25th - 27th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

27.1.2014

*KHAWVELA AIRBUS LIAN BER INDIA AH THLAWH PHALSAK ANNI VE TA
Union Aviation Minister Ajit Singh chuan India ram khawpui Delhi, Mumbai, Hyderabad leh Bangalore airport ah te khawvel a commercial airliner lian ber Airbus A-380 chu an service phal a ni tawh thu a sawi. Airbus A-380 ang chi service hi tunhma zawng in India ramah phalna an pe chhuak ngailo a ni.

 

*Vawiin khan Govt. K.M HSS, Aizawl ah sorkar laipui atanga sum dawn atanga sak Tribal Hostel thar hawn a ni.

 

*Satosh Tropy 2014 Qualifying Round North East zone result: Mizoram 3-0 Nagaland.
Source: Muantea Chinzah.

 

*TUIPANG NULA AMERICA'S GOT TALENT AH
University of Indianapolis a lehkhazir mek Emily Ngunhleisungi Zathang, Tuipang, Saiha Dist, Mizoram chu America's Got Talent Season-9 a tel thei turin zai ah audition round a paltlang.

 

*MIZO NURSE-IN STATE AWARD DAWNG

Mercy Lalpekmawii

Mercy Lalpekmawii (B.Sc Nursing), Dadra and Nagar Haveli-a Vinoba Bhave Civil Hospital-a nurse hna thawk lai chu State Award-Best Public Health Nurse Award dawng tura thlan a ni a. He chawimawina hi Republic Day lawmna-ah Administrator of Dadra and Nagar Haveli B.S Bhalla, IAS chuan Mercy hnenah hian a hlan a ni.

Mercy hi The Zozam Times-a News Editor Robert Zoliana farnu a ni a, Vinoba Bhave Civil Hospital-ah hian a u, Dr. Cindy Lalrindiki nen an thawk mek a ni.
Source: Aitea Ralte via Times Corner Group

 

*2013 December thla a Odhisa a Andhra Pradesh labour contractor in a hnathawk 2 te Chhattisgarh a leirawhchan siamna hmuna hnathawh an duh loh vang a an kut an tan sak chu kar 4 chhung a chhuichiang turin Supreme Court chuan Odhisa leh Andhra Pradesh sorkar hnenah thupek a pe.

 

*Hyderabad a 39th National Women Hockey Competition, Group-II under PYKKA khelh mek ah khelh khatna ah Mizoram team chuan Andhra Pradesh 8-0 in an hneh lo a, tunah hian Mizoram hmeichhe hockey team te hian Kerala an tum leh mek a, result hriat theih a la nilo.
Courtesy: Vansanglura Vanchhawng & Lalruatkima Hauhnar

 

26.1.2014

*Australian Open Men's single final a Stanislas Wawrinka (Switzerland) chuan Rafael Nadal (Spain) chu 6-3, 6-2, 3-6, 6-3 a hnehin a champion ta. Wawrinka hian Grand Slam title a lak vawi 1-na a ni.

 

*HOTEL ATANGIN TLAHLUM
Zanin dar 7:45 vel khan Tata Motors Managing Director Karl Slym(51) chu Bangkok a 5-Star Hotel pakhat Shangri-La Hotel chhawng 22-na atangin chhawng 4-na zawn ah a tla hlum a ni. A mah hi Tata motors Thailand board of directors meeting turin a nupui nen Bangkok ah hian kal anni a, police ten a room ah a thih hma a a thu hnuchhiah(suicide note) an hmuchhuak ni a sawi a ni. Amah hi British khua leh tui niin India ramah Tata motors hi Oct 2012 khan zawm a, Tata company a athawh hma hian General Motors leh Toyota company ah te pawh a lo thawk tawh thin a ni. A ruang hi naktuk ah post-mortem a ni ang.

 

*SAINA NEHWAL INDIA GRAND PRIX AH CHAMPION
India hmeichhe badminton khel thiam Saina Nehwal chuan vawiin khan Sayed Modi International India Grand Prix Gold Badminton hmeichhe final ah India mi vek P.V Sindhu chu hnehin a champion. Saina Nehwal leh P.V Sindhu te hi Hyderabad mi ve ve anni.

 

*LAWNG CHESUAL AH MI 20 CHUANG AN THI
Vawiin tlai dar 3:45-4pm inkar khan Andaman thliarkar ah tourist lawng chesual ah mi 20 chuang an boral a, mi 13 chhanchhuah tawh anni. He lawng chesual ah hian mi 45 an chuang a, chhanchhuah hna kalpui mek a ni.

 

*Vawiin a Aizawl a Republic Day lawmnah ah Fire Service Medal for Gallantry chu Fireman C. Lalawmpuia, Fireman Lalnghahmawia leh Fireman B. Vanlalruattluanga te hnenah hlan a ni a. Anni pathum hian nikum May ni 11, 2013-a Laipuitlang leiminah an nunna hial chan huam a chhiattawkte chhanchhuahna kawnga an thawh that avangin chawimawina hi hlan an ni a. Mizoram Fire Service atanga ‘Fire Service Medal for Gallantry chawimawina dawng hmasaber an ni bawk.

President’s Police Medal for Distinguished Service chu Pu L.H. Shanliana, DIG-Southern Range hnenah hlan a ni a. Presidents’ Police Medal for Meritorious Service chu Inspector Jimmy L. Renthlei, Inspector K. Laltluangliana leh Inspector V.L. Hmangaihzuala te hnenah pek a ni bawk.
Parade contingent lawmman dawngtute:
I. Armed Contingent: 1) 1st Bn. MAP ; 2) 1st Bn. CRPF ;3)3rd Bn. MAP
II. Unarmed Contingent: 1) Ex-Servicemen ;2) Hrangbana College NCC ;3) – Pachhunga University College NCC
III. School Contingent: 1) Home Mission School ; 2) Govt. K.M. High School ; 3)Staines Memorial School
source: DIPR

 

*Romalsawma(52) chu tukin khan Chite kam leilet thlam ah thi a hmuh a ni, a taksa hi a kang nasa hle ni a sawi a ni. A ruang hi a u te in Bethlehem Vengthlang, Aizawl ah lak a ni.

 

*Tukin khan Manipur khawpui Imphal ah bomb vawi 2 a puak, he bomb puak hi helpawl ten Republic Day lawmna tihbuai an duh vanga tihpuah rin a ni.

 

*IIM-B BUSINESS MANAGEMENT ZIRNA THABER AH THLANG
Stanford University's Graduate School of Business in tunhnai India ram a university, colleges leh institution te a zirchianna ah Indian Institute of Manangement-Bangalore(IIM-B) chu business and management zirna thaber ah an puang. IIM-B hi IIT-Delhi in dawt in IIM-Culcutta leh Indian School of Business-Hyderabad in a dawt a ni.

*MIZO VAL IN SIPAI CHAWIMAWINA DAWNG DAWN
Lallawmzuala, Mamit khua tuna India sipai 18 Rashtriya Rifle(Rasputana Rifle) a tang mek chu sipai huaisen chawimawina 'Shaurya Chakra' dawng tura thlan a ni. 23 July 2013 zan khan Lallawmzuala hi J&K ah in pakhat ah terrorist awm ni a hriat luhchhuak tur a ruat zingah telin, a tuk zing dar 6:30 ah hmelma tawmna in chu a luhchilh tu hmasa zingah telin huaisen takin Jaish-e-Mohammad firfiak pawl hotu tawmna chu a hmachhawn a, a remhriatna leh huaisenna vang hian a thian sipai dang te pawn a zai ngai zel a an beih avangin thi leh hliam awmlo in a hun taka an mi zawn chu an duh ang ngeiin an dahtha thei ta a ni. Hetiang a Mizo sipai chhuanawm kan nei hi kan lawmpuiin duhsakna sangber kan hlan e. 

 

25.1.2014

*MIZO PA IN PADMA SHRI AWARD DAWNG THAR
C.Chhuanvawra, Tuikhuahtlang, Aizawl chu India khua leh tuite chawimawina sang Padma Shri dawng tur a thlan a ni. Literature and Education category atanga he award hi pek a ni. Kan lawmpuiin chhuanawm kan ti. C.Chhuanvawra hi Boys M.E School atanga Headmaster retired a ni.

 

*RICKSHAW KHALHTU DAMDAWIIN HAWN TIR
Vawiin khan Delhi CM Arvind Kejriwal chuan rickshaw khalhtu kum 60 mi Vijay Baba chu Delhi Municipal Council in tunhnai a an cheithat damdawiin 1 Palika Maternity Hospital, Lodhi Colony, Delhi a mi chu a hawn tir.

 

*Naktuk hian India Republic Day vawi 65-na India ram pum ah lawm a ni dawn, Mizoram a a lawmna pui ber chu zing dar 7 hian Aizawl ah neih a ni ang.

 

*Bangalore khawpui kawtthler ah mipui ten darkar 3 chhung a thlawn a hman theih turin internet wifi hmangin pek chhuah a ni dawn tih Karnataka IT dept chuan an sawi.

 

*Australian Open Women's single final ah Li Na (China) chuan Dominika Cibulkova(Slovakia) chu 7-6(7/3), 6-0 a hnehin a champion ta. Li Na hi Australian Open hmeichhe champion tawh zing a upa ber niin thla leh hian kum 32 a tling dawn a ni.

 

*University of Hyderabad a Mizoram state atanga nomination a admission dil tum te tan 10 Feb - 3 April 2014 thleng Technical Wing, Higher & Technical Education Dept. Office Chaltlang ah ngaihven theih a ni e. (Mizoram state atanga candidate nominate te hi NE state 8 leh UT a ST candidate dang te nen an mark hmuh khaikhin vek anni ang a, chuta mark hmusang ber tan chuan dept tinah seat 1 hauh sak an ni thin.)

 

*LOK SABHA INTHLAN AH BJP CHAK RING AN TAM BER
CNN-IBN -Lokniti-CSDS National Election Tracker ten pre-poll survey an neihna ah kumin a Lok Sabha inthlanpui lo awm tur ah hian NDA (BJP leh an thawhpui te) in Lok Sabha seat awm zawng zawng 543 ah seat 211-231 an hmu dawn niin an chhut a, an dawt ah hian UPA (Congress leh an thawhpui te) in seat 107-127 inkar an hmu dawn niin an chhut. PM atana duhber ah Narendra Modi chuan 34% hmu in Rahul Gandhi chuan 15% a hmu thung a ni.

 

*TRUCK ACCIDENT
Zanin dar 9:30 vel khan Tualte atanga Chawngtlai lam 1Km vel ah LPK truck chesual ah motor khalhtu Lalmuansanga S/o.Vanlalngaia(L), Tualte khua chu a hmunah a boral a, mi 2 chuang ve te pawh hliam na tak tuarin damdawiin pan pui an ni.
# Lamtluang page hi i thian te lo like tir ve rawh le.

23rd - 24th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM
24.1.2014
*Manchester United Manager hlui Alex Fergusion chu European Football's governing body coaching ambassador atan ruat thar a ni tih UEFA President Michael Platini chuan a sawi. Sir Alex hi UEFA hnuai a kumtin a meeting neih thin forum of elite coaches ah chairman a ni dawn bakah Champions League leh European Championship ah technical study group member a ni tur a ruatthar a ni.
 
*Mizo Idol 2013 neih mek ah Top 9 intihsiakna ah Lalawmpuii, Chawlhhmun veng a tla.
 
*Zanin dar 7:15 vel khan Khatla chawhmeh bazar bul (Sainik Rest House bul) a assam type in thingpui dawr a kang a, thi leh hliam an awm hriat a ni lo.
 
*Vawiin tlai dar 5 vel khan Saikhamakawn ah Gypsy leh Bike(FZ dum) an insu a bike hnung a chuang Vanlalzuata, Lawngtlai mi Govt. Aizawl North college a zirlai chu a hmunah a boral nghal a, bike khalhtu pa pawh biak theih loh in a awm. Gypsy hi Melriat lam mi ta ni a sawi a ni.
 
*Zanin hian Mizo Idol Top 9 result puan a ni dawn, Zonet Zawlbuk channel ah live in tihchhuah a ni ang.
 
*Australian Open Men's Single semi final ah Rafael Nadal chuan Roger Federer chu 7-6, 6-3, 6-3 in a hneh ta.
 

Sr. Sarah Zoremsiami Ralte

*Dr. Sarah Zoremsiami Ralte d/o Dr. R. Rothuama (L) Ex MP (LS) chu kum 1899 atanga tun thlenga US-a biographical publisher lian ber Marquis Who’s Who chuan 31st Edition of Marquis Who’s Who in the World 2014-a chuang turin an rawn thlang. Dr. Sarah hi North Eastern Indira Gandhi Regional Institute of Health and Medical Sciences (NEIGRIHMS) Shillong-a Department of Anatomy-ah Assistant Professor thawk lai a ni.
Source: Aitea Ralte via Times Corner Group
 
*PWD motor 48 manna thupek District Court-in a tichhuak
Aizawl District Court chuan, kum 1984-85 vela Maubawk-Govt. Complex, Luangmual inkar kawngpui laihnaa ram neitute hnenah Court-in zangnadawmna cheng nuai 52 leh a pungte pe tura thupek a chhuah tawh chu Mizoram PWD-in an zawm loh avangin, January 22, Nilaini khan PWD lirthei 48-te chu mansak tura tihna thupek a tichhuak.

Court hian PWD lirthei 48-te hi a hma pawhin man turin a lo ti tawh a, mahse PWD lamin nghak rih tura an ngen avangin, man a la ni lo.

Chumi hnuah kawng laihin ram a tihchhiatsak neitute ukil ngenna angin, Court chuan January 22 khan PWD motor 48 manna tur thupek a tichhuak leh a, a man turin police-te a hriattir bawk a, mahse nimin thleng kha chuan motor-te chu man a la ni lo. Hemi chungchangah hian vawiin lamah Court-in thu a tihchian beisei a ni.

Tarlan tawh angin, Mau­bawk-Govt. Complex, Luang­mual inkar kawng laihah hian Dinthar kawn - Luangmual Chhangurkawn inkar bika ram neitu mi 84-te chu lungawi loin Court-ah an kal a; zangnadawmna pek tura tih zat chu Rs. 12,26,634.31 a ni.

Court chuan PWD chu zangnadawmna Rs. 12,26,634.31 leh February 26, 1986 aṭanga chhiar ṭanin, kum tin 12% zela a pung nen pe turin a ti a; mahse PWD lamin an pek loh avang leh, Court sang zawka an appeal bawk si loh avangin December 9, 2013 khan order chhuahin, PWD motor 48-te chhuhsakna tur thupek a siam a ni.

PWD lam hian Court chu January 17, 2014 thleng nghak turin a ngen a; mahse PWD chuan January 17, 2014-ah pawh zangnadawmna pawisa Court-a a pek loh avangin, Court chuan January 22, 2014 khan thupek chhuah lehin, PWD motor-te chu man turin a ti ta a ni.

Ram neitute ukil sawi danin, PWD-in zangnadawmna an pek tur zat hi kum tina 12% pung nen chuan cheng nuai 52 chuang a tling tawh a ni.

Source: http://www.vanglaini.org/
 
*Sania Mirza leh Horia Tecau ten Australia Open Mixed Double Final an lut.
 
*Zanin atang hian Chawlhni zan thleng awh turin Pastor bial hrang hrang ah Kristian Thalai Pawl(KTP) bial inkhawmpui neih a ni dawn.
 
*Nimin zing khan zaithiam Justin Bieber chu zurui chung a motor a khalh vang leh phal chin bak a car a khalh chak avangin Miami Beach police ten an man.
 
23.1.2014
*Vawiin khan Bollywood star Shah Rukh Khan chu Mumbai a hotel pakhat a 'Happy New Year' tih film an shoot laiin thil in a tlak palh a, a taksa atanga thisen a chhuah avangin Nanavati Hospital panpui a ni.
 
*MUMBAI INTERNATIONAL FILM FESTIVAL-AH MIZO FILM

Chengranglanu & MNF The Mizo Uprising

Khawvel-a Documentary, Short leh Animation Film Festival lar berte zing ami Mumbai International Fim Festival (MIFF) lo awm turah Mizo Film pahnih chhuah tura thlan a ni. Heng Film pahnih te hi ‘ Chengrang Lanu’ (Lady Musket) leh ‘MNF: The Mizo Uprising’ te an ni. ‘Chengrang Lanu’ hi Malsawmkima Chhangte siam (Producer/Director) a ni a, Short Film Competition (National) Category-a thlan a ni. ‘MNF: The Mizo Uprising; hi Napoleon RZ Thanga siam (Producer/Director) a ni a, Films Division tana Produce niin, Prism (non competitive) Documentary Film under 40 minutes category-a thlan a ni.’Chengrang Lanu’ hi 1st Mizo Short Film competition 2013 I & PR leh Mizoram Films Development Society (MFDS) tangkawp buatsaih ah khan pahnihna a ni. ‘Chengrang Lanu’ hi ni 8 tlai dar 4-5 inkarah Godrej Theatre-ah chhuah tum a ni. Kum 2010 khan Napoleon RZ Thanga documentary film ‘Malsawmi’ kha screened/chhuah a lo ni tawh a ni.

Mumbai International Film Festival (MIFF) ah hian khawvel hmun hrang hrang atangin Film 793 a lut a, Competition (National) Short Film Category ah film 19 than a ni a, Documentary Film upto 40 mintues ah film 5 thlan a ni a, Documentary Film above 40 minutes ah film 10 thlan an ni. International competition, animation ah film 10 thlan a ni a, long documentary film ah 14 thlan a ni a, short documentary film ah 6 thlan a ni a, short film ah 7 thlan a ni. Prism ( non competitive) National category-a Short Documentary film ah film 5 thlan a ni a, long documentary film ah 12 thlan a ni, Prism International Category-ah film 10 thlan a ni.

Mumbai International Fim Festival (MIFF) hi Films Division, Ministry of Information and Broadcasting buatsaih a ni a, kum khat danah neih thin a ni. He Film Festival hi NCPA, Nariman Point, Mumbai-ah neih tur a ni.

Hetianga Mizo Film in rampum huap inelna sang zawka dinhmun a luah chho ve tan hi I & PR leh MFDS thawhhona rah a ni tiin Director I &PR Pu Jim K. Chozah chuan hetiang lama tuimi Mizo thalaite chu phur zawka rawn penchhuak zel turin a sawm a ni.
Courtesy: DIPR
 
*68th National Football Championship for Santosh Tropy (Northeast zone) qualifying round chu kar leh thawhtanni (27 Jan 2014) khian Aizawl ah khelh tan a ni dawn. Hetiang hian group then a ni:
Group A: Mizoram, Manipur, Arunachal Pradesh, Nagaland.
Group B: Assam, Railways, Meghalaya, Tripura.

20th - 22nd January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

22.1.2014
*Mizo National Front (MNF) party chuan naktuk 23.1.2014 hian Mizoram Assembly election neih zawh tak a Electronic Voting Machine (EVM) hman a nih chungchang a thil fel hlel awm a hria in Gauhati High Court Aizawl bench ah thubuai thehluh an tum.
 
*Vawiin khan Union Petroleum minister Verrappa Moily chuan eirawngbawlna gas (LPG) hmangtu ten agent an duhna na a an insawn theihna tur kalphung thar LPG number portibility chu a hawng. He ruahmanna thar hi India ram pum a LPG hmangtu te tan a zawi zawi a tih hlawhtlin chhoh zel tum a ni a, ram pumah he ruahmanna hi kalpui a nih hunah chuan i gas agent te an that loh chuan awlsam takin a dangah i insawn daih thei tawh dawn a ni.
 
*2005 HMALAM A PAWISA CHHUAK HMAN THEIH TAWH DAWN LOH
Reserved Bank of India(RBI) chuan thuchhuah siamin 31 March 2014 hnulamah chuan India pawisa note engchi pawh 2005 hmalam a siam te chu a hman theih a ni tawh dawn lo an ti. 1 April 2014 atangin heng pawisa te hi Bank ah a thar a thleng a tul tawh dawn a, bank te pawh mipui ten pawisa thar an thleng phal sak turin a hriattir bawk. Kum 2005 hma lama pawisa chhuak te hi a phek hnung lamah a kum a inziah lan loh avangin awlsam takin mipui te tan pawh hriathran theih a ni. He thuchhuah avang hian mipuite chiai mai lo a bank a pawisa thar a thleng mai turin mipui te an ngen a ni.
# Lamtluang page hi i thian te lo like tir ve rawh le.
 
*AIR AIZAWL LIVE PHONE-IN PROGRAMME
Tun Inrinni (25.1.2014) lo awm tur chawhnu dar 1:05 - dar 2:00 inkar, Telephone a zawhna leh chhanna Live Phone-In Programme ah chuan “Zu, Ruihhlo leh a kaihhnawih” chungchang a hriat duh neite tan a zawh theih dawn a. Mipui zawhna chu - 1) Malsawmkima, Inspector ; 2) C. Lalbiaktluanga, Sub-Inspector, Excise & Narcotic Department, Aizawl a miten an rawn chhang ang. A zawh duh tan Telephone No. 0389/2322515 ah emaw 2323148 ah emaw a biak pawh theih ang.

*Tunlai hian thlawhtheihna a zin tum te tan airlines hrang hrang ten ticket man an ti tlawm nasa hle 50% in discount te pawh an pe chhuak mek a ni, travel operators leh airlines lam te zawh fiah chi a ni.

*Mizo Idol 2013 Top 9 result chu zirtawp zan (24 Jan 2014) ah puan leh tur a ni. Result puan zawhah Top 8 intihsiak in a chhunzawm leh ang. Top 9 SMS vote hawn mek a ni a, zirtawpni chhun (24 Jan 2014) dar 12 thleng a vote leh theih dawn a ni.

*Lamtluang page pawh nangmah vangin like tu an pung ve zel e, i thian te like turin lo hrilh darh zel rawh le, i tang tlang ang u hmiang, smart phone leh personal computer/laptop etc a online te tan invite tih ah khan in Mizo thian te chu lo invite ve vek turin kan ngen a che u. In zarah hmasawn kan duh e.

*Vawiin chawhnu dar 1 khan Vanapa Hall, Aizawl kawt ah Tuikuk hel ten an rukbo Sanglianthanga leh Lalzamliana te hmuahna leh an thlahualna hun hman a ni.

*Kum 2014 - 2015 a NERIST a zir tumte chuan application form hi online in fill up tur a ni a, online application hi ni 15 January, 2014 - 28th February, 2014 chhungin Website www.neeonline.ac.in ah tih theih a ni e.Hre chiang duh chuan Technical Wing, Chaltlang ah office hun chhungin zawh fiah theih a ni e.

*Kan ram hian ram hruaitu hausak tumlo, hlawh a lungawi a mipui te hmasawnna duh tak tak tu a mamawh.

*Mizoram chhunga Republic Day 2014 hmannna pui ber Aizawl Sipai Lammua la neih dan tur kimchang a hnuai ami ang hi a ni a. Mizoram Larsap Pu Vakkom Purushothaman chu khuallian tur a beisei a ni. 

Zing ni chhuah
(a)Sorkar pisa leh mimal in ah hnam puanzar zar a ni ang.
(b)Kohhran hrang hrang zing tawngtai inkhawmah ram leh ram hruaitute tana tawngtai sak
07:28 AM
Aizawl Sipai Lammual-ah khuallian a thleng ang.
07:30 AM
(1)Mizoram Larsap Pu Vakkom Purushothaman chuan hnam puanzar pawt pharhin parade hote a endik ang a.March past leh Republic Day pual thuchah in a zui ang.
(2)Award, Medal sem zui nghal a ni ang.
(3)Republic Day pual infiamna hrang hrang lawmman leh parade contingents te hnena lawmman sem.
(4)Band Party ten Hnam Hla rimawi in an tum ang.
12:00 noon
(1)Sawm bikte tan Governor’s At Home.
(2)1st Bn. MAP Brass Band ten rimawi an tum ang.
He ni ropui tak hmang tur hian mi zawng zawng a duh apiang sawm an ni a. Mizoram sorkar hnathawktute chu tel vek tura ngen an ni bawk.
Courtesy: DIPR

21.1.2014

*Australian Open quarter final khelh mek ah mipa defending champion lai Novak Djokovic chuan Stanisla Wawrinka chu a hneh zo ta lo.

*K.Lalhruaitluanga (Hruaia) S/o Lianthanga, Samthang/Bethlehem chu zanin Zonet Mizo Idol 2013 top 10 result puan ah a tla a ni.

*Tuikuk hel ten an rukbo Sanglianthanga leh Lalzawmliana te chuan Mizoram an lo thleng tawh a, tunah hian West Phaileng an rawn pan mek a, Phaileng ah hian doctor ten an hriselna an lo enfiah sak dawn a ni.

Lamtluang page hi i thian te lo like tir ve rawh le.

*Nimin khan Bangalore ah Union Minister for Health and Family Welfare Gulam Nabi Azad chuan khawpui chhung a mirethei zawk ten hriselna kawng a an inenkawlna tur a sorkar hmalakna thar National Urban Health Mission (NUHM) chu a hawng. NUHM programme hnuai ah hian sorkar laipuiin 80% sum tumin 20% chu state sorkar ten an lo tum ve dawn a ni. He programme hi March 2015 chhungin India ram a khawpui 779 chhung a mipui singnga te huam tir hman tum a ni.

*Mizoram mipuite thlanlal MLA 2013-2018 (Choice of the People) te thlalak calendar anga siam chu I&PR Office-ah lei thehin a awm ta.

*Lai Autonomous District Council Chief Executive Member atan Paithar bialtu MDC V.Zirsanga chu nimin khan Lawngtlai DC J.Hmingthanmawia’n rinawmna thu tiamtirin a lalut.

*Mi rukbote chu chhuah tawh niin Dar 11 velah hian Silisuri ah inhlan chhawn hman beisei a ni. Nizan khan Mahmuam (Bangladesh)-ah an riak tawh a... Mahmuam leh Chhippui YMA hruaituten an rawn hruai mek niin report a ni.

Source: Lal Hriata Chawngthu via SPECIAL REPORT

*Union cabinet chuan Jain community te chu minority status pek an rem ti.

*Zanin hian Delhi CM Arvind Kejriwal leh a minister 6 te Rail Bhavan, Delhi kawt ah an riak. Tunhnai a Delhi a Denmark hmeichhe 1 in pawngsual rawn a tawh chungchang ah Delhi police 4 te ban phut a Union Home ministry kawt a lungawilohna lantir tum AAP hruaitute thawkchhuak chu chhun lamah khan police ten kal tlang phallovin Rail Bhavan kawt ah hian an lo dang bet a ni. [Hriat ve mai mai atan: Delhi police te hi Delhi sorkar enkawlna hnuai a awm lo in Union Home Ministry in direct a a enkawlna hnuai a awm anni.]

*Union Minister of state Shashi Tharoor nupui Sunanda Pushkar ruang post-mortem result chu AIIMS doctor ten Delhi Sub-Divisional Magistrate hnenah ah thehlut ta, AIIMS doctor te hian a thih chhan an chhui chianna ah hian 'drug overdose' ni ber in an ngai a ni. Magistrate hian autopsy report hi a la zirchian tur thu leh chumi hnu a investigation kalpui zel dan tur a la sawi theih chauh tur thu thuthar lakhhawmtute a hma ah a sawi a ni.

20.1.2014

*Mizo Idol 2013 te chu naktuk Tthawhlehni chhun dar 12 thleng vote a thlak theih anni:

SMS Vote na tur no: 56263444
1. K. Lalhruaitluanga
SMS Vote Dan: Zonetmizoidol K Lalrintluanga
2. Lancy Remlalhruaii
SMS Vote Dan: Zonetmizoidol Lancy Remlalhruaii
3. Janet K. Lalrinpuii, Sairang
SMS Vote Dan: Zonetmizoidol Jenet Lalrinpuii
4. K. Lalhriatrenga
SMS Vote Dan: Zonetmizoidol K Lalhriatrenga
5. Lalawmpuii, Chawlhhmun
SMS Vote Dan: Zonetmizoidol Lalawmpuii
6. Grace Lalchhanhimi, Kolasib
SMS Vote Dan: Zonetmizoidol Grace Lalchhanhimi
7. Lalhlumawii
SMS Vote Dan: Zonetmizoidol Lalhlumawii
8. Lalhruaitluanga
SMS Vote Dan: Zonetmizoidol Lalhruaitluanga
9. Vanlalauva
SMS Vote Dan: Zonetmizoidol Vanlalauva
10. Angela Lalremtluangi
SMS Vote Dan: Zonetmizoidol Angela Lalremtluangi

*Bawngkawn venga Brigade ram chu Sawrkar in a chinfel hun ah Vantlang tana hmun pawimawh siamna hmun ah hman a ni dawn. He thu hi vawiin chawhnu khan Revenue Minister Pu R.Romawia chuan ama bial chhung Bawngkawn Veng a Local Council House sak thar a hawnna ah a sawi a ni.

*Nimin khan Aizawl Bru Welfare Committee, Bru Cultural Organisation, Bru Christian Fellowship, Bru Student’s Association leh Bru Women’s Federation te chuan thuchhuah intawm siamin inrukbona thleng chungchanga tun thlenga Mizote dawhtheihnaah lawmthu an sawi.

Hemi chungchangah hian thu tha lam leh chhe lam thuthang diklo tam tak a awm thin a; a la awm zel lovang tih pawh a sawi theih loh niin an tarlang. Tun tum inrukbona thlen atanga vawiin thleng hian Bru mipuite chungah harsatna, inrikrapna, in leh lo hal leh inhnawhchhuahna a la thleng lo tih an hriatpui thu an sawi a. Thuthang diklo leh boruak tuar ngam lova mahni chenna in leh lo chhuahsan erawh chu an awm nual nia sawiin pawi an ti hle tih thuchhuahah chuan an tarlang.

Thuthang a awmin thudik finfiah hmasak zel nise an duh thu an sawi a ni.

Source: Vanneihthanga Vanchhawng via SPECIAL REPORT

*Tunhnai a Denmark hmeichhe 1 in Delhi a pawngsual rawn a tawh vangin Delhi police 4 te suspend phut in Delhi CM Arvind Kejriwal leh a minister ten vawiin hian Union Home Ministry office kawt ah lungawilohna lan tir tumin an thawk chhuak.

*Tukkin zing dar 7 khan Central YMA office, Tuikhuahtlangah rukbo chungchang ngaihtuahin CYMA CEC chuan meeting an nei a, naktuk chhun dar 12 hian Mamit-ah CYMA hruaitute, Mamit Sub-Hqrs. leh Group YMA hruaituten meeting an nei bawk ang.

*Tualchhung news leh he page ah pawh vawi tam tak kan rawn post tawh Tuikuk hel ten Mizo 2 leh vai 1 an rukbo ten tun thleng hian Mizoram an la rawn thlen loh mai bakah Mamit lam a rukbo chhungten phone an dawn danin a rubo tute hian an la rawn chhuah lo niin an in sawi a ni.

*RJD Hotupa India politician te zinga boruak ngah ber pawl Lalu Prasad Yadav chuan microblogging site lar tak Twitter ah account a nei thar, twitter a a thu post ah hian Bihar CM Nitish Kumar a kap nghal a ni.

17th - 19th January 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

19.1.2014

*Lalrampana s/o Lalparliana, kum 23, Keitum khua chu tukin khan Aizawl Edenthar, H.B. motors chhak lawkah a truck (LPK) khalh pangah inawkhluma chhar a ni. Thudawnnain a sawi danin Lalrampana hi a thiante nen a motor khalh chhungah zute an in ho a, Chanmaria riak tur angin a in sawi a, a thiante an haw hnuah a thiante pawh a la phone nia hriat a ni. A motor hi a sut khem deuh avanga rilru hah in awkhlum ta mai nia sawi an awm bawk. Tunah hian a ruang hi a bul hnai inah lak a ni a. Edenthar YMA ten a kuang siam sakin an buaipui mek a ni.
Source: Ben Thakerz Pachuau via SPECIAL REPORT Group

 

*West Bengal CM Mamata Banerjee chuan Rajya Sabha MP atan filmstar Mithun Chakraborty an vawrh chhuah dawn thu a sawi.

 

18.1.2014

*Vawiin khan Tuikuk helte mi rukbo chungchanga an thu leh ui beng hlin tur awm lo lutuk vanga mipui thinrim sosangin Mamit ah Home Minister Lalzirliana lem an hal.

 

*Mizo zaithiam Vanlalsailova chuan a Facebook account "Vanlal Sailova" tih chu deactivate a tum ta, a deactivate tum na chhan ah hian social networking site hmangin Diabola'n ringtute a bei thin niin a ngai a ni. He thu hi vawiin chhuak The Aizawl Post ah tarlan a ni.

 

*Rangvamual Local Council chuan Central YMA hruaitute hnenah lehkhathawnin, CYMA hmalaknaa Rangvamuala duty-te'n an veng community hall an hman ṭhin chu kangmei a chhuah tawh avang leh hman duhna an neih ve avangin nimin aṭang khan hman zui rem an tih loh thu an hriattir. -Vanglaini

 

*All India Pre-Medical/Pre-Dental Entrance Test (AIPMT)-2014 form fill up tawh siam that ngai nei te tan 1st -28th February, 2014 thlengin an website www.aipmt.nic.in ah a tih that theih e. Hrechiang duh tan office hun chhungin Technical Wing, Higher & Technical Education, Chaltlang ah zawhfiah theih a ni e.

 

*Nizan a Leela Hotel, New Delhi a thi a hmuh Union Minister of State Shashi Tharoor nupui Sunanda Pushkar ruang chu vawiinah AIIMS ah post-mortem a ni ang.

 

*Lalramchuanzela s/o R. Vanlalzauva, Bawngkawn, Aizawl chuan January ni 12, 2014 khan Ludiana-a National Youth Festival neihah National Youth Award 2012-2013 a dawng. He chawimawina hi Union Minister of State for Youth Affairs & Sports Pu Jitendra Singh-an a hlan a. Ani hi Mizoram atanga National Youth Award dawng hmasa ber a ni.

Lalramchuanzela hi Mission Foundation Movement-ah Coordinator niin, he foundation kaltlang hian Mizo thalaite chawikanna leh tih hmasawnna atan theih tawp a chhuah a. Tlalaite hmakhua ngaiin, hriselna kawnga mipui vantlang zirtirnate, HIV (AIDS) dona kawngah te, kut themthiamna lam leh hnam inpumkhatna lam hawi programme hrang hrangah theihtawp chhuaha hma la thintu a ni a. Thalaite ruihtheih thil leh hmeichhiat mipat kawnga humsual dai tawh ten nunphung pangngai an zawh leh theih nan nasa taka thawk thintu a ni bawk. Mizo thalaite tan kawng hrang hranga a hmalakna avang hian National Youth Award 2012-2013 hi pek a ni. - DIPR

 

*Mahni khumzawl atanga tui tak a i online theih lai khan mi tam tak natna tawkin damdawiin leh mahni in ah an mu ve mek a an tan tawngtai sak theihnghilh suh ang che aw.

 

*"A khum ah muthilh tum in a zal ngei a, a muthilh meuh chuan khaweng a lo lang tawh thin, ti hian amah leh a mah a in zawt a muttheih loh hri(insomnia) vang a ni ngei ang, ka awm ang hian mi tam tak an awm ve ngei ang" - Ernest Hemingway

 

17.1.2014

*K.Vanlalruata, Serchhip chu vawiin khan Sabual lengkir ah chesual in a boral.

 

*Sawi hlawh tak Union minister of state for human resources development ni mek Shashi Tharoor a nupui Sunanda Pushkar chu New Delhi a 5 Star Hotel pakhat Leela Hotel room number 345 ah zanin dar 8 khan thi a hmuh a ni. Tunhnai lawk khan Sunanda Pushkar hian Pakistani journalist Mehr Tarar (45) chu medical treatment a lak hlan a pasal Shashi Tharoor lo beisei ah a puh bakah an nupa inkar tihbuai tumah a puh tel bawk a ni, an chanchin hi media hrang hrang ten an cover chuai chuai kha a ni.

 

*Vawiin chhun dar 11 khan Chanmari West Presbyterian Kohhran atanga indang Chanmari West Hmar veng Presbyterian Kohhran thar chu Aizawl Bethel Presbytery Moderator Revd.Chuauthuama'n hawnna a nei.

 

*India leh khawvel a lehkhabu ziaktu lar te intawhkhawmna hunpui 7th Jaipur Literature Festival ni 5 awhtur chu vawiin khan Noble Prize pawh lo dawng tawh Economist Amartya Sen in keynote adress pe in hawnna neih a ni. He literature festival ah hian India leh khawvel a ziaktu lar 200 te an tel dawn a ni.

 

*Zaithiam Lalroutmawi te chu a pasal Rev.Rammawipuia Pachuau chu Sialsuk Pastor Bial vawngtur a ruat a nih avangin an chhungkua in Champhai atangin Sialsuk ah an in sawn fel ta.

 

*India ram a sahuan a enkawl mek zing a sakei (Royal Bengal tiger) upa ber Guddu ti a koh kum 26 a upa chu tunkar nilaini khan Kanpur zoo ah lung lam tha lo vangin a boral.

 

*Tukin zing dar 7:00am vel khan champhai khawpui chhung luh hma Petrol pump bulah Lei chi phurh Truck a Accident a,Driver leh Handy man an chuang a,Driver zawk hi tlem in a na deuh a,Damdawi in pan pui a ni a,handy man zawk chu m0t0r hian a vawrh chhuak a,a Thlang lama In awm a delh a,in neitu te hi Chaw an eilai a ni a,thi leh hliam an awmlo hlauh.
Source:Eldy-a Oct Chhangte via CHANCHINTHAR(Zofate tan)