leh tawh lohna tur anga kan tih thiam a pawimawh thu a sawi a. Mahatma Gandhi NREGS hnuaiah kan hnathawh zaa 51% zet chu Link Road a ni mai hi kan tih thlem a, mipui tam zawkin an chhawr theihna atan Convergence tih a tul thu a sawi a, Quality maintenance lamah tan lak a pawimawh thu leh monitoring ngaih pawimawh a tul thu a sawi.

He trainingah hian District hrang hrang atanga APO (MGNREGS) leh Tlangnuam leh Thingsulthliah Block hnuaia VLAA te an tel kim vek a, Pu Khuangthansanga Pakhuangte, Deputy Director, Social Audit Unit. Rural Development chuan inkhawm hi a kaihhruai a ni.

Trainingah hian theory in Ni za inhlawhnaa ‘Audit of Scheme Rules, 2011’ angin Social Audit neih dan tur an zir dawn a. SAU leh SIRD mithiam ten zirtirna an pe ang a, Tuirial leh Seling-ah Social Audit an ti chhin bawk dawn a ni.

Mizoram sorkar chuan tunhnai khan MGNREGS leh IAY-ah Social Audit neihpui turin Social Audit Unit a din thar a, hei hi Director-in hovin thawktu engemaw zatin kumtin vawi 2 tal Social Audit neih anih theihna turin hma an la tan mek a. Kumin February 2014 ralhma ngeiin Tlangnuam leh Thingsulthliah Block chhungah Pilot Project angin Social Audit hi neih zawh hman tur a ni a.

Social Auditors te hi khawtinah kalin, Ni za inhlawhna hmanga mipui hnathawh dan chu Dan phal angin an thawk em tih leh an hnathawh chu Estimate ang takin an thawk em tih an en ang a. In tinah lutin mipui te zirtirna an pe bawk dawn a ni. Hei bakah hian Vantlang rorel inkhawm (Gram Sabha) ah sawihona an buatsaih bawk ang. Social Auditors hi ‘Audit Rules’ ang chuan Comptroller and Auditor General of India thuneihna hnuaia mi an ni tawh ang a. Sum leh pai hman dik loh pawh a tul dan anga Action lak an ni thin tawh dawn a ni. -DIPR

25th - 27th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

27.1.2014

*KHAWVELA AIRBUS LIAN BER INDIA AH THLAWH PHALSAK ANNI VE TA
Union Aviation Minister Ajit Singh chuan India ram khawpui Delhi, Mumbai, Hyderabad leh Bangalore airport ah te khawvel a commercial airliner lian ber Airbus A-380 chu an service phal a ni tawh thu a sawi. Airbus A-380 ang chi service hi tunhma zawng in India ramah phalna an pe chhuak ngailo a ni.

 

*Vawiin khan Govt. K.M HSS, Aizawl ah sorkar laipui atanga sum dawn atanga sak Tribal Hostel thar hawn a ni.

 

*Satosh Tropy 2014 Qualifying Round North East zone result: Mizoram 3-0 Nagaland.
Source: Muantea Chinzah.

 

*TUIPANG NULA AMERICA'S GOT TALENT AH
University of Indianapolis a lehkhazir mek Emily Ngunhleisungi Zathang, Tuipang, Saiha Dist, Mizoram chu America's Got Talent Season-9 a tel thei turin zai ah audition round a paltlang.

 

*MIZO NURSE-IN STATE AWARD DAWNG

Mercy Lalpekmawii

Mercy Lalpekmawii (B.Sc Nursing), Dadra and Nagar Haveli-a Vinoba Bhave Civil Hospital-a nurse hna thawk lai chu State Award-Best Public Health Nurse Award dawng tura thlan a ni a. He chawimawina hi Republic Day lawmna-ah Administrator of Dadra and Nagar Haveli B.S Bhalla, IAS chuan Mercy hnenah hian a hlan a ni.

Mercy hi The Zozam Times-a News Editor Robert Zoliana farnu a ni a, Vinoba Bhave Civil Hospital-ah hian a u, Dr. Cindy Lalrindiki nen an thawk mek a ni.
Source: Aitea Ralte via Times Corner Group

 

*2013 December thla a Odhisa a Andhra Pradesh labour contractor in a hnathawk 2 te Chhattisgarh a leirawhchan siamna hmuna hnathawh an duh loh vang a an kut an tan sak chu kar 4 chhung a chhuichiang turin Supreme Court chuan Odhisa leh Andhra Pradesh sorkar hnenah thupek a pe.

 

*Hyderabad a 39th National Women Hockey Competition, Group-II under PYKKA khelh mek ah khelh khatna ah Mizoram team chuan Andhra Pradesh 8-0 in an hneh lo a, tunah hian Mizoram hmeichhe hockey team te hian Kerala an tum leh mek a, result hriat theih a la nilo.
Courtesy: Vansanglura Vanchhawng & Lalruatkima Hauhnar

 

26.1.2014

*Australian Open Men's single final a Stanislas Wawrinka (Switzerland) chuan Rafael Nadal (Spain) chu 6-3, 6-2, 3-6, 6-3 a hnehin a champion ta. Wawrinka hian Grand Slam title a lak vawi 1-na a ni.

 

*HOTEL ATANGIN TLAHLUM
Zanin dar 7:45 vel khan Tata Motors Managing Director Karl Slym(51) chu Bangkok a 5-Star Hotel pakhat Shangri-La Hotel chhawng 22-na atangin chhawng 4-na zawn ah a tla hlum a ni. A mah hi Tata motors Thailand board of directors meeting turin a nupui nen Bangkok ah hian kal anni a, police ten a room ah a thih hma a a thu hnuchhiah(suicide note) an hmuchhuak ni a sawi a ni. Amah hi British khua leh tui niin India ramah Tata motors hi Oct 2012 khan zawm a, Tata company a athawh hma hian General Motors leh Toyota company ah te pawh a lo thawk tawh thin a ni. A ruang hi naktuk ah post-mortem a ni ang.

 

*SAINA NEHWAL INDIA GRAND PRIX AH CHAMPION
India hmeichhe badminton khel thiam Saina Nehwal chuan vawiin khan Sayed Modi International India Grand Prix Gold Badminton hmeichhe final ah India mi vek P.V Sindhu chu hnehin a champion. Saina Nehwal leh P.V Sindhu te hi Hyderabad mi ve ve anni.

 

*LAWNG CHESUAL AH MI 20 CHUANG AN THI
Vawiin tlai dar 3:45-4pm inkar khan Andaman thliarkar ah tourist lawng chesual ah mi 20 chuang an boral a, mi 13 chhanchhuah tawh anni. He lawng chesual ah hian mi 45 an chuang a, chhanchhuah hna kalpui mek a ni.

 

*Vawiin a Aizawl a Republic Day lawmnah ah Fire Service Medal for Gallantry chu Fireman C. Lalawmpuia, Fireman Lalnghahmawia leh Fireman B. Vanlalruattluanga te hnenah hlan a ni a. Anni pathum hian nikum May ni 11, 2013-a Laipuitlang leiminah an nunna hial chan huam a chhiattawkte chhanchhuahna kawnga an thawh that avangin chawimawina hi hlan an ni a. Mizoram Fire Service atanga ‘Fire Service Medal for Gallantry chawimawina dawng hmasaber an ni bawk.

President’s Police Medal for Distinguished Service chu Pu L.H. Shanliana, DIG-Southern Range hnenah hlan a ni a. Presidents’ Police Medal for Meritorious Service chu Inspector Jimmy L. Renthlei, Inspector K. Laltluangliana leh Inspector V.L. Hmangaihzuala te hnenah pek a ni bawk.
Parade contingent lawmman dawngtute:
I. Armed Contingent: 1) 1st Bn. MAP ; 2) 1st Bn. CRPF ;3)3rd Bn. MAP
II. Unarmed Contingent: 1) Ex-Servicemen ;2) Hrangbana College NCC ;3) – Pachhunga University College NCC
III. School Contingent: 1) Home Mission School ; 2) Govt. K.M. High School ; 3)Staines Memorial School
source: DIPR

 

*Romalsawma(52) chu tukin khan Chite kam leilet thlam ah thi a hmuh a ni, a taksa hi a kang nasa hle ni a sawi a ni. A ruang hi a u te in Bethlehem Vengthlang, Aizawl ah lak a ni.

 

*Tukin khan Manipur khawpui Imphal ah bomb vawi 2 a puak, he bomb puak hi helpawl ten Republic Day lawmna tihbuai an duh vanga tihpuah rin a ni.

 

*IIM-B BUSINESS MANAGEMENT ZIRNA THABER AH THLANG
Stanford University's Graduate School of Business in tunhnai India ram a university, colleges leh institution te a zirchianna ah Indian Institute of Manangement-Bangalore(IIM-B) chu business and management zirna thaber ah an puang. IIM-B hi IIT-Delhi in dawt in IIM-Culcutta leh Indian School of Business-Hyderabad in a dawt a ni.

*MIZO VAL IN SIPAI CHAWIMAWINA DAWNG DAWN
Lallawmzuala, Mamit khua tuna India sipai 18 Rashtriya Rifle(Rasputana Rifle) a tang mek chu sipai huaisen chawimawina 'Shaurya Chakra' dawng tura thlan a ni. 23 July 2013 zan khan Lallawmzuala hi J&K ah in pakhat ah terrorist awm ni a hriat luhchhuak tur a ruat zingah telin, a tuk zing dar 6:30 ah hmelma tawmna in chu a luhchilh tu hmasa zingah telin huaisen takin Jaish-e-Mohammad firfiak pawl hotu tawmna chu a hmachhawn a, a remhriatna leh huaisenna vang hian a thian sipai dang te pawn a zai ngai zel a an beih avangin thi leh hliam awmlo in a hun taka an mi zawn chu an duh ang ngeiin an dahtha thei ta a ni. Hetiang a Mizo sipai chhuanawm kan nei hi kan lawmpuiin duhsakna sangber kan hlan e. 

 

25.1.2014

*MIZO PA IN PADMA SHRI AWARD DAWNG THAR
C.Chhuanvawra, Tuikhuahtlang, Aizawl chu India khua leh tuite chawimawina sang Padma Shri dawng tur a thlan a ni. Literature and Education category atanga he award hi pek a ni. Kan lawmpuiin chhuanawm kan ti. C.Chhuanvawra hi Boys M.E School atanga Headmaster retired a ni.

 

*RICKSHAW KHALHTU DAMDAWIIN HAWN TIR
Vawiin khan Delhi CM Arvind Kejriwal chuan rickshaw khalhtu kum 60 mi Vijay Baba chu Delhi Municipal Council in tunhnai a an cheithat damdawiin 1 Palika Maternity Hospital, Lodhi Colony, Delhi a mi chu a hawn tir.

 

*Naktuk hian India Republic Day vawi 65-na India ram pum ah lawm a ni dawn, Mizoram a a lawmna pui ber chu zing dar 7 hian Aizawl ah neih a ni ang.

 

*Bangalore khawpui kawtthler ah mipui ten darkar 3 chhung a thlawn a hman theih turin internet wifi hmangin pek chhuah a ni dawn tih Karnataka IT dept chuan an sawi.

 

*Australian Open Women's single final ah Li Na (China) chuan Dominika Cibulkova(Slovakia) chu 7-6(7/3), 6-0 a hnehin a champion ta. Li Na hi Australian Open hmeichhe champion tawh zing a upa ber niin thla leh hian kum 32 a tling dawn a ni.

 

*University of Hyderabad a Mizoram state atanga nomination a admission dil tum te tan 10 Feb - 3 April 2014 thleng Technical Wing, Higher & Technical Education Dept. Office Chaltlang ah ngaihven theih a ni e. (Mizoram state atanga candidate nominate te hi NE state 8 leh UT a ST candidate dang te nen an mark hmuh khaikhin vek anni ang a, chuta mark hmusang ber tan chuan dept tinah seat 1 hauh sak an ni thin.)

 

*LOK SABHA INTHLAN AH BJP CHAK RING AN TAM BER
CNN-IBN -Lokniti-CSDS National Election Tracker ten pre-poll survey an neihna ah kumin a Lok Sabha inthlanpui lo awm tur ah hian NDA (BJP leh an thawhpui te) in Lok Sabha seat awm zawng zawng 543 ah seat 211-231 an hmu dawn niin an chhut a, an dawt ah hian UPA (Congress leh an thawhpui te) in seat 107-127 inkar an hmu dawn niin an chhut. PM atana duhber ah Narendra Modi chuan 34% hmu in Rahul Gandhi chuan 15% a hmu thung a ni.

 

*TRUCK ACCIDENT
Zanin dar 9:30 vel khan Tualte atanga Chawngtlai lam 1Km vel ah LPK truck chesual ah motor khalhtu Lalmuansanga S/o.Vanlalngaia(L), Tualte khua chu a hmunah a boral a, mi 2 chuang ve te pawh hliam na tak tuarin damdawiin pan pui an ni.
# Lamtluang page hi i thian te lo like tir ve rawh le.