Thursday, 19 September 2013

12th - 18th September 2013 news in Mizo

News collection in Mizo language:

CHANCHINTHAR LAWRKHAWM
18.9.2013
*France Senate chuan an ram chhung a naupang kum 16 hnuailam te chu taksa nalhna pholanna intihsiakna (beauty pageant) ah an tan a phal tawh dawn lo. Dan thar an siam hi naupangte zahawmna vawmhim nan a tih niin National Assembly ah la pass leh tur a ni ang.
*Mizoram sorkar chuan Mizo zinga a UPSC leh MPSC civil service prelims exam a inziaktling te tan tanpuina pawisa Rs.25000-50000 a pe tawh dawn. UPSC Prelims a inziaktlingte hi Rs.35000 pek thin anni a, tunhnai ah sorkar in Ministry of Minority Affairs ah sum dil belhin Group A leh Group B exam a inziak tling te pawh huam vek thei turin tanpuina hi pek tum a ni. -DINGDI
 
*Vawiin khan Champhai Zotlang ah Rs.Nuai 2238.69 seng a sak tur Sports Stadium lungphum chu Minister J.H Rothuama'n a phum ta.
 
*Chief Minister Pu Lal Thanhawla hmalakna in nimin ni 17.9.2013 khan Comprehensive Rubber Based Settlement Project buatsaihna turin, Pu K.G. Mohanan, Addl. Rubber Production Commissioner (Retd.), Trivandrum, Kerala (Consultant) leh Mizoram Sawrkar (Soil & Water Conservation Department) chuan Memorandum of Understanding (MoU) an sign fel ta a. Sawrkar Flagship Programme NLUP sum hmangin he Project hi buatsaih a ni a, MoU signed atanga thla thum chhungin Project hi peihfel tura duan a ni. DPR buatsaih fel veleh a funding source tur zawn nghal a ni dawn a, a tul dan angin World Bank assistance pawh beisei a ni. Kum tin 2500 ha. vel a bul tan chhovin, kum 20 chhung chuan 50,000 ha. tih zawh vek tum a ni. MIRSAC hmangin Mizoram chhunga Rubber chin theihna tur hmun zau zawng hi buatsaih (mapping) mek a ni. -DIPR
 
17.9.2013
*Kum 2013-2015 chhunga Central Young Mizo Association (CYMA) O.B tura Nominate list :
1. Dr. Malsawmliana Vaivakawn
2. Er. K. Lalrimawia Thuampui
3. J. Lalsailova Mission Veng North
4. K. Sapdanga Aizawl Venglai
5. Lalbiakzuala Khatla
6. Laldawngliana Tochhawng Kanan
7. Lalhmachhuana Chaltlang North
8. Lalrochuanga Pachuau Zarkawt
9. Roneihthanga Nursery Veng
10. R. Lalhmachhuana Chanmari West
11. R. Lalngheta Hlimen
12. R.L. Rindika Bungkawn
13. Vanlalrema Rokhum Zemabawk
14. Vanlalruata Tuikual South
Source: DINGDI
 
*MIZORAM SKILLS EXPO - 2013
Pu Haukhum Hauzel IAS, Member Secretary, State Planning Board Chairman-na hnuaia din, Mizoram Skill Development Society (MSDS) chuan Mizo thalai lehkhathiam, hna nghet leh thawh tur mumal neilote tan India ramchhung leh pawnah te hna an thawh theihna tur kawng kawhhmuh leh training pe turin, Mizoram Skills Expo 2013 chu ni 18 leh 19 September, 2013 hian a buatsaih dawn a. Pu H. Liansailova, Finance Minister chu Khuallian niin, ni 18 Sept., 2013 zing dar 10-ah Hrangbana College, Golden Hall-ah neih a ni anga, ni 19 September-ah Govt. Mizo High School Indoor Stadium-ah neih a ni thung ang. He hun tihlawhtling tur hian India rama Skill Providers tha tak takte leh U.K. Skill Provider-te sawm an ni a, Mizo thalaite tana an tih theihte entirin, a duh apiang tan zawhna a zawh theih dawn a ni. Mizo thalai lehkhathiam, hna zawng mekte tel vek tura sawm an ni e. -DIPR
 
*Vawiin khan Chief Secretary Conference Hall-ah Pi M. Sathiyavathy, Additional Chief Secretary hovin Pi Sonia Gandhi, UPA Chairperson-in ni 20 September, 2013-a Aizawl a rawn tlawh tur chungchangah sorkar department hrang hrang hotuten an hna chanpual tur relin an thukhawm. Pi Sonia Gandhi hian Aizawl-ah vantlang inkhawm a hmanpui anga, Sainik School Chhingchhipa sak tur lungphum phumin, Food Security Bill hman tur a puan dawn bakah NLUP 4th Phase a tlangzarh nghal bawk ang. - DIPR
*MZP GEN.HQTRS HRUAITU THAR TE (2013-15)
President: Lalhmachhuana
Vice President: Lalsangzuala Ngente
Gen.Secy: L.Ramdinliana Renthlei
Asst.Gen Secy: Joseph K.Zohmingliana
Treasurer: R.Lalrokima
Fin.Secy: Michael Lalramsanga
 
*Karnataka sorkar chuan an state sorkar hnathawk te tan a office kai na a t-shirt, jeans leh designer blouse hak phallohna order 12 september 2013 a an chhuah chu nimin khan an hnukdawk leh ta a ni. An order chhuah hmasak ah kha chuan hmeichhia tan sari chauh leh mipa tan salwar kamiz leh kekawr thui pangngai bak office a hak an phallo kha a nia.
 
16.9.2013
*Forbes in an tarlan danin America(US) ram chhung a hausa ber ah Microsoft co-founder Bill Gates chu an puang, 72 Billion dollar a nei mek niin an chhut.
 
*Mizoram sorkar New Land Use Project entawnin Arunachal Pradesh chuan Integrated socio-economic programme kalpui a tum a. Hemi atana NLUP kalphung rawn zir chiang tura Arunachal Chief Minister, Pu Nabam Tuki rawn tirh, State Land Use Board Director, Pu Joram Puppa chuan vawiin khan NLUP Implementing Board Chairman Pu R.Selthuama leh Marketing Cell hotute hmuin NIB conference hall-ah line department te nen NLUP chungchanga inkawm hona an nei. -DIPR
*Nimin tlai dar 5:30 leh dar 6 inkar vel khan Thuampui veng Ch.chhunga Bus Terminal bula Thangruma te luah Concrete In, a chung Assam Type chu a kang a, mi 3 in hliam an tuar. Thuampui veng Ch.chhunga Bus Terminal bul Chawhmeh zawrhna Bazar building hnaih ber dawttu Pushpak Cinema Hall hnaih a Thangruma te luah Concrete In, a chung Assam Type chu Nimin tlai dar 5:30 leh dar 6 inkar vel khan a kang a, Thangruma te hian motor oil vel zawrha leh chenna atana an hman ani a, chung lam Assam Type chu a kang chhe nasa hman hle a, bungrua pawh a kang chhe hman hle niin thu dawn a ni a, hnuai lam erawh Fire Deptt. ten an chhan hman ani. Thangruma leh a nupui leh an fapa 1 in hliam an tuar a, Thangruma hi Aizawl Civil Hospital ICU ah enkawl a ni a, a taksa kang hi 50% vel niin thu dawn a ni. A fapa Lalruatfela chu inchhawng chung atanga a zuan thlaknaah hliam a tuar a, Pu Thangruma nupui Pi Kawlramthangi chuan a banah kang hliam a tuar a , Fireman 1 in a ke ah hliam tenau a tuar bawk. Kangmei chhuah chhan chiah hi hriat ani lo. Fire Department an thlen hma avangin in dang a kan kai hmain thelh mih hman a ni. He In hi Dr.Tlangkunga building niin thu dawn a ni bawk. -Princess Beevee via SPECIAL REPORT
 
* Pathian fakna hla lar tak, Kristian Hla Bu ah pawh sengluh tak 'Tawpna ni a ka hringnun hi a ral hunin' tih hla te leh Pathian fakna hla tha tak tak dang Mizo tawnga letlingtu Pu LT Zothankhuma (72) Zotlang Veng, Aizawl chuan vawiin (Sept 16) chawhma dar 11 khan chuap tha lo avangin chatuan ram a pan a. Naktuk (Sept 17) chhun dar 12 ah vui a ni ang.

Pu Zothankhuma hian hla a lehlin bakah hla tha tak tak a phuah bakah hla thluk tam tak a siam bawk a. An veng pa Pu C Thangkhuma phuah, thalai hla lar tak 'Zing thla zarin han leng ila' tih hla thluk te pawh hi a siam a ni.

Central YMA-ah Vice President a ni tawh a, LAD Department Jt. Director ni a a pension hnu ah Aizawl Municipal inthlan hmasaber ah khan MNF Official candidate a ni nghe nghe.
Source: Aitea Ralte via Times Corner FB Group

*India chhul chhuak New York a an chhungkua a cheng mek Nina Davuluri (24) chu Miss America 2014 atan thlan tlin a ni.
 
15.9.2013
*Christiano Ronaldo chuan 2015 thleng atan Real Madrid club ah contract a siam chhunzawm leh. 

*Tukin zing dar 8:20 khan India mithiam ten ramdang thiamna tello a an siam missile 5000 km kap thei leh nuclear ralthuam kengtel thei chi Agni-V chu Wheeler Island, Odhisa tuipuikam atangin hlawhtling takin a enchhin. India hian Agni missile hi chi 5 a nei ta a ni.
 
14.9.2013
 *Tukin zing dar 2 vel khan Bairabi Ramhlun veng a Pu Lalmuanzova leh Pu B. Lalchawimawia te in luah lai chu leimin hlauhawm avangin an bungrua thiar chhuah a ni a, tunah hian YMA ten in senghawi hna an thawk mek. Indang 3 pawh min mai hlauhawm khawp in a awm mek a, heng zingah hian IKK Biak In a tel a ni.Leimin hlauhawm na lai hi Tlawng lui ko Teirei lui in Tlawng lui a rawn finna lai a ni.-Sudden Muanga Darngawn

*India ram pum ah petrol man Rs.1.63 in tih pun a ni a, state zawng zawng ah tax nen a chhut chuan a man punna tak hi hei aiin a tam vek ang.
 
*Nizan khan Imphal West dist a Nagampala a lobour camp a bomb puak ah mi 8 an thi a, mi 7 in hliam an tuar, thi leh hliam tuar te hi non-manipuri vek anni.
 
13.9.2013
*Vawiin khan PHE Minister Pu S. Hiato chuan Tlungvel PHE Sub-Divisional Office a hawng, he offie hawn thar hian Tlungvel leh a chhehvel khua 22 a huam dawn a, SDO pakhat leh J.E. pathum telin, thawktu hi an vaiin 11 awm tura ruahman a ni. -DIPR

*Nikum a Delhi a bus chhung a hmeichhe pawngsual tu mi 4 te chu court in thi turin an chungthu a rel sak ta. He hmeichhe vanduai tak pawh hi a hliam tuar lo in a lo boral tawh a ni.

*BJP Parliamentary Board meeting chuan Gujarat CM ni mek Narendra Modi chu 2014 inthlanpui a Prime Minister candidate atan ah an puang ta.
 
*Party hruaitu zing a inlungrual lohna neuh neuh awm karah vawiin tlai ah hian BJP thuneitu sang Parliamentary Board meeting neih a ni dawn a, hetah hian 2014 inthlanpui a an Prime Minister candidate tur an ngaihtuah dawn a ni.
 
*Vawiin ah Aizawl leh Lunglei ah MSU te huaihawt in 'Zoram Chanchhuah ni' hman a ni dawn. Aizawl ah chuan Chanmari-Tennis court ah kawngzawh an tum.
 
 *11 Sept khan USA Pastor pakhat Terry Jones (61) chu Muslim sakhaw lehkhabu Koran hal a tum avangin Florida, USA ah police in an man. 9/11 a firfiak pawl ten US an beih hriatrengna ni ah Pastor Terry hian public park a hal ral turin Koran lehkhabu 2998 chu khawnvartui a chiah sa in motor in a phur chhuak a, a thil tih tum hi police lamin lo hria in an man ta a ni. 2011 ah khan a rawngbawlna hmun Dove Reach Christian Centre ah pawh Koran hi an lo hal tawh a ni.

*UN Department of Economics and Social Affairs (UN-DESA) in nimin a an tarlan danin India ah hian Bangladesh mi maktaduaih 32 an cheng mek a ni. Khawvel ram thang lai mek (developing countries) te zinga ramdang mi mikhual ngah ber kan ni mek a ni.
 
12.9.2013
*BJP hruaitu hluan LK Advani chuan Prime Minister candidate atan a Gujarat CM Narendra Modi puan rawtna chu a pawm pui thei lo, nimin khan BJP President Rajnath Sigh in LK Advani hi a titi pui a, mahse LK Advani chuan BJP PM candidate puan nan a la hma rih in a hria a ni.

*Russia President Vladimir Putin chuan Syria tualchhung buaina a US sorkar in tharum hmang a beih chuan khawvel a remna leh muanna a khawih buai theih a rin thu a sawi. US leh Russia sorkar mi pawimawh ten Syria chungchang hi an sawi ho dawn a ni.

*Mirethei zawk ten a man tlawm zawk a ei leh in tur an lei theihna tur National Food Security Bill- 2013. chu sorkar in bul a tan theih na turin India President Pranab Mukherjee chuan a pawm pui ta. 
-----------
Facebook ah Lamtluang page https://www.facebook.com/Lamtluang hi i lo like ve dawnnia. 

No comments:

Post a Comment