Thursday Evening news in Mizo (22.8.2013)

News collection in Mizo language:

NINGANI TLAILAM CHANCHINTHAR LAWRKHAWM (22.8.2013)

*South Asia Christian Youth Network (SACYN) Conference 25-31 Aug 2013 a Jaffna, Sri Lanka a neih tur ah Central KTP hruaitu 2 Dr.H.Lalthanzara leh Dr.Julie Remsangpuii te an tel ang. -Synfocity

*Kawng chhiat avangin 23, 26 & 27th August, 2013 ah te Mizoram University zirlaite tan class suspend a ni. Teaching & Non-teaching staff te chu Ropaia Bawk thleng bus in kal theih ang a, chumi thlang lamah chuan bus dangin a lo nghak leh dawn a ni.

*Vawiin ah khan Tamil Nadu khawpui Chennai chuan kum 375 hmel a hmu. Chennai khawpui hi Madras tih a ni thin a, 1996 ah Chennai ti a thlak a ni. He khawpui hi 1639 ah British administrator Francis Day along leh Andrew Cogan ten an din a ni. April 23, 1640 ah kulh Fort St.George chu sak a nia, he kulh hi 1746-49 ah French ho in British an laksak a, mahse 1949 ah British ten an chang let leh a ni.

*Kumin kum tawp Mizoram Legislative Assembly inthlanpui lo awm tura inpuahchahna atan sorkar hnathawkte training peturinElection Commission ofIndia,New Delhiatangin sorkar mi pawimawh ten Mizoram an rawn tlawh.

Deputy Election Commissioner pahnih Vinod Zutshi leh R. Balakrishnan bakah Director General pahnih PK Dash, Ashish Srivastava leh Secretary S.K.Rudola ten nimin khan Aizawl lo thlengin I&PR Conference Hall-ah meeting pawimawh tak an nei nghal a. He meeting-ah hian Mizoram Chief Electoral Officer Ashwani Kumar, Mizoram District pariat atangin District Electoral Officers (DEO) te leh SP te an tel a ni.

Vawiin chawhma khan New Secretariat Complex-a Chief Electoral Officer Pu Ashwani Kumar office-ah ECI mi pawimawh te hian ADGP (Law&Order) leh senior Police Officer dangte, Police Academy Director leh Election Department hotute nen meeting pawimawh tak an nei a. Meeting neih zawh hian Deputy Election Commissioner pahnihte hian Aizawl an chhuahsan a ni.

Vawiin vek khan ECI thuneitute kaihhruaiin I&PR Auditorium-ah Expenditure monitoring leh paid news chungchangte, District Election Management Plan leh Vulnerability Mapping (DEMP & VM), Postal Ballot, Voter Slip leh inthlan kaihhnawih thil pawimawh chi hrang hrang zir ho a ni a. District tin atanga DC leh SP te, RO, ARO leh EO te he training-ah hian an tel a. Training hi ECI Director General PK Dash, Akshay Rout leh Ashish Srivastava bakah Secretary Sumit Mukherjee ten an kaihruai a ni.

Training hi naktukah chhunzawm a ni ang. -DIPR

*Pi K Zohmangaihi, Zarkawt thih chungchang ah a thattu Lalremruata u Lalmuanpuia chu a ruang senghawi puitu ah inhnamhnawih ve niin police hma ah inpuang tiin Evening Post chanchinbu chuan an tarlang

*Vawiin tlai ruahsur vangin Sesawng a Pu Lalnilawma in a chim, thi leh hliam an awm lo ni a sawi a ni.

*Radio neilo tan All India Radio Aizawl station chanchinthar zinglam dar 7:30 leh zan dar 6:30 a mi te a hnuai a link ah hian online in a ngaihthlak theih e. Aizawl tih ah khan i ngaihthla mai dawnnia
http://www.newsonair.com/Regional-Audio-Bulletins-News-schedule.asp

*Union cabinet chuan vawiin 22.8.2013 khan Supreme court in a nawrna angin court thubuai neite chu MP annih na atanga hrem theih na tur Representation of the Peoples Act amendment chu an pawm. He dan siamthat ah hian MP te chu court thubuai an neih chuan ban tawp lo in an thubuai a fel hma chuan vote an thlak thei lo ang a, hlawh leh hamthatna an chan te tihtawp sak anni ang a, tin MP te chu reilote thubuai nei annih chuan vote an thlak thei tho ang a, an thubuai fel hnuah inthlan pawh an chuh thei tho natur in dan hi siamthat a ni.

*Robert Mugabe (kum 89) chu a tum 7-na turin Zimbabwe President atan 22.8.2013 khan lakluh a ni. Lakluh inkhawm hi Harare sports stadium ah neih a ni.

*22.8.2013 khan Chinmoy Bhattacharjee, Kolkata chuan 24th National Photo Contest 2013 ah lawmman 1-na a la. He thlalak contest hi Photo Division, Ministry of Information and Broadcasting te buatsaih niin  Sustainable Energy for All tih chu thupui(theme) atan a hman a ni. Lawmman 1-na la tu thlalak hian Joy of Energy tih caption ah hmangin colour section atanga thlan chhuah a ni. Intihsiak ah hian India ram state 13 atangin thlalak 439 a lut a ni. 2-na chu Santosh Kumar Jana, Midnapur niin  Rishabh Mittal, Indore chu 3-na a ni. 

Thursday morning news in Mizo (22.8.2013)

News collection in Mizo language:

NINGANI ZING MIZO TAWNG CHANCHINTHAR LAWRKHAWM (22.8.2013)

*Vawiin hian Lai Students’ Association, General Headquarters; Lawngtlai bul tumin Gov’t Region Higher Secondary School, Lawngtlai-ah Sociology leh Geography zirtirtu Post siam tawh, tun thlenga sorkarin an la dah loh kar nan Lawngtlai a sorkar office leh zirna in zawng zawng ah te office kal tur te lo dan (picketting) beh an tum.

*Zarkawt Nu, K.Zohmangaihi rawng taka thah chungchangah a pasal u, Lalmuanpuia chu thuzawh fiah turin Police ten manin Central Jail-ah an dah nghal. -DINGDI

*Mara Thyutlia Py (MTP) gen.hqrs chuan Saiha district-a doctor pahnih sawn chhuah duh lohna lantirna leh a thlaktu tur dah thuai tura sorkar an ngenna tihhlawhtlin a nih loh avangin vawiin hian zing dar 5 aṭanga tlai dar 6 thleng Saiha district pumah total bandh an huaihawt. -Vanglaini

*Federation of Motor Sports Club of India in 12-15 September 2013 a an buatsaih tur One make race ah B Lalruatsanga s/o B Lalhmuakthanga, Salem Veng, Aizawl chu a tlan ve dawn. He intihsiak hi Buddh International Circuit, Noida ah neih a ni ang.

*Congress President Sonia Gandhi chuan Andhra Pradesh Chief Minister Kiran Kumar Reddy hnenah Telangana state thar siamtur chu thu tihtluk vek tawh anih avangin dodalna awm mahse thutawp a ni e tih a hrilh.

*Tun fur chhung hian ruahsur in chhiatna athlen vangin mi 50 in Himachal Pradesh ah nunna an chan tawh a, an thil chan tawh zat hlut lam hi Rs. Vaibelchhe 2,900 chuang a tling tawh a ni.

*India ritchawithiam (Weightlifter) Venkat Rahul Ragala chuan Asian Youth Games, China a khelh mek ah 77 kg category in Weihtlifting ah Gold meldal nimin khan a la.

*Nimin tlai dar 5:45 vel khan Aizawl Civil Hospital Ambulance Mini Bus Pu Vanlalchhunga ruang phur chu an khua Chawngtlai pan a tlan laiin Zemabawk Forest Check-Gate thlangah kawngchhak a leimin in a delh a, nunna chan an awm lo a ruangzui zing a mi 2 in hliam an tuar.Dar 7 vel ah khan ruang hi motor dangin an khawlam hi panpui leh a ni.

*Goa a mirethei te chenna(slum area) a cheng chhungkaw 4846 awm zing a chhungkaw 870 te chuan computer/laptop neiin internet an hmang thei a, chhungkaw 467 ten motor ke pali nei (car,jeep,van etc.) an nei a ni.

*Delhi Police sub-inspectors Puneet leh Lakshmi Chand te chu North east zirlai 2 te harsatna an siam sak vangin suspend an ni. Heng zirlai 2 te hi bus ticket neilo a Delhi a bus an chuan vangin Police te hian Police station ah an hruai a chutah chuan hmusitna tawngkam natak tak in an tawngkhum niin sawi a ni.

*July 2013 chhung khan Aizawl Civil Hospital ah damlo 1308 Admit anni.
-----------------
*Nieng tello chuan pangpar a parchhuak theilo ang hian mihring te pawh hi hmangaihna tello chuan kan nung theilo. -Max Muller.

Wednesday evening news in Mizo (21.8.2013)

News collection in Mizo language:

NILAINI TLAI CHANCHINTHAR LAWRKHAWM (21.8.2013)

*Nimin tlai dar 4 vel khan Lawngtlai Electric veng ah sumo in rawlthar 2 leh tleirawl 1 a su a, an zinga 1 chu Lunglei damdawi ah thawn niin a dang 2 te hi Lawngtlai damdawiin ah enkawlna pek anni. Driver hian zu a rui ni a sawi a ni.

*Tukin zing dar 3 vel khan Aizawl Bawngkawn ah lungrem chim a, a thlang a in pakhat chu lutheih loh in a hnawh a, tukin khan YMA ten hnatlang in an thianfai. Mihring thi leh hliam an awm lo.

*Naktuk atangin Integrated Infrastructural Development Centre (IIDC), Zote, Champhai ah Grape Festival hman a ni dawn a, a tuk leh zirtawpni ah a tiak ang.

*Vawiin ah sorkar laipui hnuai a RTI hmanga dilna thehlut duh ten online a an tih theih na tur www.rtionline.gov.in chu hawn a ni ta.

*Syria ram a tualchhung buaina chhuak ah mi 1300 chuang te chu chemical theh vanga thi a rinhlelh anni a, heng mi te thih chhan chhui tur hian UN chemical weapons investigators te Syria ah an lut tawh a ni.

*Assam sorkar chuan an state chhung a sorkar sikul leh sorkar tanpui sikul a hmeichhe naupang class 9 & 10 zirlai te athlawnin thirsakawr an pe dawn.

*University of Hyderabad chuan 1.10.2013 hian XV Convocation an nei dawn a, heta degree/diploma award dil tum te tan 10.9.2013 thleng dil theih a ni ang, dilna form hi www.uohyd.ac.in ah chiang zawkin a en theih e.

*Art & Culture Department leh Raja Rammohan Roy Library Foundation thawhdunna hnuaia “Assistance to Public Libraries for Increasing Accomodation” atan Raja Rammohan Roy Library Foundation, Kolkata chuan NGO Libraries building sak nan Rs. 6,00,000/- theuh hetiang hian a rawn sanction :-
1) Maite Branch YMA, Aizawl District.
2) Vangchhia Branch YMA, Champhai District.
3) Luangpawn Branch YMA, Aizawl District.
4) Kawrtethawveng North Branch YMA, Mamit District.
5) Khawzawl Electrict Veng Branch YMA, Khawzawl, Champhai District.
-DIPR

Wednesday Morning news in Mizo (21.8.2013)

News collection in Mizo language:

NILAINIZING CHANCHINTHAR LAWRKHAWM (21.8.2013)
*2nd Asian Youth Games 2013, Nanjing, China-a neih mekah Champhai rawlthar TBC Lalchhanhima chuan weightlifting ah Bronze Medal India tan a la. -DINGDI

*Tun Inrinni lo awm tur, August ni 24, 2013 chawhnu dar 1:05 - 2:00 inkara Telephone a zawhna leh chhannna AIR Aizawl Station Live Phone-in hunah chuan kar hmasa lama mi “ Mobile Phone, ATM leh Internet Banking chungchang ” bawk a zawh leh theih dawn a. Mipui zawhna te chu - H. Lalhlimpuia, Dy. Manager leh K.C. Lalvena, Channel Manager, SBI, Regional Office, Zarkawt ami ten an rawn chhang leh ang. Zawhna zawt duh tan Telephone no. 0389-2322515 ah emaw 0389-2323148 ah emaw a biak pawh theih dawn a ni.

*Nimin khan Aizawl Tuikual South ah lei a chet avangin chhungkaw 4 te chenna in 2 chu khawtlang in hnatlang in an thiat.

*Chawei hma a tuisik no 10 (500 ml) in hian thau a ti tlem thei. Mi thau te tan exercise lak hma a tui in pawh hian nasa takin thau a pan thei a ni.

*Nimin khan coagate thubuai chhuina a file then khat a bo ni a sawi anih avangin Parliament in 2 Rajya Sabha leh Lok Sabha te rorel mumal thei lo an awm avangin Food Security Bill pawh sawiho theih a ni ta lo a ni.

*Pakistan Sipai roreltu hlui Pervez Musharraf chu nimin khan Court in 2007 a an ram Prime Minister hlui Benazir Bhutto thih chungchang a mawhphurtu  ah puh in 28 Aug ah a chungchang ngaihtuh that leh a ni dawn. Parvez Musahraf hi thla 4 chhung pawn chhuah phalloh (House arrest) a ni tawh a ni.

*Kum 100 chuang thlalak leh thlalakna hmanrua hmanga lo sumdawng tawh Kodak chu tunhnai ah nasa takin an tlachhia a, an tlakchhiat chhanchhuah nan court in sumdawn chhunzawm erawh a phalsak leh. Kodak hian film leh printing lam a an sumdawnna chu kumin kumtir lam khan UK Pension Fund hnenah £419m ($650m) in an lo hralh tawh nghe nghe a ni.

*Nimin thleng khan India leh Pakistan ramri Line of Control ah ram 2 sipaite an la intibuai a, Pakistan sipai te hian ramri kanin India sipai duty post an rawn kap niin sawi a ni.

*Mizorama a tum 24-na tur Bharat Nirman Public Information Campaign chu 21-23 August ,2013 chhung hian Saiha ah neih a ni dawn. -DIPR

*July 2013 chhungin Mizoram Excise & Narcotics Department chuan Zu zuar mi 189 leh zu rui mi 9 an man a, Rak zu 2427.475 Litres leh zu bilhlai tin 4788 leh a chanve an man a, zu phurhna motor 24 an man bawk. -DIPR

*Khawvel a company brand hluber ni a an sawi thin 3 te chu Marlboro, Coca-Cola leh Budweiser te anni.

*1984 vawiin ang ah hian Clint Eastwood chu Hollywood Walk of Fame ah star pek a ni.

*Vawiin khawthlir (Weather forecast):
# Aizawl ah khua a duai a, chawhnu leh zan lamah ruahsur a beisei awm. Boruak lum leh vawh lam chu 22°C-25°C a ni.

#Lunglei ah erawh chuan chhum zing leh nisa inpawlh a, khawpui ri leh zan rei lama ruahsur a beisei awm.

# Saiha ah chuan chhum leh nisa inpawlh a, ruahsur zeuh mai thei a ni.

#Kolasib ah chuan zing atangin chhum zing leh ruahsur nasa a, zan lamah pawh ruahsur leh khawpuiri awm ang.

#Serchhip ah chuan chhum a zing a, ruahsur leh chawhnu lam ruahhmi awm rin a ni, zan lam pawh ruahsur leh chhum zing ang.

#Mamit ah pawh chhum zing leh ruahsur a nasa a, zan rei ah ruah a sur beisei awm bawk.
------------------------  

Facebook a Lamtluang page pawh in zarah like tu mi 2000 kan chuang ve ta reng mai, in zavai a chungah lawmthu kan sawi a, midang pawh lo like tir zel turin kan ngen a che u.