Thursday, 28 November 2013

28th November 2013 news in Mizo

Latest news collection in Mizo language:
MIZO TAWNG A CHANCHINTHAR LAWRKHAWM
28.11.2013
*India mi UK a cheng Aravindan Balakrishnan, kum 73 mi chuan Isua ka ni tiin zirtirna a kalpui thin a, a In ah hmeichhia 3 kum 30 lai sal angin a lo kawl tih Scotland Yard ten an chhuichhuak. He pa hi Maoist zirtirna a tui niin Comrade Bala tiin hminglem an phuahsak a Tanzania lam mi nupui ah a nei a, an nupa hian police ten man in thu an zawtfiah tawh nghe nghe.
 
*Borazjan, Iran nuclear plant atanga 60 kms ah 5.6 ritcher scale a chakin lir a nghing a mi 7 in nunna an chan a mi 30 chuangin hliam an tuar.
 
*Supreme Court of India chuan inneih hma a nupa anga lo khawsak dun(live in relationship/marriage like relationship) chu India ram khawtlang nun ah entleu ni thin mahse dan bawhchhiatna a ni lo a, sual pawh a ni hek lo tiin thu tlukna a siam. Hetiang a lo khawsa ten fa an lo nei anih chuan leh a bikin hmeichhe dinhmun a chhiat zawk thin avangin an hmalam zel a an awm dan tur ngaihtuahna tur dan erawh Parliament in an siam a ngai a ni tiin an thu an ti tlu.
 
*India rama mobile phone operator lar tak Idea Cellular chuan android smartphone dual SIM hmang 'Aurus 4' Rs.8,999 man an siam chhuak ta.
 
*Vawiin khan Union Agriculture Minister Sharad Pawar chuan Sikkim khawpui Gangtok ah Annual Conference of Minister of Agriculture in North Eastern States hawngin hmarchhak bial a kuthnathawktute chu oil palm ching uar turin a hrilh.
 
*Britain's National Crime Agency ten Premier League football fixing vangin mi 6 an man, rinhlelh zingah hian premier league player nilai 3 leh player hlui te pawh an tel a ni.
 
*Nihnih awh tur Thalfavang Kut chu naktuk November 29 hian Hmuifang Tourist Resort-ah Mizoram Governor Pu Vakkom Purusthothaman’ a hawng dawn. - DIPR
 
*FIFA World Ranking thar berah India chu 148-na a ni mek, Top 5 a lang te chu 1-na Spain, 2-na Germany, 3-na Argentina, 4-na Columbia, 5-na Portugal.
 
*Fifa World Cup khelhna tur stadium sak lai Brazil a mi chu crane a chim a, mi 2 in nunna an chan.
 
*Vawiin khan Meghalaya Police ten Garo helpawl United A'chik Liberation Army zinga mi 3 an kaphlum a, mi 1 an kahhliam hnu ah man tel a ni bawk, an inkahna hmun hi East Garo Hills khawpui Williamnagar atanga 10 kms a hla ah a ni.
 
*Social activist Anna Hazare chuan kumin Parliament thlasik thutkhawm huna Lokpal Bill passed a nih ngei theih nan Yadavbaba Temple, Maharashtra ah 10 Dec 2013 atangin chawnghei leh a tum.
 
*Vawiin hian Election Commission of India thupek angin Aizawl South I constituency a Republic veng Polling Booth-I ah vote thlak that mek a ni.
 
*Tehelka Chanchinbu Editor-in-Chief Tarun Tejpal chuan hmeichhe khuaikhem a puh a nihna insawifiah nan Goa Police te hnenah hun tam zawk inbuatsaih nan a dil.

*Underworld firfiak a che thin Abu Salem chu passport lem hmang a puh a nih avangin CBI Court Hyderabad in kum 7 lung in tang turin a chung thu a rel.


*Syria sorkar leh opposition party ten Geneva Peace conference ah an tel tur thu an ti chiang ta.


*Vawiin chawhnu hian Andhra Pradesh tuipui kam hnaih Cyclone Lehar in a nuai dawn ni a sawi a ni.


*Vawiin hian Mizo History Association chuan Govt. Aizawl College ah Annual Session XXXIII -na an hmang tan a, 'History of Mizoram' tih thupui hmangin Seminar an huaihawt, Pu J.Malsawma khuallian a ni. He Session hi Dept. of History, Govt. Aizawl College in an thleng a, naktuk 29.11.2013 ah an chhunzawm ang.

No comments:

Post a Comment