3rd December 2013 news in Mizo

Latest news collection in Mizo language:

MIZO TAWNG A CHANCHINTHAR LAWRKHAWM

3.12.2013

*Kum 2014-2015 atan a University of Hyderabad a Integrated MA, MA, M.Sc, MCA, MFA, M.Phil, M.Tech, Ph.D etc zir tum te tan 4 December 2013 - 4 January 2014 chhungin entrance exam form online in www.uohyd.ac.in ah ngaihven theih a ni, kumtin deuh thaw Mizo zirlai ten kan ngaihven tlai thin avangin a hunlai a ngaihven a form fillup turin i chhungte leh duhsak zawngte lo hrilh darh ve rawh le.

 

*Tukin dar 10:05 am khan India mithiam ten ramdang tanpuina tellova an mahni thiamna liau liau hmang a an siamchhuah bomb mitnei (missile) nuclear ralthuam kengtel thei ni bawk Prithvi-II chu hlawhtling takin Chandipur, Odisha atangin enchhin a ni. Prithvi-II missile hian 350 km a hla kap thei a ni.

 

*SIPAI LAK RUNPUI NEI DAWN
Mizoram thalai te tan Rajiv Gandhi Stadium, Mualpui-ah Indian Army tan Sipai Lak Runpui (Recruitment Rally) chu nakum January ni 15 – 20 inkarah khian buatsaih a ni dawn. Rally ah hian Soldier (General Duty); Soldier (Technical); Soldier (Nursing Assistant) leh Soldier (Clerk/Storekeeper) te lak a ni dawn.

January ni 15 khian Soldier (General Duty) atan Mizoram District zawng zawng a mite chu an intlar thei ang a. Soldier (Technical); Soldier (Nursing Assistant) leh Soldier (Clerk/Storekeeper) tang duhte chu January ni 16 leh 17 ah an in tlar thei ang. Soldier (Technical); Soldier (Nursing Assistant) leh Soldier (Clerk/Storekeeper) te tan hian Mizoram thalai bakah Arunachal Pradesh, Assam, Meghalaya, Tripura leh Nagaland a mite pawh an intlar thei ang. Sipai tanglai fate, sipai pension tawh fate, sipai pasal sun tawh hmeithai fate, NCC ‘C’ Certificate nei te leh infiam mite chu Soldier (General Duty) atan chuan January ni 15 ah intlar tur a ni.

January ni 18 – 20 inkarah Rally-a tling te Document leh hriselna (Medical) endik a ni ang. Heta tling Soldier (General Duty) leh Soldier (Technical) te chuan February ni 2 khian Kendriya Vidyalaya, Aizawl ah Written Exam an nei ang.

He sipai lak runpui atan hian a hma ah dilna thehluh hran a ngai lova, an ni a intlar mai tur a ni ang. Soldier(General Duty) chu Pawl 8 pass chin tan dil theih niin kum bithliah chu 17 ½ - 21 inkar a ni ang. Soldier (Technical) leh Soldier (Nursing Assistant) te tan chuan 10+2 (Science) leh Soldier (Clerk/Storekeeper) tan chuan 10+2 (Arts, Science leh Commerce) chin tan dil theih niin kum bithlaih chu 17 ½ – 23 inkar a ni ang.

Hre chiang duh tan Army Recruiting Office, Supply Point Zembawk ah zawhfiah theih a ni. Office Phone No. te chu 0389-2351166 leh 0389-2351518 te an ni. Aw record sa –Integrated Voice Response System hmangin Phone No. 0389-2350141 ah a zawhfiah thei bawk a ni.

Intlar ni ah hian thuamhnaw inthlakna ken tel a that thu leh document te chu sarang emaw file cover emaw (huh thei lova) dah turin ARO te hian intlar tumte chu a chah. Hriselna endik hunah hian beng a fai tawk loh thin avangin leh taksa a tattoo an neih avangin mi tam tak an tla thin a, chuvangin beng ti fai turin leh tattoo tihreh chu ngaipawimawh turin an chah tel bawk a ni. Sipai a tlin hi mahni theina, merit based behchhan anih avangin mibum hmang te laka fimkhur tur leh sum tham a sipai a luh tir theia insawi an awm chuan chung mite chu thuneitute leh ARO te hnenah pawh hriattir(report) turin an ngen bawk a ni.
-DIPR

 

*Vawiin chawhma dar 11:00 khan Vanapa Hall-ah Social Welfare Department, Health Services, Hospital & Medical Education, SCERT, Mizoram SSA mission leh N.I.O.H, North East regional Cetre te tangkawpin an buatsaih International day Of Persons with Disabilities (Rualbanlote Ni) hman a ni. - DIPR

2nd December 2013 news in Mizo

Latest news collection in Mizo language:

MIZO TAWNG A CHANCHINTHAR LAWRKHAWM

2.12.2013
*Vawiin tlai dar 3 vel khan Khawlailung leh Chekkawn inkarah Serchhip Assam Riffle ten Burma lam mi hnen atangin Silai leh grenade engemaw zat an man.
 
*Nizan khan Dawrpui/Saron veng ah ruihhlo zuar ni a rinhlelh a endikna lamah Mizoram Police constable Zodingluaia chu a mi endik pa hian chemte in a ban ah a sat. Constable Zodingluaia hi Aizawl Civil Hospital ah enkawl mek niin a dinhmun in ziawm lam a pan ni a sawi a ni.
 
*Department of Post chuan vawiin khan Delhi ah Express parcel leh Business parcel service an hawng thar, heng service te hi India ram khawpui 20 ah an kalpui phawt ang a kumthar lamah a tahtawlin khawpui hrang hrang ah hawn belh zel a ni ang. India hmarchhak ah chuan Shillong ah pawh hawn tel a ni dawn.
 
*Vawiin khan Forensic Laboratory Building, New Secretariat Complex-ah Excise & Narcotics Dept. Inspector 10 leh Sub-Inspector 15 te tan ‘Scientific Analysis of Alcoholic Liquor’ tih thupui hmangin kar khat awh tur training hawnna hun hman a ni. He Training hian a tum ber chu MLTP Act Amendment 2013-in a sawi anga Excise & Narcotics Department Officer-te hnena Zu (alcohol) finfiah thei tura thiamna pek a ni.
Training hawnna inkhawmah hian Pu Zorammawia, IPS, IGP chu khuallian niin, kalkhawmte hnenah chuan zu finfiah kawnga an mawhphurhna chu hre renga, training an dawn tur chu hmang tangkai turin leh, thutlukna siam kawnga fimkhur taka thawk turin fuihna thu a sawi a ni. - DIPR

* Ni 25.11.2013-a Mizoram Legislative Assembly inthlannaa vote tla te chu ni 9.12.2013 zing dar 8:00 atangin chhiar tan a ni dawn a, Aizawl District huam chhunga Assembly Constituency 14 biala vote te chu Pachhunga University College Science Building-a Counting Centre ah chhiar a ni dawn a ni. PUC Counting Centre ah hian Counting Hall pathum siam a ni a, Ground Floor ah Counting Hall No.1 leh No.2 dah niin Counting Table 10 ve ve dah tura ruahman a ni. Second Floor ah Counting Hall No.3 dah niin Counting Table 8 dah tura ruahman a ni bawk. -DIPR

* Hun engemawchen MST Bus Service Aizawl - Saipum/N. Hlimen chawlhtir tawh chu ni 30.11.2013 atang khan Bus hi Aizawl leh N. Hlimen inkarah service tir leh a ni. Bus hi Aizawl atangin Inrinni apiangin zing dar 6:00 a.m.-ah a chhuak anga, N. Hlimen atangin thawhtanni apiangin zing dar 6:00 a.m.-ah Aizawl panin a chhuak leh thin ang. - DIPR

 

*Cher duh te tan nitin tui no 8-10 in ziah hian thau a ti tlem thei, achhan chu tui intam hian thil ei chakna a ti tlem bakah calories tamna thil i ei thin kha a i ei tlem theih phah dawn a ni tiin mithiam ten an sawi. Chaw ei hma a tui 500 ml in thin ten weight an paih thei tih pawh sawi a ni.

 

*Tukin dar 7 khan Thenzawl Police Training Centre (PTC) ah oil dahna in a kang a, bungrua chuh hman lohin a kangral vek, kangmei chhuahna chhan hi Electric current kalsual vang ni a sawi a ni.

 

*4 Dec 2013 hian Krismas Hlabu leh KTP General Conference 2014 Hlabu chu Central KTP in an tlangzarh dawn ta.

30th November - 1st December 2013 news in Mizo

Latest news collection in Mizo language:

MIZO TAWNG A CHANCHINTHAR LAWRKHAWM

1.12.2013
*Vawiin hi World Aids Day a ni a, mitin hian Aids veite thinhrik mai lo a an tan khawvel ah hian beiseina siam sak hi kan tih ve tur a ni. Aids natna lakah fihlim dan tha ber chu a him chin zel a nun hman hi a ni.

*Naktuk 2 Dec 2013 hian KTP Thakthing veng Branch chuan Golden Jubilee an lawm dawn.

*Nimin a Hmuifang Tourist Complex a neih zawh tak 'Thalfavang Kut' an khan a huaihawttu Mizoram sorkar (Tourism dept) hian pawisa engzat nge an lakluh ang le?

*1995 a piang India badminton khelthiam PV Sindhu chuan Macau Open Grand Prix Tournament ah Women's single champion a ni ta.

*Vawiin hian Rajasthan ah Assembly Election neih a ni a, vote thlak hun hawn anih atanga darkar 3 chhungin 25% vote a tla tawh a ni.

*Zaithiam famta Zirsangzela Hnamte Pa Pu Kawlkhuma (85) chu tukin dar 9:55 khan an chenna In Mission veng ah a boral.

*Fast and Furious movie changtu Paul Walker chu Los Angeles khawsir Santa Clarita ah car accident in a boral.

30.11.2013
* R.Lalrinkima chuan Mizoram University, Forestry Dept atangin Doctor of Phillosophy a hmu thar, a thesis chu 'Study of Medicinal Plants in Eastern Himalyan Motane Forests of Mizoram' tih a ni.

* Naktuk hian Rajasthan ah Assembly Election neih a ni dawn. Rajasthan MLA inthlan ah hian polling stations 47,200 awmin candidate 2087 an awm dawn a ni.

29th November 2013 news in Mizo

Latest news collection in Mizo language:
MIZO TAWNG A CHANCHINTHAR LAWRKHAWM

29.11.2013
*Lai Autonomous District Council Chairman F.Rohnuna chuan vawiin khan banna a theh lut. Amah hi Congress party in an party dan kalh a inthlan ah a campaign vangin an ban bawk.

*Mizoram Pa lar leh mi tam takin an zui thin Pu Vanawia chu Vawiin chawhnu dar 1 vel khan a chenna Sangau-I, Zion Veng ah Cancer natna avangin a boral. Amah hi 'Vanawia Pawl' ti a hriatlar din chhuak tu kha  a ni.

 

*Kum 2014 Baptist Church of Mizoram (BCM) Calendar leh Diary a tichhuak ta a; Kohhran hrang hrangah sem darh mek a ni. Hetiang hi a rate a ni e: Calendar phek khat chi Rs. 10/- Calendar phek 3 chi Rs. 50/- BCM Diary Rs. 130/-

 

*Current fiscal chhung hian Prime Minister's Economic Advisory Council chuan 5.3 % a GDP growth a awm theih an beisei.

 

*Mizo band Boomarang album 'HOME' chu Universal Music India-in Mumbai Hard Rock Cafe-a a tihchhuah hnu ah Mizoram atanga lei duh tan Scavenger Records, Ramhlun South, Aizawl-ah ngaihven theih a ni e. Aman Rs.175/-

 

*Nimin tlai dar 5:30 vel khan Thingsai naupang 2, C.Lalhuthanga (12) s/o C.Sangchunga leh Mesak Remnalalnghaka (14) s/o K.Lalmuansanga (L) chu Tiau luiah an tla hlum a, vawiin ah vui an ni ang.

Tiau luia Uchang veha kal Tiu lui Bungkhaw kaiah C.Lalhuthanga hi chesual a, chhan tum Mesaka pawh chesual ve nghalin Tiau luiah hian an tlahlum dun ta a ni. - DINGDI