Sunday, 6 March 2016

LAMTLUANG PATHIANNI ZINGKAR CHANCHINTHAR LAWRKHAWM

*Kristian Thalai Pawl General Conference vawi 56-na Champhai a neih mek chu zaninah a tiak dawn ta. Lamtluang thudawn danin nizan thleng a palai riaklut a kal zat chu mi 18,635 anni a, lehlang a kal mi 1,024 an awm bawk. Vawiin chawhma inkhawm leh chawhnu inkhawm ah Speaker Rev.Vanlalbela hnen atangin inkhawmpui thupui "Pathian Kohhran" tih ngaihthlak a nih leh ang a, zanah Leader kalchhuak Rev.J.Lalremsiama hnen atangin thuchah ngaihthlak a ni ang. Zan inkhawm ah hian hruaitu thar te Pathian hnena hlanna neih a ni bawk ang. 

*Mizoram Baptist Kohhran Rorelna Sang ber BCM Assembly vawi 120-na chu karleh March 9, 2016 (Nilaini) zan atang hian tan a ni dawn ta a, hemi atana inbuatsaihna pawh a thlengtu tur Hnahthial Bazar leh BCM Headquarters lam te inpuahchahna pawh peih fel a ni ta. Assembly hi March 9, 2016 ah tanin March 13, 2016 Pathianni zanah a tiak ang. Kumin Assembly thupui tur chu “Ringtu Nun” tih a ni ang.

*North Mizoram District Conference lian vawi - 66 na District Conference chu March ni 3 Ningani zan atang khan Aizawl Tlangnuam khelmual-a Pandal sakah tan a ni. Inkhawm puiah hian Thupui “Hma i sawn zel ang u” tih Philipi Bung 3:16 thu atanga lakchhuah hman niin, March ni 3 Ningani zan khan Rev. K. Satinvela, NEI-UPC Former General Superintendent in inkhawmpui a hawng. Thupui hi kawng hrang hranga thensawmin Pastor Vanlalruata, Rev. C. Lalmuanpuia, Rev. Laltluanga, Rev. Zohmingthanzama, Rev. Rosanga Kawlni leh Rev. C. Lalrammuana ten Pathian thuchah an insawi chhawk thin a ni.

*Mizoram UPC Bible School Apostolic Theological Institute, ATI Board Meeting vawi 153-na chu March ni 2, Nilaini chawhma dar 11 khan General Headquarters Office Conference Hall, Tuikhuahtlangah neih a ni. An thurel langsar zual zingah ATI bungrua tih changtlun chungchang te, kum 2016 ATI Session tan hun tur leh Registration Day hman dan tur te an rel bawk. Heng bakah hian kum 2016 ATI Mizo Section-a lut thar tur Personal Interview an nei nghal a, 1st Year Zirlai tur interview mi 40 zingah mi 18 an la thar bawk.

*Nimin khan Salvation Army India Eastern Territory pumah a thawkhatnan 'Intodelhna lamtluang' thupui a hmangin Finance Seminar Commanding Officer Bial hrang hrangah neih a ni . Team - 45 a insiamin he hun hi neih a ni. Team tin a Member ten he hunah hian Resource person ni nghalin hun an hmang. CO bial tin a Corps a hruaitu chin te an kalkhawm a, THQ Officerte pawh Team Leader niin Finance Seminar hi hmun hrang hrang ah an hmanpui a ni.

No comments:

Post a Comment