Sunday, 28 January 2018

LAMTLUANG ZINGKAR CHANCHINTHAR LAWRKHAWM

28.1.2018 (Pathianni)

*Mizoram Presbyterian Synod hnuai a Kristian Thalai Pawl te chuan Pastor Bial hrang hrang ah Zirtawpni zan atang khan Bial conference an hmang tan a, zaninah an tiak ang.

*Baptist Church of Mizoram te chuan vawiinah Phal pual Pathianni (Leprosy Sunday) an hmang dawn a, Headquarters atanga thupui thlan sa ‘Phar te tithianghlim ula.’ (Matt. 10:8) hmangin Pathian thuchah ngihthlak a ni ang.

*January 23, 2018 (Thawhlehni) tlai dar 3:00 khan Mizoram Baptist Kohhran-in Nau hnuchham a enkawlna (Baptist Church Orphanage (BCO)) Building nghenga sak thar BCM Sick Room leh Counseling Hall chu Rev. R. Zohmingliana, Associate General Secretary, BCM chuan Pathian hnenah hlanin a hawng.

*Mizoram Synod-in Lungleia Family Guidance & Counselling Centre thar a din chu January 23, 2018 chawhnu dar 1:00 khan Rev. F. Lalrinnunga, Synod Moderator chuan hawngin Pathian hnenah a hlan a; he hmuna Counsellor awm tur, Rev.Lalrintluanga Ngente a dah nghet nghal bawk. He Centre hi Lunglei Bazar Venga Synod Building (Bazar Veng Pastor Quarters) bulah siam a ni.

*Nimin khan Afghanistan khawpui Kabul ah car (ambulance) hmangin bomb tihpuah a ni a, mi 95 in nunna an chan a, mi 158 chuangin hliam an tuar. Lamtluang thulakna in a tarlan danin he pawikhawihna hi Taliban te chuan an tih niin an chhal.

*Nimin khan Jaipur Literature Festival ah Oxford Dictionaries chuan 'AADHAAR' tih chu Hindi Word of the Year 2017 ah an puang. 

*Nimin khan BJP te chuan Tripura state assembly inthlan February ni 18  a neih tur a an candidate tur te list hmasaber chu an puang. Hetih lai hian Congress party pawhin Meghalaya leh Tripura inthlan lo awm tur a an candidate tur list hmasaber an puang bawl. Lamtluang thulakna in a tarlan danin Tripura leh Meghalaya ah hian March ni 3 ah he inthlan neih tur a vote tla te hi chhiar a ni ang.

*Niminpiah thim hlim khan Lungdai (Sihphir leh Serkhan inkar) Hmar Vengah In a kang a. In neitu Pi Awii te hi an len chhuah lai a nih avangin kangmei chhuah chhan hi chiang taka hriat a ni lo. Inkang hi bungrua chuh hman loh in a kangral vek a ni.

*Assam a New Haflong railway station ah tlawmngai pawl hrang hrang ten sawrkar dodalna an buatsaih avangin rel a zin mi 1,200 chuang te an tangkhang. Lamtluang thulakna in a tarlan danin heng pawl hrang hrang te hian Dima Hasao district chu Naga hel leh sawrkar laipui remna kawng an inbiaknaah Naga te huam chhung a rinluh tumna awm nia an hriat avangin sawrkar dodalna hi an huaihawt ta a ni. He buaina avang hian rel kawng te tihchhiat a ni a, rel pawh tlan thei lo in khualzin te hi an tangkhang ta a ni.

*Nimin khan Australian Open hmeichhe final ah Denmark mi Caroline Wozniack chuan a khingpui Romania nula Simona Halep chu 7-6, 3-6, 6-4 a hnehin a vawi 1-na atan Grand Slam title a la. Vawiin chawhnu dar 2 hian Mipa final Marin Cilic leh Roger Fererar ten an khel ve leh dawn a ni.

*China ram hmun thenkhatah vur a tlak nasat avangin mipui te nunphung a khaihlak nasa hle. Central Hubei province ah phei chuan kawngpui 30 chuang vur tla avang hian khar a ni a, hmun hrang hrangah rel leh thlawhna zin chhuak tur te pawh tih tawp a ni.

*India sawrkar laipui chuan December 2017 chhung khan GST chhiah atangin Rs.Vaibelchhe 86,703 a hmuchhuak. Lamtluang thulakna in a tarlan danin tun thleng in GST hnuaiah hian chhiah chawitu vaibelchhe 1 an in ziak luh tawh a ni.

*India Prime Minister Narendra Modi chuan February ni 9 atanga ni 12 chhungin Palestine, UAE leh Oman a tlawh dawn. A zin chhung hian Dubai ah World Government Summit vawi 6-ah thusawina hun a chang bawk ang.

#news #mizoram #newsinmizo #mizo #chanchinthar #mizonews #mizoramnews

No comments:

Post a Comment