Monday, 30 March 2015

29th March 2015 news in Mizo

Latest news collection in Mizo language (News update from Mizoram)
MIZO TAWNG A CHANCHINTHAR LAWRKHAWM
29.3.2015
*MINISTER PU JOHN ROTLUANGLIANA'N KHAWZAWL TOURIST LODGE SAK HNA ENFIAH; 'MIZORAMAH BUHFAI DINHMUN A THA"
Tourism, Transport leh Food & Civil Supplies changtu Minister Pu John Rotluangliana chuan nimin zing khan Khawzawl Tourist Lodge sak hna kal mek a endik. Minister hi Pu T.T. Zothansanga Parl. Secretary, Pu K. Lianzuala Chairman KVI Board leh Tourism Director Pu Vabeiha Hlychho leh Department hotuten an tawiawm a ni.

Khawzawl Tourist Lodge hi kum 2014 March atanga sak tan a ni a. A sak hna hi Royal Engineering & Architectural Consultant, Engr. K. Lalrimawia'n enkawl in, a sak hna hi 70% chu zawh tawh a sawi a ni.

Minister chuan tun dinhmuna Mizoram buhfai, tuialhthei leh gas chungchanga zawhna chhangin Mega Block avangin Mizoram in buhfai chawkluh kawngah harsatna a tawh loh thu a sawi a. Bairabi thleng Rail kawng lian zawk (Broad Guage) a tih changtlun hna pawh zawhfel tep a nih thu leh April thla chawhnu lam chuan bungraw phur chi Rail in Bairabi alo thlen theih beisei anih thu a sawi. Mega Block hian Mizoram a Tuialhthei lakluhna-ah nghawng aneih loh thu leh Mizoram in Tuialhthei dahkhawlna tha ala neilo chungin Mizoram chhungah Tuialhthei dinhmun a that thu Minister chuan a sawi bakah Eirawngbawlna Gas (LPG) dinhmun pawh a that thu a sawi bawk.

Minister hian niminpiah March ni 27 tlai khan Champhai Circuit House-ah Champhai District Transport hnathawktute a kawm a. District Transport in Sorkar Revenue a cheng vaibelchhe khat dawn a chhunglut thei chu lawmawm a tih thu sawiin, Champhai DTO in mamawh hrang hrang a neihte tihhlawhtlin nan theih ang tawka hmalak a nih tur thu a tarlang a ni. (DIPR)

*ACADEMIC SESSION THAR ATAN SCHOOL KAI HUN THAR
Mizoram Sawrkar School Education Department chuan Academic Session thar 2015 - 2016 atangin Sikul kai hunbi thar a hmang dawn ta a, hunbi thar ang chuan zing dar 8 ah sikul tanin Primary level chawhnu dar 1-ah bantir an ni ang a, Middle School chin dar 2-ah an bang ang a, Secondary leh Higher Secondary School te 2: 30-ah bantir an ni ang.

Hemi chung chang hi nimin khan School Education hotute chuan puangzarin MJA Press Club-ah Chanchinbumite an kawm a. Pu Lalzirmawia Chhangte, Addl. Secy, School Education , Pu K. Lalthawmmawia, Director, School Education leh hotu dangten Mizorama school timing thar chungchang leh zirna kawnga hmalakna hrang hrangte an sawifiah a ni. Rawtna thar hi uluk taka Department in a zir chian hnuah tih chhuah a ni tih sawiin Sawrkar phalna neia Skul din zawng zawngte chu zawm vek tura tih an ni tih pawh an sawi a ni. Thusawi points pawimawh te :

SCHOOL CALENDAR CHUNGCHANG : Elementary leh High School tan kum 2015-16 school academic session tan ni atan April 1 ruat a ni a. Hei hi Govt., Deficit, Ad-hoc Aided, Lump-sum school te leh Private school Mizoram sorkarin hawn phalna a pek zawng zawng ten an zawm ngei tur a ni. Hei hi an zawm leh zawm loh hrechiang turin anmahni bialtu DEO, SDEO, DPC (SSA), BRCC (SSA) leh CRCC(SSA) te theuh chik taka vil tur leh April 2015 chhunga report Director of School Education hnenah an thehlut tur a hriattir an ni. School tan ni a ruat a tan lo hriatchhuah te chu an chungah a tul angin sorkarin hma a la ang.

SCHOOL SYLLABUS LEH TEXT BOOK CHUNGCHANG: Academic session thar 2015-16 atan hian sorkar chuan school syllabus leh text book a siam a, hei hi school zawng zawng, sorkar leh private school ten an hmang tur a ni. Sorkarin a syllabus leh textbook zir tur a duan bak hi eng school mahin mahni thu in zir tur an belh tur a ni lo.

SCHOOL FEE : Hei bakah hian School fee/Admission fee pawh skul tina inanga hman turin sawrkar chuan a bithliah thar bawk a ni.

Hengte hi zawmlo skul an awm chuan a tul anga hmalak a, skul recognition suspend emaw, hlih sak emaw thlenga ngaihtuah a ni dawn tih School Education hotute chuan an sawi a ni. (DIPR)

*BCM HRUAITUTE MANIPUR AH THANG MEK
Manipur Baptist Convention (MBC) chuan Manipur pum huapa Baptist Kohhran inkhawmpui lian MBC General Conference chu March 26-29, 2015 hian Ukhrul, Manipur-ah an nei mek a, hei hi kum 5 dana an neih thin inkhawmpui lian tak a ni. He hun hmanpui tur hian BCM min sawm angin President, Rev.C. Ngurhnema leh General Secretary, Rev.H. Lianngaia te chuan an hmanpui a, March 25-ah kalin March 30-ah an lo kir leh ang.
Source: www.mizobaptist.org


*BIAL INKHAWMPUI NEI MEK
BCM Phuldungsei Pastor bial chuan March 27-29, 2015 hian Pukzing Biak inah Bial inkhawmpui an nei mek a, speaker atan Rev.Dr.V. Laldingliana hmangin thupui Kohhran Nung tih a ni. Chhipphir Pastor bial BKHP chuan Lungmawi Kohhranah inkhawmpuian nei mek a; speaker atan an bialtu Pastor, Rev. PC. Lalmuankima hmangin thupui atan “I ram lo thleng rawh se”tih an hmang. Paithar Pastor bial KNP chuan Chawntlangpui Biak inah KNP inkhawmpui an nei mek bawk a, speaker atan Lawngtlai ES Office-a HA, Upa C. Lalbiakthanga an hmang.
Source: www.mizobaptist.org

*HNIMHNAH HMANG A SIKSERH NATNA ENKAWL CHUNGHANG
BCM Relief and Development hnuaia Zo-Clinic hmalakna kal zelah Artemesia Annua thing hmanga hmalakna thar neih belhchhah a ni a. Director, Pu M.S. Dawngliana leh Pu Stuart Spani Chairman, Bye Bye Malaria, Canada te’n 22 Feb – 1 March, 2015 khan Anamed hnuaiah Training Ranchi ah an nei a. Artemesia Annua chin dan leh sawngbawl dan leh damdawi hman dan te an nei a ni. Training zawh hian a chi te rawn hawn in Mizoram khaw hnihah Training pe in a chi te pawh kui nghal a ni. Artemesia Annua hi Malaria laka inven nan leh a veite enkawl nana hnimhnah damdawi tha bera ngaih a ni mek a ni. Africa ramah tunah chin darh ni in Malaria benvawn veite pawh a ti dam a ni.
Source: www.mizobaptist.org

*LIKBK ASSEMBLY NEI MEK
Lairam Isua Krista Baptist Kohhran (LIKBK) chuan March 25-29, 2015 chhung hian an Kohhran rorelna sang ber Assembly, Lawngtlai Chanmari Biak inah an nei mek a ni. Inkhawmpui hi zanin ah an tiak ang.

*SYNOD CHOIR KARBI ANGLONG AH ZAI DAWN
Karbi Anglong Synod thar hawnna vawiin (April 29, 2015)-a zai turin Mizoram Synod Choir te chuan Zirtawpni (April 27,2015) khan Aizawl an chhuahsan. Central KTP Committee atangin Pu Ngurhmingliana leh Pu Lalchhuanliana ten an tawiawm a ni.

Nimin khan Karbi Anglong General AssemblyAdministrative Area (KAGAAA) Synod hawn a ni a, hemi hmanpui turin hian Rev. Lalzuithanga, Senior Executive Secretary, Rev. B. Sangthanga, Synod Secretary, Rev. Dr. R. Lalbiakmawia, Finance Officer leh Upa Vanengmawia, Statistician te an kal a ni.
Source: Synfocity=529

*KOHHRAN HMEICHHE HRUAITU TE TAHAN AH ZIN
Presbyterian Women Joint Committee (PWJC) Inkhawmpui, Khampat Calvin, Tahan, Myanmar-a neih turah Central Kohhran Hmeichhe hruaitu, Pi H. Lalpianthangi, General Secretary; Pi Sailuti, Asst. Secretary; Pi C. Lalhmangaihi, Ex-Chairman leh Nl. Zoremmawii (Soloist) te chu March 24,2015 khan an kal a, April 1, 2015-ah an lo let leh ang. Inkhawmpuiah hian Pi H. Lalpianthangin Bible Study ‘Petera Lehkhathawn 1’ a neihpui ang a, Inrinni zan atanga Pathianni zan thlengin Pi Sailuti leh Pi C. Lalhmangaihi ten ‘Krista thuhretu’ (Tirhkohte 1:8) tih thupui hmangin Pathian thuchah an sawi bawk ang.

Source: Synfocity=529

*BCM IN PASTOR BIAL THAR HAWNG
BCM Assembly thurel bawhzuiin Pastoral Ministry chuan Pastor bial a hawng thar zel a, nimin March 28,2015 (Inrinni) khan Tawipui Pastor bial atanga piang tur Tawipui North Pastor bial chu President Elect, Rev. Lalthangliana Hnamte chuan a hawng. Bial thar hawnna hi Tawipui North II Biak inah neih a ni a. Bial thar hawnna inkhawm hi Pastoral Coordinator, Rev. R. Zohminglianan inkhawm a kaihruai a, President Elect, Rev. Lalthangliana Hnamte in thuchah a sawi nghal a ni. Bial thar pahnih hruaitute lawm luhna leh hlanna Rev. R. Thanmawia’n a nei thung a ni. 

Tawipui North bialah hian Tawipui biala awm thin Kohhran 2 leh Hrangchalkawn biala awm Kohhran 3 te an tel ang a, an vaiin member 1774 an ni ang. Hetiangin: Tawipui North I, Tawipui North II, Gilead, Thualthu leh Mualthuam S. Tawipui bialah heng Kohhran 4- Tawipui South, Minpui, Mt. Hermon leh Mualcheng S te an awm zui ang a, member 1556 an ni ang. Tawipui bialah hian tuna Zawlpui biala awm Rev. Lalchhuankima (Atea) a awm ang a, Tawipui North bialah hian kumin Assembly-a ordain, Rev. Andrew Lalhmachhuana Fanai a awm ang.
Source: www.mizobaptist.org


*SYNOD IN RAM PUM HUAP TAWNGTAI RUAL NEI DAWN
Synod Executive Committee 255:62 of 24-26.2.2015 chuan khawvel ram hrang hranga Kristian tihduhdahna leh nekchepna hnuaia kun mekte tan ram pum huapa tawngtai rual neih ni se tiin a rel a.Ahun atan April 4, 2015 (Inrinni) Zan Inkhawm a ruat bawk a ni. Tawngtai rual thupui a hnuaia tar lante hi a theih anga sawi zau emaw sawi fiah emaw a tul chuan Kohhran Committee-in buatsaih mai ni se a ti.

Sawifiahna:
India ram chhungah hmun hrang hrangah Kristian-te'n beih leh nek chep kan tawk mek a. Kumin chhung ngei pawh hian Jabalpur, Madhya Pradesh-ah te, Mumbai, Maharastra-ah te, Biak In hal a ni a, Haryana-ah te Biak In suasamna leh Kraws suasamna te a thleng a, kraws dahna hmuna Hanuman lim dah luihsak te an tawk a. Mangalore-ah Catholic rawngbawltu Nun te ruk bo a ni a, pawngsual te an tawk a. Central India hmun hrang hrangah Kristian school thenkhatte Kristian chhinchhiahna an siamte avangin tihbuai leh vau an ni bawk a. Karnataka-ah Hindu firfiak pawl VHP ten Kristian-te an tibuai reng a, nasa takin an nek chep a. Hetiang thil hi India ram hmun hrang hranga Kristian-te laka a thleng reng chung hian sawrkar atangin ngaihsak leh humhalh an hlawh lo hle a ni.

Khawvel hmun hrang hrangah Kristian-te hian ngaimawh kan hlawh hle bawk. Kumin chhung hian Muslim firfiakte kut an tuar nasa tawh hle a ni. Pakistan-ah Biak Ina tawngtai lai thih chilh bomb nena beih an ni a. Middle East huam chhungah nunna tam tak lak a ni tawh. Nunau thlengin zuah an ni lo va, Bible hal leh Biak In nghaisak te chu nitin a thleng. Muslim firfiak ISIS te chuan mamawh leh ralthuam tuak nan mihring taksa bung pawimawhte sumdawn nan hmangin Kristian-te chu sa talhin an talh reng a. Hetiang atan hian Kristian tawh phawt chu ruk bo tur an vai reng a ni. An hmeichhiate an pawngsual a, an that a, an kal leh taksa bung hrang hralh theih apiangte an la thin bawk. Syria, Lybia leh Egypt-ah te an che na em em reng a ni. Kristian-te hmunpuia kan ngaih thin USA leh UK-ahte ngei pawh Kristian nihna tihlan khapna hmun tam tak a awm ta mek bawk.

INDIA
- India mi Kristian khawvel ram hrang hranga awm intel khawmten Kristian tihduhdahna titawp tura India sawrkar an dawr mek tihhlawhtlin a nih theih nan
- Prime Minister Narendra Modi-an hnam leh sakhaw tenau zawkte humhim a tiam ang ngeia Kristiante hum him an nih theih nan
- India rama Kristian huat bikna a reh theih nan.

KHAWVEL HMUN DANG
- Ram tinin sakhaw hrang hrangte thlei bik nei lova an en theuh theih nan
- Tihduhdahna tuar mek Kristian-ten rorelna dik tak an hmuh theih nan
- Khawvel puma Kristian-te nghehna leh inpumkhatna atan.

KHAIKHAWMNA
- Tiduhdahtute Pathian khawngaihnaa hneha an awm theih nan
- Mihring leh mihring innghaisak duhna thinlung a lo bo theih nan
- Sakhaw dangte ang bawka Kristian-te'n zalenna an neih ve theih nan.
Source: Synfocity=529

*MARTARTE NI LEH TUMKAU NI HMANG DAWN
Tunkar Pathianni March 29, 2015 hi Mizoram Baptist Kohhran chuan Martarte Ni atana an hman thin ni a ni. Kuminah hian Palm Sunday nen a inrual avangin thusawitu chuan a duh zawk zawk a sawi thei dawn a ni; thusawi turte chuan zing lamah Krista vanga tuarna, zan lamah Isua zuitu (Kristian) nih avanga tuarna thupui sawi tur in an in hriattir. Kumin Tumkau Pathianni thupui chu ‘Phelh ula, han kai rawh u’. (Luka 19:30) tih a ni.

*TANPUINA SEM
March 19, 2015 a Synod Partnership Committee thukhawm chuan tanpuina sum pek nise, tiin a rel a. Tanpuina hi tunah hian pek chhoh mek an ni. Tanpuina pek turte chu :-
1. Cancer Hospital, Zemabawk - Rs. 50,000
2. Shalom, Jowai - Rs. 30,000
3. Partnership Mission, Meghalaya - Rs. 30,000
4. Tawngtai Bethel Camp, Chawnpui - Rs. 50,000
5. Gan Sabra, Luangmual - Rs. 10,000
6. Mission Foundation Movement Missionary Training atan - Rs. 30,000
7. Disciple’s Society - Rs. 20,000
8. Varanasi Mission - Rs. 40,000
9. T.B.Z., Mizoram - Rs. 50,000
10. Apostolic India Mission - Rs. 50,000
11. Restoration India Mission, Cuttack - Rs. 40,000
12. Set Free Ministries (Jail Ministry) - Rs. 30,000
13. Zoram Evangelical Fellowship - Rs. 50,000
14. T.N.T., Zuangtui - Rs. 50,000
15. Blind Society, Luangmual - Rs. 20,000
16. Love Project c/o Grace Home - Rs. 50,000
Total - Rs. 6,00,000
Source: Synfocity=529

No comments:

Post a Comment