15th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

15.5.2014 
*MIZORAM CALENDAR 2015
Mizoram Calendar 2015 tur atan thlalak thehluh leh theih tawh a ni a. June 20,2014 ral hma in Directorate of Information & Public Relations Office ah thehluh tur a ni. (DIPR)
 
*Missionary Retreat for Central Region
May 15 - 18, 2014 awh tur chu Synod Mission Board hnuai a India ram laili lai a missionary thawk mek ten Missionary Retreat for Central Region, ITI Vengchhak Kohhran Biak Inah an nei tan, thupuiah ‘Krista Thuhretu’ (Tirh. 2:32) tih an hmang ang. Retreat-ah hian Rev. Vanlalbela, BEC member; Rev. C. Lalsangliana, BEC member; Upa Denghmingthanga, BEC member; Rev. P.C. Pachhunga, E/S i/c Mission & Rev. C. Chawngliana, BEC Member ten thupui awmsa hmangin Pathian thuchah an sawi ang. (Synfo)
 
*Ramhlun East Kohhran Biak In thar hawng
Nimin (May 14, 2014) khan Synod Moderator Rev. K. Lalhmuchhuakan Ramhlun East Kohhran Biak In sak thar chu Pathian hnenah hlanin a hawng a, thuchah a sawi bawk. Biak In thar hawnna programme zan inkhawmah Rev. Lalzuithanga, Senior Executive Secretary-in Pathian thuchah a sawi bawk. Ramhlun East Kohhran hi March 13, 2010 khan Branch Church atan hawn a ni a, November 13, 2010 khan Rev. R. Lalnuntluanga, Moderator, Aizawl Bethel Presbytery-in Kohhran puitlingah a hlangkai a ni. Biak In thar hi a dung 75ft. a ni a, a vang lam hi 48ft. a ni. (Synfo)
 

*VOTE THLAK THAT AH TUMAH CHHUAK LO
Vawiin khan EC thupek angin Nagaland a Wokha District chhung 39-Sanis assembly constituency huam chhung a polling station 5 ah Lok Sabha inthlan that na neih a ni a, mahse, tumah vote thlak tur a an chhuah duh loh avangin polling duty te pawh an hawihai hle a ni. Mipui te hian vote thlak that tulna an hre lem lo niin a lang.

(THUBELH: Naga mipui te hi an duh zawng ah hi chuan tanrual hi an thiam hle niin a lang. 30 March 1953 khan kha tih lai India PM Jawaharlal Nehru khan Naga buaina sawifel pui tumin Nagaland khawpui Kohima a tlawh a, thuneituten Nehru biak emaw an memorandum thehluh emaw pawh an phalsak loh avangin a thusawi ngaithla tur a mipui singkhat pungkhawm te chu inthurual in Nehru thusawi hma in an tho suau a an hawsan ta vek mai a, Prime Minister meuh thusawi tur hma a mipui haw zo vek chu a hrilhhai thlak ve ngei ang le.)

 

*INTHLAN RESULT LAWM PHALLO
Election Commission of India chuan naktuk a Lok Sabha inthlan result puan a nih hunah tupawh chak se Uttar Pradesh ah leh tunhnaia buaina chhuahna Assam a district 3, Baksha, Chirang leh Kokrajhar ah te lawmna siam a phallo. He thupek hi state sorkar te hnenah khauh tak a kalpui turin a hriattir tawh nghe nghe a ni.

 

*INNEIH TLAI LUAT AWM LO
Tum tam tak chanchinthar lo luah tawh thin Congress hruaitu hlun leh AP Governor hlui ND Tiwari (89) chuan tunhnai a ama fa ngei a ni tih a pawm tak Rohit Shekhar a nu Ujjwala Sharma chu vawiin khan Lucknow ah 'tiam tlat e' a tihpui tlai khawhnu leh a ni. Rohit Shekhar hian a pa ngei a ni tih finfiah phut in court ah vawi duai lo a kal thin a nih kha, kan la hre vek in a rinawm.

 

*KHAWVEL A ZUHEH BER CANADIAN
World Health Organization (WHO) in surevey report an tlangzarh thar berah chuan khawvel a ram hrang hrang te zingah Canada ram mipui ten zu an heh ber a, a dawt ah America mipui te anni. India leh China ah pawh zu in nasa takin an pung a ni. Africa mite rin aiin zu an in tam lo a, Islam sakhaw zuitu ram te phei chuan zu an in tam lo hle a ni. Canada ah chuan kum 1 chhung in mi 1 in zu 12.5 litre in ziah ang a chhut anni. WHO report a lan dan chuan kum 2012 chhung khan zu vangin khawvel pumah mi maktaduai 3.3 an thi a ni.

 

*TUAK THAR
Nimin a kan rawn post nupa tuak thar H.Rotluanga (Mapuia of Zephyr) leh T.Malsawmtluangi te thlalak (wedding picture) dang i la hmuh loh takin. Kan lawmpui em em e.

 

Mizo celebrity comedian H. Rotluanga (Mapuia of Zephyr) weds T.Malsawmtluangi (Tawii)

Zephyr Drama club frontman H Rotluanga (Mapuia) weds T Malsawmtluangi

GOOD MORNING MIZORAM:
LAMTLUANG ZINGKAR CHANCHINTHAR LAWRKHAWM
*HMANGAIHBERTE LENNA: Kolasib khawpui ah sorkar kar nan a nimin atanga total bandh neih mek chu tukin zing dar 5 thleng khan neih a ni. Nizan ah Rengtekawn leh Thingdawl lam atanga motor tangkhang te Diakkawn ah an lut khawm huk a, hei vang hian nawrh huaihawttu te leh khualzin te inkarah boruak a thalo a chhuak hman tep ni a sawi a ni. Tun tum total bandh hi Kolasib MZP te meizang hlaptu ber anni a, NGO dang tam takin an thlawp loh mai bakah mipui te tawiawmna pawh tum dang aiin an hmu tha lo niin a hmun a awm ten an sawi. He thu ziah a nih lai hian bandh hi kaltlang pui zel an tum leh tum loh hriat hman a ni ta lo!

*CHHAKTIANG KAWLRAWN: Nimin piah khan Champhai DC office ah bawrhsap Sangdingliana IAS kaihhruaina in mipuite nitin mamawh hrang hranga mawhphurtuten Joint Meeting an nei. An thurel zingah vairam atanga nitin mamawh an kham tawk loh avangin khawchhak (Burma) lam atanga lakluh dan tur ngaihtuah a hmalak mai nise an ti a, hei hian buhfai indaihlohna pawh a ziaawm an beisei a ni.

*LAI NU HO INKHAWMPUI: Lai Women Association(LWA) General Conference Vawi 12-na chu nimin khan Central YLA Hall, Lawngtlai-III ah neih tan ani. He inkhawmpui hian mitthi kuang ah pangpar dah tawh lo nise an ti a, an inkhawmpui hi vawiin ah an tiak ang.

*ATM THAR: Mamit DC Complex chhung ah SBI ATM Booth hawn thar a ni. Tihian Mamit district huam chhungah SBI ATM 3 a awm ta a, Mamit ah 2 leh Zawlnuam a 1 a awm a mek a ni.

*TUIKUK VOTE CHHIAR DAWN: Nimin khan Election Commission of India thupek angin Tripura refugee camp a Bru (Tuikuk) te vote chhiar turin sorkar mi pawimawh ten Mamit chhuahsan in Tripura an pan.

*SUMO CHUAN MAN TITO: Saiha leh Aizawl inkar sumo/maxi cab chuan man Rs.700 atangin Rs.800 ah tihsan a ni. Tin, Lunglei leh Aizawl inkar sumo/maxi cab chuan man pawh Rs.330 atangin Rs.400 ah tihsan a ni.

*INDIA HMARCHHAK KRISTIANTE: Vawiin May 15 atanga Pathianni zan thleng awh tur India hmarchhak a Kristian inzawmkhawm pawl North East India Christian Council (NEICC) Inkhawmpui vawi 76-na (First Biennial Session) chu Churachanpur, Manipur-ah neih a ni dawn a. Thupui atan I puan in hmun chu zauh rawh (Isaia 54:2) a ni ang. NEICC inkhawmpui hi Rev. Chawnga Memorial Chapel, Sielmat ah Evangelical Free Church of India (EFCI) kohhran ten an thleng dawn a ni.

*KHAWLTHLUAKNEI ZIRDUH TAN: Pawl 10 pass chin tan Synod Multipurpose Training Centre, Mission Vengthlang, Aizawl-ah Certificate in Computer Application Course (6 months) zir theih, 5.6.2014 thleng SMTC ah dilna thehluh theih.

*INCOME TAX ZIRCHIANG: Nimin khan MZP Pisapui Confrence hall ah MZP buatsaih in “Seminar on Income Tax” neih a ni. R.L. Rinawma IRS, Principal Secretary to the Gov’t of Mizoram buatsaih ‘Income Tax bihchianna’ tih thupui leh C.Zothankhuma IDAS, Registrar Mizoram University buatsaih ‘Tax Payer tana Financial Management lama hmasawnna’ tih thupui hmang in paper an present a, Lalhriatrenga Chhangte, Deputy Controller of Mines, IBM Bhubaneshwar hnen atangin ‘Corruption dona leh mimal hmasawnna' tih paper ngaihthlak a ni bawk.

*BJP SENIOR TE: BJP President Rajnath Singh chuan an party in Sorkar laipui ah hnehna an chang a nih a, Narendra Modi PM a nih chuan an party mihlun PM atana Modi duhlo tute LK Advani, Murli Manohar Joshi leh Sushma Swaraj te chungchang leh mawhphurhna an chan tur vel chu party in an la ngaihtuah ang a ti.

*KERALA PUITHIAM HLAWHTAM: Kerala khawpui Thiruvananthapuram a Hindu temple lar tak Sree Padmanabhaswamy temple a puithiam luber (thanthris) chu thlakhat a Rs.Nuai 5 hlawh pe turin temple adviser Gopal Subramaniam chuan Supreme Court ah report a thehlut. He temple hi India ram mai nilo khawvel pum a Hindu temple hausa ber niin US dollar tluklehdingawn 20 hu thil hlu an kawl a ni.

*LALU INSUM ZO LO: Nimin a Bihar khawpui Patna a RJP hotupa Lalu Prasad an press conference a neihna ah, an party in BJP kaihhruai NDA an zawm dawn leh dawn loh chanchinbumi 1 in a zawh laiin insum zo lo in "Engtik kumah nge i pian? Ka politics kalpui dan hrechiang hawt lo chuan chutiang zawhna chu min zawt buai lo mai rawh" a ti a ni awm e. BJP zawm chu a tum chiah lo a nih hmel.

*MAHSE, RAHUL-A A TEL VE LO: Nimin a Rahul-a nu Sonia Gandhi in Prime Minister Manmohan Singh thlahna chawlhlui a buatsaih ah Congress Vice President Rahul Gandhi a tel ve lo. Rahul-a hian kar hmasa inrinni khan PM hi hmu in he zanriah hi a kil pui hman loh tur thu a lo hrilh lawk tawh thung a ni. Rahul hi Delhi ah awm loh vang a tel thei lo ni a sawi a ni.

*SAZU KUA ANG A LEI LAIH PHALLO: Meghalaya sorkar chuan an state chhung ah sorkar hriatpuina leh kaihhruaina nilo a mahni remchan ang ang a lungalhthei lo laihchhuah ve ringawt chu an khap ta. Hetiang a mahni a lungalhthei laihchhuahna khur lo siam ve tawp thin hi a saptawng chuan "Rat hole mining" an ti a, Mizo tawng chuan "Sazu kua anga lungalhthei laihchhuah" tihna te pawh a ni thei mai awm e. Jowai leh Cherapunjee vel a kawl tawh chuan in hriatthiam kha.

*3rd FRONT THLAWP LO ANG: Congress General Secretary Digvijay Singh chuan sorkar laipui ah an party Congress in sorkarna an chang lo a nih pawn party te zawk infawmkhawm in 3rd front an siam pawn an thlawp loh tur thu a sawi.

*ARUNACHAL AH TUILIAN HLAUHAWM: Tunlai hian chhum lo chat lo in Arunachal hmun thenkhat ah ruah a sur a, chuvang chuan khaw tam tak ah tuilian an tawn palh a hlauhawm thu sorkar thuneitu ten an sawi.

*LUNGHLU ZIRNA: India ramah hian Lunghlu zirna a awm tih i hre tawh ngai em? Kum 1978 a din Indian Diamond Institute (IDI), Surat, Gujarat chuan course thar synthetic diamonds telh thar an tum.

*MIZORAM HRECHIANG ANG: Mizoram a puk lianber chu Pukzing puk niin he puk hi Mualzavatan bakilh hmang a laih kuak ni a sawi a ni. Mizoram larsap(Governor) hmasaber chu Hiteswar Saikia niin 20.2.1987 atanga 30.4.1989 thleng atang a ni.

*HMANLAI VAWIIN: Kum 1957 vawiin angah khan zaithiam Elvis Presley chuan a halem kawr a lempalh avangin Los Angeles damdawiin ah hruai a ni a, a kawchhung atangin lakchhuah turin dahluh a ni. A vawi khatna atan kum 1940 vawiin angah khan US ah nylon stockings hralhchhuah a ni. Kum 1948 vawiin angah khan Israel in independence an puan atanga darkar reilo te ah an thenawm ram Transjordan, Egypt, Syria, Iraq leh Lebanon ten an do rawn nghal.

*THURIL: "I la suangtuah theih chuan, i ti thei tih inhria ang che" - Walt Disney
---------
Lamtluang pawh sangriat kan chuang e. Singkhat tlin hlan kan nghakhlel, i thian/bialnu/bialpa/nupui/pasal te mawlh khan an lo la like ve lo ang e. Engpawh nise nuisak phawt mai teh, nui var var chung a ni hman tan hi inchhirawm loh thin! A chung a mite ho khi i chhiar chhuak dap (CCD) em le?

14th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

14.5.2014

*India President hlui APJ Abdul Kalam chu University of Edinburgh, Scotland te chuan India ram tan a science and technology hmasawn nan a a thawh that em avangin honorary doctorate an hlan. Abdul Kalam hian India chuan vision nei tha ram hruaitu a neih a ngai a ni ti.

 

*SONY COMPANY TLACHHIA
Japan ram electronic bungrua leh hmanraw chakkhai siam chhuak tu lar SONY chuan kum 1 chhung in US $ Tluk leh dingawn 1.3 an hloh niin an in sawi. An hloh neih let leh tum hian tunlai hian company hotuten kalphung thar an duang mek a ni.

 

*TURKEY LUNGALHTHEI KHUR CHIM
Nizan leh tukin lamah pawh kan rawn post tawh Turkey ram a Soma khua a lungalhthei khur (Coal mine) chimah thizat an pung zel a tunah hian nunna chan zat chu mi 245 an tling tawh niin BBC chuan an puang. He chhiatna a thlen avang hian an ram Prime Minister Recep Tayyip Erdogan chuan ram pawn a zin a tum pawh thulh in Soma khua hi a tlawh a, chhanchhuah hna thawh mekte mit ngeiin a enfiah a ni. Energy minister Taner Yildi chuan lungalhthei khur chhung ah hian hnathawk mi 787 an awm ni a hriat niin an zing a mi 368 chu chhanchhuah an ni tawh a, midang 120 te chin erawh hriat thiam a la har niin a sawi. Lungalhthei khur chimna Soma khua hi an ram khawpuiber Istanbul atanga chhimlam km 250 a hla a awm a ni.

 

*CHI LEH CHI INTIBUAI
Tukin khan Hyderabad Old City (Charminar awmna lam) Kishanbagh ah Sikh leh Muslim te intihbuai avangin mi 3 in nunna an chana, mi 17 in hliam an tuar, hliam tuar zingah hian police te pawh an tel. Cyberabad police ten helai veng huam chhung ah hian buaina dang a chhuah tawh loh nan curfew an puang mek a ni.

 

*KUM 500 HNUAH COLUMBUS-A LAWNG HLUI SANTA MARIA HMUCHHUAK
America khawmualpui hmuchhuaktu Christopher Columbus-a lawng hmingthang tak 'Santa Maria', kum 500 kal ta a tuipui a kehchhe ta ni a rin chu tunhnai khan Haiti hmar lam tuipui chhungril ah an hmuchhuak niin a sawi a ni. Massachusetts marine investigator Barry Clifford chuan an thil hmuchhuah hi ngun tak a zirchian pawh in Santa Maria lawng ngei kha nia an hriat thu a sawi. Kum 1492 khan Christopher Columbus chu Asia panna kawng hnai zawk zawn tumin lawng 3 hmangin Spain a chhuahsan a, chumi kum Krismas ni chuan Haiti hnaih tuipui ah Santa Maria lawng hi a chhia a, siamthat rual a nih tawh loh avangin thil pawimawh thenkhat an la a, tichuan an kalsan ta a ni. He lawng hlui hmuchhuah hi Santa Maria a ni ngei em tih erawh chu Haiti Sokar leh History Channel te nen a tangrual zirchianna a la neih chhunzawm zel ani dawn a ni. A hria ten an sawi danin an hmuchhuahna hmun hi Columbus-a'n a diary a lawngchhiatna hmun a sawi nen pawh in mil viau ni awm tak a ni.

 

*MAPUIA ZEPHYR IN NUPUI NEI
Mizo fiamthu thiam lar H.Rotluanga (Mapuia of Zephyr) leh Chanmari West nula T.Malsawmtluangi te tukin khan Aizawl Dinthar Presbyterian Kohhran Hall ah an innei. Kan lawmpui e.

Zephyr drama club frontman H Rotluanga weds T Malsawmtluagi

 

*MANGTHA PU PRIME MINISTER
Kum 10 zet Congress kaihhruai UPA sorkar hnuai a India Prime Minister hna thawk tu Manmohan Singh chu nimin khan nitin a kaina office South Block staff ten thlahna hun an hmang. Hemi hnu hian a Prime Minister nupui Gursharan Kaur chuan an chenna In 7 Race Course Road-ah PM office staff te nen hian inthlahna hun a huaihawt sak bawk a ni.

Prime Minister office awmna South Block staff te aiawh in national security advisor Shivshankar Menon chuan Prime Minister Manmohan Singh hi world map a present a, he map ah hian PM a nih chhunga khawvel ram hrang hrang 110 a tlawh te tarlan a ni.

Manmohan Singh hian nimin khan official tak a file pawimawh a tihfel hnuhnun ber pawl niturin Andhra Pradesh governor tanglai ESL Narasimhan chu Telangana leh Seemandhra state Governor nikawp tur a ruatna a ziak fel a, hei hi cabinet in la pawmpui leh tur a ni. Tin, nimin vek khan Union Cabinet meeting a neihpui a, chutah chuan Army Chief thar tur ruatna leh FDI kaltlang a damdawi lam a sumdawnna an pawm bawk a ni.

Manmohan Singh hian may 17 ah cabinet meeting hnuhnung ber a neihpui anga , chumi hnuah Prime Minister atang a a banna lehkha India President hnenah a thehlut dawn a ni. Prime Minister thar lakluh a nih hnuah Delhi a Motilal Nehru Marg ah an insawn chhuak tawh dawn a ni.

Tunkar inrinni hian India President Pranab Mukherjee chuan a chenna Rashtrapati Bhavan ah Prime Minister kalchhuak tur Manmohan Singh hi thlahna zanriah a buatsaih sak dawn bawk a ni.

I lo la hrelo mai thei a Manmohan Singh hi Lok Sabha member nilo a India Prime Minister a zawn a ni thei awm chhun a ni a, Assam atanga Rajya Sabha member a thlantlin niin tum 4 thlan tlin a ni tawh a ni. An nupa hian fanu 3 an nei a, an fanu pakhat Daman Singh chuan Mizoram ah hun engemaw chen rawn awmchilh in saptawng in lehkhabu "The Last Frontier: People and Forests in Mizoram" tih a ziak nghe nghe. Kum 2004 May ni 22 khan India Prime Minister 13-na ni tur a lakluh a ni a, Sikh zing a Prime Minister nihmasaber a ni. An party Congress in sorkarna siam leh dawn mahse Prime Minister nih zui a tum tawh loh thu a sawi chiang tawh a ni. Mangtha, Pu Prime Minister!

 

*GOOD MORNING MIZORAM: LAMTLUANG CHANCHINTHAR LAWRKHAWM
*KAN VUNVAR MIKHUAL TE: Germany ram a football club pakhat India ram tlawh a lo zin mek, TSG 1899 Hoffenheim te chuan nizan a AR Lammual a Mizoram XI team 3-0 a an hneh hnuin tukin hian Mizo infiammi te football camp an neih pui leh dawn. Chumi hnuah vawiin ah Lengpui airport atangin Kolkata panin an thlawk chhuak leh ang.

*KOLASIB BANDH: Kolasib a tlawmngai pawl thenkhat 'Joint NGO" te chuan tukin zing dar 5 atanga ningani zing dar 5 thleng Kolasib ah Total Bandh huaihawt an tum. Kolasib kawngpui leh sorkar hnathawk post dah belh te leh Higher Secondary School thar siam te an ngiat a ni.

*MSSC MEETING: Nimin khan Mizoram State Sport Council chu an president, Sport Minister Zodintluanga hovin meeting pawimawh tak annei a, District Sports Committee inkaihhruaina chungchangte ; Recruitment Rules ennawn; Sport Medical Section tana hmanraw lei dan ; leh Pykka staff te Sport council-a rawihzui chungchang te an ngaihtuah a ni.

*INTHLANG RAM TIH TAKAH: Lok Sabha leh 28 Hrangturzo (ST) Assembly Bial Bye-Election inthlanna a Serchhip District chhung Constituency pathum a vote tlate chu May 16, 2014 Zirtawpni chawhma dar 08:00 atangin DC Conference Hall leh DC Office Establishment Room-ah te chhiar a ni dawn a. He hunah hian Polling Station hrang hranga Presiding Officer zawng zawngte chu Identity Card kengin DC office-ah awm ve vek tura hriattir an ni.(DIPR)

*UN TEAM HAW TA: Chawlhkar khat chuang Mizoram hmasawnna tur zirchiang tura lo zin UN Team te chuan nimin khan Mizoram an chhuahsan leh ta. Mizoram hausakna hlawkpui tur zawnga development kalphung buatsaih an tum thu an sawi.

*MI HEK THEIHNA BILL: India President Pranab Mukherjee chuan Sorkar hnathawk te an diklo a ni tih a ruk a thuneitu te hnen a hek na thlen theihna dan Whistleblowers Protection Bill, 2011 chu a pawmpui ta. He dan thar hi nikum a Parliament thlasik thutkhawm khan an pawm a nih kha, miin he dam hmang a sorkar hnathawk thiltih dik loh a hailan pawn sorkarin venhimna tha tawk a pek na tur dan pawh telh a ni.

*MISSIONARY INKHAWMPUI: Naktuk zan atanga Pathianni zan thleng awh tur Mizoram Synod Mission Board hnuai a India ram laili a missionary thawk te pualin Missionary Retreat for Central region chu ITI Vengchhak Kohhran Biak In ah neih a ni dawn.

*CANCER HOSPITAL CHAPLAIN: Rev.Zawlthuama, Bawngkawn chu Zemabawk Cancer Hospital ah Chaplain thar atan Mizoram Synod in a ruat.

*KRISTIAN CHHUNGKAW NI: Mizoram Baptist Kohhran chuan May 18 (Pathianni) atang khian Kristian Chhungkaw Chawlhkar hmang tanin May 23 (Zirtawpni) zan thleng an hmang dawn a ni.

*MODI THLAKTUTUR: Gujarat CM ni mek Narendra Modi chu an party BJP in Lok sabha inthlan a hnehna an chan chuan CM atan a mah thlak tu tur vote chhiar tuk 17 May ah ngaihtuah a ni ang.

*RSS IN KUM UPA DUHLO: Hindu pawl chak tak leh BJP te nen a thawkho tlat RSS te chuan sorkar laipui ah BJP leh an thawhpui ten hnehna an chang anih chuan politician kum 75 chunglam te chuan an aia nau zawk te hmun an kian thiam tur a ni an ti.

*ISRAEL PM HLUI TANG DAWN: Israel Prime Minister hlui Ehud Olmert (68) chu Tel Aviv Court in Jerusalem Mayor a nih lai a Holyland project a thamna pawisa alo dawn avangin kum 6 tang tur leh US $nuai 3 chawi turin a chungthu an rel sak. Ehud Olmert hi kum 2006-2009 chhung khan Israel PM a ni.

*OBAMA THUCHAH: US President Barack Obama chuan India mipui ten tluang taka ram hruaitu tur an thlang thei chu a lawmpui thu leh tupawh in sorkarna siam se US nen a inlaichinna tha neih a duh thu a sawi.

*LUNGALHTHEI KHUR CHIM: Nizan a kan rawn post tawh Turkey ram a lungalhthei khur chim ah nunna chan zat chu mi 157 anni tawh a, mi engemaw zat lungalhthei khur chhung ah hian an la tangkhang mek bawk a ni.

*DU IN DAN THAR SIAM: Delhi University thuneitu te chuan an hnuai a awm college hrang hrang te chu 2014-15 session atana admission tih zawh a nih veleh, an website theuh ah zirlai te hming tarlang vek turin hriattir na chhuah.

*COACH BAN: EPL club Tottenham Hotspur chuan an manager Tim Sherwood chu thla 6 chhung an rawih hnuah an ban fel der.

*THURIL: "Thingphun hun tha ber chu kum 20 kal ta tawh khan ania, mahse a thaber dawttu chu vawiin a phun a ni" - Chinese Thufing.

*AIR LIVE PHONE-IN: Tun Inrinni lo awm tur May 17, 2014 chawhnu dar 1:05 - 2:00 inkar telephone a zawhna leh chhanna AIR Aizawl Live Phone-In programme-ah chuan ‘Rannung Seh (Scrub Typhus)’ tih chungchanga hriat duh neite tan a zawh theih dawn a. Mipui zawhna te chu Dr. Pachuau Lalmalsawma, Nodal Officer, IDSP, DHS leh Lalfakzuala, Entomologist, IDSP, DHS, Dte. of Health Services, Aizawl ami ten an rawn chhang ang a. A zawt duh tan telephone no. 0389-2322515 leh 2323148 ah emaw a biak pawh theih ang. (DIPR)

*MIZO HISTORY: British in min awplai 9 April 1946 khan Mizoram a political party hmasaber tur Mizo Common People's Union din a ni a, hemi hnu hian Mizo Union Party ti a thlak a ni.

*HMANLAI VAWIIN KHA: Kum 1796 vawiin ang ah khan khawvel a zawnghri (smallpox) vaccine hmasaber Edward Jenner hnen ah pek a ni. 1811 kum vawiin angah tho hian Paraguay chuan Spain lak atangin zalenna an hmu. Kum 1948 vawiin ang ah khan a lawm tunlai a Isareal ram kan tih hi a lo pian ni, an ram Prime Minister ni ta David Ben-Gurion chuan zalenna thuthlung 'Declaration of the Establishment of State of Israel' a puang a ni.
--------------
Lamtluang page hi nangmah tiam in like tu mi 7653 kan nei mek a, sangriat tlin nan mi 347 kan la mamawh a ni, i lo tan ve angai a nia. Smsgupshup hmang a Lamtluang in sms news kan thawn chhuah thin lai a min join sak thin tu kum lam a upa tak tak, FB hmang ve bawk silo te khan FB ah hian page kan nei tih hi hria se an like ve chak in kan ring thin! Ni hman nuam le, i chhiar zo vek em aw? comment ah i rawn sawi angai a nia!

 

 

*INDIA SIPAI HOTU THAR TUR RUAT FEL
Lamtluang ah pawh vawiduailo kan rawn post tawh thin tuna sorkar laipui a rorel mek UPA chuan Lok Sabha inthlan result puan hma a thuthlukna lian tham a siam hnuhnun ber pawl niturin eptu lam BJP te dodalna nasa tak karah India Army hotuber (Chief/General) thar atan Lieutenant General Dalbir Singh Suhag chu an ruat fel ta. He thuthlukna hi Prime Minister kaihhruai Appointments Committee of Cabinet (ACC) chuan an tifel ta a ni. Tuna India sipai General nilai General Bikram Singh hi kumin July ni 31-ah a chawl tawh dawn a, a chawlh veleh Lt.Gen. Dalbir Singh Suhag hian a thlak dawn a ni.

Lieutenant General Suhag (59) hian kum 1970 ah National Defence Academy (NDA) zawmin kum 1974 khan 4/5 Gorkha Rifles ah sipai officer hna hmasaber chu zawm a ni. Hmun hrang hrang ah post a ni a, kum 2012 khan Jorhat (Assam) leh Dimapur (Nagaland) ah intelligence operation hlawhchham vangin khatih lai Army General V.K Singh khan "Discipline and Vigilance ban" hmangin a hrem a, mahse a hnu lawk a hremna hi a hlip leh a ni. Sorkar laipui ah BJP an rawn chak a nih a, Congress kaihhruai UPA sorkar in a appointment an siam hi an duhlo a, an tidanglam leh te a nih ngawt loh chuan, kum 2016 December ni 31 ah pension in a chhuak chauh dawn a ni. Amah hi tuna India leilam sipai hotuber dawttu Army Vice Chief nilai mek a ni. 

13th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

13.5.2014 
*LUNGALHTHEI KHUR CHIM
Turkey ram Manisa Province a Somsa khua ah lungalhthei laichhuahna (Coal mine) a chim a, a chhung ah mi 20 an thi a, midang 30 in hliam na tak an tuar. He lungalhthei laichhuahna khur chim ah hian mi 400 chuang leihnuai 2km a thuk ah an tangkhang mek ni a hriat a ni. Chhanchhuahna hna kalpui mek a ni.
 

*FULL TIME: TSG 1899 Hoffenheim 3-0 Mizoram XI

(TSG 1899 Hoffenheim India Tour - Exhibition match @AR Lammual, Aizawl, Mizoram, India)

Mizoram XI (India) vs TSG 1899 Hoffenheim (Germany) exhibition match @AR Lammual, Aizawl, India

Mizoram XI (India) vs TSG 1899 Hoffenheim (Germany) exhibition match @AR Lammual, Aizawl, India

Mizoram XI (India) vs TSG 1899 Hoffenheim (Germany) exhibition match @AR Lammual, Aizawl, India

Mizoram XI (India) vs TSG 1899 Hoffenheim (Germany) exhibition match @AR Lammual, Aizawl, India

Mizoram XI (India) vs TSG 1899 Hoffenheim (Germany) exhibition match @AR Lammual, Aizawl, India

*LUNGALHTHEI KHUR CHIM
Turkey ram Manisa Province a Somsa khua ah lungalhthei laichhuahna (Coal mine) a chim a, a chhung ah mi 20 an thi a, midang 30 in hliam na tak an tuar. He lungalhthei laichhuahna khur chim ah hian mi 400 chuang leihnuai 2km a thuk ah an tangkhang mek ni a hriat a ni. Chhanchhuahna hna kalpui mek a ni.

 

*1899 Hoffenheim team in Mizoram XI lak a an goal 2 na an khunglai video clip en duh tan a hnuaia link ah hian en theih e.
https://www.youtube.com/watch?v=T6RdO5gRAXU

 

*LIVE STREAM IN EN THEIH E
Mizoram XI vs German football team '1899 Hoffenheim' a hnuaia link ah hian en theih e
http://www.turbotv.in/dd-sports-live/

 

*EXCISE & NARCOTICS TEN RUIHHLO MAN
Excise & Narcotics Department (END), Champhai Station thawktute chuan vawiin khan Mualkawi khaw daiah Heroin gram 7 an man. Hemi kaihhnawihah hian Heroin neitu Lalbiaksanga (21) s/o Lalramzauva (L), Kanan Veng, Champhai chu an man nghal a ni a. Heroin hi Tiau a lak, Champhaia zawrh tur niin a sawi.

Nizan (12 May, 2014) dar 8:45 khan Excise & Narcotics Department, Anti-Narcotics Squad leh Tuikual South Branch YMA te tangkawp chuan Tuikualah Heroin Gram 6 leh a neitute – Lallianpari (52) d/o Lalthangliana (L), Tiau, Myanmar leh Lalliansangi (45) d/o Thangliana (L), Tahan Myanmar, tuna Dawrpui Veng, Aizawla khawsa mek intite chu an man bawk.

Excise & Narcotics Department hian an mi mante hi Section 21(b) of The Narcotic Drugs & Psychotropic Substances Act (NDPS Act) hnuaiah thubuai an siamsak nghal a ni. (DIPR)

 

*LAMTLUANG ZINGKAR CHANCHINTHAR LAWRKHAWM
*ZO VAL VS VUNNGO INKHEL: Zanin dar 8 ah hian Aizawl Sipai Lammual ah Mizoram XI leh German football team '1899 Hoffenheim' te an inkhel dawn. Inkhel entur te chu zan dar 6;30 ah Lammual a lut fel vek tur a ngen anni. Zonet TV in inkhel hi live in an pe chhuak dawn a ni.

*CoLLEGE ADMISSION: Tunlai hi Mizoram ah College admission tih hunlai a ni a, a bikin khawpui a college hrang hrang te zirlai te admission buaipui in an buai vanglai a ni.

*COUNCIL INTHLANG LEH DAWN: 4 June 2014 ah Mara Autonomous District Council (MADC), Lai Autonomous District Council (LADC) leh Chakma Autonomous District Council (CADC) a constituency pali ah te inthlan that by-election neih a ni dawn.

*LUNGLEI AH BURMA VAWK LAKLUH KHAP: LUnglei District Magistrate chuan thu leh awm hma chuan Lunglei district huam chhungah Myanmar atanga vawk lakluh a khap.

*SIKEISEN PAN IN: India in sikeisen thleng tur a thlalem a kahchhuah "Mangalyaan" chuan a zinkawng tluang takin a zawh zel a, 24 Sept 2014 hian Mars (sikeisen) a thlen hman beisei a ni.

*RAM PUMAH VOTE TLA THA: Tun tum Lok Sabha inthlan hi India rama vote tlak that ber kum niin vote tla zat chu 66.4% a ni. Kum 1984 a 64% chu a khum a ni.

*INTHLAN HAUTAK: Tun tum Lok Sabha inthlan senso atan a Sorkar sum sen zat chu Rs.Vaibelchhe 3,426 a ni.

*SIPAI HOTU THAR TUR: Sorkar laipui a rorellai UPA chuan India army hotuber Gen Bikram Singh July 31 a chawlh huna amah thlaktu turin eptu lam te sawiselna nasa tak karah Defence ministry kal tlangin Lt.General Dalbir Singh chu an recommend a, Appointments Committee of Cabinet in thutawp an la siam ang.

*SORKAR HNATHAWK HOTU THAR: BJP kaihhruai NDA in sorkar laipui ah hnehna an chan chuan Uttar Pradesh Chief Secretary tanglai IAs 1978 batch Javed Usman chu Cabinet Secretary thar atan ruat anih ring an tam hle.

*MANIPUR NULA TE CHAMPION: Assam a 20th Senior National Women's Football Championships khelh zawh tak ah Manipur nula ten 3-1 a champion lai Odhisa hneh in champion nomawi an la.

*NIGERIA LAM HAWI IN: Boko Haram firfiak pawl ten an naupang rukbo te leh sorkar tan a in an mahni mi leh sa tang mek te inthleng pui a Nigeria sorkar a sawm chu sorkar lamin an hnawl. Kan hriat theuh angin 14 april 2014 khan Nigeria ram ah hian sikul naupang hmeichhia 200 chuang firfiak pawlte hian an rubo a ni kha.

*MCC ZAIPAWL LO ZIN: Mizo zirlai tam tak te lo zirchhuah tawh na Madras Christian College (MCC), Chennai zaipawl member mi 35-te chuan Aizawl rawn tlawh in tunkar nilaini (14 May) thleng Mizoram hmun hrang hrang ah zai a rawngbawlna an nei ang.

*BJP SORKAR RING: India ram a media lian thenkhat ten Exit Poll an lakna hrang hrang ah BJP kaihhruai NDA in sorkar na an siam ring an tam ber.

*POLITICIAN KAPHLUM: Spain ram Leon provincial government a hotunu ber Isabel Carrasco (59) chu an party meeting a tel tur a kal laiin khawlaiah kahhlum a ni. Police ten hmeichhe 2 thuzawhfiah turin an man tawh.

*MIZO HISTORY ZIR LAWK ANG: Kum 1898 khan Mizo tawng chanchinbu hmasaber 'Mizo chanchin Laisuih' tihchhuah a ni. A kum leh kum 1899 kha Mizo ten thlichhe tleh kum kan tih thin hi a ni.

*HMANLAI VAWIIN: Kum 1888 vawiin angah khan Brazil ramah bawih/sal neih theihna dan tihbo a ni. Kum 1996 vawiin ang ah tho khan kan ram thenawm Bangladesh ah chuan thlipui(tornado) avangin mi 600 an thi a nih kha. Kum 1998 vawiin angah hian alawm India in a tum 2-na atan nuclear test a neih kha.
----------
Lamtluang page hi midang te like chhawn tir ve thin tur leh kan thu post te inthlahrung hauh lo a i timeline a share chhawng thin turin kan ngen a che. Kan news post te hmun dang a chhuah atan ti a lo la chhawng in awm a nih pawn 'source:Lamtluang' tih min dahsak tawh turin kan ngen a che u. He post hi tha i tih chuan rawn comment ve la aw. Nui sak phawt mai teh le! Ni hman nuam le!

12th May 2014 news in Mizo

Latest news collection in Mizo language

MIZO TAWNG A CHANCHINTHAR LAWRKHAWM

For news related to Mizo people & Mizoram Contact us: lamtluangmizo[at]gmail[dot]com

12.5.2014 
*LOK SABHA EXIT POLL AH NDA CHUNGNUNG
Lok Sabha inthlan a vote chhiar hma a tlingtur lo rinlawkna (Exit poll) media hrang hrang ten an neih ah BJP kaihhruai National Democratic Alliances (NDA) ten rin an kai ta ber a ni. Hetiang hi exit poll result a ni:
Times Now- ORG:
NDA-49 seats, UPA-148 seats, Others-146 seats.
ABPNEWS: NDA-281 seats, UPA-97 seats, AAP-4, Others-161 seats.
CNN-IBN news: NDA 270-282 seats, UPA 92-102 seats.
Chanakya: NDA-340 seats, UPA-70 seats, Others-133 seats.
India TV-Cvoter: NDA-289 seats, UPA-101 seats, AAP-5, Others-148 seats.
India Tody-Cicero: NDA-261-283 seats, UPA-110-120 seats, Others-150-162 seats.
 
*DIESEL MAN TO DAWN
Zanin zanlai dar 12 atangin India ram pumah diesel man Litre 1 zel ah Rs.1.09 in tih pun a ni dawn. Oil Company te sawi dan chuan hetia a man tihpun anih hnu pawh hian diesel ah hian 1 litre zel ah Rs. 5.71 an hloh char char dawn tho niin an sawi.
 
*Vawiin khan India Parliament rorelna Lok Sabha 16-na a member tur thlanna tawpber chu zawh a ni a, tihian Lok Sabha inthlan neih mek chu zawhfel a ni ta a ni. Ram pumah tun tum Lok Sabha inthlan a vote tla zat chu 66.38% a ni. 2009 khan ram pum a vote tla zat chu 58.19% a ni. Inthlanpui result hi tunkar zirtawpni 16 May ah puan a ni dawn ani.
 
*MYANMAR RAMA ZOHNAHTHLAKTEN CHIEF MINISTER AN CHAWIMAWI HUN TUR SAWN

Myanmar ram chhunga zohnahthlakte chenna khua pahnih Salachhuah khua leh Vuangtu khua tlawh tuma zinchhuak Chief Minister Pu Lalthanhawla chuan khaw nawm loh vanga kir lehin hun danga tlawh zawk turin ruahmanna a siam.

Chawimawi an duh avanga Myanmar rama zohnahthlak intelkhawm ten an sawm Chief Minister Pu Lalthanhawla kar kalta May ni 9 khan Salachhuah tlawh a, May 12 hian zan riaka Vuangtu khua pan turin a zinchhuaka, amaherawh chu ni thum chhung zet Mizoram chhim lamah ruah nasa taka a tlak avangin he a zinna hi titawp rihin hun remchang danga kal zawk turin ruahmanna a siam ta a ni.

May ni 9 a lehlanga tlawh a tum Salachhuah leh a chhehvel khaw 16 zet te chu hemi ni hian inchahkhawmin ropui taka Mizoram Chief Minister hi lo hmuah a, ran lu kima lo lawm an tuma, amaherawh chu an khaw panna kawng chu a chian loh avangin thlen theih a ni ta lova. Vawiin May ni 12 hian Vuangtu leh a chhehvel khaw hrang hrang bakah Chin State Chief Minister leh a Cabinet minister pariat zet te nena hun hman ho tuma ruahmanna siam a nih laiin Chin Chief Minister leh a thuihhruaite hi leiminin a dan leh tak si avangin Vuangtu lama hun hman tum pawh hi thulh a ni leh ta rih a ni.

Vuangtu khaw hotute hnen atanga thudawn danin Vuangtuah hian Mizoram Chief Minister leh a Offial te thlenna tur in thar engemawzat sak thar a ni a, sial 17 bakah ramsa leh ransa lu kima lo lawm tumin an inbuatsaih a. Lui lam sa pawh an hmuh phak ang ang a lukima lo siam pawh tumin luia ram vak thin mi engemawzat in an bei mek bawk a. Hnam peng hrang hrang ten an chaw siam theuhte pho chhuaka mipuite hrai an tum bawk a ni.

Nasa taka inbuatsaihna hi kalpui ni mah se kawng thuah harsatna a awm leh tak si avangin hun dang atan sawn a nit a a ni.
(DIPR)
 
*GAS CHUNGCHANG A MIPUITE HRIAT NGEI NGEI TUR
Food, Civil Supplies & Consumer Affairs Department hotute leh LPG Distributor te Meeting dt.21.4.2014 a Director, Food, Civil Supplies & Consumer Affairs chamber a neihah heng a hnuaia mite hi Distributor leh mipuiten zawm ngei tur a tih a ni :

1. Distributor ten Point-a Gas an semdawn reng rengin Bukna (Spring balance/Weighing scale) an keng tel ngei ngei tur a ni a. Vengchhunga Gas sem reng reng buk vek tur a ni. Buk lova la te chuan a buk a tlin loh pawhin an sawisel thei lovang.

2. Distributor ten an Gas sem buk a tlin loh chuan a tlin lohna zat man consumer-te hnenah a pe let tur a ni.

3. Gas la tuten Distributor hnen atangin Cash memo an la ngei ngei tur a ni.

4. Consumer ten Gas chungchanga an harsatna emaw zawhfiah ngai emaw an neih reng reng in Distributor ten tha taka lo dawngsawngin an hriatthiam loh te an lo hrilhfiah thin tur a ni.
(DIPR)
 
*Vawiin chawhnu dar 2:00 Pm khan Chief Minister Pu Lalthanhawla chuan Lai Autonomous District Council Chief Executive Member Office Building thar a hawng. He building thar hi 13th Finance Commission atanga sum hmuh atang a sak a ni a, cheng nuai 211 senna tura ruahman niin tunah hian luah theiha zawh fel a ni tawh a ni.
Courtesy: DIPR

Mizoram CM Lal Thanhawla inaugurate LADC new building, Lawngtlai
Pix: DIPR

Mizoram CM Lal Thanhawla inaugurate LADC new building, Lawngtlai
Pix: DIPR

 
*INDIA CHHIM LAM HAWI ZUAI ANG:
ANDHRA PRADESH MUNICIPAL INTHLAN RESULT
India chhim lailai lai a awm, tunhnai a state pahnih a then tur a sorkar in a tih fel tak, Andhra Pradesh state chhung Seemandhra leh Telangana bial a khawpui lian ho municipal election result chu vawiin khan puan fel a ni. Hetiang hi political party hrang hrang te vote hmuh dan chu a ni:

SEEMANDHRA: Telegu Desam Party - 1,446 seats, YSR Congress Party - 852, Independent - 120 seats, Congress - 55 seats.

TELANGANA: Congress - 525 seats, Telangana Rashtra Samithi (TRS) - 313 seats, Independent - 355 seats, TDP-BJP (Tangrual) - 162 seats.

Telangana bial ah hian municipalities 56 leh corporation 3 ah inthlan na neih a ni a, Seemandhra bial ah hian municipalities 90 leh corporation 7 ah te inthlan na neih a ni.
 

*MIZO BIBLE CHANG (BIBLE VERSE IN MIZO)
I hun hman danah Bible chhiar hmanloh chang te i nei thin em? Thlarau lam nun tihthar ngai riau a inhriat chang i neih emaw I FB pah hian Bible chang chhiar tur i duh chuan a hnuai a link ah hian hawng la a page ah khan i like mai dawnnia:
Computer atanga online tan: https://www.facebook.com/MizoBibleverse
Mobile phone atanga online tan: https://m.facebook.com/MizoBibleverse

 

*TOOTHPASTE, SUNSCREEN LEH SAHBAWN CHEMICAL AWMTE MIPA TAN A PAWI THEI
EMBO Journal a European Scientist ten an thil hmuchhuah thar tarlan danin mihring in nitin a taksa tan a kan hman thin thil 3 - hanawhna hlo (toothpaste), sunscreen leh sahbawn siam nan a chemical (non-toxic) an hman thin zingah hian mipa te chithlah na a tibuai thei thil awm niin an hria. He thil an hmuchhuah avang hian mipuite lo chiai chuk angai hran lem lo a, zirbingmi te chuan mipa te chithlahna kawngah engti tak a pawi nge a nih zirchian mek zel a nia, hriat chian var a nih hunah thuneitu lam hnenah heng products te hi tihtawp tir emaw hman dan uluk zawk a inzirna la siam mai turin an ngai a ni.

Medical Research Council Human Reproductive Sciences Unit in Edinburgh, a senior scientist Professor Richard Sharpe chuan "He thil zirchian mek hian environmental chemical emaw kan nitin nunphung a kan thil hman thin ten mipa te chithlahna kawngah nghawng a nei thei tih ngaihdan thar a rawn paw chhuak a ni" a ti a ni. Kum 1991 khan Copenhagen University Hospital a thawk Professor Niels Skakkebaek chuan kum 50 chhung in mipa te chithlah theih na (sperm count) hi 50% in a tlahniam niin a zirchianna a lo tlangzarh tawh a ni.

 

*MIZO NU IN INDIA RAM NURSE CHAWIMAWINA SANG DAWNG
Pi Lallungmuani Nursing Tutor Retired, Falkland, Zemabawk a mi chuan vawiin khan India President Pranab Mukherjee hnen atangin India rama nurse chawimawina sang National Florence Nightingale Awards for 2014 a dawng. Vawiin May ni 12 hi 'International Nurses day" a ni a, he ni pual hian kum tin India ram a nurse thawk tha te hnenah India President in chawimawina sang "Florence Nightingale Award" a hlan thin a ni. Kumin pawh hian nurse 35 in he chawimawina hi an dawng a ni.

Pi Lallungmuani hian sawrkar hna a thawh chhungin Outstanding Service - mi nunna chhanchhuahna atan leh service tha tak a lo pek thin avangin National Florence Nightingale Award hi hlan a ni ta a ni. He Award hian Rs.50,000/- (Singnga), Medal, certificate leh Citation a keng tel a ni. Hetiang chawimawina ropui dawng thei Mizo nu chhuanawm Mizo ten kan nei hi Lamtluang chuan chhuanawm kan tiin kan lawmpui em em a ni.

Mizoram Nurse Mrs. Lallungmuani receiving National Florence Nightingale Award 2014 from India President

 

*ASHLEY COLE AN INTERNATIONAL FOOTBALL CHAWLHSAN
English football khelthiam Ashley Cole (Kum 34) chuan an ram team a telh ve a ni ta lo tih a in hriat hnu in international football a chawlhsan thu a puang. Football goal thlawp (defence) a khel thin Ashley Cole hian an ram England World Cup football squad ah tel ve a lo inrin ran ran laiin, an ram coach Roy Hodgson chuan phone in an ram aiawh a khel tur zingah a telh tak loh thu a hrilh a ni. Amah Ashley Cole chuan hetiang hian a sawi a "Roy-a hnen atangin phone ka dawng a, England team chu player naupang zawk ten khel se a tih chu ka pawmpui a. Tichuan England team atanga chawlh chu ka tan atha ta ber in ka hria a ni." tiin. Ram aiawh tur a thlan a ni lo hi a la na ve ngang a niang hetiang hian twitter ah a ziak a: "In pawm zawng a ni chiah lo mai thei a, mahse hei hi chu lo ring hram teh u kan ram tan a ka inkhel tawh loh tur hian min ti na ve a ni. England ram hi ka ngaisang in ka zah a ni"

 

*IN CHIM
Nimin chhun dar 12:25 vel khan Aizawl Dinthar veng a R.Lalmuana te chhungkaw chenna In assam type a sak chhawng 3 chu an inkhawm hlan in a chim. In chim hi a bula lungrem chim in a min pui a, a bul a Baptist biak in chung a zuk su a, a tlusawp lo ni a sawi a ni. Vawiinah khawtlang hnatlang in inchim hi an thiat dawn a ni.

Dinthar veng landslide, Aizawl

*PAKISTAN ENTHLATU TEN PHONE HMANGIN INDIA MI PAWIMAWH TE BUM TUM THIN
India intelligence agencies report a landan in Pakistan enthlatu (spies) ten India ram a sorkar hnathawk lian ho (bureaucrats) bakah police, intelligence leh Army officer te department leh official thuruk hriat tumin telephone hmang a bum (spoof call) an tum thin tih hriatchhuah ni. India sorkar hnuai a department hrang hrang - intelligence agencies, police, defence leh home ministry office a thawk te chu telephone hmang a mi pawimawh anga insawi a India sorkar thuruk hriat duh nei a insawi an awm pawhin an mahni thu a lo chhang mai lo turin hriattir anni. Pakistan enthlatute hian Telephone a heng office pawimawh te hi bia in army, Intelligence Bureau (IB) leh Research and Analysis Wing (RAW) officers chumi kha mi chu ka nia ti a dawtsawiin India thupawimawh te zawh an ching ni a hriat chhuah a ni. Office staff tan chuan an mahni aia lal zawk ni a insawi ten thuhriat duh nei an rawn phone chuan lo chhan loh kha thilmawi a ni bawk silo a, chuvangin sorkar in thuruk vawn tur chin a tih (classified/secret information) te chu eng ang a lal a insawi pawh nise a dan pangngai lo chuan tumah lo share miah lo turin sorkar office staff te hriattir vek anni.
--------
"Thawhtanni hi zingah mutrei ve theih nise a ropui ngawt ang. Mihring thil ho te te nuam tichi ka ni a, ka ti tak tak ania." - Arthur Darvill
------
Chawlhkar thar hman nuam vek ule.